Read KapsikiDC Mark 2 Bible Online

Mark 2 - KapsikiDC bible

Mark 2

¹Kwa sebe ta hɛ ɓɛhwɛ ne, pa Yɛsə zhɛneke geva kadzembe Kapɛrnawəm, fa mbeli ne, ki ghɛ ŋkɛ.

²Kwele kwele mbeli tseneke geva te wəndə te wəndə dzeghwa mbeli kwa ɗema ŋkwa shɛ ya pelɛke kwa degha. Pa Yɛsə tekete nda wəsə ke hɛ.

³Pa kweci mbeli se shɛ le nde mte mtea geva, mbeli wəfaɗe ka kele ŋkɛ.

⁴Ama kashɛ hɛ kele ŋkɛ kadzawa kema ta Yɛsə va wəba ta mbeli we. Pa hɛ ŋate ŋkwa te dɛɓere nya kənəa cɛ yipə yipə le ŋkwa nya nza Yɛsə, pa hɛ keleghe nde mte mtea geva te gezle ta ŋkɛ dzawa te wəfela nya ŋate hɛ te dɛɓere nya kənəa cɛ.

⁵Ma kwa nakɛ yɛ ta mbelia shɛhɛ Yɛsə, ma ke sha nde mte mtea geva: «Wəzege ta ɗa, nahe jaɗafa ta ŋa kekelemte geva te wənə.»

⁶Ma ke kweci ka rafe wəsə mahalegə nyi tagha mentishɛ zəzəte mbe ghəa nci:

⁷«Tsema geze ghena wəndə nya kala nya wa? Shala yaŋele ŋkɛ wəka? Wa nde nza kakelemte jaɗafa te wənə, keɗema deke Shala wa?»

⁸Nahe Yɛsə keɗepe wəsə nya zəzə hɛ taghanyɛ, ma ke sha hɛ: «Wa raberə nda nza zəzə nya kala nya mbe ghəa ŋayɛ wa?

⁹Wa ya dekwede ma wa? Geze: Nahe jaɗafa ta ŋa kekelemte geva te wənə na, na, geze: Sate te ŋkwa, kelete gezle ta ŋa ba'a dzeghwa na?

¹⁰Ama kaɗe 'ya kaɗepe yɛ berete ya va Wəzege ta za kezha kelemte jaɗafa ta mbeli te wənə kwake te hɛɗi.» Ma ke gezete nda ke nde mte mtea geva:

¹¹«Ma 'ya sha gha ne, sate ŋa, kelete gezle ta ŋa, kwiɗi sha ghɛa ŋa.»

¹²Te ŋkwa shɛnyɛ, mba mbeli pɛtɛ kanewe, pelɛhetɛme ŋkɛ, laŋe ŋkɛ sha gezle ta ŋkɛ, cape ŋkɛ. Pɛtɛ hɛ heheɓake, ntake hɛ kageze zləvəa Shala, ma ke hɛ: «Kegha gheɓəmə kanakɛ wəsə nya kala nya we.»

¹³Pa Yɛsə zhɛneghe geva dzeyi mɛa ndərəa Galilɛ. Pɛtɛ mbeli tseneke nda geva, pa ŋkɛ tekete nda wəshi ke hɛ.

¹⁴Ma kadzeyi ŋkɛ, pa nakɛ Lɛvi, wəzege ta Alfɛ, mentishɛ te ŋkwa ketsehe jaɓeregwale, ma ke Yɛsə shɛ: «Təkwə təkwə ɗa.» Pelɛhetɛme Lɛvi, pa təkwə təkwəte ŋkɛ.

¹⁵Ma kwa zeme ɗafa Yɛsə ki ghɛa Lɛvi ne, pa ka tsehe jaɓeregwale ba'a ka jaɗafa kwele kwele ntishɛ kənəa ɗafa le Yɛsə ba'a mbeli nyi ketəkwə təkwə ŋkɛ, kwa nza ŋkɛ kwele kwele mbeli kwa sebe ta ŋkɛ.

