Read KapsikiDC Matiye 5 Bible Online

Matiye 5 - KapsikiDC bible

Matiye 5

¹Ma kwa nakɛ mbeli Yɛsə kwele kwele ne, pa dzemenyɛ pelɛ ghweme, pa ntishɛnyɛ. Pa mbeli nyi ketəkwə təkwə hendeke nda geva.

²Ma ke Yɛsə teke nda wəshi ke hɛ:

³Zlama ya va mbeli nyi keshifə ghəa nci, kwa nza ŋkɛ kaŋa nci nza Meghe nya pelɛ ghweme.

⁴Zlama ya va mbeli nyi kenehwene, kategweɗakwe nda wənə Shala ke hɛ.

⁵Zlama ya va ka gwedəa kɛfi, katekemave hɛɗi nya meɗeyi Shala hɛ.

⁶Zlama ya va mbeli nyi shewə va ma ba'a ndere yitea nza tiɗiɗi, katenza hɛ behe behe.

⁷Zlama ya va mbeli nyi kezhɛ heli yitea mbeli, katezhɛ heli Shala yitea hɛ.

⁸Zlama ya va mbeli nyi nza wənəa nci wɛŋe, katenakɛ Shala hɛ.

⁹Zlama ya va mbeli nyi kesepa kwelɛŋe, kateheka hɛ Shala kaŋwalea ŋkɛ.

¹⁰Zlama ya va mbeli nyi ghweze mɛ mbeli hwa hɛ tewəmbəreke nza tiɗiɗi, kaŋa nci nza Meghe nya pelɛ ghweme.

¹¹Zlama ya va gheyɛ kenza mbeli kaŋele ŋayɛ, kaghweze mɛ hwa gheyɛ, kaŋwashɛ ŋwashɛ ŋayɛ tewəmbəreke 'ya.

¹²Nza mə le zlama ba'a farefa, kwa nza ŋkɛ neghe yaneghe ŋayɛ zhɛme pelɛ ghweme. Tsagha se mbeli kaghweze mɛ hwa ka mɛ ŋkwa nyi mpelɛa ma ke gheyɛ.

¹³Gheyɛ ya kaghwene kezha mbeli nyi te hɛɗi. Ma keshavenyɛ mele mbe ghwene ne, tsema nza ghwənəghwə kazhɛname geva mbe wa? Mba mbeli menete kwete wəsə le we, negha yanegha ŋkɛ mbeli kezha dzeghwa mbeli te.

¹⁴Gheyɛ ya kawaŋe kezha mbeli nyi te hɛɗi. Kanakɛma meleme nya pelɛ ghəa ghweme mbeli we.

¹⁵Wəndə shɛ kandə ghwə kwa paterela kezha ve ŋkɛ mbeyitere wəsə we. Ama pelɛ ghəa ŋkwa ve mbeli yitea newe ŋkwa pɛtɛa mbeli nyi mbe cɛ yite.

¹⁶Tsagha hi waŋe ta ŋayɛ kaɓele kwa kema ta mbeli pɛtɛ, baŋe hɛ kanakɛ ghena ganyɛ nya mene yɛ ba'a baŋe hɛ kageze zləvəa Yiteyɛ ŋayɛ nya pelɛ ghweme.

¹⁷Zəzəma yɛ 'ya se kezha za sebe te wəsə mahalegə nya vəashi ba'a wəshi nyi tekete ka mɛ ŋkwa ta Shala ma. Kese 'ya kezha za sebe te we, ama kezha yipə ŋkɛ kadzawa.

¹⁸Kaganda ne, ma 'ya sha gheyɛ: kala nya tetemə ghweme ba'a hɛɗi ne, katentamte geva kwete wəsə shave mbe wəshi mahalegəa Shala ya kala ghəa zhiwə ŋkɛ we. Tsagha tenza ŋkɛ hwa'a te kiɗi ta hɛɗi.

