Read KapsikiDC Zakari 5 Bible Online

Zakari 5 - KapsikiDC bible

Zakari 5

¹Ma newe 'ya sha ŋkwa zhɛkwa ne, dəkwə 'ya te palepa kwa peɗe peɗe nya kekapale geva yitea ghweme.

²Ma ke nde ghwene 'yɛwete va 'ya: «Wa yanewe na wa?» Ma 'ya zhɛnete: «Palepa kwa peɗe peɗe nya kekapale geva yitea ghweme yanewe 'ya. Mɛtre meŋe biya ta ŋkɛ ba'a mɛtre mcɛfe bezlea ŋkɛ.»

³Tagha gɛ, ma ke nde ghwene sha 'ya: «Ghena ta bezla ŋkwa nya ketepesle geva te hɛɗi pɛtɛ ya te: ma te kwete bela ta palepa shɛ ne, nahe ŋkɛ kerafete geva kezha teŋkamte geva ka ghərəa kɛfi pɛtɛ te hɛɗi. Ma laka kwete ne, nahe ŋkɛ kerafete geva kezha teŋkamte geva mbeli nyi kezeme fela tseŋwə pɛtɛ perə.

⁴Ma ke Mahwətə nde berete: 'Ya nde ghwene bezla shɛ kadzeki ghɛa ka ghərəa kɛfi ba'a ghɛa yayata wəndə nya kezeme fela tseŋwə te sləa ɗa. Kiagha tenza ŋkɛ kezha za sebe te wəshi pɛtɛ, ya yɛ sheghwə keɗema yɛ pelɛ.»

⁵Pa nde ghwene nya kegeze ɗa ghena hendave ɗa geva, ma ke sha 'ya: «Kafe pa sha ghə shɛ na newakɛ wəsə nya kenca nya pelɛke.»

⁶Ma 'ya 'yɛwete ve: «Wa yaɗe ŋkɛ kancɛ wa?» Ma ke zhɛnete: «Kwaciga nya nza jaɗafa ta hɛɗi pɛtɛ kwa.»

⁷Ma vəa ŋkwa shɛ ne, pa wəsə nya kadalema nya medzəɓə kənəa kwaciga kelemte geva, dəkwə 'ya te male mentishɛ kwa.

⁸Ma ke nde ghwene sha 'ya: «'Yaghwa mehele yancɛ nde.» Kwa sebe ta ŋkɛ, pa tsəkwəyi ŋkɛ kwa kwaciga ba'a zhɛneyi wəsə nya kese mɛ kənə.

⁹Ma kafe 'ya sha ghə ne, dəkwə 'ya te mi bake nyi kele sefə yitea ghweme kase. Kala bidzəa kwaghela bidzəa nci. Pa hɛ kelete kwaciga nyagha kadzeme yitea ghweme.

¹⁰Ma 'ya 'yɛwete va nde ghwene nya kegeze ɗa ghena: «Kalə tema kele kwaciga shɛ hɛ tse wa?»

¹¹Ma ke zhɛnete ɗa: «Kadzeme Mɛzopotami. Pelɛagha ne, kateŋa nda cɛ hɛ. Kateve hɛ te ŋkwa nya ɗema nde katezhɛne kagaŋkəɗə.»