Read KapsikiDC Mark 16 Bible Online

Mark 16 - KapsikiDC bible

Mark 16

¹Ma kwa nahe veci kezhɛne mpi ne, pa Mari wəzha ta ka Magdala, Mari meghekɛa Zhake ba'a Salomɛ pave 'wərdə kezha dzeme kasheke te geva ta Yɛsə.

²Masheke masheke vəa ŋkwa demase, samema ta veci ne, cape hɛ kadzeme kwele.

³Ma ke hɛ kwelɛ ghəa nci: «Wa nde tepəŋə ɓəmə pelɛ seyi mɛ tse wa?»

⁴Newe ke hɛ ne, nahe pelɛ nya wəba shɛ kepəŋəmte geva, talɛ ŋwela ŋkɛ.

⁵Pa hɛ dzawa kwelea shɛ, pa hɛ nakɛ kwete mempɛhweta mentishɛ te kwa zeme mbe gare kwa tɛawetɛa, benake hɛ va ghazlənə.

⁶Ama ma ke sha hɛ: «Ghazlənəma yɛ ma, Yɛsə nde Nazarɛt yazele yɛ, nya baŋete mbeli te sheghwə kwa zleŋkwa. Nahe ŋkɛ kesame kwa kwele le mpi, mba ŋkɛ teke we. Newe ma mə, wa nya ŋkwa nya se ŋkɛ te nya.

⁷Kwiɗi mə tsetsenya, geze nda mə ke mbeli nyi ketəkwə təkwə le Piyɛre perə. Mpelɛa tedzawa Galilɛ ŋkɛ ke gheyɛ, kwagha tebegeme yɛ le kala nya gezete ŋayɛ ŋkɛ.»

⁸Pa hɛ same kwa kwele ba'a hwɛnji cakeɗake le kwele, kabare bare hɛ va ghazlənə. Kese hɛ kageze nda ghena shɛ ke yayata wəndə va nya nza ghazlənə kazhɛ nda ke hɛ we.

⁹Ma kwa same Yɛsə kwa kwele le mpi masheke masheke te vecia demase ne, pa ncɛte nda geva ke Mari wəzha ta ka Magdala, nya ŋkamte 'yi'yɛghwə ŋkɛ mberefaŋe shave mbe kaba.

¹⁰Pa nde lə kagezete nda ke mbeli nyi ketəkwə təkwə, teheɗe kema va mbelia shɛhɛ, mbe nehwene hɛ.

¹¹Ma kwa fate hɛ teghweme Yɛsə ba'a nahe nde kenakɛ ŋkɛ ne, kese hɛ kayɛ we.

¹²Kwa sebe ta ŋkɛ, pa Yɛsə ncɛte nda geva ke kweci bake hwa hɛ, le kwete nza tekeleke kwa hweŋkwa hɛ kadzemte.

¹³Pa hɛ se kagezete nda ke kweci, ama pa hɛ ɗema yɛ shanda.

¹⁴Kwa sebe ta ŋkɛ, pa Yɛsə ncɛte nda geva ke ka ghwene ta ŋkɛ meŋe kwetɛŋeghəmbe vəa ŋkwa nya zeme wəsə kezeme hɛ. Pa ŋkɛ ŋelete hɛ va nya ɗema yɛ va hɛ ba'a va nya nza wənəa nci ntɛaŋe ntɛaŋe, kwa ɗema hɛ yɛ ghena ta mbeli nyi kenakɛ nahe ŋkɛ kesame kwa kwele.

¹⁵Ma ke sha hɛ: «Kwiɗi mə dzeyi te hɛɗi lema, geze nda mə Ghena kwatenca nya ganyɛ ke mbeli pɛtɛ.

¹⁶Ma wəndə nya keyɛte ba'a menete nda batɛme mbeli ne, pələsə tenza ŋkɛ, ama wəndə nya keɗema yɛ, kateve nda geva fete.

¹⁷Wa nyi wəshi kencɛ wəshi nyi ketebeghe mbeli nyi keteyɛhwe nyi: Kateŋka 'yi'yɛghwə hɛ te sləa ɗa, kategeze kweci ghena hɛ.

¹⁸Katekese shishi hɛ le dzeve ta nci, katesa wəsəa kwamasa hɛ, ama katezhɛ nda nde ke hɛ we, katedape dzeve hɛ kənəa ka zereghwe, katembe hɛ.»

¹⁹Ma kwa gezemte nda ghena ŋkɛ ke hɛ kala nya ne, cape Nde sleke ŋkwa Yɛsə kadzeme ghweme, ntishɛ ŋkɛ te kwa zeme ta Shala.

²⁰Cape mbeli nyi ketəkwə təkwə kalə kazlape Ghena kwatenca nya ganyɛ dzeyi te yayata ŋkwa. Nahe Nde sleke ŋkwa kemenete slene le hɛ, nahe ŋkɛ kencɛte nda kaganda ta ghena nya zlape hɛ ke hɛ laka wəshi kencɛ wəshi nyi mene hɛ.