Read KapsikiDC Mark 6 Bible Online

Mark 6 - KapsikiDC bible

Mark 6

¹Pa Yɛsə slənyɛ te nyagha ŋkwa kalə kadzembe meleme nya kele ŋkɛ, pa mbeli nyi ketəkwə təkwə begheghe ŋkɛ.

²Ma te veci kezhɛne mpi ne, ntake ŋkɛ kateke nda wəshi ke mbeli mbe cɛ kesəkwə ghə. Mbeli kwele kwele nyi kefate ghena ta ŋkɛ ne, heheɓake hɛ. Ma ke hɛ: «Tema seke nda se ntsehwele nyi wa? Wa nde ndeke nda ntsehwele ba'a berete kemene wəshi meŋele nyi wa?

³Ashɛ gheŋkɛ ya kande feɗe sheghwə, wəzege ta Mari, menəyɛa Zhake, Zhozɛs, Zhəwde ba'a Simon wəka? Ashɛ teke ŋwalea kwɛa meghekɛ hwa gheɓəmə wəka?» Gheŋkɛ nde zhɛrenyɛ kawəsə nya teɗe hɛ ve.

⁴Ma ke Yɛsə sha hɛ: «Kwele yave nda mbeli ke nde mɛ ŋkwa ya tema tema, ama mbe meleme nya ya ŋkɛ hwa ka menəhɛnyɛ, ki ghɛa ŋkɛ, kwele shɛ ve we.»

⁵Kekemave hweŋkwa kemene wəshi meŋele ŋkɛ ya kwetɛŋe we, deke kweci ka zereghwe ɓɛhwɛ yakwaɗakɛ hɛ ŋkɛ le dzeve kambete hɛ.

⁶Heɓake ŋkɛ va nya ɗema yɛ va hɛ. Pa Yɛsə lə kateke nda wəshi ke mbeli mbe kweci meleme nyi dzeyi yite.

⁷Pa ŋkɛ tsenete mbelia ŋkɛ meŋe bakeghəmbe, pa ŋkɛ ndeke nda berete te ghəa 'yi'yɛghwə ke hɛ, pa ghwenakɛ hɛ bake bake.

⁸Ma ke gezete nda ke hɛ: «Mba yɛ kekele kwete wəsə yitea dzeghwa shɛ deke geta, mba yɛ kekele ɗafa, ya slibə ŋkɛ, ya cɛdɛ kwa slibəa ŋayɛ.

⁹Seɗete mə tsahwa sla, mba yɛ kele lekwesa bake.»

¹⁰Ma ke sha hɛ zhɛkwa: «Ma kentsehe yɛ mbe meleme ne, nza mə ki ghɛa wəndə nya kekemaneve ŋayɛ, vaŋe te veci nya teslə yɛ te ŋkwa shɛ.

¹¹Ma keɗema mbeli kekemaneve ŋayɛ ba'a keɗema hɛ kefate ghena ta ŋayɛ ne, slə ŋayɛ mə te ŋkwa shɛ, bekwemte mə keləwə nya te seɗa ta ŋayɛ, gheŋkɛ nde tencɛ nda fete ta nci ke hɛ.»

¹²Cape mbeli nyi ketəkwə təkwə kalə kageze nda ke mbeli kezha zhɛrete nza ta nci hɛ.

¹³Pa hɛ ŋkamte 'yi'yɛghwə kwele kwele shave mbe mbeli, mbete ka zereghwe kwele kwele laka sheke n'yi kənəa hɛ.

¹⁴Pa meghe Hɛrode fate zləvəa Yɛsə, kwa nza ŋkɛ na sləa ŋkɛ kentsehe te yayata ŋkwa. Ma ke kweci mbeli: «Zhaŋe Batiste nde samenyɛ kwa kwele le mpi, vatse nza berete kemene wəsə meŋele ve.»

¹⁵Ma ke kweci: «Ɛli.» Ma ke kweci zhɛkwa: «Nde mɛ ŋkwa ŋkɛ kala ka mɛ ŋkwa nyi vəashi.»

¹⁶Ma kwa fate Hɛrode, ma ke: «Zhaŋe Batiste nya slamte ghə 'ya te nde samenyɛ kwa kwele le mpi na?»

¹⁷Kwa nza ŋkɛ Hɛrode le ghəa ŋkɛ nde gezete nda ke mbeli kakese Zhaŋe ba'a kave ŋkɛ kwa daŋgayɛ tewəmbəreke Hɛrodiyade nya wəmeve ŋkɛ kamale ya tsema nza nde kamale ta Filipe, menənyɛ.

¹⁸Kwa nza ŋkɛ ma ke Zhaŋe sha Hɛrode: «Kehi na kakele male ta wəza meyɛ ŋa we.»

¹⁹Kazhɛ nda zlɛ ke Hɛrodiyade va Zhaŋe, kaɗe nde kapesle ŋkɛ, ama ŋkwa nta te we.

