Read KapsikiDC Ləwke 12 Bible Online

Ləwke 12 - KapsikiDC bible

Ləwke 12

¹Ma vəa ŋkwa shɛ ne, pa mbeli tsenete geva tipə tipə, te wəndə te wəndə dzeghwa mbeli. Ma ke Yɛsə gezete nda ghena ke mbeli nyi ketəkwə təkwə: «Ya mə ghəa ŋayɛ va tenjɛne ta ka Fariziyɛn, geze ta ŋkɛ va mbəɗəkwəa nci.

²Pɛtɛ tencɛ geva wəshi nyi tewəfərə. Pɛtɛ teɗepe geva zeweve ta ghena nya ɗema mbeli kancɛ.

³Va nya nza ŋkɛ pɛtɛ tefa ghena nya gezete yɛ mbe ŋkwesle mbeli heveci. Ma ghena nya gezete nda yɛ ke wəndə kwa sleme kwa sleme ne, pelɛ dɛɓere nya kənəa cɛ tedzeme mbeli kazlape.

⁴Ma 'ya sha gheyɛ, gheyɛ ka mcɛhɛ ɗa: ghazlənəma yɛ va mbeli nyi kempə ŋkwa ma. Ma kwetere wəmbəa ŋkɛ ne, kazhɛne hɛ menete kwete wəsə we.

⁵'Ya katencɛ ŋayɛ wəndə nya hi yɛ kaghazlənə ve. Ghazlənə mə va Shala nya nza berete ve kanegha wəndə kadzembe ghwə nya keɗema kakiɗi kwetere wəmbəa mte. Kaganda ne, ma 'ya sha gheyɛ: gheŋkɛ yahi yɛ kaghazlənə ve.

⁶Ashɛ mcɛfe nta zaghwala mbeli te dala bake wəka? Ndagwara kwete wəndəa nci shɛ kazaghə Shala we.

⁷Pa le pɛtɛa shintia ghəa ŋayɛ keɓelate geva. Ghazlənəma yɛ ma, za ma yɛ ke zaghwala nyi kwele kwele.»

⁸Ma 'ya sha gheyɛ: ma yayata wəndə nya kegeze nahe ŋkɛ kenza kande təkwə təkwə ɗa kwa kema ta mbeli ne, kateɗepe 'ya kwa kema ta ka ghwene ta Shala nahe ŋkɛ kenza kawəndəa ɗa.

⁹Ama yayata wəndə nya keɗepema ɗa kwa kema ta mbeli ne, kateɗepema ŋkɛ 'ya kwa kema ta ka ghwene ta Shala.

¹⁰Katekelemte geva ghena kwa ndiremi nyi gezete wəndə te Wəzege ta za te wənə. Ama wəndə nya kegeze ghena kwa ndiremi te Sefəa Shala, katekelemte geva ŋkɛ te wənə we.

¹¹Ma kefəghe ŋayɛ mbeli kalə kadzete kema ta mbeli nyi mbe cɛ kesəkwə ghə, ka meghea kɛfi ba'a mbeli nyi te ghə ne, yirəma yɛ yitea ghena nya tesla yɛ ma.

¹²Va nya nza ŋkɛ Sefəa Shala nde tencɛ ŋayɛ ghena nya kehite geva kezha geze yɛ.

¹³Ma ke kwete wəndəa mbeli nyi ketsenete geva sha Yɛsə: «Nde sleke ɗa, geze nda ke wəza meyɛ ɗa kezha neheve wəshi kezeme ghɛ nya sərəakɛ n'yɛ yiteyɛ n'yɛ le 'ya gi!»

¹⁴Ma ke Yɛsə na shɛ: «Mcɛ ɗa, wa nde veyi ɗa kawəndə kemeha ghwə ta wəshia ŋayɛ ba'a kande kenehe hɛ wa?»

¹⁵Ma ke sha mbeli pɛtɛ: «Ya mə ghəa ŋayɛ va ɗa ntsə yitea wəshi. Ma mpi nya ganyɛ kezha wəndə ne, laka mcɛlə nza wəndə kakemave we.»

¹⁶Pa ŋkɛ gezete nda kwete ghena keyipə pa ke hɛ, ma ke: «Pa kwete nde mcɛlə ɗake wəshi kwele kwele te wəve.

¹⁷Ma ke mbe ghəa ŋkɛ: Tsema temene 'ya tse wa? Ŋkwa shɛ va 'ya kezha bete wəshia ɗa we.

¹⁸Ma ke: Nahe 'ya keɗepe wəsə nya temene 'ya: 'ya kateŋzla yɛ tame ta ɗa, kateŋa nyi jama jama ma 'ya kezha bete ha ta ɗa ba'a kweci wəshia ɗa kwa hɛ.

¹⁹Kwa sebe ta ŋkɛ, ma 'ya sha tegeze nda ke ghəa ɗa: Gha ɓiyitsa ne, wəshi kezeme ya va gha gare va kwele kwele. Yawa, zhɛnakɛ mpi, zeme, sa wəsə, behekɛ ghəa ŋa.

