Read KapsikiDC Ləwke 13 Bible Online

Ləwke 13 - KapsikiDC bible

Ləwke 13

¹Ma vəa ŋkwa shɛ, pɛkwe mbeli nyi kegezete nda ghena ta ka Galilɛ nyi mpəmte Pilate, vəa ŋkwa nya dzeghe Shala hɛ ke Yɛsə.

²Ma ke sha hɛ: «Ma zəzə yɛ ne, za ma jaɗafa va ka Galilɛa shɛhɛ ke pɛtɛa kweci ka Galilɛ na?

³Ewə, 'ya sha gheyɛ. Ma keɗema yɛ kazhɛre nza ta ŋayɛ ne, pɛtɛ tempə yɛ kala ghenci.

⁴Ma mbeli meŋe degheseghəmbe nyi kempənji kwa ŋzlanyɛ ŋkwa keya ŋkwa nya mbe Silowɛ ne, za ma jaɗafa va hɛ ke kweci ka Zhɛrəzalɛm zəzə yɛ na?

⁵Ewə, 'ya sha gheyɛ. Ma keɗema yɛ kazhɛre nza ta ŋayɛ ne, pɛtɛ tempə yɛ kala ghenci.»

⁶Ma ke Yɛsə gezete nda ghena keyipə pa ke hɛ: «Pa kwete wəndə mɓete dasekwa mbe wəvea ŋkɛ. Ma se ŋkɛ kanewe ya te ne, ya te we.

⁷Ma ke sha wəndə nya kemene slene mbe wəvea shɛ: Va mahekene ɓeshi kase 'ya kanewe ya te dasekwa nya, ama ya te we. Tsaslemte seyi mɛa hɛɗi! Wa raberə fɛa nda ŋkwa ŋkɛ ke wəshi wa?

⁸Ama ma ke shɛ: Nde sleke ŋkwa, sərəakɛ ɓeshi kava, 'ya katela ŋkwa nya yitea dəŋwəa ŋkɛ ba'a katenta dədə yite.

⁹Ya kwete kateya ŋkɛ heshi tsetse ŋkwa. Ma keɗema ŋkɛ keya ne, katetsasle ŋkɛ na.»

¹⁰Te kwete veci kezhɛne mpi ne, ntake Yɛsə kateke nda ghena ke mbeli mbe cɛ kesəkwə ghə.

¹¹Kwete male shewə ya tagha. Ghala va meŋe degheseghəmbe ne, kafɛa malea shɛ kwete 'yi'yɛghwə keslete tiɗiɗi. Metsehwekwe nde.

¹²Ma kwa nakɛ ŋkɛ Yɛsə ne, pa hekakɛ ŋkɛ, ma ke shɛ: «Male, pələsə na va zereghwe nya kaghala ghala.»

¹³Pa Yɛsə dapakɛ ŋkɛ le dzeve, tewə ketemə ne, slete nde tiɗiɗi. Ntake katsahe Shala.

¹⁴Ama pa wənəa wəndə nya te ghəa cɛ kesəkwə ghə bezenyɛ va nya mbete ŋkwa Yɛsə te veci kezhɛne mpi. Ma ke sha mbeli: «Hɛ ya shɛ ŋkwaŋe kamene slene mbeli te. Vəa ŋkwa shɛ hi yɛ kase yitea mbele ŋayɛ mbeli, mba veci kezhɛne mpi wəka?»

¹⁵Ma ke Nde sleke ŋkwa shɛ: «Ka mbəɗəkwəa kɛfi yɛ! Yayata wəndəa ŋayɛ kapele sla ta ŋkɛ keɗema kwara ta ŋkɛ same zlema te veci kezhɛne mpi.

¹⁶Va ta nta meŋe degheseghəmbe tehwepe va Satan. Ma male nya ne hwelefe ta Abraham nde. Ashɛ veci kezhɛne mpi kehite geva kezha pele ŋkɛ mbeli te zewea shɛ wəka?»

¹⁷Ma kwa fave ghena shɛ ka jaga ta Yɛsə ne, shewə hɛ va hawe. Ama kweci mbeli nyi tagha ne, fare fare wənəa nci yitea pɛtɛa wəshi ganji nyi menete Yɛsə.

¹⁸Ma ke Yɛsə: «Le wa nza Meghea Shala kayipəte geva tse wa? Le wa nza 'ya kayipəte ŋkɛ tse wa?

¹⁹Yipə yipə ŋkɛ le ya ta balepale nya tsawete kwete wəndə mbe wəvea ŋkɛ. Ma kwa pese ŋkɛ ne, pa ŋkɛ kele kawəfe, kase 'yɛ kapa ghɛa nci dzeyi te yɛ dzeve ta ŋkɛ.»