²⁰Kwa nza ŋkɛ ne, kaghazlənə Hɛrode va Zhaŋe, kwa ɗepe ŋkɛ nahe ŋkɛ kenza kawəndə nya tiɗiɗi ba'a nya keveyi geva tekeleke. Tagha gɛ, pa yakɛ ŋkɛ. Ma kwa fa ghena ta ŋkɛ ŋkɛ ne, kwele kwele tazenyɛ mehele ta ŋkɛ. Ndagwara kaɗe ŋkɛ kafa ghena ta ŋkɛ.

²¹Pa kwete hɛ menete geva zlɛcɛ le nya ɗe Hɛrodiyade, veci kemene gəsəkəa ya ta Hɛrode. Pa ŋkɛ menete wəsə kezeme kezha mbelia jama, mbeli nyi te ghəa ka sewajɛ ba'a mbeli nyi nza zləvə te hɛ te hɛɗia Galilɛ.

²²Pa wəzha ta Hɛrodiyade dzembe cɛa shɛ kawetsete wetse, gwəfə ghəa Hɛrode yite le mbeli nyi hekakɛ ŋkɛ. Ma ke meghe sha wəzha shɛ: «'Yɛwe wəsə nya ɗe na va 'ya, kave ŋa ŋkɛ 'ya.»

²³Ma ke zemete nda fela: «Ma yayata nya 'yɛwe na va 'ya ne, kave ŋa wəsə shɛ 'ya, ya kwete kwa bake ta hɛɗi meghea ɗa ŋkɛ.»

²⁴Pa wəzha shɛ shave sha meghekɛ, ma ke 'yɛwete ve: «Wa yahi 'ya ka'yɛwe wa?» Ma ke shɛ: «Ghəa Zhaŋe Batiste.»

²⁵Pɛkwe wəzha nyagha kahe kahe zhɛneke geva sha meghe, ma ke 'yɛwete: «Kaɗe 'ya tsetsenya kandeke ɗa ghəa Zhaŋe Batiste na te parantɛ.»

²⁶Kwele kwele zhɛ nda wənəa meghe, ama kashɛ ɗema va fela nya zemete ŋkɛ te kema ta mbeli nyi hekakɛ nyi ŋkɛ we.

²⁷Pa ŋkɛ ghwenakɛ kwete sewajɛa ŋkɛ te ŋkwa shɛnyɛ le ghena kalə kasla ghəa Zhaŋe. Cape sewajɛa shɛ lə kadzawa daŋgayɛ kasla ghəa Zhaŋe.

²⁸Pa ŋkɛ keleke ghəa shɛ te parantɛ kandeke nda ke wəzha shɛ, pa wəzha shɛ ndeke nda ke meghekɛ.

²⁹Ma kwa fate mbeli nyi ketəkwə təkwə Zhaŋe ne, pa hɛ se kakelete geva ta ŋkɛ kaveyi kwa kwele.

³⁰Pa ka ghwene ta Yɛsə zhɛneke geva kase shɛ ba'a gezete nda pɛtɛa wəshi nyi menete hɛ ba'a nyi tekete nda hɛ ke mbeli pɛtɛ.

³¹Kase nyighɛ ne, kaslə nyighɛ mbeli kwele kwele sha Yɛsə shaŋe hɛ kakemave və kezeme wəsə kezeme. Vatse gɛ, ma ke sha hɛ: «Mbi ɓəmə kalə te ŋkwa nya ɗema mbeli kezha zhɛne mpi ɓɛhwɛ.»

³²Cape hɛ kwa kwambelə kaghəa nci kalə kadzete ŋkwa nya ɗema mbeli.

³³Ama kwele kwele mbeli nyi kenakɛ nda lə ŋkɛ. Nahe hɛ keɗepete ŋkwa shɛ, kwesayɛ hɛ le hwɛ kalə le seɗa shave mbe meleme pɛtɛ kadzete ŋkwa shɛ, mpelɛa ma hɛ ke yɛ Yɛsə le mbelia ŋkɛ.

³⁴Ma kwa same Yɛsə kwa kwambelə ne, pa nakɛ mbeli tetsene kwele kwele. Ntake helia ŋkɛ kazhɛ nda yitea hɛ, kwa tsenete geva hɛ kala timɛti nyi ɗema wəndə keya hɛ shɛ. Ntake ŋkɛ kateke nda wəshi ke hɛ kwele kwele.

³⁵Ma kwa se tɛhwɛɗi ne, pa mbeli nyi ketəkwə təkwə se sha Yɛsə, ma ke hɛ shɛ: «Hetɛhwɛɗi ŋkwa, ŋkwa nya ne, hwa gamba ŋkɛ.»

³⁶Geze nda ke mbeli nyi kaslə hɛ kazele wəsə kezeme dzeyi mbe meleme ba'a yɛ ghedəkwə nyi dekwede teke.

