Read KapsikiDC Mark 8 Bible Online

Mark 8 - KapsikiDC bible

Mark 8

¹Ma te kwete hɛ zhɛkwa, pa mbeli tsenete geva kwele kwele yitea Yɛsə. Ma kwa ɗema wəsə kezeme va hɛ ne, pa Yɛsə hekakɛ mbeli nyi ketəkwə təkwə, ma ke sha hɛ:

²«Kazhɛ ɗa heli yitea mbeli nyi, kwa nza ŋkɛ mahekene hɛa nci teke yitea 'ya, wəsə kezeme va hɛ ya ɓɛhwɛ we.

³Ma keŋkaghe hɛ 'ya kalə sha ghɛa nci tse le ma ne, kaŋzla kweci kwa hweŋkwa va dewə berete, kwa nza ŋkɛ kwele kwele nyi kese cakeɗake hwa hɛ.»

⁴Ma ke mbeli nyi ketəkwə təkwə shɛ: «Tema nza wəndə kakemave wəshi kezeme kaketekɛ hɛ te ŋkwa nya kaɓerama nya wa?»

⁵Ma ke Yɛsə 'yɛwete va hɛ: «Ŋkwini 'yɛmbe dəghwəa ɗafa va gheyɛ wa?» Ma ke hɛ: «Mberefaŋe.»

⁶Pa ŋkɛ geze nda ke mbeli kantishɛ te hɛɗi. Pa ŋkɛ kelete 'yɛmbe dəghwəa ɗafa nyi mberefaŋea shɛhɛ ba'a tsate nda ŋ'wese ke Shala, pa neheve hɛ mbe, pa ŋkɛ ndeke nda hɛ ke mbeli nyi ketəkwə təkwə kezha nehe nda ke mbelia shɛhɛ. Pa hɛ menete tsagha.

⁷Kweci kelepe ya shɛ tagha zhɛkwa ɓɛhwɛ. Pa Yɛsə tsate nda ŋ'wese ke Shala kezha kelepea shɛhɛ, pa geze nda ke mbeli nyi ketəkwə təkwə kanehe hɛ perə.

⁸Pa hɛ zehwe behe behe, pa mbeli nyi ketəkwə təkwə tsenete kwetiɓəa ɗafa nyi ketene kakwaciga mberefaŋe.

⁹Ndagwara gare slibə wəfaɗe mbelia shɛhɛ. Kwa sebe ta ŋkɛ, pa Yɛsə zhɛneghe hɛ kalə sha ghɛ.

¹⁰Shilimə ŋkɛ kwa kwambelə taghanyɛ le mbeli nyi ketəkwə təkwə kalə kadzete hɛɗia Dalmanəwta.

¹¹Pa kweci ka Fariziyɛn se kazhɛne ghəpə le Yɛsə kezha ŋa nda keleŋa. Pa hɛ 'yɛwete wəsə kencɛ wəsə ve kezha newe kenza nde sawa pelɛ ghweme va Shala sawa berete ta ŋkɛ.

¹²Pa Yɛsə gafete gafe le berete, ma ke: «Kezha wa 'yɛwe wəsə kencɛ wəsə mbeli nyi tsetse ŋkwa nyi wa? Kaganda ne, ma 'ya sha gheyɛ: wəsə kencɛ wəsə shɛ katenakɛ hɛ we.»

¹³Pa ŋkɛ slənyɛ yitea hɛ ba'a dzawanyɛ kwa kwambelə kezha jive kwete hələbəa ndərə.

¹⁴Pa mbeli nyi ketəkwə təkwə Yɛsə zaghəyite kele ɗafa, deke 'yɛmbe dəghwəa ɗafa kwetɛŋe ya va hɛ kwa kwambelə.

¹⁵Ma ke Yɛsə gezete nda ghena ke hɛ: «Ntsehwele mə yitea ghəa ŋayɛ va tenjɛne ta ka Fariziyɛn ba'a ŋa Hɛrode.»

¹⁶Ntake mbeli nyi ketəkwə təkwə kaghəpə kwelɛ ghəa nci va nya ɗema hɛ kekelete ɗafa.

¹⁷Nahe Yɛsə keɗepe ghena nyi geze hɛ, ma ke 'yɛwete va hɛ: «Tewəmbəreke wa geze yɛ, va nya ɗema ɗafa va gheɓəmə, pe yɛ wa? Kenaka yɛ kafa wəsə kaba wəka? Kefave wəsə yɛ kaba wəka? Ntɛaŋe ntɛaŋe ghəa ŋayɛ tsape ka?

¹⁸Ntsə ya kwa ghə va gheyɛ, kanewe ŋkwa yɛ wəka? Sleme ya va ghə va gheyɛ, kafa ghena yɛ wəka? Nahe yɛ kezaghəyite ghena:

¹⁹ma 'yɛmbe dəghwəa ɗafa nyi mcɛfe nyi nehave nda 'ya ke mbeli slibə mcɛfe ne, ŋkwini pɛrekɛ kwaciga yɛ le kwetiɓəa ŋkɛ wa?» Ma ke hɛ: «Meŋe bakeghəmbe.»

²⁰Ma ke Yɛsə zhɛkwa: «Ma kwa nehave nda 'yɛmbe dəghwəa ɗafa 'ya mberefaŋe ke mbeli slibə wəfaɗe ne, ŋkwini kwaciga pɛrekɛ yɛ le kwetiɓəa ŋkɛ wa?» Ma ke hɛ: «Mberefaŋe.»