¹⁹Vatse gɛ, ma wəndə nya kentamte kwete hwa ghena nyi gezete Shala ba'a nya ketekete nda ke kweci mbeli kamene kala gheŋkɛ, kawəndə nya ɓɛhwɛ tenza ŋkɛ mbe Meghe nya pelɛ ghweme, ama wəndə nya kehawe va wəshia shɛhɛ ba'a nya ketekete nda ke kweci mbeli kamene kala gheŋkɛ ne, kawəndə nya wəba tenza ŋkɛ mbe Meghe nya pelɛ ghweme.

²⁰Kaganda ne, ma 'ya sha gheyɛ: nda yɛ kamenete wəshi nyi ɗe Shala za ma ke ka rafe wəsə mahalegə le ka Fariziyɛn nda nza yɛ kadzembe Meghe nya pelɛ ghweme.

²¹Nahe yɛ kefate ghena nyi kegezete nda geva ke ka shihɛ ŋayɛ: Peslema wəndə na ma. Yayata wəndə nya kepeslekɛ wəndə, katekele ŋkɛ mbeli kadzete ghwə.

²²Ma 'ya ne, ma 'ya sha gheyɛ: yayata wəndə nya kehwepete nda wənə ke menənyɛ, katekele ŋkɛ mbeli kadzete ghwə. Ma wəndə nya kegeze sha menənyɛ: Kelɛ, a ke shɛ ne, katekele ŋkɛ mbeli kalə sha mbeli nyi te ghəa meleme nyi kemeha ghwə. Ma wəndə nya kegeze sha wəndə: Gezhi, a ke shɛ ne, katedzembe ghwə nya keɗema kakiɗi ŋkɛ.

²³Ma kese na kave nda wəsə ke Shala te reghwetɛa ŋkɛ, nda zəzəte na te ŋkwa shɛnyɛ ghena ya va menə ŋa le gha ne,

²⁴zlenekɛ wəsə nya ɗe na kave nda ke Shala te ŋkwa shɛ yitea reghwetɛ, kwiɗi kiɗimte ghena shɛ le menə ŋa kaba, nda tese na kave nda wəsəa ŋa ke Shala.

²⁵Ma kenza na te ghwə le wəndə ne, tseɓate ghena shɛ kahe kahe le wəndəa shɛ vəa ŋkwa nya nza yɛ mba kwa hweŋkwa, yagha ŋkɛ tendeke nda ŋa ke nde meha ghwə, yagha nde meha ghwə tendeke nda ŋa ke ka sewajɛ ba'a yagha mbeli teveyi ŋa kwa daŋgayɛ.

²⁶Kaganda ne, ma 'ya sha gha: katesame na kwa keɗema na keŋkimte pɛtɛa dewa nya hwa gha we.

²⁷Nahe yɛ kefate ghena nya kegezete geva kaghate, ma ke: Valema na tahe ma.

²⁸Yawa, ma 'ya sha gheyɛ le ŋa ɗa: ma yayata wəndə nya kesla ntsə yitea male ta kwete wəndə ne, nahe ŋkɛ kemenete vale tahe le malea shɛ mɛa wənəa ŋkɛ.

²⁹Ma kenza nde ntsə ta ŋa kwa zeme nde ghwete ŋa yitea jaɗafa ne, feraɗemte ŋkɛ, neghamte ŋkɛ cakeɗake. Megela ma zamte kwete na bela ta geva ta ŋa kenya dzembe ghwə nya keɗema kakiɗi na le pɛtɛa geva ta ŋa.

³⁰Ma kenza nde dzeve ta ŋa kwa zeme nde ghwete ŋa yitea jaɗafa ne, tsaslemte ŋkɛ, neghamte ŋkɛ cakeɗake. Megela ma zamte kwete na bela ta geva ta ŋa kenya dzembe ghwə nya keɗema kakiɗi na le pɛtɛa geva ta ŋa.

³¹Nahe yɛ kefate ghena nya kegezete geva kaghate, ma ke: Ma wəndə nya keŋka male ta ŋkɛ ne, nda ŋkɛ ndeke nda palepa ta ŋka.

