Read KapsikiDC Ləwke 10 Bible Online

Ləwke 10 - KapsikiDC bible

Ləwke 10

¹Kwetere wəmbəa ŋkɛ, pa Nde sleke ŋkwa tsehave kweci mbeli mberefaŋemsə bakeghəmbe, pa ghwenakɛ hɛ te kema ta ŋkɛ bake bake kadzembe pɛtɛa meleme ba'a kadzete pɛtɛa ŋkwa nyi hi ŋkɛ kalə kadzete hɛ le ghəa ŋkɛ.

²Ma ke sha hɛ: «Kwele kwele wəshi te wəve, ama dewə ka mene slene kezha mene hɛ kasheke. Səkwə mə wəndə ke wəve kezha ghwene ka mene slene ŋkɛ kezha mene wəshia shɛhɛ kasheke.

³Kwiɗi mə. 'Ya kaghwene ŋayɛ kala zhɛgwəa lɛməa timɛti kadzehwa yɛ makwagwele.

⁴Kelema cɛdɛ, slibə, tsahwa yɛ ma. Ghereŋema yɛ kwa hweŋkwa kezha njiŋwe mbeli ma.

⁵Ma kedzeki ghɛ yɛ ne, ma pe yɛ sha geze kaba: Kwelɛŋe ke ghɛ nya.

⁶Ma kenza ŋkɛ wəndəa kwelɛŋe ya ki ghɛa shɛ ne, katenza kwelɛŋea ŋayɛ le wəndəa shɛ. Ma keɗema ŋkɛ tsagha ne, zhɛnehwe mə kwelɛŋea ŋayɛ.

⁷Nza mə ki ghɛ nya kemaneve ŋayɛ mbeli, zeme mə ba'a sa mə wəsə nya ve ŋayɛ mbeli, kwa nza ŋkɛ nahe ŋkɛ kehi kakemave zhɛme ta ŋkɛ nde mene slene. Dzeghwama yɛ keghɛ keghɛ ma.

⁸Ma mbe yayata meleme nya dzembe yɛ ba'a nya kemaneve ŋayɛ mbeli mbe ne, zeme mə wəsə nya ve ŋayɛ mbeli.

⁹Mbe mə ka zereghwe nyi mbe melemea shɛ. Ma pe yɛ sha geze nda ke mbeli: Nahe Meghea Shala kehendeke geva yitea gheyɛ.

¹⁰Ma kelə yɛ kadzembe kwete meleme, nda ɗema mbeli kekemaneve ŋayɛ mbe ne, lə ŋayɛ mə te ŋkwa kebeke, ma pe yɛ sha geze:

¹¹Ya keləwəa meleme ta ŋayɛ nya te seɗa ta n'yɛ ne, kabekwe ŋayɛ ŋkɛ ghen'yɛ. Ama ɗepete mə tiɗiɗi, nahe Meghea Shala kehendeke geva yitea gheyɛ.

¹²Kaganda ne, ma 'ya sha gheyɛ: ma vəa ŋkwa nya temeha ghwə Shala te mbeli ne, kwele ma tenza ɗa te melemea shɛ ke ka Sodome.

¹³Ndiremi ya te gha Korazɛn! Ndiremi ya te gha Bɛtesayida! Ma ya mbe Tir ba'a Sidon menete geva wəshi meŋele nyi kemenete geva mbe gheyɛ ne, nza ɓeshi hwepeyi zewe hɛ hwa hwə ba'a behwemte geva mbeli nyi mbe melemea shɛhɛ le pəsəɗə kezha mpi dzeve we.

¹⁴Kaganda deŋwa, ma veci nya temeha ghwə Shala te mbeli, ɓɛhwɛ ma tesa yaka Tir ba'a Sidon ke gheyɛ.

¹⁵Gha le ŋa ŋa gɛ Kapɛrnawəm, hwa'a pelɛ ghweme tedzeme 'ya, pa sha ŋa ŋa na? Hwa'a kwa ghɛa mbelia kwahɛɗi teteɗe na.»