²⁰Ma ke Yɛsə ɓiyitsa: «Le wa nza 'ya yipəte Meghea Shala tse wa?

²¹Yipə yipə ŋkɛ le tenjɛne nya nza male kantave ɓɛhwɛ kezha bete hwa kiləwəa hə bakemsə mcɛfeghəmbe kwa tasa. Tagha ne, kawepe pɛtɛa həa shɛ.»

²²Kadzeghwa Yɛsə dzeyi mbe meleme nyi jama jama ba'a nyi ɓɛhwɛ ɓɛhwɛ kezha teke nda wəshi ke mbeli kwa hweŋkwa kedzeme Zhɛrəzalɛm.

²³Ma ke kwete wəndə 'yɛwete ve: «Nde sleke ŋkwa, deke mbeli ɓɛhwɛ ka tembele na?» Tagha gɛ, ma ke Yɛsə sha hɛ:

²⁴«Ma 'ya sha gheyɛ: Ntsə mə geva kadzeki kwa mɛ degha nya mentɛawe, kwele kwele mbeli nyi ketezele ŋkwa kedzawa ki, ama katepesle hɛ yite we.

²⁵Ma kesate wəndə ke ghɛ kaŋzlete degha ta ŋkɛ, sərə tenza yɛ pelɛke te ŋwela, katetsa degha yɛ, ma pe yɛ sha tetsa lewela: Nde sleke ŋkwa, pelemte n'yɛ ŋkwa. Ma ke sha tezhɛne ŋayɛ: Keɗepe ŋkwa nya se yɛ te 'ya we.

²⁶Tagha gɛ, ma pe yɛ sha tegeze: nahe gheɓəmə kezehwe wəsə kezeme jikə, nahe gheɓəmə kesahwe wəsə. Te kələŋəa n'yɛ se na kateke nda wəsə ke mbeli.

²⁷Ma ke sha tezhɛne ŋayɛ zhɛkwa: Keɗepe ŋkwa nya se yɛ te 'ya we. Ghərəmte ɗa mə geva yitea 'ya, gheyɛ ka mene wəsə kwa ndiremi.

²⁸Katenehwene yɛ ba'a katempeɗe slene yɛ, vəa ŋkwa nya tenakɛ Abraham, Izak, Zhakob ba'a kweci ka mɛ ŋkwa yɛ mbe Meghea Shala. Ama yɛ ne, katenegha ŋayɛ mbeli pelɛke te ŋwela.

²⁹Katese kweci mbeli laka ŋkwa kesame ta veci, ŋkwa kepəkwə ta veci, bela kwa gwela ba'a bela kwa zeme kezha zeme gəsəkə mbe Meghea Shala.

³⁰Ma tsagha gɛ, katenza mbeli nyi kaka keɗaŋe kaka ghate ba'a katenza ka ghate kaka keɗaŋe.»

³¹Ma vəa ŋkwa shɛ, pa kweci ka Fariziyɛn se sha Yɛsə, ma ke hɛ shɛ: «Slə ŋa teke, kwiɗi kalə kadzete kwete ŋkwa, wa nya Hɛrode kaɗe kapesle ŋa.»

³²Ma ke Yɛsə sha hɛ: «Ma pe yɛ sha lə kageze nda ke wəndə nya keghwete ŋkwa shɛ kala meke: Kaŋka 'yi'yɛghwə 'ya ba'a kambe ŋkwa 'ya ɓeshi ba'a hendɛ. Ma te kwa maheke ta hɛ ne, katekiɗi slene ta ɗa.

³³Ama nahe ŋkɛ kehite geva kezha kele hweŋkwa ta ɗa 'ya ɓeshi, hendɛ ba'a vatahebezle tewəmbəreke kahi nde mɛ ŋkwa kamte te kwete ŋkwa keɗema mbe Zhɛrəzalɛm we.

³⁴Zhɛrəzalɛm, Zhɛrəzalɛm, ma gha nya kempə ka mɛ ŋkwa ba'a nya kebeza mbeli nyi ghweneke ŋa Shala le pelɛ ne, nahe 'ya keɗe katsene ŋwalea ŋa kala nya tsene ŋwalea ŋkɛ ghenda mbe bidzəa ŋkɛ, ama nahe na kesema kaɗe.

³⁵Yawa, kakwəfi tenza ghɛa Shala ta ŋayɛ. Kaganda ne, ma 'ya sha gheyɛ: ma se mɛa tsetsenya ne, katezhɛne yɛ kanakɛ ɗa hwa'a te veci nya tegeze yɛ: Kewəpi wəpi nza wəndə nya kese te sləa Mahwətə, pe yɛ we.»