Read KapsikiDC Ləwke 11 Bible Online

Ləwke 11 - KapsikiDC bible

Ləwke 11

¹Te kwete veci, kasəkwə ghə Yɛsə te kwete ŋkwa. Nahema ta səkwə ghə ta ŋkɛ, ma ke kwete wəndəa mbeli nyi ketəkwə təkwə shɛ: «Nde sleke ŋkwa, teke n'yɛ səkwə ghə kala nya tekete nda Zhaŋe Batiste ke mbeli nyi ketəkwə təkwə ŋkɛ.»

²Ma ke Yɛsə sha hɛ: «Ma kenza yɛ kasəkwə ghə ne, ma pe yɛ sha geze: Yita, hawe mbeli va ganyɛa sləa ŋa, sawa Meghea ŋa.

³Ɗave n'yɛ wəsə kezeme behe n'yɛ ve keveci keveci.

⁴Kelemte n'yɛ jaɗafa ta n'yɛ te wənə, kala nya kelemte ŋa mbeli nyi kebezemte n'yɛ ghena ghen'yɛ te wənə. Kelema n'yɛ na kadzete ŋkwa keghwete ŋkwa ma.»

⁵Ma ke sha hɛ ɓiyitsa: «Banda ta ŋkɛ: ya kwete mcɛ ya shɛ kwete wəndəa ŋayɛ. Ntəŋə ŋkɛ kalə shɛ te tepe ta viɗi. Ma ke shɛ: Mcɛ ɗa, 'ya se kasəkwə 'yɛmbe dəghwəa ɗafa mahekene va gha.

⁶Kwa nza ŋkɛ ne, nahe kwete mcɛ ɗa kese kwamte dzeghwa heviɗi nya, wəsə shɛ va 'ya kazeme ŋkɛ we.

⁷Ma ke wəndə nya ki ghɛ shɛ: Ghakɛ ɗa ma na ma. Teŋzle degha, meɓelahe 'ya le ŋwalea ɗa, kashɛ 'ya sate kezha ve ŋa wəsə kezeme we.

⁸Ma 'ya sha gheyɛ: kenza va nya nza ŋkɛ kamcɛnyɛ nda tesate wəndə nyagha yitea ve nda wəshi nyi 'yɛwe ŋkɛ we, ama va nya deneve wəndəa shɛ ŋkɛ.

⁹Yawa ma 'ya ne, ma 'ya sha gheyɛ: 'yɛwe mə, katekemave yɛ, zele mə, katesləyi yɛ, tsa mə mɛa cɛ, katepele ŋayɛ ŋkwa mbeli.

¹⁰Kwa nza ŋkɛ ma yayata wəndə nya ke'yɛwe wəsə ne, katekemave ŋkɛ, nya kezele ne, katesləyi ŋkɛ, katepele nda ŋkwa mbeli ke wəndə nya kemɛ kwa degha.

¹¹Yita ya shɛ hwa gheyɛ, ke'yɛwe kelepe wəzege ta ŋkɛ ve, kateve nda shishi ŋkɛ na?

¹²Ma ke'yɛwe slesle ŋkɛ ne, kateve nda yite ŋkɛ na?

¹³Ma gheyɛ nyi keɗema kambeli ganji, wəshi ganji yave nda yɛ ke ŋwalea ŋayɛ ne, ashɛ za ma teve nda Sefəa ŋkɛ Yiteyɛ ŋayɛ nya pelɛ ghweme ke mbeli nyi ke'yɛwe ve wəka?»

¹⁴Pa Yɛsə ŋkamte 'yi'yɛghwə nya kefɛa ŋkwa kegeze ghena shave mbe kwete wəndə. Ma kwa shavenyɛ ŋkɛ mbe ne, ntake wəndəa shɛ kageze ghena, hehake mbeli nyi tagha va ghena shɛ.

¹⁵Ma ke kweci mbeli hwa hɛ: «Bɛlzɛbəl, meghea 'yi'yɛghwə nde ve nda berete keŋka 'yi'yɛghwə nyi shave mbe mbeli.»

¹⁶Ma ke kweci shɛ kezha ŋa nda keleŋa: «Menete wəsə kencɛ wəsə nya ketencɛ n'yɛ se laka Shala se berete ta ŋa gɛ.»

¹⁷Ama nahe Yɛsə keɗepe ghena nyi zəzə hɛ. Ma ke sha hɛ: «Yayata hɛɗi meghe nya heɗe geva mbelia ŋkɛ, keɗaŋe ta ŋkɛ ne, beze yatebeze ŋkɛ. Pɛtɛa ghɛ nyi mbe hɛɗi meghea shɛ kateŋzlanji.

¹⁸Ma kenza nde Satan nde nehe geva bake mbe kampa kwelɛ ghəa nci ne, kanzate nza meghea ŋkɛ tsagha na? Va nya geze yɛ ne, Bɛlzɛbəl nde ve ɗa berete kaŋka 'yi'yɛghwə mbe mbeli pe yɛ.

