Read KapsikiDC Matiye 19 Bible Online

Matiye 19 - KapsikiDC bible

Matiye 19

¹Ma kwa kiɗimte ghena shɛhɛ Yɛsə ne, cape ŋkɛ shave mbe Galilɛ kalə kadzete hɛɗia Zhəwdɛ nya pelɛ kema ta hələa Zhəwrdɛŋe.

²Kwele kwele mbeli nyi kezelete ŋkɛ. Pa ŋkɛ mbete mbeli va zereghwe ta nci.

³Pa kweci ka Fariziyɛn hendave nda geva kezha ŋa nda keleŋa. Ma ke hɛ 'yɛwete ve: «Take ne, nahe wəsə mahalegəa ɓəmə kendeke nda hweŋkwa keŋka male ta ŋkɛ ke wəndə te yayata ghena na?»

⁴Ma ke Yɛsə sha hɛ: «Kegha yɛ kajaŋgate mbe Ghena ta Shala wəka? Kaghate ne, nahe Nde pa ŋkwa kepate wəndə ŋelɛ, za le male pate hɛ ŋkɛ.

⁵Ma ke Shala zhɛkwa: Vatse nza za kasərəakɛ yitenyɛ ba'a meghekɛ kandeɓe geva te male ta ŋkɛ, yitea nza hɛ kageva nya kwetɛŋe.

⁶Tsagha ne, kezhɛne hɛ kanza bake we, ama geva kwetɛŋe hɛ. Mba wəndə kenehe wəsə nya jikəte Shala.»

⁷Ma ke ka Fariziyɛn 'yɛwete ve: «Nda tsagha nde ne, va wa gezete Moyize kezha ve nda palepa ta nehe wəndə ke male ta ŋkɛ keɗe ŋkɛ kaŋka ŋkɛ wa?»

⁸Ma ke Yɛsə sha hɛ: «Ma nda se Moyize kandeke ŋayɛ hweŋkwa kemene kala nya ne, va nya nza wənəa ŋayɛ ntɛaŋe ntɛaŋe. Ama kenza ŋkɛ tsagha kaghate we.

⁹Kaganda ne, ma 'ya sha gheyɛ: yayata wəndə nya keŋkamte male ta ŋkɛ kaɗema tewəmbəreke wəsə nya kehitema geva laka wəsə mahalegə, nda wəmeve kwete male ŋkɛ ne, vale tahe yamenete ŋkɛ.»

¹⁰Ma ke mbeli nyi ketəkwə təkwə sha Yɛsə: «Ma kenza ŋkɛ tsetse nza ta za laka male ta ŋkɛ ne, megela ma ɗema wəndə wəme male tsagha.»

¹¹Ma ke Yɛsə sha hɛ: «Berete va yayata wəndə kayɛ ghena nya we, ama deke mbeli nyi ndeke nda berete Shala ke hɛ.

¹²Keghə keghə wəshi nyi kefɛa zhili kewəme mi, ma kweci mbeli ne, tsagha yake geva hɛ sawa kwa hwə, mbeli ka tsewemte kweci, kezha Meghe nya pelɛ ghweme ɗema wəme mi kweci. Fave ghena nya wəndə nya kenza kafave.»

¹³Pa kweci mbeli fəke nda ŋwale ke Yɛsə kezha dape dzeve ŋkɛ kwa ghəa nci ba'a kezha səkwə ghə ŋkɛ kezha hɛ. Pa mbeli nyi ketəkwə təkwə Yɛsə ɗe kafɛa hɛ.

¹⁴Ma ke Yɛsə: «Pelakɛ mə ŋwale kase sha 'ya, fɛama hɛ yɛ ma, kwa nza ŋkɛ kezha mbeli nyi nza mehele ta nci kala ŋa ŋwale veyi geva Meghe nya pelɛ ghweme.»

¹⁵Ma kwa dapaghe dzeve ŋkɛ kənəa hɛ ne, ntəŋə ŋkɛ slənyɛ te ŋkwa shɛ.

¹⁶Pa kwete wəndə se sha Yɛsə, ma ke 'yɛwete: «Wa wəsə ganyɛ nya nza 'ya kamenete kezha kemave mpi nya kaghala ghala tse wa Nde sleke ɗa?»

