Read KapsikiDC Mark 11 Bible Online

Mark 11 - KapsikiDC bible

Mark 11

¹Ma kwa nza hɛ takwa takwa yitea Zhɛrəzalɛm, terasle yitea yɛ Bɛtfazhɛ le Bɛtani ne, pa hɛ ntsehe pelɛ ghweme ta yɛ Bekele. Pa Yɛsə ghwenakɛ mbeli nyi ketəkwə təkwə bake kalə te kema ta ŋkɛ, ma ke sha hɛ:

²«Kwiɗi mə kalə kadzembe meleme nya te kema ta ŋayɛ. Dzembema ta ŋayɛ ne, katenewe leve ta kwara yɛ tehwepe, kegha wəndə kase pelɛ we. Pelemte mə ŋkɛ ba'a ŋkake ɗa mə ŋkɛ.

³Ma kegeze ŋayɛ kwete wəndə: kawa yɛ le wa, a ke ne, Nde sleke ŋkwa nza kaɗe, pe yɛ shɛ. Taghanyɛ teghwene ŋkɛ kase teke.»

⁴Ntəŋə hɛ tsagha, pa hɛ nakɛ kwara te ŋwela, kwa rəki, tehwepe mɛa degha. Pa hɛ peleve ŋkɛ.

⁵Ma ke kweci mbeli nyi tagha 'yɛwete va hɛ: «Wa wəsə nya mene yɛ wa? Kezha wa pele leve ta kwara shɛ yɛ wa?»

⁶Pa hɛ zhɛnete nda ke hɛ kala nya gezete nda Yɛsə ke hɛ, pa mbelia shɛhɛ sərəakɛ hɛ kaslə le.

⁷Pa hɛ keleke nda leve ta kwara shɛ ke Yɛsə, pa hɛ pelakeyi lekwesa ta nci te, ntishɛ Yɛsə pelɛ.

⁸Kwele kwele mbeli nyi kepelakeyi lekwesa ta nci kwa hweŋkwa, dzeve ta wəfe nyi tsasleke hɛ hwa gamba yapelake kweci.

⁹Mbeli nyi te kema ta ŋkɛ le nyi kwa sebe ta ŋkɛ ne, ma ke hɛ tsate lewela: «Tsahe ɓəmə Shala, kewəpi wəpi nza wəndə nya kese te sləa Mahwətə.

¹⁰Wəpikɛ hɛɗi meghe nya ketese Shala, hɛɗi meghea David, yiteyɛ ɓəmə. Tsahe Shala nya pelɛ ghweme mbeli.»

¹¹Pa Yɛsə dzembe Zhɛrəzalɛm ba'a dzembe ghɛa Shala. Ma kwa newemte ŋkwa nya dzeyi yite ŋkɛ ne, cape hɛ le mbeli nyi ketəkwə təkwə meŋe bakeghəmbe kadzembe Bɛtani kwa senyɛ tɛhwɛɗi.

¹²Ma te hendɛ ta ŋkwa kaslə Yɛsə mbe Bɛtani ne, pa ma keseve ŋkɛ.

¹³Pa ŋkɛ nakɛ dasekwa cakeɗake gwəzləmə, ntəŋə ŋkɛ kalə kadzeyite nda kwete kakemave ya ŋkɛ. Ma kwa se ŋkɛ takwa takwa yite ne, kenakɛ ya ŋkɛ te we, kwa nza ŋkɛ ne, kenaka və keya ta dasekwa we.

¹⁴Yewə, ma ke Yɛsə sha dasekwa: «Mba wəndə kandɛamakɛ ya ta ŋa tɛape we.» Kafefa mbeli nyi ketəkwə təkwə.

¹⁵Pa hɛ zhɛneke geva kadzembe Zhɛrəzalɛm zhɛkwa. Shilimə Yɛsə mbe ghɛa Shala, ntake kaŋka pɛtɛa mbeli nyi kepamte wəshi ba'a nyi kepa shave mbe. Pa ŋkɛ tsetsəkwəate tabelea ka mbeɗe cɛdɛ ba'a tsəkwələa ka pamte gheɗepe te hɛɗi.

¹⁶Kesərəakɛ wəndə ŋkɛ kakele wəsə dzeyi mbe ghɛa Shala ŋkɛ we.

¹⁷Kwa sebe ta ŋkɛ, ma ke tekete nda wəsə ke hɛ: «Ma mbe Ghena ta Shala ne, ma ke Shala gezete: Kateheka ghɛa ɗa mbeli kaghɛ kesəkwə ghə. Ama gheyɛ ne, nahe yɛ kezhɛrete ŋkɛ kazlera ta ka ghərəa kɛfi.»

