Read KapsikiDC Zakari 11 Bible Online

Zakari 11 - KapsikiDC bible

Zakari 11

¹Liban, ghwenemte yɛ mɛa degha ta ŋa, teremte yɛ lekelekea ŋa ghwə.

²Gheyɛ vɛ, ŋələvə mə kwa nza ŋkɛ nahe yɛ lekeleke keŋzleŋzlanji, nahe wəfe nyi ndeɗe ndeɗea shɛhɛ kempəmte geva. Cɛana nyi mbe Bashan, ŋələvə mə, kwa nza ŋkɛ nahe ghɛa wəfe ta ŋayɛ nya zhiɓə kempəmte geva.

³Fama mə ŋələvə ta ka ya wəshi, kwa nza ŋkɛ nahe berete ta nci kekiɗinji. Fama mə ghwəghwə ta megelɛshia nivɛrə, kwa nza ŋkɛ nahe ŋkwa nya dzeyi mɛa Zhəwrdɛŋe, gamba ta nci nyi ndeɗe ndeɗe kebezemte geva.

⁴Ma ke Shala Mahwətə ta ɗa sha 'ya: «Nza kande ya timɛti nyi tehene mbeli.

⁵Nda hene yahene hɛ mbeli nyi kepave hɛ, kaɗema hɛ kanewe ghəa nci kaka mene fete. Ma ke mbeli nyi kepamte hɛ sha geze: ‹Hana ke mə sha Mahwətə, newema ɓəmə kaka mcɛlə gi!› Kese mbeli nyi keya hɛ kazhɛ heli yitea hɛ we.

⁶Ma 'ya, 'ya Mahwətə: Kazhɛne 'ya kazhɛ heli yitea mbeli nyi te hɛɗi we. Kateve nda yayata wəndə 'ya mbe dzeve ta nde ghedəkwəa ba'a dzeve ta meghea ŋkɛ. Katebeze hɛɗi ka meghe, ama kambele mbeli 'ya shave mbe dzeve ta nci we.»

⁷Pa 'ya zhɛre ɗa kande ya timɛti nyi veyi ghə nyi ka zhɛre dzeve nyi kaka mbəɗəkwə nyi kampə. Kəliɓə 'ya te geta keya wəshi bake. Pa 'ya hekate nda slə ke kwa ghate «kaGanyɛa mehele», ke kwa bake «kaJikə ta mehele.» Kwa sebe ta ŋkɛ, ntake 'ya kanewe ghweme te timɛti.

⁸Mbe tere kwetɛŋe ne, ka ya wəshi mahekene ŋkamte 'ya. Kwa sebe ta ŋkɛ, wənəakwe 'ya va timɛti. Ghenci le ŋa nci ghə perə ne, wənəakwe hɛ va 'ya.

⁹Tagha gɛ, ma 'ya sha hɛ: «Kazhɛne 'ya kanewe ghweme te gheyɛ we. Ma nyi ketempə ne, mpənji hɛ! Ma nyi keteza ne, zanji hɛ! Ma nyi ketenza teghweme ne, mpeɗe ghəa nci hɛ!»

¹⁰Kwa sebe ta ŋkɛ, laŋe 'ya te geta ta ɗa nya nza sləa ŋkɛ «kaGanyɛa mehele», hwepa'a 'ya ɓelemte kezha nehemte jikə geva nya kwelɛ 'ya le mbeli pɛtɛ.

¹¹Rakatse Jikə geva nehenyɛ vəa ŋkwa shɛ. Pa ka zhɛre dzeve nyi kaka mbəɗəkwə nyi kenakɛ ɗa ɗepete Mahwətə nde geze ghena laka wəsə nya menete 'ya.

¹²Ma 'ya sha hɛ: «Ma kenakɛ yɛ megela ŋkɛ sha gheyɛ ne, ŋkikɛ ɗa mə meleɓe ta ɗa. Ma keɗema nde tsagha ne, va gheyɛ tsewe nde!» Tagha gɛ, pa hɛ ŋkikɛ meleɓe ta ɗa kadəɓərəa mze kwa tɛawetɛa mahekenemsə.

¹³Ma ke Mahwətə sha 'ya: «Fəave nda dəɓərə nyi 'yɛwete nyi 'ya va hɛ ke nde vɛsə mze.» Kəliɓə 'ya te dəɓərə nyi mahekenemsə nyi, tereke 'ya sha hɛ va nde vɛsə mze mbe ghɛa Mahwətə.

¹⁴Kwa sebe ta ŋkɛ, hwepa'a 'ya ɓelemte kwa bake ta geta ta ɗa nya nza sləa ŋkɛ «kaJikə ta mehele», kezha nehemte nza ta ka Zhəwda le ka Israyɛl kala ka mama.

¹⁵Ma ke Mahwətə sha 'ya zhɛkwa: «Nza kala nde ya wəshi nya dewə nda mehele tsetsenya.

¹⁶Kwa nza ŋkɛ ne, kateve kwete nde ya wəshi 'ya te hɛɗia shɛ: katezəzə timɛti nyi kezanji ŋkɛ we, katezele nyi kentamte geva ŋkɛ we, katesa nda ghwɛ ŋkɛ ke nyi shewə we, katezeme nda gwəzə ŋkɛ ke nyi lɛŋe lɛŋe we. Ama timɛti nyi dɛɓedɛa dɛɓedɛa yatezeme ŋkɛ ba'a cɛpe yateseɗe ŋkɛ te hɛ.»

¹⁷Wa nya ndiremi te nde ya wəshi nya kande dewə mehele nya kewəfəyite timɛti gɛ! Tsaslemte dzeve ba'a ntsamte ntsə kwa zeme kafayɛ te! Mtenyɛ dzeve ta ŋkɛ fəyitekeghə ba'a ghwələpənyɛ ntsə kwa zeme ta ŋkɛ!