¹⁷Ma ke Yɛsə shɛ: «Wa raberə 'yɛwe ghena na va 'ya te ghəa wəsə ganyɛ wa? Wəndə kwetɛŋe ya ganyɛ. Keɗe na kakema mpi nya kaghala ghala ne, hawe va wəshi nyi gezeke Shala.»

¹⁸Ma ke sha Yɛsə: «Nyima wa?» Ma ke Yɛsə zhɛnete nda: «Peslema wəndə na ma, valema na tahe ma, ghərəma na ma, sla nda ma tseŋwə ke wəndə ma,

¹⁹hawe va yiteyɛ ŋa ba'a meyɛ ŋa, ɗe nde ghedəkwəa ŋa kala ghəa ŋa.»

²⁰Ma ke mempɛhweta shɛ: «Nahe 'ya keyate pɛtɛa wəshi nyi. Wa nde tene kamene 'ya zhɛkwa wa?»

²¹Ma ke Yɛsə shɛ: «Ma keɗe na kanza kawəndə ganyɛ tsape ne, kwiɗi pamte pɛtɛa wəshia ŋa, ndeke nda cɛdɛ nya kese te hɛ ke ka titikwəa kɛfi, tsagha ne, kwele kwele tekemave mcɛlə na pelɛ ghweme. Ma kwa sebe ta ŋkɛ, se ba'a təkwə təkwəte ɗa.»

²²Ma kwa fate ghena nyagha mempɛhweta shɛ, cape ŋkɛ le kema teheɗe, va nya nza ŋkɛ kande mcɛlə.

²³Ma ke Yɛsə sha mbeli nyi ketəkwə təkwə: «Dzawe ŋkɛ kaŋa ka mcɛləa kɛfi kadzembe Meghe nya pelɛ ghweme.

²⁴Kaganda ne, ma 'ya sha gheyɛ ɓiyitsa: dzawe ŋkɛ nda nza zlegwemə kajive mbe wəfela ta zhɛliɓə, ama dzawe ma ŋkɛ sha nde mcɛlə kadzembe Meghea Shala ɓiyitsa.»

²⁵Ma kwa fave ghena shɛ mbeli nyi ketəkwə təkwə Yɛsə ne, hehake hɛ, ma ke hɛ: «Ama wa nde tenza kambele tsagha wa?»

²⁶Pa Yɛsə newakɛ hɛ, ma ke: «Wəsə nya dzawe ŋkɛ sha wəndə ŋelɛ, ama kenza sha Shala we, kwa nza ŋkɛ ne, pɛtɛa wəshi dekwede sha Shala.»

²⁷Ma ke Piyɛre shɛ: «Fa gi, nahe ghen'yɛ kesərəakɛ pɛtɛa wəshia n'yɛ kezha təkwə təkwə ŋa. Tsema tenza ŋkɛ kaŋa n'yɛ wa?»

²⁸Ma ke Yɛsə sha hɛ: «Kaganda ne, ma 'ya sha gheyɛ: ma vəa ŋkwa nya tentishɛ Wəzege ta za pelɛ pasla nya nza zləvə te ne, katentishɛ gheyɛ nyi meŋe bakeghəmbe nyi kese katəkwə təkwəte ɗa pelɛ yɛ pasla kezha meha ghwə te ka yitehɛa Israyɛl nyi meŋe bakeghəmbe.

²⁹Ma pɛtɛa mbeli nyi kesərəakɛ ghɛa nci, ka kesaka megheyɛa nci, ŋwalea kwɛa megheyɛa nci, yite nci, megheyɛa nci, ŋwalea nci, yɛ wəvea nci tewəmbəreke 'ya ne, katekemave kweci hɛ gwəmsə zhigə ba'a kateŋ'we mpi nya kaghala ghala hɛ.

³⁰Ama kwele kwele mbeli nyi kaka ghate tsetsenya nyi ketenza kaka keɗaŋe ba'a kwele kwele mbeli nyi kaka keɗaŋe tsetsenya nyi ketenza kaka ghate.»