¹⁸Ma kwa fate ghena shɛ mbeli nyi te ghəa ka dzeghe Shala ba'a ka rafe wəsə mahalegə ne, ntake hɛ kazele hweŋkwa kepesle Yɛsə, ama kazhɛ nda ghazlənə ke hɛ kwa nza mbeli heheɓake va ntsehwelea ŋkɛ kateke nda wəsə ke mbeli.

¹⁹Ma kwa se tɛhwɛɗi ne, pa yɛ Yɛsə le mbelia ŋkɛ shavenji mbe meleme.

²⁰Masheke masheke kadzeyi hɛ kwa hweŋkwa ne, pa hɛ nakɛ dasekwa shɛ kemte mte pa te slərəa ŋkɛ.

²¹Pa Piyɛre zəzəte ghena nya kemenete geva, ma ke sha Yɛsə: «Rabi, newema dasekwa nya bezlakɛ nya na keghwele ghwele gi!»

²²Ma ke Yɛsə sha mbeli nyi ketəkwə təkwə: «Kaganda ne, ma 'ya sha gheyɛ: Yɛte mə Shala.

²³Ma kegeze kwete wəndə sha ghweme nya: Slə ŋa tagha, negheyi ghəa ŋa kwa ndərə, ke shɛ, kaɗema ghəa ŋkɛ bake bake, ama nahe ŋkɛ keyɛte katemene wəsə nya gezete ŋkɛ ne, tsagha shɛ temene geva ŋkɛ.

²⁴Vatse gɛ, ma 'ya sha gheyɛ: ma yayata wəsə nya 'yɛwe yɛ le səkwə ghə ne, yɛte mə kala wəsə nya kemave wəsəa shɛ yɛ, kateve ŋayɛ geva ŋkɛ.

²⁵Ma kenza yɛ meslete kasəkwə Shala nda zəzəte wəsə nya kwelɛ gheyɛ yɛ le kwete wəndə ne, kelemte mə ghena shɛ te wənəa ŋa kezha kelemte ŋayɛ jaɗafa ta ŋayɛ Yiteyɛ ŋayɛ nya pelɛ ghweme te wənə perə.

²⁶Ama keɗema yɛ kekelemte ghena nya bezemte ŋayɛ kweci mbeli te wənə ne, katekelemte ŋayɛ jaɗafa ta ŋayɛ Yiteyɛ ŋayɛ nya pelɛ ghweme te wənə perə we.»

²⁷Pa hɛ dzeme Zhɛrəzalɛm zhɛkwa, ma mbe dzeghwa Yɛsə mbe ghɛa Shala ne, pa mbeli nyi te ghəa ka dzeghe Shala, ka rafe wəsə mahalegə ba'a mbelia jama se shɛ.

²⁸Ma ke hɛ 'yɛwete ve: «Le berete ta wa mene wəshi nyi na wa? Wa nde ndeke ŋa hweŋkwa kamene kala nya wa?»

²⁹Ma ke Yɛsə zhɛnete nda ke hɛ: «'Ya kate'yɛwe ghena kwetɛŋe va gheyɛ, ma kezhɛnete ɗa yɛ, kategeze ŋayɛ 'ya le nyama nyama berete mene wəshia shɛhɛ 'ya.

³⁰Wa nde ghweneke Zhaŋe kamene batɛme wa? Shala na, na mbeli na? Zhɛnete ɗa mə.»

³¹Ntake hɛ kazele ghena kezhɛne kwelɛ ghəa nci, ma ke hɛ: «Ma kezhɛnete mə: Shala nde ghweneke ŋkɛ, ke gheɓəmə ne, ma ke sha te'yɛwe va gheɓəmə: Va wa ɗema yɛ keyɛte ghena ta Zhaŋe tsagha wa?

³²Ama kegeze gheɓəmə: Mbeli nde ghweneke ŋkɛ, ke gheɓəmə ne, tagha gɛ...» Kazhɛ nda ghazlənə ke hɛ va mbeli kwa nza ŋkɛ nahe mbeli pɛtɛ keɗepe Zhaŋe kande mɛ ŋkwa nya kaganda.

³³Tagha gɛ, ma ke hɛ zhɛnete nda ke Yɛsə: «Keɗepe n'yɛ we.» Ma ke Yɛsə sha hɛ: «Yawa, ma 'ya perə ne, kageze ŋayɛ 'ya le nyama nyama berete mene wəshia shɛhɛ 'ya we.»