Read KapsikiDC Mark 14 Bible Online

Mark 14 - KapsikiDC bible

Mark 14

¹Tene hɛ bake yitea gəsəkəa Pake ba'a ŋa pɛaŋe nya ɗema tenjɛne hwe. Ntake mbelia jama ta dzeghe Shala ba'a ka rafe wəsə mahalegə kaghweze ntsehwele kekese Yɛsə tewəfərə kezha pesle ŋkɛ.

²Kwa nza ŋkɛ ma ke hɛ mbe ghəa nci: «Kesema ŋkɛ gheɓəmə hwa gəsəkə yagha ghena kamenete geva hwa mbeli ma.»

³Ma kwa nza Yɛsə ki ghɛa Simon nde derena kwa Bɛtani, vəa ŋkwa nya zeme ɗafa ŋkɛ ne, pa kwete male se le tereme ta 'wərdə nya jakeja te viɗi. Pa nde ghwenemte teremea shɛ ba'a shekaghe 'wərdə kənəa Yɛsə.

⁴Ma kweci hwa mbeli nyi tagha ne, keɗema ɗema ghəa nci tsagha, ma ke hɛ kwelɛ ghəa nci: «Wa ketekɛ ŋkwa 'wərdə nya kwa bezemte mbeli kala nya tse wa?

⁵Wərə mbeli kapamte kaslibə mahekenemsə ba'a kandeke nda cɛdɛa ŋkɛ ke ka titikwəa kɛfi wəka?» Kwele kwele geze hɛ te malea shɛ.

⁶Ma ke Yɛsə sha hɛ: «Ghakɛma ŋkɛ yɛ ma. Yitea wa sa nda yaka yɛ ke male nya wa? Ma wəsə nya menete ɗa nya nde ne, megela.

⁷Kwa nza ŋkɛ teke ka titikwəa kɛfi keveci keveci hwa gheyɛ, wərə yɛ kamenete nda ganyɛ ke hɛ, ama 'ya ne, teke tenza 'ya keveci keveci hwa gheyɛ we.

⁸Nahe nde kemenete wəsə nya nza nde kamenete, nahe nde kehimte geva ta ɗa le 'wərdə kezha ve kwa kwele.

⁹Kaganda ne, ma 'ya sha gheyɛ: ya tema tema geze Ghena kwatenca nya ganyɛ mbeli te hɛɗi lema ne, kategeze wəsə nya menete nya male nya mbeli, katezəzə malea shɛ mbeli.»

¹⁰Tagha gɛ, pa Zhəwdas Iskariyote, kwete wəndəa mbeli nyi meŋe bakeghəmbe lə sha mbeli nyi te ghəa ka dzeghe Shala, kezha kese nda Yɛsə ke hɛ.

¹¹Fare fare wənəa nci, pa hɛ meɗeyi nda ve nda cɛdɛ, ntake Zhəwdas kazele və ganyɛ kezha kese nda Yɛsə ke hɛ.

¹²Te kwa ghate ta vecia gəsəkəa pɛaŋe nya ɗema tenjɛne hwe, te veci nya hene gamea lɛmə mbeli kata ɗafa gəsəkəa Pake ne, ma ke mbeli nyi ketəkwə təkwə sha Yɛsə: «Tema ɗe na kalə ghen'yɛ kahi ŋa wəsə kezeme ta gəsəkəa Pake wa?»

¹³Pa Yɛsə ghwenakɛ kweci bake hwa mbeli nyi ketəkwə təkwə, ma ke sha hɛ: «Kwiɗi mə kadzembe meleme, katebegeme yɛ le kwete wəndə nya nza ghwelepe ta yɛmə kwa ghə ve, təkwə təkwə mə ŋkɛ.

¹⁴Ki ghɛ nya dzeki ŋkɛ ne, ma pe yɛ sha wəndə ke ghɛ: Ma ke Nde sleke n'yɛ 'yɛwete: Tema cɛ nya tezeme gəsəkəa Pake 'ya mbe le mbeli nyi ketəkwə təkwə ɗa mbe wa?

¹⁵Ma pelɛ ghəa cɛ nya mencikə ne, katencɛ ŋayɛ cɛ nya wəba le pɛtɛa wəshi nyi kehi ŋkɛ. Tagha temene ɓəmə wəsə kezeme yɛ.»

¹⁶Cape mbeli nyi ketəkwə təkwəa shɛhɛ kalə kadzembe meleme, tsagha shɛ hɛ sləyi kala nya gezete nda Yɛsə ke hɛ, pa hɛ hite ŋkwa kezha zeme gəsəkəa Pake.

