Read KapsikiDC Matiye 25 Bible Online

Matiye 25 - KapsikiDC bible

Matiye 25

¹Yipə yipə tenza Meghe nya pelɛ ghweme le deghelɛshi meŋe nyi kekelete paterela kalə kabegeme le za makwa.

²Kweci mcɛfe ne, kaka ɓaŋara hɛ, kweci mcɛfe ne, kentsehwele ntsehwele hɛ.

³Pa ka ɓaŋara nyi hwa hɛ kelete paterela ta nci, ama kese hɛ kakele kwalaba ta n'yi we.

⁴Pa ka ntsehwele ntsehwele shɛhɛ kelete paterela ba'a n'yi kwa kwalaba yitea dzeve ta nci.

⁵Ma kwa dera za makwa kaɗema kese kahe kahe ne, pɛtɛ hɛ dzetenji te hɛ.

⁶Ma te tepe ta viɗi ne, ma ke mbeli zlapete: Nahe za makwa kese. Sate mə kakemane ŋkɛ.

⁷Feɗeghakwe deghelɛshi shɛhɛ, ntake hɛ kahi paterela ta nci.

⁸Ma ke ka ɓaŋara kɛfi nyighɛ sha ka ntsehwele ntsehwele: Gəave n'yɛ mə n'yia ŋayɛ ɓɛhwɛ kadzawa paterela ta n'yɛ nza ŋkɛ kamte gi!

⁹Ma ke ka ntsehwele ntsehwele sha hɛ: Ewə, dewə kezha neheve gheɓəmə le gheyɛ. Kwiɗi mə kalə kapa ŋa ŋayɛ.

¹⁰Cape ka ɓaŋara kalə kapa n'yi. Ma kalənji hɛ ne, pɛkwe za makwa. Ma nyi mcɛfe nyi kehite geva ne, shilimə hɛ ki ghɛ yitea veghe, jaslɛ mbeli ŋzlete degha le lakelɛ.

¹¹Temə ɓɛhwɛ ne, pɛkwe kweci deghelɛshi nyi mcɛfe. Ma ke hɛ: Nde sleke ŋkwa, Nde sleke ŋkwa, pelemte n'yɛ mə ŋkwa gi!

¹²Ma ke za makwa sha hɛ: Kaganda ne, ma 'ya sha gheyɛ: keɗepe ŋayɛ 'ya we.

¹³Ma ke Yɛsə mtsehete: Ntsehwele mə, kwa nza ŋkɛ keɗepe vecia shɛ keɗema vəa shɛ yɛ we.

¹⁴Katenza ŋkɛ kala wəndə nya kedzehwa mte. Pa ŋkɛ hekakɛ ka mavashia ŋkɛ ba'a dapate nda wəshia ŋkɛ te dzeve ke hɛ.

¹⁵Mcɛfe sha miliyeŋə va kwete, bake va kwete, təhə va nde maheke. Keberete keberete neheve nda ŋkɛ ke hɛ. Pa ŋkɛ lənyɛ yitea dzeghwa.

¹⁶Ma wəndə nya ndeke nda miliyeŋə mcɛfe mbeli ne, taghanyɛ lə ŋkɛ kafəlite fəli le, pa kemave meleɓe miliyeŋə mcɛfe kala ghəa cɛdɛa ŋkɛ.

¹⁷Ma wəndə nya ndeke nda miliyeŋə bake mbeli ne, pa ŋkɛ menete kala nde ghate. Pa ŋkɛ kemave meleɓe kamiliyeŋə bake.

¹⁸Ma wəndə nya ndeke nda miliyeŋə mbeli kwetɛŋe, pa late ki, pa wəfərəakɛ cɛdɛa nde sleke ŋkɛ kwa.

¹⁹Kwetere wəmbəa temə kwele kwele ne, hwa'a nde sleke ka mene slenea shɛhɛ se. Pa ŋkɛ 'yɛwete wəsə nya menete hɛ le cɛdɛa ŋkɛ va hɛ.