³²Ma 'ya le ŋa ɗa ne, ma 'ya sha gheyɛ: Hweŋkwa va wəndə kaŋka male ta ŋkɛ, keɗema ŋkɛ kenza kawəme geva nya kehitema geva laka wəsə mahalegə. Kwa nza ŋkɛ ma keŋkamte male ta ŋkɛ wəndə ne, nahe ŋkɛ keŋkeyite ŋkɛ yitea mene vale tahe, va nya nza nde katezhɛne kawəme za. Ma kewəmeve male nya ŋkamte za nta wəndə ne, nahe ŋkɛ kemenete vale tahe perə.

³³Nahe yɛ kefate ghena nya kegezete nda geva ke mbelia jama vəashi, ma ke: Dzawama na wəmbə fela ta ŋa ma, ama yipəyi wəsə nya meɗeyi ke Mahwətə kwa.

³⁴Ma 'ya sha gheyɛ le ŋa ɗa: zemema fela yɛ ma. Zemema fela yɛ le ŋkwa nya pelɛ ghweme, va nya nza ŋkɛ kapasla ta Shala ma.

³⁵Zemema fela yɛ le hɛɗi va nya nza ŋkɛ kaŋkwa keŋkeɗe seɗa ta Shala, ya le Zhɛrəzalɛm, va nya nza ŋkɛ kameleme ta Meghe nya wəba ma.

³⁶Zemema fela yɛ le ghəa ŋayɛ, va nya nza ŋkɛ kazhɛre shintia ghəa ŋayɛ ŋkereyi keɗema tɛawe tɛawe we.

³⁷Ma vəa ŋkwa nya geze ghena yɛ ne, geze mə e'e keɗema ewə. Va Gətəli se kweci ghena nyi mtsehe mbeli yite.

³⁸Nahe yɛ kefate ghena nya kegezete geva vəashi, ma ke: Ntsə te ntsə, slene te slene.

³⁹Ma 'ya sha gheyɛ le ŋa ɗa: Wama wəsə kwa ndiremi nya menete ŋayɛ wəndə yɛ ma. Ma kempave ŋa wəndə kwa kwete sleme ne, zhɛrave nda kwete perə.

⁴⁰Ma kekeleghe ŋa wəndə kadzete ghwə kezha kele tɛagwarea ŋa ne, pelakɛ ŋkɛ kakele karalamea ŋa perə.

⁴¹Ma keŋkeyite ŋa wəndə yitea dzeghwa gare kilemɛtre kwetɛŋe ne, lə le wəndəa shɛ gare kilemɛtre bake.

⁴²Ma ke'yɛwe wəsə wəndə va gha ne, ndeke nda ŋkɛ, ndaŋema wəndə nya ke'yɛwe dewa va gha na ma.

⁴³Nahe yɛ kefate ghena nya kegezete geva vəashi, ma ke: Ɗe nde ghedəkwəa ŋa, zlɛ va nde jaga ta ŋa.

⁴⁴Ma 'ya sha gheyɛ le ŋa ɗa: ɗe mə ka jaga ta ŋayɛ, səkwə mə ghə kezha mbeli nyi keghweze mɛ hwa gheyɛ,

⁴⁵kezha nza yɛ kaŋwale ganjia Yiteyɛ ŋayɛ nya pelɛ ghweme. Kwa nza ŋkɛ kakele veci ŋkɛ same kwa ghɛ kezha ka 'yaghwa mehele ba'a kezha mbeli ganji, kame nda va ŋkɛ ke mbeli nyi tiɗiɗi tiɗiɗi ba'a nyi ndiremi ndiremi.

⁴⁶Ma kenza nde mbeli nyi keɗe ŋayɛ yaɗe yɛ nahe ne, yitea wa neghe yɛ kakemave zhɛme va Shala tsagha wa? Ashɛ tsagha mene ka tsehe jaɓeregwale wəka?

⁴⁷Mze kwa kwelɛke yamtseke yɛ kenza nde deke ka menəhɛ ŋayɛ yaɗe yɛ tsagha na? Ashɛ tsagha mene ka ŋa zlera perə wəka?

⁴⁸Nza mə kambeli ganji kala Yiteyɛ ŋayɛ nya pelɛ ghweme.