¹⁷Ma kwa se tɛhwɛɗi ne, pɛkwe Yɛsə le mbeli nyi ketəkwə təkwə meŋe bakeghəmbe.

¹⁸Ma kənəa wəsə kezeme hɛ ne, ma ke Yɛsə: «Kaganda ne, ma 'ya sha gheyɛ: kwete wəndə hwa gheyɛ nya kezeme ɗafa nya le 'ya katepamte ɗa.»

¹⁹Pɛtɛ hɛ kenza le kema teheɗe, ma ke hɛ 'yɛwete kwete kwete ve: «'Ya ŋkɛ perə na?»

²⁰Ma ke Yɛsə zhɛnete nda ke hɛ: «Kwete wəndəa ŋayɛ, gheyɛ nyi meŋe bakeghəmbe, wəndə nya kemze nɗeli nya le 'ya kwa helape nde tepamte ɗa.

²¹Ghəpə yite we, wa nya Wəzege ta za katemte kala nya gezete Ghena ta Shala te ghəa ŋkɛ. Ama wa nya yaka te wəndə nya ketepamte Wəzege ta za gɛ! Megela ma yakema geva wəndəa shɛ.»

²²Ma vəa ŋkwa nya zeme wəsə kezeme hɛ ne, pa Yɛsə kelete ɗafa. Ma kwa tsate nda ŋ'wese ŋkɛ ke Shala ne, pa neheve mbe, pa ŋkɛ ndeke nda ke mbeli nyi ketəkwə təkwə, ma ke sha hɛ: «Kele mə, nya ya kageva ta ɗa.»

²³Pa ŋkɛ kelete zlerekwe tɛ, ma kwa sebe ta nya tsate nda ŋ'wese ŋkɛ ke Shala ne, pa ŋkɛ ndeke nda ke hɛ, pa hɛ sahwe pɛtɛa nci.

²⁴Ma ke Yɛsə sha hɛ: «Nya ya kamimia ɗa, mimia jikə geva nya keshekeyi geva kezha mbeli kwele kwele.

²⁵Kaganda ne, ma 'ya sha gheyɛ: katezhɛne 'ya kasa tɛ tɛape hwa'a te veci nya tesa tɛ mɛnɛfɛ 'ya mbe Meghea Shala we.»

²⁶Pa hɛ ghate ciməa gəsəkə, kwa sebe ta ŋkɛ, cape hɛ kadzeme ghweme ta Bekele.

²⁷Ma ke Yɛsə sha mbeli nyi ketəkwə təkwə: «Pɛtɛ tewəfəyite ɗa yɛ, kwa nza ŋkɛ ma ke rafete geva mbe Ghena ta Shala: Katepesle nde ya wəshi 'ya, kwetɛ kwetɛŋe tenza timɛti.

²⁸Ama vəa ŋkwa nya tesame 'ya kwa kwele le mpi ne, mpelɛa tedzawa Galilɛ 'ya ke gheyɛ.»

²⁹Ma ke Piyɛre shɛ: «Ya kweci mbeli wəfəyite ŋa ne, katewəfə ŋa 'ya tɛape we.»

³⁰Ma ke Yɛsə zhɛnete nda: «Kaganda ne, ma 'ya sha gha: ma ɓeshi te viɗi nya, nda teheka ŋələ bake zhigə ne, kategeze na mahekene zhigə kaɗema na keɗepe ɗa.»

³¹Ama ma ke Piyɛre le berete zhɛkwa: «Ya 'ya nza kamte le gha ne, kategeze 'ya tɛape kaɗema 'ya keɗepe ŋa we.» Tsagha ke kweci mbeli nyi ketəkwə təkwə gezete kala Piyɛre perə.

³²Kwa sebe ta ŋkɛ, hwa'a hɛ te kwete ŋkwa nya heka mbeli kaZhɛtsɛmanɛ. Ma ke Yɛsə sha mbeli nyi ketəkwə təkwə: «Ntishɛ ŋayɛ mə teke, nda jive 'ya kasəkwə Shala pelɛke.»

³³Pa ŋkɛ hekakɛ Piyɛre, Zhake ba'a Zhaŋe. Nahe ghazlənə ba'a zhɛ ta mte kedzembe geva ta ŋkɛ,

³⁴ma ke sha hɛ: «Zəzə ta mte nya kwa wənə kaɗe kapesle ɗa, nza mə teke ba'a nza mə le ntsə ghwɛre ghwɛre.

³⁵Pa ŋkɛ hendemte geva cakeɗake vare hɛ, gwəɗəŋə ŋkɛ ŋame ghə mbe hɛɗi ba'a pa səkwəte Shala kenza nde kamenete geva ŋkɛ kezha hendemte geva vəa yaka shɛ cakeɗake yite.