²⁰Ma wəndə nya ndeke nda miliyeŋə mcɛfe mbeli ne, pa hendave nda geva ke nde sleke ŋkɛ. Ma ke shɛ: Nde sleke ɗa, miliyeŋə mcɛfe ndeke ɗa na. Wa nyi kweci nyi mcɛfe nyi kemave 'ya kameleɓe.

²¹Ma ke nde sleke ŋkɛ shɛ: Yewə, wəndə nya ganyɛa mehele na, mava nya dɛŋe dɛŋe te slene ta ŋkɛ na, ma va nya nza na dɛŋe dɛŋe te mene wəshi nyi ɓɛhwɛ ɓɛhwɛ ne, kateve ŋa 'ya kawəndə nya wəba te ghəa wəshi nyi kwele kwele, nde kazlama mə.

²²Ma wəndə nya ndeke nda miliyeŋə mbeli bake ne, pa hendeke nda geva ke maze zhɛkwa. Ma ke shɛ: Nde sleke ɗa, miliyeŋə bake ndeke ɗa na. Wa nyi kweci nyi bake nyi kemave 'ya kameleɓe.

²³Ma ke nde sleke ŋkɛ shɛ: Yewə, wəndə nya ganyɛa mehele na, mava nya dɛŋe dɛŋe te slene ta ŋkɛ na, ma va nya nza na dɛŋe dɛŋe te mene wəshi nyi ɓɛhwɛ ɓɛhwɛ ne, kateve ŋa 'ya kawəndə nya wəba te ghəa wəshi nyi kwele kwele, nde kazlama mə.

²⁴Kakwa keɗaŋe ne, pɛkwe wəndə nya kekelete miliyeŋə kwetɛŋe. Ma ke: Nde sleke ɗa, nahe 'ya keɗepe dzawe na, katsa ha ta wəndə na kadzawa tame ta ŋa ya gha tsawetema ha. Katsene wəshi na te ŋkwa nya wəzatema na.

²⁵Pa ghazlənə zhɛte ɗa. Pa 'ya late ki, pa 'ya wəfərəakɛ cɛdɛa ŋa kwa. Wa nya wəsəa ŋa nya.

²⁶Ma ke nde sleke ŋkɛ shɛ: Mava nya kande mefətekwə ba'a nya kande meɗə na. Nahe na keɗepe katsa ha 'ya te ŋkwa nya wəzatema 'ya ba'a katsene wəshi 'ya te ŋkwa nya wəzatema 'ya.

²⁷Wa raberə ɗema na keveyi ɗa cɛdɛa ɗa kakane wa? Nza kese 'ya ne, kakele cɛdɛa ɗa 'ya le meleɓe.

²⁸Kelehwe mə cɛdɛa shɛ ve, ndeke nda mə ŋkɛ ke wəndə nya nza miliyeŋə meŋe ve.

²⁹Kwa nza nde ma wəndə nya nza wəsə ve, mbake yambake nda mbeli yitea nza ŋkɛ kwele kwele ve. Ma wəndə nya ɗema wəsə ve ne, kele yakele nya ve mbeli ya kwela nza ŋkɛ ɓɛhwɛ.

³⁰Ma mava nya kameɗə nya ne, negheyi mə ŋkɛ pelɛ hwa ŋkwesle. Tagha ne, katenehwene ba'a katenca slene ŋkɛ.

³¹Ma vəa ŋkwa nya tesawa Wəzege ta za mbe zləvəa ŋkɛ le ka ghwene ta Shala ne, katentishɛ ŋkɛ pelɛ pasla ta ŋkɛ nya nza zləvə te.

³²Katetsene geva pɛtɛa hwelefefia mbeli kwa kema ta ŋkɛ nda tetsewele mbeli ŋkɛ kala nya tsewele yɛ kwi le timɛti nde ya wəshi.

³³Te kwa zeme ta ŋkɛ tenza timɛti, te kwa gwela ta ŋkɛ tenza kwi.

