Read KapsikiDC Matiye 26 Bible Online

Matiye 26 - KapsikiDC bible

Matiye 26

¹Ma kwa kiɗimte geze ghena nyi Yɛsə ne, ma ke sha mbeli nyi ketəkwə təkwə:

²«Nahe yɛ keɗepe, tene hɛ bake nda tese gəsəkəa Pake, katekese Wəzege ta za mbeli katebaŋe ŋkɛ hɛ te sheghwə kwa zleŋkwa vəa ŋkwa shɛ.»

³Pa mbeli nyi te ghəa ka dzeghe Shala ba'a mbelia jama ta ka Zhəwif tsenete geva ki ghɛa Kayife, wəndə kwelea ka dzeghe Shala.

⁴Pa hɛ yipəte ghena ta nci kezha kese Yɛsə tewəfərə ba'a kezha pesle ŋkɛ.

⁵Ma ke hɛ gezete: «Kesema ŋkɛ gheɓəmə hwa gəsəkə yagha ghena kamenete geva hwa mbeli ma.»

⁶Ma kwa nza Yɛsə ki ghɛa Simon, nde derena kwa Bɛtani ne,

⁷pa kwete male hendave nda geva ke Yɛsə le kwete tereme nya nza 'wərdə viɗi te, jakeja pa ta 'wərdəa shɛ. Pa nde shekaghe ŋkɛ kənəa ghəa Yɛsə vəa ŋkwa nya zeme ɗafa ŋkɛ.

⁸Ma kwa nakɛ wəsəa shɛ mbeli nyi ketəkwə təkwə Yɛsə ne, pa hɛ hwepete wənə, ma ke hɛ: «Yitea wa beze 'wərdə nya male nya wa?

⁹Ndagwara ma kepamte 'wərdəa shɛ mbeli ne, kwele kwele tese cɛdɛ te kezha ve nda ke ka titikwəa kɛfi.»

¹⁰Nahe Yɛsə kefate ghena nya gezete hɛ. Ma ke sha hɛ: «Yitea wa sa nda yaka yɛ ke male nya wa? Ma wəsə nya menete ɗa nya nde ne, megela ŋkɛ.

¹¹Kwa nza ŋkɛ teke ka titikwəa kɛfi keveci keveci hwa gheyɛ, ama 'ya ne, teke tenza 'ya keveci keveci hwa gheyɛ we.

¹²Ma 'wərdə nya shekaghe ɗa nya male nya ne, nahe nde kehimte geva ta ɗa le 'wərdə kezha ve kwa kwele.

¹³Kaganda ne, ma 'ya sha gheyɛ: ya tema tema geze Ghena kwatenca nya ganyɛ mbeli te hɛɗi lema ne, kategeze wəsə nya menete nya male nya mbeli, katezəzə malea shɛ mbeli.»

¹⁴Yewə, pa Zhəwdas Iskariyote, kwete wəndəa mbeli nyi meŋe bakeghəmbe lə sha mbeli nyi te ghəa ka dzeghe Shala.

¹⁵Ma ke sha hɛ: «Wa yateve ɗa yɛ kencɛte ŋayɛ ntsehwele nya nza yɛ kakeseve Yɛsə le 'ya wa?» Ma ke hɛ shɛ: «Slibə mahekenemsə yateve ŋa n'yɛ.»

¹⁶Ghala se mɛa vecia shɛ ne, ntake Zhəwdas kazele və ganyɛ kezha kese Yɛsə ke hɛ.

¹⁷Te kwa ghate ta vecia gəsəkəa ɗafa kwalekwala, ma ke mbeli nyi ketəkwə təkwə sha Yɛsə: «Tema ɗe na kalə ghen'yɛ kahi ŋa wəsə kezemea gəsəkəa Pake wa?»

