Read KapsikiDC Mark 4 Bible Online

Mark 4 - KapsikiDC bible

Mark 4

¹Ntake Yɛsə kateke nda wəshi ke mbeli zhɛkwa mɛa ndərəa Galilɛ. Kwele kwele mbeli tsenete geva yite, pa dzawa kwa kwambelə ba'a ntishɛnyɛ. Te ndərə kwambelə mba mbeli pelɛke te hələbə mɛa yɛmə.

²Pa tekete nda ghena kwele kwele ke hɛ le ghena keyipə pa. Ma ke sha hɛ mbe wəshi nyi tekete ŋkɛ:

³«Fa mə, pa kwete wəndə slə kadzemte kezha ŋkisə ha.

⁴Ma vəa ŋkwa nya ŋkisə ha ŋkɛ mbe wəvea ŋkɛ ne, pa kweci betenji kwa hweŋkwa, pa yɛ 'yɛ se ba'a tsehahwe hɛ.

⁵Pa kweci menji hwa pelɛ, te ŋkwa nya dewə hɛɗi. Pa hɛ pesenji kahe kahe va nya ɗema hɛɗi kwele kwele te ŋkwa.

⁶Ma kwa ɓele veci ne, pa hɛ ghwelenji va nya dewə yɛ slərə yitea hɛ.

⁷Ma kweci ha shɛhɛ ɓiyitsa ne, hwa tigə menji hɛ. Pa tigəa shɛhɛ kelenji ba'a ŋkweŋkwahemte hɛ. Tagha gɛ, ha shɛ kapate hɛ we.

⁸Pa kweci ha shɛhɛ menji te hɛɗi ganyɛ, pa hɛ pese, kele ba'a menete ghə megela: mahekenemsə ha kwa kweci, ŋkwaŋemsə kwa kweci, gwəmsə kwa kweci.»

⁹Ma ke Yɛsə mbakete: «Fa ghena wəndə nya nza sleme ve!»

¹⁰Ma kwa hendemte geva Yɛsə cakeɗake le mbeli nyighɛ ne, pa kweci mbeli nyi ketene tagha yite le mbeli nyi ketəkwə təkwə meŋe bakeghəmbe 'yɛwete va Yɛsə kezha ncɛte nda zeweve ta ghena keyipə pa nyi ŋkɛ ke hɛ.

¹¹Ma ke Yɛsə sha hɛ: «Nahe Shala kendeke ŋayɛ hweŋkwa kezha ɗepe wəshi nyi tewəfərə te ghəa Meghea ŋkɛ, ama kweci mbeli ne, laka ghena keyipə pa fa wəshi hɛ.

¹²Tsagha ne, kanewe ŋkwa hɛ, kaveregheve hɛ we, kafa ghena hɛ, ama kafave ghena nya mbe hɛ we. Ma kenza ŋkɛ tsagha ne, katezhɛre geva hɛ kase sha Shala ba'a katekelemte jaɗafa ta nci Shala te wənə.»

¹³Ma ke Yɛsə sha hɛ: «Ma keɗema yɛ kafa ghena keyipə pa nya ne, tsema tefa kweci yɛ pɛtɛ wa?

¹⁴Ma nde ŋkisə ha ne, ghena ta Shala yaŋkisə ŋkɛ.

¹⁵Kweci mbeli ne, kala hweŋkwa nya bete kweci ha te hɛ. Ma kwa fate hɛ, pa Satan se kanteɗehwe ghena nya keŋkisəyi geva mbe hɛ.

¹⁶Ma kweci mbeli ne, kala pelɛ nyi betenji ha hwa hɛ hɛ. Ma kwa fate ghena ta Shala hɛ, pa hɛ yɛte ŋkɛ le zlama.

¹⁷Ama kapele ŋkɛ hɛ kaha slərə mbe hɛ we, deke kezha və ɓɛhwɛ nza hɛ. Ma kese yaka kadzete hɛ ba'a kenza mbeli kaghweze mɛ hwa hɛ tewəmbəreke ghena ta Shala ne, te ŋkwa shɛnyɛ teɗe hɛ.

¹⁸Ma kweci mbeli zhɛkwa kala ha nyi kebetenji hwa tigə tsawete geva ghena shɛ mbe hɛ, pa hɛ fate ghena,

¹⁹ama zəzə ta wəshi nyi te hɛɗi nya ba'a sla ntsə yitea mcɛlə nyi keghwete ŋkwa zhiɓəaghe geva kənəa ghena shɛ, shaŋe ŋkɛ kamene wəsə ya ci'a.

²⁰Nahe kweci mbeli kenza kala ha nyi ketsawete geva te hɛɗi ganyɛ ne, pa hɛ fate ghena, pa hɛ fave, yate ya, gwəmsə ya ta kwete, ŋkwaŋemsə ŋa kwete, mahekenemsə ŋa kwete.»