¹⁶Ma ke sha mbeli nyi ketəkwə təkwə zhɛkwa: «Ma wəndə nya kefa ŋayɛ ghena ne, 'ya yafa ɗa ghena ŋkɛ. Ma wəndə nya keɗema ntsə ta ŋayɛ ne, 'ya yaɗema ntsə ta ɗa ŋkɛ perə. Ma wəndə nya keɗema ɗa ne, wəndə nya keghweneke ɗa yaɗema ŋkɛ.»

¹⁷Pa mbeli nyi mberefaŋemsə bakeghəmbe nyi ghwenakɛ Yɛsə zhɛneke geva le zlama. Ma ke hɛ: «Nde sleke ŋkwa, pa le 'yi'yɛghwə kefate n'yɛ ghena vəa ŋkwa nya geze nda ghen'yɛ ke hɛ kaslə mbe mbeli te sləa ŋa.»

¹⁸Ma ke Yɛsə sha hɛ: «Nahe 'ya kenakɛ Satan kateɗe sawa pelɛ ghweme kala slesla ta va.

¹⁹Fa mə: nahe 'ya kendeke ŋayɛ berete keŋkeɗe yɛ shishi ba'a yɛ yite, kehərə pɛtɛa berete ta nde ghema, wəsə shɛ katemene ŋayɛ wəsə kwa ndiremi we.

²⁰Ama zlamama yɛ va nya fate ŋayɛ ghena yɛ 'yi'yɛghwə ma, zlama mə ɓetəkə yitea sləa ŋayɛ nyi kerafete geva pelɛ ghweme.»

²¹Te vəa shɛnyɛ, fare fare wənəa Yɛsə va Sefəa Shala. Ma ke: «Yita yawe, Nde sleke ghweme ba'a hɛɗi, hana 'ya sha gha kwa ncɛte nda wəshi nyi wəfərəakɛ na va ka ntsehwele ntsehwele ba'a ka ɗepe wəshi na ke ka dewə ŋeli. Kaganda Yita, gha nde ɗete kanza ŋkɛ tsagha.

²²Nahe Yiteyɛ ɗa kedapate ɗa pɛtɛa wəshi te dzeve, wəndə shɛ keɗepe Wəzege keɗema Yita we, wəndə shɛ keɗepe Yita keɗema Wəzege we, nda wəndə nya ɗe Wəzege kancɛ nda ŋkɛ.»

²³Pa Yɛsə zhɛrete geva laka mbeli nyi ketəkwə təkwə. Ma ke sha hɛ kaghəa nci: «Zlama ya va gheyɛ kanewe wəshi nyi newe nyi yɛ.

²⁴Kaganda ne, ma 'ya sha gheyɛ: kwele kwele ka mɛ ŋkwa ta Shala ba'a kweci ka meghe nyi keɗe kanewe wəshi nyi newe yɛ, ama kenakɛ hɛ we. Kaɗe hɛ kafa ghena nyi fa nyi yɛ, ama kefave hɛ hɛ we.»

²⁵Pelɛhetɛme kwete nde rafe wəsə mahalegə sate. Ma ke sha Yɛsə kezha ŋa nda keleŋa: «Nde sleke ɗa, wa wəsə nya nza 'ya menete kezha kemave mpi nya kaghala ghala wa?»

²⁶Ma ke Yɛsə zhɛnete nda: «Wa nde rafete geva te wəsə mahalegəa ɓəmə wa? Tsema fa na kwa jaŋga na wa?»

²⁷Ma ke wəndəa shɛ: «Ɗe Mahwətə Shala ta ŋa le wənəa ŋa pɛtɛ, mehele ta ŋa pɛtɛ, berete ta ŋa pɛtɛ ba'a zəzə ta ŋa pɛtɛ. Ɗe nde ghedəkwəa ŋa kala nya ghəa ŋa.»

²⁸Ma ke Yɛsə shɛ: «Megela zhɛnete na. Mene kala nyagha, katekemave mpi na.»

