Read KapsikiDC Zakari 14 Bible Online

Zakari 14 - KapsikiDC bible

Zakari 14

¹Takwa takwa vecia Mahwətə, ka Zhɛrəzalɛm. Katenehe wəshia ŋayɛ kweci hwelefefi kwa ntsə ta ŋayɛ.

²Katetsene kweci pɛtɛa hwelefefi Shala yitea gheyɛ. Katekele Zhɛrəzalɛm hɛ, katefə wəshi nyi dzeyi ki ghɛ hɛ ba'a kateɓelahe hɛ le mi kaberete. Katefə bela ta mbeli nyi mbe mbeli kadzete kwete hɛɗi, ama kateshave mbeli nyi ketene mbe meleme we.

³Kwa sebe ta ŋkɛ, katempa Mahwətə le hwelefefia shɛhɛ. Katempa ŋkɛ kala nya seneve ŋkɛ kamene te vəa mpa.

⁴Ma te vecia shɛ ne, kateslete ŋkɛ pelɛ ghweme ta yɛ bekele nya terasle yitea Zhɛrəzalɛm, laka ŋkwa kesame ta veci yitea meleme. Kateperawe ghweme ta bekele bake mbe ba'a katemene geva zlərə nya wəba se laka ŋkwa kesame ta veci hwa'a laka ŋkwa kepəkwə ta ŋkɛ. Katedzeme kwete bela ta ghweme laka bela kwa gwela ba'a katedzawa kwete dzawa laka bela kwa zeme.

⁵Katehwɛ yɛ dzeyi kwelɛ zlərə nya kemenete geva nya kwelɛ yɛ ghweme, kwa nza ŋkɛ hwa'a mbe Asal tentsehe ŋkɛ. Katehwɛ yɛ kala ka shihɛ ŋayɛ te vəa Oziyas, meghea ka Zhəwda va gaŋkəɗə ta hɛɗi. Tagha gɛ, katese Shala Mahwətə ta ɗa, le ka ghwene nyi kemene nda slene pɛtɛ.

⁶Ma vəa ŋkwa shɛ ne, katezhɛne mbeli kaɗe wəshi nyi kewaŋe ŋkwa we. Katezhɛne ntasle kazhɛ ŋkwa we, katezhɛne yɛmə kazhɛre kakwacakelɛ we.

⁷Kaveci nya ɗepe Mahwətə kwetɛŋenyɛ tenza ŋkɛ, waŋe tenza ŋkwa shanda, katenehe yɛ veci le viɗi mbeli we. Ya hetɛhwɛɗi ne, waŋe tenza ŋkwa.

⁸Ma te vecia shɛ ne, katehwɛ ɗasle shave mbe Zhɛrəzalɛm. Katehwɛ kwete bela ta yɛmə kadzawa ndərə kwa Ghwənəghwə, kadzawa ndərəa Mɛditɛranɛ tehwɛ kwete. Vɛa le ghele tehwɛ ŋkɛ.

⁹Mahwətə nde tenza kameghe te hɛɗi lema. Ma te vecia shɛ ne, deke Mahwətə yategwəɗəŋə mbeli kwa kema ta ŋkɛ, deke te sləa ŋkɛ tesəkwə ghə mbeli.

¹⁰Kaŋwela tezhɛre hɛɗi nya pɛtɛ, se mbe Gɛba nya laka bela kwa gwela ta Zhɛrəzalɛm hwa'a kwa Rimon nya laka bela kwa zeme. Biya ma tenza Zhɛrəzalɛm ke kweci ŋkwa dzeyi yite, katewədəɗə geva meleme se mɛa degha ta Bɛnjamɛn hwa'a te mɛ degha nya te Megwekwe, ŋkwa nya se mɛ degha te vəashi. Kateslə ŋkɛ yitea cɛ keya ŋkwa ta Hananɛyɛl hwa'a te ŋkwa kehetəsə wəsəa meghe.

¹¹Katenza mbeli mbe meleme. Katezhɛne mbeli kaŋzla ŋkɛ we. Gwezlayɛ tenza mbeli mbe.

¹²Wa nyi ndiremi nyi teve Mahwətə te hwelefe nyi kese kaɗa Zhɛrəzalɛm nyi: katedanji slia geva ta nci mbanji hɛ teghweme. Katedanji ntsə kwa ghəa va hɛ ba'a katedanji ghɛni kwa mɛ va hɛ.

¹³Ma te vecia shɛ ne, kateve nda ghazlənə nya wəba Mahwətə ke hɛ. Katempa hɛ kwelɛ ghəa nci, yayata wəndə kateɗa nde ghedəkwəa ŋkɛ.

¹⁴Katempa ka Zhəwda kezha Zhɛrəzalɛm. Katetsenehwe wəshia hwelefefi nyi dzeyi yitea hɛ hɛ: mze kwa tere tere, mze kwa tɛawetɛa ba'a lekwesa kwele kwele.

¹⁵Kateme ndiremi nya wəba te wəshi keseɗa nyi mbe ghedəkwəa ka jaga ta nci: yɛ gədəwə, yɛ gədəwə kwara lɛmə, zlegweməa lɛmə ba'a kwara lɛmə kala ndiremi nya wəba nya kese te mbeli.

¹⁶Ma se mɛa vecia shɛ ne, katese mbeli nyi mba teghweme mbe hwelefe nyi kese kaɗa Zhɛrəzalɛm keva keva kadzembe meleme nya. Mbagha ne, kategwəɗəŋə hɛ kwa kema ta Mahwətə, meghe nya berete ba'a katemene gəsəkəa yɛ ghwəli hɛ.

¹⁷Ma keɗema kwete mbe hwelefe nyi te hɛɗi kase kadzembe Zhɛrəzalɛm kezha hawe va Mahwətə, meghe nya berete ne, kateme va te hɛɗia ŋkɛ we.

¹⁸Ma keɗema dzeme Zhɛrəzalɛm ka Ɛzhipte yitea gəsəkəa yɛ ghwəli ne, kateme ndiremi te hɛ kala kweci hwelefefi nyi ketedzemema yitea gəsəkəa shɛ.

¹⁹Tsetse teme ɗa te ka Ɛzhipte ba'a kweci hwelefefi nyi ketedzemema yitea gəsəkəa shɛ.

²⁰Ma te vecia shɛ ne, pa te gwalɛaŋe nyi kwa welɛa yɛ gədəwə terafe “Kaŋa Mahwətə” mbeli te. Kateve geva yɛ dəghwə nyi mbe ghɛa Mahwətə tekeleke kala kwenə nyi nza mimia wəshi keseɗa kwa kwa kema ta reghwetɛ kedzeghe melɛ.

²¹Pɛtɛ teve geva dəghwə nyi mbe Zhɛrəzalɛm ba'a nyi te hɛɗia Zhəwda tekeleke kaŋa Mahwətə nde berete. Ghenci yatefə mbeli nyi ketese kadzeghe melɛ kezha ta sli. Ma vəa ŋkwa nya tese vecia shɛ ne, katezhɛne ka zhɛre dzeve kanza mbe ghɛa Mahwətə nde berete we.