²¹Ma ke Yɛsə sha hɛ: «Wəndə shɛ kandə ghwə kwa paterela kezha dzəɓə wəsə kənə keɗema kezha ve ŋkɛ mbeyitere gezle we. Ama pelɛ ghəa ŋkwa ve mbeli yitea newe ŋkwa pɛtɛa mbeli nyi mbe cɛ yite.

²²Pɛtɛ tencɛ geva wəshi nyi tewəfərə, pɛtɛ tencɛ geva zeweve ta ghena nya ɗema mbeli kancɛ.

²³Ma kenza sleme va wəndə kafa ghena ne, fa ghena ŋkɛ.»

²⁴Ma ke Yɛsə sha hɛ zhɛkwa: «Ntsehwele mə yitea ghena nya fa yɛ. Wəsə nya se yɛ kamene nda ke kweci mbeli yatemene ŋayɛ Shala deŋwa, kwele ma temene geva ŋkɛ.

²⁵Kwa nza ŋkɛ, ma wəndə nya nza wəshi ve ne, katemtsehe nda wəshi mbeli, ama wəndə nya ɗema wəsə ve, ya nya ɓɛhwɛ nya ve ŋkɛ ne, katekele mbeli ve.»

²⁶Ma ke Yɛsə: «Wa nya wəsə nya keyipə Meghea Shala nya: pa wəndə ŋkisəte ha te wəvea ŋkɛ.

²⁷Ya gheŋkɛ nza yitea hɛ keɗema meslete heviɗi ba'a heveci ne, kapese ha ba'a kakele ŋkɛ, ama keɗepe ŋkɛ tsema tsema mene geva ŋkɛ we.

²⁸Hɛɗi nde pesete ha shɛ le ghəa ŋkɛ kaba, kwa sebe ta ŋkɛ, ghəa ha, ba'a ha megela kwa kenehe nehe.

²⁹Ma kwa nehe ha, nda kele hwətə mbeli katsa kwa nakanyɛ və ketsa ha.»

³⁰Ma ke Yɛsə zhɛkwa: «Le wa nza gheɓəmə kayipəte Meghea Shala tse wa? Laka nyama ghena keyipə pa nza gheɓəmə kancɛte tse wa?

³¹Kala ya ta balepale ŋkɛ, ma kwa tsawame ŋkɛ mbeli mbe hɛɗi ne, gheŋkɛ ya ɓɛhwɛ ma hwa pɛtɛa ya ta wəshi nyi te hɛɗi lema.

³²Ama kwa tsawete mbeli ne, kakele ŋkɛ kanza kwele ma ke pɛtɛa wəshi nyi zeme mbeli, kapesle dzeve ŋkɛ wəbake, wərə yɛ 'yɛ kapate ghɛa nci mbe shenaŋkwe ta ŋkɛ.»

³³Laka mama ta ghena keyipə pa kwele kwele gezete nda ghena ŋkɛ ke hɛ yipə yipə le wəsə nya nza hɛ kapesle kafate.

³⁴Kese ŋkɛ kageze nda ghena ke hɛ kaɗema le ghena keyipə pa we. Ama kwa nza ŋkɛ kwetɛŋenyɛ le mbeli nyi ketəkwə təkwə ne, pɛtɛ ŋkɛ ncɛmte nda zeweve ta ghena shɛ ke hɛ.

³⁵Ma hetɛhwɛɗi te vecia shɛnyɛ, ma ke Yɛsə sha mbeli nyi ketəkwə təkwə: «Mbi ɓəmə kajive kwete kema ta hələ.»

³⁶Pa hɛ slənji hwa tsene ta mbeli nyighɛ. Pa mbeli nyi ketəkwə təkwə keleghe Yɛsə le kwambelə nya nza ŋkɛ kwa. Tagha kweci kwambelə dekwede yite.

³⁷Ntake sefə nya wəba kavɛ le berete, ntake yɛ gaŋkeɓe ta yɛmə kasheke geva kadzawa kwambelə, takwa takwa nde kaviɗi.

³⁸Li zeweve ta kwambelə Yɛsə yitea hɛ te wəsə keve ghə ta ŋkɛ. Pa hɛ feɗeghete ŋkɛ, ma ke hɛ shɛ: «Nde sleke ŋkwa, gheɓəmə kaza, ashɛ katsakɛ ŋa wəka?»

³⁹Pa Yɛsə feɗeghe, pa ŋkɛ ntsehete nda ŋzle ke sefə le berete. Ma ke sha yɛmə nya kwa ndərə: «Divə na, nza gweŋe.» Pa sefə gweɗakwe, tikə tikə ŋkwa.

⁴⁰Ma ke Yɛsə sha mbeli nyi ketəkwə təkwə: «Va wa ghazlənə yɛ wa? Kenaka yɛ kayɛte Shala wəka?»

⁴¹Ama kwele kwele ghazlənənji hɛ, ma ke hɛ kwelɛ ghəa nci: «Wa nya hwelefe ta wəndə nda fa nda ghena yɛ sefə le yɛmə wa?»