²⁹Ama kwa ɗe wəndəa shɛ kancɛ tiɗiɗi ghena 'yɛwete ŋkɛ ne, ma ke sha Yɛsə: «Wa ŋkɛ kande ghedəkwəa ɗa wa?»

³⁰Ma ke Yɛsə zhɛnete nda: «Pa kwete wəndə sawa pelɛ Zhɛrəzalɛm kadzawa Zhɛriko. Ma kwa have nda mpa ka ŋwasle ŋkwa ne, pa hɛ fəhwe yɛ lekwesa ta ŋkɛ, ɗate ŋkɛ ba'a dzeghwanji, sərə ŋkɛ mbe wənə mbe wənə.

³¹Pɛkwe kwete nde dzeghe Shala dzeghwake dzeghwa sawa kwa hweŋkwa shɛ. Ma kwa nakɛ ŋkɛ ne, pa wətəlite hweŋkwa ba'a dzeghwanyɛ.

³²Tsagha shɛnyɛ, pa kwete nde Lɛvi ntsehe te ŋkwa shɛ, pa nakɛ ŋkɛ, wətəlite hweŋkwa ba'a dzeghwanyɛ.

³³Ama pɛkwe kwete nde Samari nya kedzehwa mte ntsehe tagha. Ma kwa nakɛ ŋkɛ ne, ntake helia ŋkɛ kazhɛ nda kwele kwele yitea wəndəa shɛ.

³⁴Pa ŋkɛ hendeke geva, pa gəyi n'yi ba'a tɛ te yɛ zhia ŋkɛ ba'a peɗete hɛ. Pa ŋkɛ vate ŋkɛ te kwara ta ŋkɛ ba'a keleghe ŋkɛ kalə kadzembe ŋkwa kehɛ ta mbeli nyi kedzeghwa ba'a nya newete ghweme te wəndəa shɛ.

³⁵Te hendɛ ta ŋkwa, pa kelete slibə bake ba'a ndeke nda ke wəndə nya kesleke ŋkwa shɛ. Ma ke shɛ: Newe ghweme te wəndə nya, ma vəa ŋkwa nya zhɛne 'ya kase teke ne, kateŋki ŋa wəsə nya zhɛne na kazamte kezha gheŋkɛ 'ya le ghəa ɗa.»

³⁶Ma ke Yɛsə mtsehete ghena shɛ: «Ma sha gha ne, nyama wəndə hwa mbeli nyi mahekene nyi nde se kande ghedəkwəa wəndə nya ɗate nya ka mefətekwə wa?»

³⁷Ma ke wəndəa shɛ shɛ: «Wəndə nya kezhɛakɛ heli yite.» Tagha gɛ, ma ke Yɛsə shɛ: «Kwiɗi ba'a menete kala nyagha.»

³⁸Ma kwa dzeghwa yɛ Yɛsə le mbeli nyi ketəkwə təkwə ne, pa dzembe kwete meleme. Pa kwete male nya nza sləa nta kaMarte kemaneve ŋkɛ ki ghɛa nta.

³⁹Wəzha ta ma nya nza sləa nta kaMari ya ve. Mentishɛ Maria shɛ yitea seɗa ta Nde sleke ŋkwa kafa ghena nya geze ŋkɛ.

⁴⁰Ma Marte ne, kwele kwele dambeghə nda nde yitea wəshi kezeme kata. Pɛkwe nde, ma ke: «Nde sleke ŋkwa, ketsakɛ ŋa ghena ta wəzha ta meyɛ ɗa nya wəka? Kapelakɛ ɗa nde kwetɛŋe ɗa yitea wəshi kezeme kata. Geze nda kakemanakɛ ɗa gi!»

⁴¹Ma ke Yɛsə shɛ: «Marte, Marte, kayirə ŋa na ba'a kadambeghə ŋa na yitea wəshi kwele kwele.

⁴²Ama wəsə kwetɛŋe nde hi. Nahe Mari kentave wəsə nya ganyɛ ma, nya keteɗema kakelehwe geva ve.»