¹⁹Ma nda le berete ta Bɛlzɛbəl ŋka yɛ 'yi'yɛghwə 'ya ne, le wa ŋka mbelia ŋayɛ tsagha wa? Mbelia ŋayɛ ka ve ŋayɛ fete tse wəka?

²⁰Ama kenza nde le berete ta Shala ŋka yɛ 'yi'yɛghwə 'ya ne, nahe Meghea Shala kese kadzehwa gheyɛ tsagha.

²¹Ma kenza nde kaya ghɛa ŋkɛ wəndə nya nza berete ve ba'a nya nza wəshi kempa ve ne, kapesle mbeli yitea fə wəshia ŋkɛ we.

²²Ma kese kwete wəndə nya nza berete ve kwele ma ke ŋa ŋkɛ, kehərəte ŋkɛ ne, pɛtɛ fə wəshi kempa ta ŋkɛ nyi zəzə nyighɛ ŋkɛ, pɛtɛ nehemte wəshia ŋkɛ shɛ.

²³Nde jaga ta ɗa wəndə nya keɗema kamcɛ ɗa, kande taze ŋkwa wəndə nya keɗema kakemane ɗa katsene ŋkwa.»

²⁴Ma keshavenyɛ 'yi'yɛghwə mbe wəndə, kandeŋe ŋkɛ te ɓerama yitea sepa ŋkwa kezhɛne mpi. Ma kendɛare ŋkɛ ve ne, ma ke sha geze mbe ghəa ŋkɛ: «Megela ma zhɛneghe geva 'ya kalə kadzeki ghɛa ɗa nya se 'ya ki.»

²⁵Ma kwa zhɛneke geva ŋkɛ ne, ketsale tsale ghɛa shɛ megela, kehi hi ŋkwa nya ki.

²⁶Ntəŋə ŋkɛ kalə kaheka kweci 'yi'yɛghwə nyi 'yaghwa 'yaghwa ma ke gheŋkɛ mberefaŋe. Kazhɛne geva hɛ kase, kantishɛ hɛ ki. Vatse nza wəndəa shɛ ndiremi ma ke nya ghalanza.

²⁷Ma kwa gezemte ghena shɛ Yɛsə ne, pa kwete male zlapete ghena te tepe ta mbeli, ma ke shɛ: «Zlama ya va male nya keyake ŋa ba'a nya sahwe ŋ'wa ta nta na.»

²⁸Ma ke Yɛsə le ŋa ŋkɛ: «Ma pa na sha geze ɓetəkə: Zlama ya va mbeli nyi kefa ghena ta Shala ba'a nyi kehawe ve.»

²⁹Ma kwa tsene geva mbeli yitea Yɛsə kwele kwele ne, ma ke sha hɛ: «Nahe mbeli nyi tsetse ŋkwa nyi kenza kaka ndiremia mehele. Wəsə kencɛ wəsə ya'yɛwe hɛ, ama kamene nda kwete wəsə kencɛ wəsə mbeli ke hɛ we, deke ŋa Zhonas.

³⁰Ma kala nya se Zhonas kawəsə nya kencɛ wəsə sha ka Ninive ne, tsagha tenza Wəzege ta za sha mbeli nyi tsetse ŋkwa.

³¹Ma vəa ŋkwa nya temeha ghwə Shala te mbeli ne, katese male nya kameghe laka bela kwa zeme kezha ve nda fete ke mbeli nyi tsetsenya. Kwa nza ŋkɛ nahe malea shɛ kese cakeɗake yitea fa ghena ntsehwele nya geze Salomon. Ama kwete wəndə ya shɛ teke hwa gheyɛ kwele ma ke Salomon.

³²Ma vəa ŋkwa nya temeha ghwə Shala te mbeli ne, katese ka Ninive kave nda fete ke mbeli nyi tsetsenya. Kwa nza ŋkɛ nahe ka Ninive kezhɛremte nza ta nci vəa ŋkwa nya zlapete nda ghena ta Shala Zhonas ke hɛ. Ama kwete wəndə ya shɛ teke hwa gheyɛ kwele ma ke Zhonas.

³³Wəndə shɛ kandə ghwə kwa paterela kezha wəfərə keɗema kezha ve mbeyitere wəsə we, ama pelɛ ghəa ŋkwa ve mbeli yitea newe ŋkwa mbeli nyi kedzembe cɛ.

³⁴Ntsə ya kapaterela ta geva. Ma kenza nde lɛŋe lɛŋe ntsə ta ŋa ne, waŋe ŋkwa nya mbe geva ta ŋa pɛtɛ. Ma kenza nde nahe ntsə ta ŋa kebeze ne, te ŋkwesle geva ta ŋa pɛtɛ.

³⁵Ntsehwele, yagha waŋe ta ŋkwa nya mbe gha kazhɛrenyɛ kaŋkwesle.

³⁶Ma kenza ŋkɛ waŋe geva ta ŋa pɛtɛ, kaɗema kwete bela mbe ŋkwesle ne, pɛtɛ tenza geva ta ŋa mbe waŋe kala wəsə nya waŋe ŋa ŋkwa paterela.»

