Read KapsikiDC Zakari 9 Bible Online

Zakari 9 - KapsikiDC bible

Zakari 9

¹Meha ghwə ta Shala. Nahe ghena ta Mahwətə kentsehe te hɛɗia Hadrak, nahe ŋkɛ keghereŋenyɛ kwa Damas. Kwa nza ŋkɛ ne, deke te ka Israyɛl ghereŋe ntsə ta Mahwətə we, ama te mbeli pɛtɛ.

²Kageze nda ghena ŋkɛ ke Hamat nya dekwe yitea Damas ba'a ke meleme nyi mbe yɛ Tir le Sidon, nyi nza mehele va hɛ perə.

³Pa ka Tir ŋate zli yitea meleme ta nci. Pa hɛ tsenete mze kwa tɛawetɛa kala hɛɗi ba'a mze kwa tere tere kala rekɛ kwa hweŋkwa.

⁴Ama wa nya Mahwətə katefə hɛ, kateŋzla zlia ŋkɛ ŋkɛ kwa ndərə ba'a katetere melemea shɛ ghwə.

⁵Ma vəa ŋkwa nya tenakɛ geva ŋkɛ, dake tenza meleme ta Askalon, katebare bare Gaza va ghazlənə, tsagha Ɛkron kwa ɗema nde kemane ŋkɛ shɛ. Katezhɛne meghe kanza mbe Gaza ba'a mbeli kanza mbe Askalon we.

⁶Mewelaɗe mewelaɗe tenza mbeli nyi mbe Asdod. Ma ke Shala: «Kateza sebe 'ya te kele ghəa ka Filisti.

⁷Katekelemte sli nya nza mimi mbe ba'a nya dzeghekɛ nda melɛ mbeli le ke kweci shala 'ya same kwa mɛa nci. Ma mbeli nyi ketetene teghweme hwa hɛ ne, kambelia ɗa tenza hɛ kala ka Zhəwda, katedzehwa mbelia ɗa ka Ɛkron kala nya menete ka Zhɛbəs.

⁸Kateve ka ya ŋkwa 'ya dzasle yitea hɛɗia ɗa kezha ya ŋkɛ va ka jaga nyi kedzedzeyi vare, nde ghwərə ghwərəa ntsə shɛ kazhɛne kase kasa nda yaka ke mbelia ɗa we, kwa nza ŋkɛ ma tsetsenya ne, te hɛ ntsə ta ɗa.»

⁹Mte va zlama gɛ, meleme ta Siyon! Tsa gaghwe gɛ, Zhɛrəzalɛm! Wa nya meghea ŋa nya kase sha gha, wəndə nya tiɗiɗi, nya kande hərə ŋkwa ba'a wəndə nya keshifə ghə pelɛ kwara. Pelɛ leve ta kwara dzemenyɛ ŋkɛ.

¹⁰Kateza sebe ŋkɛ te yɛ wəmata gədəwə mbe Ɛfrayim ba'a te yɛ gədəwə mbe Zhɛrəzalɛm. Kateɓeɓele yɛ rəgi kempa ŋkɛ. Kateve kwelɛŋe ŋkɛ hwa hwelefefi. Se mɛa kwete ndərə hwa'a mɛa kwete, se mɛa Efrate hwa'a te mendɛkwe ta hɛɗi tenza meghea ŋkɛ.

¹¹Ma ke Shala: «Tewəmbəreke jikə geva nya menete 'ya le gheyɛ, nya kekeseyi geva laka mimia wəshi nyi dzeghekɛ melɛ mbeli le ne, katepele mbelia ŋayɛ nyi kwa daŋgayɛ 'ya same kwa belageji nya ɗema yɛmə kwa.

¹²Ka mavashi nyi kevate ghə te mbele, zhɛne mə geva kadzembe meleme ta ŋayɛ nya nza zli yite. Ma 'ya sha gheyɛ ɓeshi nya: kateve ŋayɛ wəshi 'ya bake zhigə kala nyi kese va gheyɛ.

¹³Kala rəgi kempa ta ɗa teve Zhəwda 'ya, kala have tenza Ɛfrayim. Siyon, kateghwene mbelia ŋa 'ya kampa le ka Grɛk. Kala kafayɛa katsala sewajɛ tezhɛre hɛ 'ya.»

¹⁴Katenca Mahwətə kənəa mbelia ŋkɛ, kala slesla ta va teslesla have ta ŋkɛ. Katevɛ ghwekwəlekwə Shala Mahwətə, katese ŋkɛ hwa sefəa va nya kesame laka bela kwa zeme.

¹⁵Kateya mbelia ŋkɛ Mahwətə nde berete, katempə ba'a katehə pelɛa kwa beza pelɛ hɛ. Katesheke mimia ka jaga ta nci hɛ kala tɛ, kala mimia wəshi kedzeghe melɛ nya pɛre te kwenə ba'a kala mimi nya keshekeyi geva te tereme nyi te reghwetɛ.

¹⁶Ma te vecia shɛ ne, Shala Mahwətə ta nci nde tembele hɛ kala nya mbele timɛtia ŋkɛ nde ya wəshi. Kateslesla hɛ dzeyi te hɛɗia ŋkɛ kala pelɛ nyi nza zləvə te hɛ te derə meghe.

¹⁷Wa nya zlama va hɛ gɛ! Wa nya ganji va hɛ gɛ! Kateve nda berete ha ke ka mempɛhwetɛti ba'a kateve nda berete tɛ mɛnɛfɛ ke deghelɛshi.