³⁷Ma ke Yɛsə sha hɛ: «Ɗave nda mə wəshi kezeme ke hɛ le ghəa ŋayɛ.» Ma ke hɛ sha Yɛsə: «Kaɗe na kalə ghen'yɛ kapave ɗafa te slibə bakemsə kezha ve nda ke hɛ kazeme na?»

³⁸Ma ke Yɛsə sha hɛ: «Ŋkwini 'yɛmbe dəghwəa ɗafa va gheyɛ wa? Kwiɗi mə newakɛ mə.» Ma kwa neweve hɛ ne, ma ke hɛ shɛ: «Deke 'yɛmbe dəghwəa ɗafa mcɛfe ba'a kelepe bake ya va ghen'yɛ.»

³⁹Ma kwa sebe ta ŋkɛ, pa geze nda ke hɛ kezha geze nda hɛ ke mbeli kantishɛnji kewəvəsə kewəvəsə te gwəzə nyi menjaɓa tagha.

⁴⁰Pa hɛ ntishɛ gwəmsə kweci, mcɛfemsə kweci.

⁴¹Pa Yɛsə kelete 'yɛmbe dəghwəa ɗafa nyi mcɛfe ba'a kelepe nyi bake. Pa ŋkɛ kafete kema yitea ghweme, tsate nda ŋ'wese ke Shala, neheve ɗafa shɛhɛ mbe ba'a ndeke nda ke mbeli nyi ketəkwə təkwə kezha nehe nda ke mbeli. Pa ŋkɛ neheve nda kelepe nyi bakea shɛhɛ ke hɛ pɛtɛ.

⁴²Pa yayata wəndə zehwe behe.

⁴³Pa mbeli pɛrekɛ kwaciga meŋe bakeghəmbe le kwetiɓəa ɗafa ba'a kelepe nyi ketene.

⁴⁴Ma mbeli nyi kezehwe ɗafa shɛ ne, zhili slibə mcɛfe.

⁴⁵Te ŋkwa shɛnyɛ kwa sebe ta ŋkɛ ne, pa Yɛsə veyi mbeli nyi ketəkwə təkwə kwa kwambelə kezha jive kema ta ndərə hɛ mpelɛa ma, laka meleme Bɛtesayida, vəa ŋkwa nya geze nda ŋkɛ ke mbeli kalə sha ghɛ.

⁴⁶Ma kwa beghemte mbeli ŋkɛ ne, pa dzemenyɛ hwa ghweme kezha səkwə Shala.

⁴⁷Ma kwa se tɛhwɛɗi, nahe kwambelə kenza te tepe ta ndərə, mba Yɛsə pelɛke te hɛɗi kwetɛŋenyɛ.

⁴⁸Newe ke ne, ka'yɛ mbelia ŋkɛ sefə le kwambelə kwa vɛ ŋkɛ kadzeghəa hɛ. Ma takwa ŋkwa kakiɗi, pa ŋkɛ lə sha hɛ le dzeghwa te yɛmə le seɗa, weli kezlakemte hɛ ŋkɛ.

⁴⁹Ma kwa nakɛ ŋkɛ hɛ kadzeghwa te yɛmə, mte ke hɛ sha ŋa nci, kɛake hɛ sha lewela.

⁵⁰Kwa nza ŋkɛ pɛtɛa nci kenakɛ, benake hɛ va ghazlənə. Ama kahe kahe ŋkɛ gezete nda ghena ke hɛ, ma ke sha hɛ: «Hwepete mə ghə, 'ya ŋkɛ, ghazlənəma yɛ ma!»

⁵¹Pa dzawa kwambelə yitea hɛ, gweɗakwe sefə. Heheɓake mbeli nyi ketəkwə təkwə, kwele kwele bezenji mehele ta nci.

⁵²Kwa nza ŋkɛ ne, kefave wəsə meŋele nya menete ŋkɛ le ɗafa hɛ we, ntɛaŋe ntɛaŋe ghəa nci.

⁵³Pa hɛ zlakemte ndərə ba'a ntsehe te hɛɗia Zhɛnɛzarɛt, te ŋkwa nya hwepeyi kwambeləa nci hɛ.

⁵⁴Samema ta nci kwa kwambelə tsagha ne, nahe mbeli keɗepete Yɛsə.

⁵⁵Pa hɛ dzeyi mbe pɛtɛa hɛɗia shɛ ba'a fəke ka zereghwe te gezle ta nci, te ŋkwa nya fate hɛ tagha Yɛsə.

⁵⁶Mbe meleme nyi jama jama, nyi ɓɛhwɛ ɓɛhwɛ ba'a ghedəkwə nyi dzembe ŋkɛ ne, katsene nda ka zereghwe mbeli, kasəkwə hɛ ve kezha kwaɗe ya deke mɛa lekwesa ta ŋkɛ hɛ. Ma yayata wəndə nya kekwaɗakɛ ne, pələsə ŋkɛ.