¹⁶Ma newe ke kweci ka rafe wəsə mahalegə nyi hwa ka Fariziyɛn ne, kazeme ɗafa Yɛsə le ka jaɗafa ba'a ka tsehe jaɓeregwale, ma ke hɛ sha mbeli nyi ketəkwə təkwə: «Tewəmbəreke wa nda zeme ɗafa ŋkɛ le ka tsehe jaɓeregwale ba'a le kweci ka jaɗafa wa?»

¹⁷Nahe Yɛsə kefate ghena shɛ, ma ke: «Wa tsewe va mbeli nyi lɛŋe lɛŋe le dakwəterə wa? Nda mbeli nyi shewə ka ɗe dakwəterə. Kese 'ya kaheka mbeli nyi tiɗiɗi we, ama nyi kaka jaɗafa.»

¹⁸Yewə, kamene səwəmayɛ mbeli nyi ketəkwə təkwə Zhaŋe ba'a ŋa ka Fariziyɛn. Pa mbeli se ka'yɛwe va Yɛsə, ma ke hɛ: «Kamene səwəmayɛ mbeli nyi ketəkwə təkwə Zhaŋe le ŋa ka Fariziyɛn ne, yitea wa ɗema ŋa ŋa mbeli kamene wa?»

¹⁹Ma ke Yɛsə sha hɛ: «Ma zəzə yɛ ne, kaɗema mbeli nyi hekakɛ mbeli yitea makwa kazeme wəsə kezeme tagha za makwa hwa hɛ na? Ewə, ma tagha ŋkɛ hwa hɛ ne, kashɛ hɛ mene səwəmayɛ we.

²⁰Ama katese kwete və nya tekelehwe za makwa mbeli va hɛ, ma kese vəa shɛ ne, katemene səwəmayɛ hɛ.

²¹Wəndə shɛ kantsəzlə zlave mɛnɛfɛ kadzete meha lekwesa we, pɛtɛ tefiwəke meha lekwesa shɛ ŋkɛ, mbake tenza ŋkwahe ta ŋkɛ va zlave mɛnɛfɛa shɛ.

²²Wəndə shɛ ka'yɛ tɛ kwa ghɛni kadzawa slibə hweta nya kameha we, ashɛ katewətətsə slibəa shɛ tɛa shɛ, bətə tɛa shɛ le slibə kanya kwetɛŋe, ama kwa slibə mɛnɛfɛ 'yɛ tɛ kwa ghɛni mbeli.»

²³Te veci kezhɛne mpi ne, pa Yɛsə jive mbe wəvea ha. Ntake mbeli nyi ketəkwə təkwə kaɓele ha dzeyi kwa hweŋkwa.

²⁴Ma ke ka Fariziyɛn sha Yɛsə: «Newe ma, wa raberə mene wəsə nya ndekema ɓəmə hweŋkwa wəsə mahalegəa ɓəmə kamene te veci kezhɛne mpi mbelia ŋa wa?»

²⁵Ma ke Yɛsə sha hɛ: «Kegha gheyɛ kajaŋgate wəsə nya menete David kwa ɗe wəsə kezeme ŋkɛ, vəa ŋkwa nya nza hɛ shewə va ma le mbelia ŋkɛ wəka?

²⁶Pa dzembe ghɛa Shala ba'a zehwe ɗafa nya ndeke nda mbeli ke Shala. Abiyatar ya kawəndə kwelea ka dzeghe Shala te va shɛ. Deke ka dzeghe Shala yandeke nda hweŋkwa wəsə mahalegəa ɓəmə kazeme, ama nahe David kezehwe, nahe ŋkɛ kendeke nda ke mbelia ŋkɛ perə.»

²⁷Ma ke Yɛsə sha hɛ zhɛkwa: «Nahe veci kezhɛne mpi kemenete geva kezha kete wəndə ŋelɛ, kemenete geva wəndə ŋelɛ kezha veci kezhɛne mpi we.

²⁸Vatse nza Wəzege ta za kande sleke veci kezhɛne mpi.»