Read KapsikiDC Matiye 17 Bible Online

Matiye 17 - KapsikiDC bible

Matiye 17

¹Ŋkwaŋe hɛ kwetere wəmbəa ŋkɛ ne, pa Yɛsə hekakɛ Piyɛre, Zhake ba'a Zhaŋe wəza meghekɛa Zhake ba'a keleghe hɛ kadzeme ghweme nya biya, deke ghenci kaghəa nci.

²Pa Yɛsə zhɛrete pa tagha kwa ntsə ta nci, kaɓele ŋkwa nya kwa kema ta ŋkɛ kala veci, tɛawetɛa ma lekwesa ta ŋkɛ ke waŋe ta ŋkwa.

³Pa mbeli nyi ketəkwə təkwə nyi mahekene nyighɛ nakɛ yɛ Moyize le Ɛli kageze ghena le Yɛsə.

⁴Ma ke Piyɛre sha Yɛsə: «Nde sleke ŋkwa, ndeɗekə nza ta ɓəmə teke. Keɗe na ne, 'ya katemɓe cɛ lekwesa mahekene teke, təhə kaŋa ŋa, təhə kaŋa Moyize, təhə kaŋa Ɛli.»

⁵Ma mba ŋkɛ kageze ghena ne, pɛkwe kwete ləmbə nya waŋe zhiɓəaghe geva kənəa hɛ. Shave mbe ləmbəa shɛ ne, ma ke hɛ fate kwete ghena: «Nya ya kaWəzege ta ɗa nya ɗe 'ya, kazlama 'ya te kwele kwele. Fa nda mə ghena.»

⁶Ma kwa fate ghena shɛ mbeli nyi ketəkwə təkwə Yɛsə ne, ntake hɛ kaŋa ghə kadzembe hɛɗi va ghazlənə.

⁷Pa Yɛsə se sha hɛ, pa kwaɗakɛ hɛ, ma ke sha hɛ: «Sate mə, ghazlənəma yɛ ma.»

⁸Kafe hɛ sha ghə ne, deke Yɛsə yanakɛ hɛ kwetɛŋenyɛ.

⁹Ma vəa ŋkwa nya sawa hɛ pelɛ ghweme, ma ke Yɛsə gezave nda ke hɛ: «Mba yɛ kegeze nda wəsə nya nakɛ nya yɛ ke kwete wəndə, hwa'a te və nya tesame Wəzege ta za kwa kwele le mpi.»

¹⁰Ma ke mbeli nyi ketəkwə təkwə 'yɛwete va Yɛsə: «Va wa nda geze ka rafe wəsə mahalegə nda Ɛli kase kaba wa?»

¹¹Ma ke sha hɛ: «Kaganda ne, katese Ɛli ba'a katehi pɛtɛa wəshi ŋkɛ.

¹²Ma 'ya le ŋa ɗa ne, ma 'ya sha gheyɛ: Nahe Ɛli kese, kese mbeli kaɓela ŋkɛ we, ama nahe hɛ kemenete nda kala nya ɗe hɛ. Tsagha shɛ tesa nda titikwə hɛ ke Wəzege ta za.»

¹³Ma kwa gezete ghena nya Yɛsə ne, nahe mbeli nyi ketəkwə təkwə keɗepe Zhaŋe Batiste yageze ŋkɛ.

¹⁴Kwa se hɛ takwa takwa yitea mbeli ne, pa kwete wəndə hendave nda geva ke Yɛsə ba'a gwəɗəŋənyɛ te kema ta ŋkɛ.

¹⁵Ma ke: «Nde sleke ŋkwa, zhɛ heli yitea wəzege ta ɗa. Nahe ŋkɛ kenza kawəndə nya sla wəsə yitea ghə ba'a kwele kwele sa yaka ŋkɛ. Mbe kwete və ne, kateɗe ŋkɛ mɛa ghwə keɗema hwa yɛmə.

¹⁶Nahe 'ya kekeleke nda ŋkɛ ke ka təkwə təkwə ŋa, shaŋe hɛ kambe ŋkɛ.»

¹⁷Ma ke Yɛsə gezete le berete: «Ka ndiremia mehele ba'a ka yɛma ghena, pa te nyama və tenza 'ya le gheyɛ wa? Hwa'a te nyama və tesəwə ŋayɛ 'ya wa? Keleke ɗa mə wəzegea shɛ teke.»

¹⁸Ntake Yɛsə kageze nda ghena ke 'yi'yɛghwə le berete, pa 'yi'yɛghwə shavenyɛ mbe wəzegea shɛ. Pələsə ŋkɛ te ŋkwa shɛnyɛ.

¹⁹Pa mbeli nyi ketəkwə təkwə hendave nda geva ke Yɛsə, ma ke hɛ shɛ: «Va wa ndɛare ghen'yɛ kaŋka 'yi'yɛghwə nya tse wa?»

²⁰Ma ke Yɛsə zhɛnete nda ke hɛ: «Va nya nza ŋkɛ dewə yɛ ta ŋayɛ. Kaganda ne, ma 'ya sha gheyɛ: ma kenza yɛ va gheyɛ ɓɛhwɛ kala ghəa zhiwə ne, wərə yɛ kageze: Slə ŋa teke kajive pelɛke, pe yɛ sha ghweme nya, katejive ŋkɛ. Wəsə shɛ katepeslema yɛ yite we.

²¹Ama deke laka səkwə ghə ba'a səwəmayɛ nza mbeli kaŋkamte felehwe ta 'yi'yɛghwəa shɛ.»

²²Te kwete hɛ, pa pɛtɛa mbeli nyi ketəkwə təkwə Yɛsə tsenete geva kwa Galilɛ. Ma ke Yɛsə sha hɛ: «Katepamte nda Wəzege ta za mbeli ke kweci mbeli,

²³katepesle ŋkɛ hɛ, ama te kwa maheke ta hɛ ne, katesame ŋkɛ kwa kwele le mpi.» Kwele kwele heɗete kema mbeli nyi ketəkwə təkwə va ghena shɛ.

²⁴Ma kwa dzawa Kapɛrnawəm Yɛsə le mbeli nyi ketəkwə təkwə, pa mbeli nyi ketsehe cɛdɛa ghɛa Shala se sha Piyɛre, ma ke hɛ shɛ: «Kaŋki jaɓeregwale nde sleke ŋayɛ te ghɛa Shala wəka?»

²⁵Ma ke Piyɛre: «E'e, kaŋki ŋkɛ.» Ma kwa dzeki ghɛ Piyɛre ne, pa Yɛsə kelete ghena kakwa ghate, ma ke: «Tsema zəzə na wa, Simon. Wa nde hi kaŋki katsehe jaɓeregwale ke ka meghea kɛfi nyi te hɛɗi wa? Mbeli nyi te hɛɗia nci na, na ka se se na?»

²⁶Ma ke Piyɛre shɛ: «Ka se se.» Ma ke Yɛsə shɛ: «Nda tsagha ŋkɛ, kaŋki mbeli nyi te hɛɗi we.

²⁷Ama kaɗe mə kabeze wənəa mbeli nyi ketsehe jaɓeregwalea shɛhɛ we. Ma tsagha, kwiɗi kadzawa hələ, negheyi dzara kwa yɛmə. Ma kelepe nya keseve na kaghate ne, ghwenemte mɛa ŋkɛ, katesləyi cɛdɛ na kwa. Kelete cɛdɛa shɛ shɛ na ŋkikɛ nda jaɓeregwalea ɓəmə. Wərə ŋkɛ kaŋa ɗa ba'a kaŋa ŋa.»