¹⁸Ma ke Yɛsə sha hɛ: «Kwiɗi mə kalə kadzembe meleme sha kwete wəndə. Ma ke Nde sleke n'yɛ pe yɛ shɛ: Nahe vəa ɗa kedzeghete geva, ki ghɛa ŋa ɗe 'ya kazeme gəsəkəa Pake le mbelia ɗa.»

¹⁹Pa mbeli nyi ketəkwə təkwə Yɛsə menete wəsə nya gezete nda ŋkɛ ke hɛ, pa hɛ hite ŋkwa kezha zeme gəsəkəa Pake.

²⁰Ma hetɛhwɛɗi ne, ntishɛ yɛ Yɛsə kənəa ɗafa le mbeli nyi ketəkwə təkwə meŋe bakeghəmbe.

²¹Ma kwa zeme ɗafa hɛ, ma ke Yɛsə: «Kaganda ne, ma 'ya sha gheyɛ: kwete wəndə hwa gheyɛ katepamte ɗa.»

²²Nahe kema kenza teheɗe va mbeli nyi ketəkwə təkwə. Ma ke hɛ 'yɛwete kwete kwete ve: «'Ya ŋkɛ perə na Nde sleke ŋkwa?»

²³Ma ke Yɛsə: «Wəndə nya kemze nɗeli nya le 'ya kwa helape nde tepamte ɗa.»

²⁴Wa nya Wəzege ta za katemte kala nya gezete Ghena ta Shala te ghəa ŋkɛ. Ama wa nya yaka te wəndə nya ketepamte Wəzege ta za gɛ! Megela ma yakema geva wəndəa shɛ.

²⁵Ma ke Zhəwdas, wəndə nya kepamte ŋkɛ: «'Ya ŋkɛ perə na Nde sleke ɗa?» Ma ke Yɛsə shɛ: «Gha nde gezete.»

²⁶Ma vəa ŋkwa nya zeme wəsə kezeme hɛ ne, pa Yɛsə kelete ɗafa. Kwa sebe ta nya tsate nda ŋ'wese ŋkɛ ke Shala ne, pa neheve ŋkɛ mbe, pa ŋkɛ ndeke nda ke mbeli nyi ketəkwə təkwə. Ma ke sha hɛ: «Kele mə ba'a zeme mə ɗafa nya, gheŋkɛ ya kageva ta ɗa.»

²⁷Pa ŋkɛ kelete zlerekwea tɛ, kwa sebe ta nya tsate nda ŋ'wese ŋkɛ ke Shala ne, pa ŋkɛ ndeke nda ke hɛ. Ma ke: «Sa mə pɛtɛa ŋayɛ.

²⁸Kwa nza ŋkɛ ne, gheŋkɛ ya kamimia ɗa, mimia jikə geva le Shala, nya kesheke kezha mbeli kwele kwele, kezha kele yɛ jaɗafa seyi te wənə.

²⁹Ma 'ya sha gheyɛ: Se mɛa ɓeshi ne, katezhɛne 'ya kasa tɛ tɛape hwa'a te veci nya tesa tɛ mɛnɛfɛ 'ya le gheyɛ mbe Meghea Yiteyɛ ɗa we.»

³⁰Pa hɛ ghate ciməa gəsəkə kwa sebe ta ŋkɛ, cape hɛ kadzeme ghweme ta Bekele.

³¹Ma ke Yɛsə sha mbeli nyi ketəkwə təkwə: «Ma te viɗi nya ɓeshi nya ne, pɛtɛ tewəfəyite ɗa yɛ, kwa nza ŋkɛ ma ke rafete geva mbe Ghena ta Shala: Katepesle nde ya wəshi 'ya, kwetɛ kwetɛŋe tenza timɛti.

³²Ama vəa ŋkwa nya tesame 'ya kwa kwele le mpi ne, mpelɛa tedzawa Galilɛ 'ya ke gheyɛ.»