³⁶Ma ke gezete: Aba, Yita yawe, pɛtɛa wəshi dekwede sha gha, hendemte yaka ta mte nya yitea 'ya gi! Wəsə nya ɗe 'ya nde mene geva we, ama nya ɗe na.»

³⁷Pa ŋkɛ zhɛneke geva kase sha mbeli nyi ketəkwə təkwə nyi mahekene ba'a sləyi hɛ te hɛ. Ma ke sha Piyɛre: «Simon, hɛ yahɛ na na? Shaŋe na kanzate nza le ntsə ya kalerə kwetɛŋe na?

³⁸Nza mə le ntsə, səkwə mə ghə, yagha yɛ kateɗe te ŋkwa keghwete ŋkwa. Kaɗe mehele ta wəndə ŋelɛ, ama dewə berete va geva ta ŋkɛ.»

³⁹Pa ŋkɛ hendemte geva zhɛkwa ba'a səkwəte ghə kala nya mshena shɛ.

⁴⁰Pa ŋkɛ zhɛneke geva kase sha mbeli nyi ketəkwə təkwə. Newe ke ne, te hɛ hɛ, shaŋe hɛ kaya ntsə ta nci va hɛ. Keɗepe ghena kegeze nda hɛ we.

⁴¹Ma kwa se ŋkɛ kakwa maheke zhigə ne, ma ke sha hɛ: «Hɛ mə hɛ ba'a zhɛne mə mpi ŋayɛ gɛ! Nahe gɛ! Nahe və kese. Wa nya və nya tekese nda Wəzege ta za mbeli ke ka jaɗafa kese.

⁴²Sate mə, ngara ɓəmə. Wa nya wəndə nya kepamte ɗa nya teke.»

⁴³Mbanyɛ Yɛsə kageze ghena ne, pɛkwe Zhəwdas, kwete wəndəa mbeli nyi meŋe bakeghəmbe. Mbeli kwele kwele ya yite le yɛ kafayɛ ba'a yɛ geta. Mbelia nyi te ghəa ka dzeghe Shala, ka rafe wəsə mahalegə ba'a mbelia jama ka ghweneke hɛ.

⁴⁴Ma ke Zhəwdas, wəndə nya kepamte Yɛsə ncɛte nda wəsə nya temene ŋkɛ ke hɛ: «Ma wəndə nya nakɛ ɗa yɛ kahəməwə ŋkɛ ne, gheŋkɛ ŋkɛ. Kese mə ŋkɛ, kele mə ŋkɛ ba'a ya mə ŋkɛ megela.»

⁴⁵Sema ta Zhəwdas ne, pa hendave nda geva ke Yɛsə, ma ke shɛ: «Rabi!» Pa ŋkɛ həməwəve ŋkɛ.

⁴⁶Tagha gɛ, pa kweci mbeli dapate dzeve te Yɛsə ba'a keseve ŋkɛ.

⁴⁷Pa kwete wəndəa mbeli nyi tagha nteɗakave kafayɛa ŋkɛ, mpave nde mene slene ta wəndə kwelea ka dzeghe Shala ba'a tsaslakawa sleme va ghə ve.

⁴⁸Ma ke Yɛsə sha hɛ: «Le yɛ kafayɛ ba'a yɛ geta hi yɛ kase kakese ɗa kala wəsə nya nza 'ya kande ŋwasle ŋkwa na?

⁴⁹Keveci keveci 'ya le gheyɛ ba'a nahe 'ya ketekete nda wəshi ke mbeli mbe ghɛa Shala, ama kese yɛ kakese ɗa we. Ma nda menete geva ŋkɛ kala nya ne, kezha yipə geva ghena ta Ghena ta Shala.»

⁵⁰Pa pɛtɛa mbeli nyi ketəkwə təkwə wəfəyite ŋkɛ ba'a hwɛnji.

⁵¹Pa kwete mempɛhweta təkwə təkwəte Yɛsə, deke le gwada ŋkɛ kənəa geva. Pa mbeli dzeghakɛ kakese ŋkɛ,

⁵²ama pa sərəakɛ gwada ba'a hwɛnyɛ mederelaŋe.

⁵³Pa hɛ keleghe Yɛsə kadzeki ghɛa wəndə kwelea ka dzeghe Shala. Kiagha tsenete geva mbeli nyi te ghəa ka dzeghe Shala, mbelia jama ba'a ka rafe wəsə mahalegə.

⁵⁴Mbe təkwə təkwə Yɛsə Piyɛre cakeɗake, pa dzeki ghɛa wəndə kwelea ka dzeghe Shala. Ntishɛ ŋkɛ hwa ka ya ghɛ kaslene ghwə.