³⁷Ma mba Yɛsə kageze ghena ne, pa kwete nde Fariziyɛn hekaghe ŋkɛ kalə kazeme wəsə kezeme ki ghɛa ŋkɛ, cape Yɛsə kalə kadzeki, ntishɛ ŋkɛ kazeme wəsə.

³⁸Hake nde Fariziyɛn va nya pɛkɛma dzeve Yɛsə kala nya gezete wəsə keshi nda tezeme ɗafa ŋkɛ.

³⁹Ma ke Nde sleke ŋkwa shɛ: «Tsetse mene yɛ gheyɛ ka Fariziyɛn: kayaɓe ŋkwa nya te wəmbəa kwalekwə ba'a tasa yɛ, ama mpɛafe ŋkwa nya kwa wənəa ŋayɛ va ghərə ba'a 'yaghwa mehele.

⁴⁰Ka gezhia kɛfi yɛ! Ma Shala nya kepate ŋkwa nya pelɛke te ŋwela ne, ashɛ gheŋkɛ nde pate ŋkwa nya kwa hwə wəka?

⁴¹Ndeke nda mə wəsə nya kwa kwalekwəa ŋayɛ ke ka titikwəa kɛfi ɓetəkə, tagha gɛ, wɛŋe wɛŋe tenza pɛtɛa wəshi kaŋa ŋayɛ.

⁴²Ndiremi ya te gheyɛ ka Fariziyɛn! Kave kwa meŋe ta bela ta meshigwə, shekwiɗi ba'a kweci nɗeli nyi wəzate yɛ yɛ ke Shala. Ama kapele se yɛ yitea nza tiɗiɗi ba'a ɗe ta Shala: Ndagwara wəshia shɛhɛ yahi yɛ kamene slene le hɛ, kaɗema kasərə wəshi nyi ketene.

⁴³Ndiremi ya te gheyɛ ka Fariziyɛn! Ŋkwa nya ganyɛ mbe cɛ kesəkwə ghə yawədə yɛ mpelɛa. Le hawe ɗe yɛ kanjiŋwe ŋayɛ mbeli te shikwə.

⁴⁴Ndiremi ya te gheyɛ! Nahe yɛ kenza kala kwele nya ɗema mbeli kepate, nya dzeghwa mbeli te kaɗema mbeli keɗepe.»

⁴⁵Ma ke kwete hwa ka rafe wəsə mahalegə sha Yɛsə: «Nde sleke ɗa, pa le ghen'yɛ ŋele na kwa geze ghena na kala nya gɛ!»

⁴⁶Ma ke Yɛsə shɛ: «Ndiremi ya te gheyɛ ka rafe wəsə mahalegə ɓiyitsa! Wəshi nyi ɗaŋeɗa ɗaŋeɗa yave yɛ kwa ghəa mbeli, ama kakwaɗe hɛ yɛ ya le kwatɛka ta dzeve kezha kemane ŋkwa kave kwa ghə we.

⁴⁷Ndiremi ya te gheyɛ nyi kepa yɛ kwele ta ka mɛ ŋkwa ta Shala, ndagwara ka shihɛ ŋayɛ ka mpəmte hɛ.

⁴⁸Tsagha ne, nahe yɛ kencɛte kanya kwetɛŋe yɛ le ka shihɛ ŋayɛ. Nahe hɛ kempəmte ka mɛ ŋkwa ta Shala, ma gheyɛ ne, kwele ta ka mɛ ŋkwa shɛhɛ yapa yɛ.

⁴⁹Vatse gɛ, ma ke Shala gezete le ntsehwele: 'Ya kateghwene nda ka mɛ ŋkwa ta ɗa ba'a kweci mbeli nyi ghwenakɛ 'ya ke hɛ. Katempə kweci hɛ, kateghweze mɛ hɛ hwa kweci.

⁵⁰Kate'yɛwe kelɛhea mbelia shɛhɛ Shala va mbeli nyi tsetsenya. Kelɛhea ka mɛ ŋkwa ta ŋkɛ nyi mpəmte mbeli se te gha ta hɛɗi yate'yɛwe ŋkɛ,

⁵¹se te Abɛl hwa'a te Zakari nya peslekɛ mbeli kwelɛ yɛ reghwetɛ le ŋkwa nya keveyi geva tekeleke. Kaganda ne, ma 'ya sha gheyɛ: kate'yɛwe geva kelɛhe ta nci va mbeli nyi tsetse ŋkwa nyi.

⁵²Ndiremi ya te gheyɛ ka rafe wəsə mahalegə! Nahe yɛ kekelehwe wəsə keghwene ŋkwa ta ɗepe wəsə. Kadzembe yɛ le ghəa ŋayɛ we. Kafɛa nda ŋkwa yɛ ke mbeli nyi keɗe kadzembe.»

⁵³Ma kwa slənyɛ Yɛsə te ŋkwa shɛ, ntəŋə ka rafe wəsə mahalegə ba'a ka Fariziyɛn yitea ntəslə ŋkɛ, kwele kwele 'yɛwe wəshi hɛ ve.

⁵⁴Kaŋa nda keleŋa hɛ kezha kese ŋkɛ kegezete ghena kwa ndiremi ŋkɛ.