³³Ma ke Piyɛre shɛ: «Ya kweci mbeli wəfəyite ŋa ne, katewəfə 'ya ŋa tɛape we.»

³⁴Ma ke Yɛsə zhɛnete nda: «Fəyitekeghə ne, ma 'ya sha gha: Ma ɓeshi te viɗi nya, nda teheka ŋələ ne, kategeze na mahekene zhigə kaɗema na keɗepe ɗa.»

³⁵Ma ke Piyɛre zhɛnete nda: «Ya 'ya nza kamte le gha ne, kategeze 'ya tɛape kaɗema 'ya keɗepe ŋa we.» Tsagha ke kweci mbeli nyi ketəkwə təkwə gezete kala Piyɛre perə.

³⁶Ma kwa ntsehe Yɛsə le mbeli nyi ketəkwə təkwə te kwete ŋkwa nya nza sləa ŋkɛ kaZhɛtsɛmanɛ ne, ma ke sha hɛ: «Ntishɛ ŋayɛ mə teke, nda jive 'ya kasəkwə Shala pelɛke.»

³⁷Pa ŋkɛ hekakɛ yɛ Piyɛre le ŋwalea Zɛbɛdɛ bake. Nahe ghazlənə ba'a zhɛ ta mte kedzembe geva ta ŋkɛ.

³⁸Ma ke sha hɛ: «Zəzə ta mte nya kwa wənə kaɗe kapesle ɗa. Nza mə teke ba'a nza mə le ntsə ghwɛre ghwɛre le 'ya.»

³⁹Pa ŋkɛ hendemte geva vare hɛ, ntiŋə ŋkɛ ŋame ghə mbe hɛɗi. Ma ke səkwəte ghə: «Yita yawe, ma ya kwete hweŋkwa shɛ ne, fɛake ɗa yaka ta mte nya gi! Wəsə nya ɗe 'ya nde mene geva we, ama nya ɗe na.»

⁴⁰Zhɛne ne, pa ŋkɛ se sha mbeli nyi ketəkwə təkwə nyi mahekene nyighɛ. Se ŋkɛ ne, te hɛ hɛ. Ma ke sha Piyɛre: «Nya shɛ gɛ na. Shaŋe yɛ kanzate nza le ntsə le 'ya kalerə kwetɛŋe na?

⁴¹Nza mə le ntsə, səkwə mə ghə yagha yɛ kateɗe kadzembe ghwete ŋkwa. Kaɗe mehele ta wəndə ŋelɛ, ama dewə berete va geva ta ŋkɛ.»

⁴²Pa ŋkɛ hendemte geva kakwa bake zhigə. Ntəŋə ŋkɛ yitea səkwə ghə. Ma ke: «Yita yawe, ma keɗema kwete wəsə kefɛake ɗa mte shɛ ne, mene kala nya ɗe na.»

⁴³Pa ŋkɛ zhɛneke geva kase sha mbeli nyi ketəkwə təkwə. Newe ke ne, te hɛ hɛ, shaŋe hɛ kaya ntsə ta nci va hɛ.

⁴⁴Zhɛne ne, pa Yɛsə hendemte geva yitea hɛ kakwa mahekene zhigə kalə kasəkwə Shala, kala nya mshena shɛ səkwəte ghə ŋkɛ.

⁴⁵Zhɛne ŋkɛ kase sha mbeli nyi ketəkwə təkwə, ma ke sha hɛ: «Hɛ mə hɛa shɛ, zhɛne mə mpia ŋayɛ gɛ! Wa nya və nya tekese nda Wəzege ta za mbeli ke ka jaɗafa kese.

⁴⁶Sate mə, ngara ɓəmə! Wa nya wəndə nya kepamte ɗa nya teke.»

⁴⁷Mba Yɛsə kageze ghena ne, pɛkwe Zhəwdas kwete wəndəa mbeli nyi meŋe bakeghəmbe. Mbeli kwele kwele ya yite le yɛ kafayɛ ba'a yɛ geta, mbeli nyi te ghəa ka dzeghe Shala ba'a mbelia jama ta ka Zhəwif ka ghwenakɛ hɛ.