³⁴Ma ke meghe sha tegeze nda ke mbeli nyi te kwa zeme ta ŋkɛ: Nde mə, gheyɛ mbeli nyi wəpikɛ Yiteyɛ ɗa, dzembe mə Meghe nya hite ŋayɛ ŋkɛ vəashi ghala pate geva hɛɗi.

³⁵Kwa nza ŋkɛ shewə se 'ya va ma, nahe yɛ keɗave ɗa wəsə kezeme, shewə se 'ya va ndere, nahe yɛ kesame ɗa yɛmə, kande se se se 'ya, pa yɛ kemaneve ɗa ki ghɛa ŋayɛ.

³⁶Wəsə shɛ kese kənəa geva va 'ya we, nahe yɛ keseɗaghe ɗa lekwesa, shewə se 'ya, nahe yɛ kese kənəa 'ya yɛ shanda, kwa daŋgayɛ se 'ya, nahe yɛ kese kanewe ɗa.

³⁷Ma ke mbeli nyi tiɗiɗi shɛhɛ sha tezhɛne nda: Nde sleke ŋkwa, hweŋkwa nakɛ ŋa ghen'yɛ shewə va ma nda ndeke ŋa wəsə kezeme ghen'yɛ wa? Shewə va ndere nda same ŋa yɛmə ghen'yɛ wa?

³⁸Hweŋkwa nakɛ ŋa ghen'yɛ kande se se nda kemaneve ŋa ghen'yɛ ki ghɛa n'yɛ, kaɗema wəsə kənəa geva va gha nda seɗaghe ŋa lekwesa ghen'yɛ wa?

³⁹Hweŋkwa nakɛ ŋa ghen'yɛ shewə ba'a kwa daŋgayɛ nda se ghen'yɛ kanewe ŋa wa?

⁴⁰Ma ke meghe sha tezhɛne nda ke hɛ: Kaganda ne, ma 'ya sha gheyɛ: yayata wəsə nya menete nda yɛ ke kwete kwetɛŋe hwa ka dewə ŋeli ma nyi kaka kesaka meyɛ ɗa ne, ke 'ya menete ɗa ŋkɛ yɛ.

⁴¹Ma ke meghe sha tegeze nda ke nyi te kwa gwela ta ŋkɛ: Slə mə teke vare 'ya, gheyɛ ka bezla bezla. Kwiɗi mə kadzembe ghwə nya kaghala ghala nya hite Shala kezha gətəli ba'a ka ghwene ta ŋkɛ.

⁴²Kwa nza ŋkɛ shewə se 'ya va ma, keɗave ɗa wəsə kezeme yɛ we, shewə se 'ya va ndere, kesame ɗa yɛmə yɛ we.

⁴³Ma kwa se 'ya kande se se ne, kese yɛ kakemane ɗa ki ghɛa ŋayɛ we. Wəsə shɛ kese kənəa geva va 'ya we, keseɗaghe ɗa lekwesa yɛ we. Ma kwa nza 'ya shewə ba'a kwa daŋgayɛ, kese yɛ kanewe ɗa we.

⁴⁴Ma ke hɛ sha tezhɛne nda: Nde sleke ŋkwa, hweŋkwa nakɛ ŋa ghen'yɛ shewə va ma, ndere, kande se se, kaɗema wəsə kənəa gha, shewə va zereghwe ba'a kwa daŋgayɛ na, nda ɗema ghen'yɛ kakemane ŋa wa?

⁴⁵Ma ke meghe sha tezhɛne nda ke hɛ: Kaganda ne, ma 'ya sha gheyɛ: kwa ɗema yɛ kemenete nda ke kwete kwetɛŋe hwa ka dewə ŋeli ma shɛhɛ ne, ke 'ya sema yɛ kamene nda.

⁴⁶Kateŋka hɛ mbeli kadzembe yaka kaghala ghala, ama mbeli nyi tiɗiɗi ne, mbe mpi nya kaghala ghala tenza hɛ.»