²¹Tagha gɛ, ma ke Yɛsə sha hɛ: «Tsema ɗema yɛ kazəzəte wəsə wa?»

²²Ma kwa ntsehe hɛ mbe Bɛtesayida ne, pa mbeli keleke nda kwete wəndə kaghwələ ke Yɛsə, ntake hɛ kampi nda dzeve kezha kwaɗe wəndəa shɛ ŋkɛ.

²³Pa Yɛsə keseve wəndəa shɛ te dzeve ba'a shavenyɛ mbe meleme le, pa ntifəyi ndɛghwɛɗɛ te ntsə ta ŋkɛ, pa vaghe dzeve kənə, ma ke 'yɛwete ve: «Kanewe ŋkwa na tse yi?»

²⁴Wereɗɛŋe ke sha ntsə, ma ke: «Mbe newe mbeli 'ya ngərə ngərə kala wəfe, ama mbe dzeghwa hɛ.»

²⁵Pa Yɛsə zhɛne kaveyi dzeve te yɛ ntsə ta ŋkɛ, ntake wəndəa shɛ kanewe ŋkwa tiɗiɗi te kema ta ŋkɛ: nahe ŋkɛ kenza pələsə, ghwɛaɗɛaɗɛa newe ŋkwa ŋkɛ.

²⁶Ma ke Yɛsə shɛ: «Kwiɗi kata kata sha ghɛa ŋa, mba na kegeze nda ke kwete wəndə.»

²⁷Ma kwa sebe ta ŋkɛ ne, cape yɛ Yɛsə le mbeli nyi ketəkwə təkwə kalə kadzembe meleme nyi ɓɛhwɛ ɓɛhwɛ nyi dzeyi yitea hɛɗia ka Sɛzarɛ Filipe. Ma kwa hweŋkwa hɛ, pa 'yɛwete va mbeli nyi ketəkwə təkwə: «Wa ŋkɛ 'ya ke mbeli sha geze tse wa?»

²⁸Ma ke hɛ shɛ: «Zhaŋe Batiste na, a ke kweci, Ɛli na, a ke kweci ɓiyitsa, kwete ŋkɛ nde mɛ ŋkwa, a ke kweci.»

²⁹Ma ke Yɛsə sha hɛ: «Yewə, take yɛ le ŋa ŋayɛ, wa ŋkɛ 'ya pe yɛ wa?» Ma ke Piyɛre shɛ: «Gha ya kaMɛsi.»

³⁰Pa Yɛsə meɗekɛ hɛ kezha ɗema hɛ kageze nda ke kwete wəndə.

³¹Ma kwa sebe ta ŋkɛ, ntake Yɛsə kateke nda wəshi ke mbeli nyi ketəkwə təkwə, ma ke: «Nda Wəzege ta za kasahwe yaka kwele kwele, katenegha ŋkɛ mbelia jama, mbeli nyi te ghəa ka dzeghe Shala ba'a ka rafe wəshi mahalegə. Katepesle ŋkɛ mbeli, ama kwetere wəmbəa hɛ mahekene ne, katesame ŋkɛ kwa kwele le mpi.»

³²Darahwe rahwe gezete nda ŋkɛ ke hɛ, pa Piyɛre hekaghe ŋkɛ kadzeyi kwetere ŋkwa kezha fɛa kegeze kala nyagha.

³³Tewətelɛwe Yɛsə sha geva kanewe mbeli nyi ketəkwə təkwə, ntake kaŋele Piyɛre, ma ke: «Slə ŋa cakeɗake kwetere wəmbəa ɗa Satan, kwa nza ŋkɛ zəzə ta Shala ya va gha we, ama zəzə ta wəndə ŋelɛ.»

³⁴Kwa sebe ta ŋkɛ, pa Yɛsə hekakɛ mbeli ba'a mbeli nyi ketəkwə təkwə, ma ke sha hɛ: «Ma keɗe wəndə katəkwə təkwə ɗa ne, zaghəyite ghə ŋkɛ yitea ghəa ŋkɛ, heyite ghə ŋkɛ yitea sheghwə kwa zleŋkwa ta ŋkɛ ba'a təkwə təkwə ɗa ŋkɛ.

³⁵Ma wəndə nya keɗe kambele mpia ŋkɛ le ghəa ŋkɛ ne, kateza ŋkɛ. Ama wəndə nya kezamte mpia ŋkɛ tewəmbəreke 'ya ba'a kezha Ghena kwatenca nya ganyɛ ne, katembele ŋkɛ.

³⁶Wa yakete wəndə kemave pɛtɛa mcɛlə nyi te hɛɗi lema kezamte mpia ŋkɛ ŋkɛ wa?

³⁷Wa wəsə nya nza wəndə kambeɗeke mpi te wa?

³⁸Kwa nza ŋkɛ, ma yayata wəndə nya zhɛ nda hawe va 'ya ba'a ghena ta ɗa tsetsenya teke hwa mbeli nyi keɗema Shala, nyi kaka jaɗafa nyi ne, tsagha tezhɛ nda hawe ke Wəzege ta za ve perə, vəa ŋkwa nya tesawa ŋkɛ mbe zləvəa Yitenyɛ le ka ghwene ta Shala nyi ganji.»