⁴⁸Ma ke Zhəwdas, wəndə nya kepamte Yɛsə ncɛte nda wəsə nya temene ŋkɛ ke hɛ: «Ma wəndə nya nakɛ ɗa yɛ kahəməwə ŋkɛ ne, gheŋkɛ ŋkɛ! Kese mə ŋkɛ.»

⁴⁹Kata kata Zhəwdas hendave nda geva ke Yɛsə, ma ke shɛ: «Kanjiŋwe ŋa 'ya Nde sleke ɗa!» Pa ŋkɛ həməwəve ŋkɛ.

⁵⁰Ma ke Yɛsə shɛ: «Mcɛ ɗa, ma wəsə nya se na kezha mene ne, menete ŋkɛ kahe kahe.» Tagha gɛ, pa kweci mbeli hendeke geva, dapate dzeve te Yɛsə ba'a keseve ŋkɛ.

⁵¹Pa kwete wəndəa mbeli nyi yitea Yɛsə nteɗakave kafayɛa ŋkɛ shave mbe kwəɓə, kwɛ'a ŋkɛ tsaslakawa sleme va ghə va nde mene slene ta wəndə kwelea ka dzeghe Shala.

⁵²Ma ke Yɛsə shɛ: «Zhɛname kafayɛa ŋa mbe kwəɓə, kwa nza ŋkɛ va kafayɛ tempə pɛtɛa mbeli nyi kekele kafayɛ.

⁵³Keɗepe na wərə 'ya katsave nda lewela ke Yiteyɛ ɗa kezha ghwene ɗa wəvəsəa ka ghwene ta ŋkɛ ŋkɛ kase za ma ke meŋe bakeghəmbe taghanyɛ wəka?

⁵⁴Tsema teyipə geva ghena ta Ghena ta Shala nyi kegeze kezha mene geva ŋkɛ tsetse tsagha wa?»

⁵⁵Ma ke Yɛsə sha hɛ: «Le yɛ kafayɛ ba'a yɛ geta hi yɛ kase kakese ɗa kala wəsə nya nza 'ya kande ŋwasle ŋkwa na? Keveci keveci 'ya hwa gheyɛ mbe ghɛa Shala kateke nda wəshi ke mbeli wə, nahe yɛ kekeseve ɗa na?

⁵⁶Kezha yipə ghena nya rafete ka mɛ ŋkwa mbe Ghena ta Shala nda menete geva ŋkɛ kala nya.» Pa pɛtɛa mbeli nyi ketəkwə təkwə wəfəyite ŋkɛ ba'a hwɛnji.

⁵⁷Pa mbeli nyi kekeseve Yɛsə keleghe ŋkɛ kalə sha Kayife, wəndə kwelea ka dzeghe Shala. Ki ghɛa ŋkɛ tsenete geva ka rafe wəsə mahalegə ba'a mbelia jama.

⁵⁸Mbe təkwə təkwə Yɛsə Piyɛre cakeɗake, hwa'a ki ghɛa wəndə kwelea ka dzeghe Shala. Shilimə ŋkɛ ki, ntishɛ ŋkɛ le ka mene slene kezha newe tsema tsema temiɗi ghena shɛ.

⁵⁹Ntake mbeli nyi te ghəa ka dzeghe Shala ba'a mbelia jama ta ka Zhəwif kazele hweŋkwa keve nda fete kemte le tseŋwə ke Yɛsə.

⁶⁰Ama shaŋe hɛ ve, ya tsemanyɛ nza ka tseŋwəa kɛfi tagha kwele kwele kave nda fete ke Yɛsə. Kwa keɗaŋe ta ŋkɛ, bake kweci mbeli sate,

⁶¹ma ke hɛ: «Ma ke wəndə nya: Wərə 'ya kampəmte ghɛa Shala ba'a kaŋate mbe hɛ mahekene zhɛkwa.»