²⁰Ama ma ke Shala shɛ: Wəndə nya kagezhi na! Ɓəshi heviɗi nya tekele mpia ŋa 'ya. Ke wa tenza wəshi nyi tsenete nda nyi na ke ghəa ŋa gɛ wa?»

²¹Ma ke Yɛsə mtsehete: «Tsetse temene nda geva ŋkɛ ke wəndə nya ketsene wəshi kwele kwele kezha ghəa ŋkɛ, kenza wəndəa shɛ kande galɛpi kwa kema ta Shala we.»

²²Ma ke Yɛsə gezete nda ke mbeli nyi ketəkwə təkwə: «Mba yɛ keheha yitea wəshi kezeme ta ŋayɛ ba'a wəshi nyi ɗe yɛ kezha nza ta ŋayɛ, lekwesa nyi teseɗe yɛ.

²³Kwa nza ŋkɛ za ma mpi ke wəsə kezeme, za ma geva ke lekwesa.

²⁴Newe mə yɛ ghame, katsawe wəshi kezeme hɛ we, kamene wəshi hɛ se te wəve we. Dɛdimə ba'a tame va hɛ we, ama Shala nde zeme nda wəshi kezeme ke hɛ. Ŋkwini zhigə nza zləvəa ŋayɛ za ma ke 'yɛ wa?

²⁵Wa wəndə nya kenza kambakete hɛa ŋkɛ hwa gheyɛ laka heha ta ŋkɛ wa?

²⁶Ma shaŋe yɛ va wəsə nya ɓɛhwɛ ne, yitea wa heha yɛ yitea kweci wəshi wa?

²⁷Newe ma mə nza ta ghwə ta wəfe nya hwa gamba, kamene slene hɛ we, katsa lekwesa hɛ we. Ma 'ya sha gheyɛ: ya Salomon mbe zləvəa ŋkɛ ne, kegha ŋkɛ kaseɗete lekwesa nyi ganji ganji ma ke ghwə ta wəfea shɛhɛ we.

²⁸Mbe seɗe nda lekwesa Shala ke gwəzə nya kenza megela ɓeshi, hendɛ mbe ghwə ŋkɛ, kateseɗe ŋayɛ lekwesa ŋkɛ za ma ke hɛ wəka? Dewə yɛ va gheyɛ deŋwa.

²⁹Ama gheyɛ ne, mba yɛ kedambeghə kazele wəsə nya tezeme yɛ ba'a wəsə nya tesa yɛ.

³⁰Wəshi nyi pɛtɛ ne, ghenci yazele kweci hwelefefi. Ama gheyɛ ne, nahe Yiteyɛ ŋayɛ keɗepe kaɗe wəshia shɛhɛ yɛ.

³¹Zelete mə ghena ta Meghea Shala ɓetəkə, kateve pɛtɛa wəshi nyi ketene Shala kadzeghə.

³²Wəvəsə timɛti, ghazlənəma yɛ ma! Nahe Shala keɗehwe Meghea ŋkɛ kave ŋayɛ.

³³Pamte mə wəshia ŋayɛ, ndeke nda mə ke ka titikwəa kɛfi. Wəfərə mə wəshia ŋayɛ kwa slibə nya keɗema kahale, tsenete mə mcɛləa ŋayɛ pelɛ ghweme, ŋkwa nya ɗema hɛ kaza tɛape pelɛ. Katekekave hɛ ka ghərəa kɛfi we, katezeme hɛ lema we.

³⁴Kwa nza ŋkɛ te ŋkwa nya nza yɛ mcɛləa ŋayɛ tenza mehele ta ŋayɛ shanda.

³⁵Nza mə ɗeke ɗeke, nza mə le hwə tehwepe, mba yɛ kepesle ghwə kwa paterela ta ŋayɛ.

³⁶Nza mə kala mbeli nyi keneghe se ta nde sleke hɛ nya kezhɛne geva se yitea veghe. Ma kese ŋkɛ ba'a kemɛ ŋkɛ kwa degha ne, kateghwene nda ŋkwa hɛ kahe kahe.

³⁷Zlama ya va ka mavashia shɛhɛ, kesləyi hɛ nde sleke hɛ kezhɛneke geva ɗeke ɗeke. Kaganda ne, ma 'ya sha gheyɛ: kateseɗe lekwesa slene mazea shɛ, kategeze nda ŋkɛ ke hɛ kantishɛ yitea ɗafa ba'a kateve nda wəsə kezeme ŋkɛ ke hɛ.

³⁸Ma kese nde sleke hɛ pəkwə veci keɗema te tepe ta viɗi mba hɛ ɗeke ɗeke ne, zlama ya va hɛ.

³⁹Ɗepete ghena nya megela: ma ya nahe wəndə ke ghɛ keɗepe və nya tese ghərə kwa ne, nza katepele ghərəa shɛ ŋkɛ kadzeki ghɛa ŋkɛ we.