⁵⁵Ntake mbeli nyi te ghəa ka dzeghe Shala ba'a mbelia jama ta ka Zhəwif kazele hweŋkwa keve nda fete kemte ke Yɛsə, ama shaŋe hɛ ve.

⁵⁶Kwele kwele mbeli nyi kekeleke kweci ghena keghə keghə kave nda fete ke Yɛsə le tseŋwə, ama keghə keghə ghena ta nci.

⁵⁷Pa kweci mbelia nci sate kasla nda tseŋwə, ma ke hɛ:

⁵⁸«Ma ke kafefa ghen'yɛ: Kateŋzla ghɛa Shala nya ŋate nya mbeli 'ya, kateŋa kwete 'ya mbe hɛ maheke, nya keɗema keŋate geva laka wəndə ŋelɛ.»

⁵⁹Ya te nyagha shɛ ŋkɛ ne, kejikə ghena ta nci we.

⁶⁰Pelɛhetɛme wəndə kwelea ka dzeghe Shala sate te ŋkwa, ma ke 'yɛwete va Yɛsə: «Kazhɛne ghena na wəka? Wa ke mbeli sha gha wa?»

⁶¹Ama pa Yɛsə nzanyɛ gweŋe, kese ŋkɛ kazhɛne ghena we. Ma ke wəndə kwelea shɛ 'yɛwete ve zhɛkwa: «Gha ya kaMɛsi, Wəzege ta Shala nya kewəpi wəpi na?»

⁶²Ma ke Yɛsə zhɛnete nda: «E'e 'ya shɛ ŋkɛ, katenewe yɛ Wəzege ta za yɛ pɛtɛ mentishɛ te kwa zeme ta Shala nde berete, katenewe ŋkɛ yɛ kasawa te ləmbə pelɛ ghweme.»

⁶³Tagha gɛ, pa wəndə kwelea ka dzeghe Shala ŋkwahemte lekwesa ta ŋkɛ, ma ke: «Mba gheɓəmə kazele kwete fete ta ŋkɛ we.

⁶⁴Nahe yɛ kefate nda ŋelekɛ Shala ŋkɛ. Tsema zəzə yɛ wa?» Pɛtɛ hɛ veyi ŋkɛ kande fete, kageze gare mte ŋkɛ ke hɛ.

⁶⁵Ntake kweci mbeli hwa hɛ kantifə ndɛghwɛɗɛ kadzete Yɛsə. Pa hɛ dəpəte kema ta ŋkɛ le zlave, mpave ŋkɛ le dzeve, ma ke hɛ gezete: ɗepete le kelɛŋəa ŋa, wəndə nya kemenete ŋa wəsə nya? Pa ka ya ghɛ kelete Yɛsə ba'a mpempave ŋkɛ.

⁶⁶Mba Piyɛre kwake kwake kwa degha nda se kwete kwatera ta wəndə kwelea ka dzeghe Shala.

⁶⁷Pa nde nakɛ Piyɛre kaslene ghwə, kaveregheve megela, ma ke shɛ: «Gha perə ne, wəndə nya yitea Yɛsə, nde Nazarɛt na.»

⁶⁸Ama pa ɗepema Yɛsə, ma ke gezete: «Keɗepe ghena nya ɗe na kageze 'ya we.» Pa ŋkɛ jivenyɛ pelɛ kwa degha. Pa ŋələ hekate heka.

⁶⁹Pa kwatera shɛ zhɛne kanakɛ ŋkɛ zhɛkwa, ma ke sha mbeli nyi tagha: «Ma wəndə nya ne, kwete ŋkɛ wəndəa nci.»

⁷⁰Pa Piyɛre ɗepema Yɛsə zhɛkwa. Temə ɓɛhwɛ kwa sebe ta ŋkɛ ne, ma ke mbeli nyi tagha sha Piyɛre: «Ghəpə yite we, kwete na wəndəa nci, kwa nza ŋkɛ ne, kande Galilɛ na.»

⁷¹Ma ke Piyɛre gezete: «Pa Shala ɗate ɗa kenza nde tseŋwə yasla 'ya, kazeme fela 'ya kaɗema 'ya keɗepe wəndə nya.»

⁷²Taghanyɛ ne, pa ŋələ hekate heka kakwa bake zhigə, ma ke Piyɛre zəzəte ghena nya gezete nda Yɛsə: «Ma nda teheka ŋələ bake zhigə ne, nahe na kegezete maheke zhigə kaɗema na keɗepe ɗa.» Ntake ŋkɛ kanehwene.