Read KapsikiDC Zakari 4 Bible Online

Zakari 4 - KapsikiDC bible

Zakari 4

¹Pa nde ghwene nya kegeze ɗa ghena feɗeghete mehele ta ɗa kala nya feɗeghe wəndə mbeli te hɛ.

²Ma ke 'yɛwete va 'ya: «Wa yanewe na wa?» Ma 'ya zhɛnete: «Wəsə kentare yɛ paterela nya pɛtɛ le mze kwa tere tere yanewe 'ya. Ma pelɛ ghəa ŋkɛ ne, wəbəzlia n'yi ya shɛ. Paterela mberefaŋe ya te wəsə kentare paterela shɛ ba'a ghɛnia ghwə mberefaŋe ya te yayata paterela.

³Bekele ya bake vare wəbəzlia n'yia shɛ, təhə te kwa zeme, təhə te kwa gwela.»

⁴Ma 'ya 'yɛwete va nde ghwene nya kegeze ɗa ghena: «Wa yaɗe ŋkɛ kancɛ tse wa nde sleke ɗa?»

⁵Ma ke zhɛnete ɗa: «Keɗepe wəsə nya ncɛ ŋkɛ na wəka?» -- «Ewə», a 'ya shɛ.

⁶Tagha gɛ, ma ke sha 'ya: «Wa nya ghena ta Mahwətə nya kaŋa Zorobabɛl: kenza laka kwele ba'a laka berete we, ama laka sefəa ɗa. 'Ya Mahwətə nde berete nde gezete.

⁷Wa ŋkɛ na wa ghweme nya wəba? Ɓerayɛ təhə geva na kwa kema ta Zorobabɛl. Katelase pelɛa shihə ŋkɛ vəa ŋkwa nya tsa lewela mbeli kala nya: Hana, hana yite!»

⁸Ma ke Mahwətə sha 'ya:

⁹«Zorobabɛl nde ghate shihəa ghɛ nya, gheŋkɛa shɛ nde tekiɗi.» Ma ketemenete geva ŋkɛ ne, kateɗepete yɛ Mahwətə nde berete nde ghweneke ɗa sha gheyɛ.

¹⁰Ma wəndə nya keɓelama hɛa wəshi nyi kemenete geva ɓɛhwɛ ɓɛhwɛ ne, zlama yahi ŋkɛ kazlama kwa nakɛ pelɛ ŋkɛ mbe dzeve ta Zorobabɛl. Ma paterela nyi mberefaŋe nyi ne, ntsə ta Mahwətə nyi kenewe ŋkwa nyi te hɛɗi lema yancɛ hɛ.

¹¹Ma 'ya 'yɛwete ve: «Wa yancɛ bekele nyi bake nyi, təhə laka bela kwa zeme ta wəsə kentare yɛ paterela, təhə laka bela kwa gwela wa?»

¹²Ma 'ya 'yɛwete ve zhɛkwa: «Wa yaɗe dzeve ta bekele nyi bake nyi, nyi hwɛ nya mze kwa tere tere sawa mbe, sawa kwa wəfela nyi bake nyi le mze kwa tere tere kancɛ wa?»

¹³Ma ke zhɛnete: «Keɗepe wəsə nya ncɛ hɛ na wəka?» -- «Ewə Nde sleke ɗa we», a 'ya zhɛnete.

¹⁴Tagha gɛ, ma ke: «Ghenci ya kambeli kenteyi geva tekeleke bake laka n'yi kezha slene ta Nde sleke hɛɗi lema.»