⁴⁰Nza mə ɗeke ɗeke, gheyɛ perə, kwa nza ŋkɛ vəa ŋkwa nya zəzəma yɛ tese Wəzege ta za.»

⁴¹Ma ke Piyɛre shɛ: «Nde sleke ŋkwa, kezha ghen'yɛ geze ghena keyipə pa nya na tse na, na kezha mbeli pɛtɛ na?»

⁴²Ma ke Nde sleke ŋkwa shɛ: «Wa sləa mava nya kedɛŋe dɛŋe te slene ta ŋkɛ, nya kentsehwele ntsehwele nya veyi nde sleke ŋkɛ kezha newe ghweme te ghɛa ŋkɛ ba'a kezha ve wəsə kezeme ta nci ke kweci ka mavashi te və nya kehi wa?

⁴³Zlama ya va mava shɛ kesləyi ŋkɛ nde sleke ŋkɛ mbe mpa le slene.

⁴⁴Kaganda ne, ma 'ya sha gheyɛ: katedape nda pɛtɛa wəshia ŋkɛ nde sleke ŋkɛ te dzeve.

⁴⁵Ma kezəzəte mava mbe ghəa ŋkɛ: Nahe nde sleke ɗa kedera kese, kampə kweci ka mavashi ŋkɛ, yɛ zhili le mi, kaŋwafe wəshi ŋkɛ, kasa wəshi ŋkɛ, kaghwəyi ŋkɛ.

⁴⁶Vəkə tese nde sleke ŋkɛ te veci nya neghema ŋkɛ, le və nya ɗepema ŋkɛ. Kateŋkamte wəndə nyagha ŋkɛ, katenegha ŋkɛ hwa mbeli nyi keɗema kayɛ ghena.

⁴⁷Ama mava nya keɗepe wəsə nya ɗe nde sleke ŋkɛ nda ɗema ŋkɛ kemenete kala nyagha shɛ ne, kwele kwele tenza ŋa ŋkɛ ghweɗa.

⁴⁸Ama mava nya keɗepema wəsə nya ɗe nde sleke ŋkɛ, nda menete zlere ŋkɛ wərə ɗa ne, ɓɛhwɛ teɗa ŋkɛ mbeli. Yayata wəndə nya ndeke nda wəshi mbeli kwele kwele, kwele kwele te'yɛwe mbeli ve. Wəndə nya ndeke nda wəshi mbeli kwele kwele kaya ne, za ma ke nyagha te'yɛwe mbeli ve.

⁴⁹Nahe 'ya kese kezha ghwə te hɛɗi. Zlahe ɗe 'ya kanza ŋkɛ ketse tse.

⁵⁰Nda 'ya kakemave batɛme, kwele kwele zhɛ ɗa wənəa ɗa kwa nakama ŋkɛ kamenete geva.

⁵¹Ma zəzə yɛ ne, kwelɛŋe yakeleke 'ya kadzete hɛɗi na? Ewə, 'ya sha gheyɛ, ama nehe ta mbeli.

⁵²Tsetsenya ne, katenza mbeli nyi mcɛfe ki ghɛ kenehe nehe, mahekene kampa le mbeli nyi bake ba'a mbeli nyi bake kampa le nyi mahekene.

⁵³Katenehe geva yɛ yita le wəzege ta ŋkɛ. Katenehe geva yɛ ma le wəzha ta nta, katenehe geva yɛ meghekɛa za le makwa ta nta.»

⁵⁴Ma ke Yɛsə sha mbeli nyi ketsenete geva kwele kwele ɓiyitsa: «Ma vəa ŋkwa nya nakɛ ləmbə yɛ kase laka ŋkwa nya pəkwə veci, katese va, pe yɛ sha geze taghanyɛ. Tsagha shɛ ŋkɛ menete geva deŋwa.

⁵⁵Ma kevɛke geva sefə se mbe bela kwa zeme ne, hwələ nde temene geva, pe yɛ sha geze, tsagha shɛ ŋkɛ menete geva.

⁵⁶Ka mbəɗəkwəa kɛfi! Nahe yɛ keɗepe nza ta yɛ hɛɗi le ghweme. Ama wəshi nyi kencɛ wəshi nyi kemene geva tsetsenya, tsema ɗepema hɛ yɛ wa?

⁵⁷Va wa ɗema yɛ kameha ghwə tiɗiɗi le ghəa ŋayɛ wa?

⁵⁸Ma kenza na te ghwə le wəndə ne, tseɓate ghena shɛ kahe kahe le wəndəa shɛ vəa ŋkwa nya nza yɛ kwa hweŋkwa, yagha ŋkɛ tendeke nda ŋa ke nde meha ghwə, yagha nde meha ghwə tendeke nda ŋa ke ka sewajɛ ba'a yagha mbeli teveyi ŋa kwa daŋgayɛ.

⁵⁹Kaganda ne, ma 'ya sha gha: katesame na kwa keɗema na keŋkimte pɛtɛa dewa nya hwa gha we.»