⁶²Pelɛhetɛme wəndə kwelea ka dzeghe Shala sate, ma ke sha Yɛsə: «Kazhɛne ghena na wəka? Wa ke mbeli sha gha wa?»

⁶³Ama pa Yɛsə nzanyɛ gweŋe. Ma ke wəndə kwelea ka dzeghe Shala shɛ: «Te sləa Shala tehwə ghweme, gezete n'yɛ fəyitekeghə kenza nde Mɛsi, Wəzege ta Shala na gi?»

⁶⁴Ma ke Yɛsə zhɛnete nda: «Gha nde gezete. Ama ma 'ya sha gheyɛ: tsetsenyanyɛ, katenewe Wəzege ta za yɛ mentishɛ te kwa zeme ta Shala nde berete. Katenewe ŋkɛ yɛ kasawa te ləmbə pelɛ ghweme.»

⁶⁵Tagha gɛ, pa wəndə kwelea ka dzeghe Shala ŋkwahemte lekwesa ta ŋkɛ. Ma ke: «Mba gheɓəmə kazele kwete fete ta ŋkɛ we. Nahe yɛ kefate nda ŋelekɛ Shala ŋkɛ.

⁶⁶Tsema zəzə yɛ wa?» Ma ke hɛ zhɛnete: «Wərə mte ŋkɛ.»

⁶⁷Pa hɛ ntifəyi nda ndɛghwɛɗɛ kwa kema ba'a ghɛpekɛ ŋkɛ le dzeve, pa kweci mpempəyi nda balema kwa sleme.

⁶⁸Ma ke hɛ: «Ma gha nya kaMɛsi gɛ ne, ɗepete, gezete n'yɛ wəndə nya kempave ŋa gɛ!»

⁶⁹Mentishɛ nzanyɛ Piyɛre pelɛ kwa degha. Pɛkwe kwete kwatera ta wəndə kwelea ka dzeghe Shala. Ma ke shɛ: «Gha perə ne, wəndə nya yitea Yɛsə nde Galilɛ na.»

⁷⁰Pa ŋkɛ ɗepema Yɛsə kwa kema ta mbeli pɛtɛ. Ma ke gezete: «Keɗepe ghena nya ɗe na kageze 'ya we.»

⁷¹Kwa sebe ta ŋkɛ, pa dzeyinyɛ laka mɛ degha. Pa kwete kwatera nakɛ ŋkɛ ɓiyitsa. Ma ke sha mbeli nyi tagha: «Nahe wəndə nya kese yitea Yɛsə nde Nazarɛt ghalanza.»

⁷²Ma ke Piyɛre zemete fela ɓiyitsa: «Keɗepe wəndəa shɛ 'ya we.»

⁷³Temə vireɗi ne, pa mbeli nyi te ŋkwa shɛ se sha Piyɛre, ma ke hɛ shɛ: «Ghəpə yite we, kwete wəndə nya ketəkwə təkwə Yɛsə na, va nya nza na kageze ghena Galilɛ. Kwa nza ŋkɛ wərə mbeli kaɗepe te mɛrea ŋa.»

⁷⁴Ma ke Piyɛre gezete: «Pa Shala ɗate ɗa kenza nde tseŋwə yasla 'ya, kazeme fela 'ya kaɗema 'ya keɗepe wəndəa shɛ.» Te ŋkwa shɛnyɛ, pa ŋələ hekate heka.

⁷⁵Pa Piyɛre zəzəte ghena nya gezete nda Yɛsə: «Ma nda teheka ŋələ ne, kategeze na mahekene zhigə kaɗema na keɗepe ɗa.» Pa Piyɛre shavenyɛ le nehwene sərəɓə sərəɓə.