Read KapsikiDC Ləwke 14 Bible Online

Ləwke 14 - KapsikiDC bible

Ləwke 14

¹Ma te kwete veci kezhɛne mpi ne, cape Yɛsə kalə sha kwete wəndəa mbeli nyi te ghəa ka Fariziyɛn kezha zeme wəsə kezeme. Kavereghe Yɛsə mbeli nyi tagha.

²Tagha kwete wəndə kwa kema ta Yɛsə. Shewə ŋkɛ, kezleŋə zleŋə geva ta ŋkɛ.

³Ntake Yɛsə kageze nda ghena ke ka Fariziyɛn ba'a ka rafe wəsə mahalegə. Ma ke sha hɛ: «Nahe ghena nyi gezete nda Shala ke Moyize kepelave ɓəmə hweŋkwa kambe ŋkwa te veci kezhɛne mpi na?»

⁴Hɛreɗɛ hɛ ɗema zhɛne nda. Tagha gɛ, pa Yɛsə kesakate nde zereghwe, pa mbete ŋkɛ ba'a geze nda kaslə.

⁵Ma ke sha hɛ: «Ma kenza wəzege keɗema sla va kwete wəndəa ŋayɛ nda teɗenyɛ ŋkɛ kwa belageji te veci kezhɛne mpi ne, ashɛ ŋkɛ kalə wəndəa shɛ kakele ŋkɛ same kwa wəka?»

⁶Ndɛare hɛ va zhɛne nda ghena shɛ.

⁷Nahe Yɛsə keneweve wəsə nya mene mbeli nyi hekakɛ mbeli yitea wəsə kezeme kezha nta ŋkwa ganji. Pa ŋkɛ gezete nda ghena keyipə pa ke hɛ, ma ke sha hɛ:

⁸«Ma kehekakɛ ŋa wəndə yitea veghe ne, mba na kelə kawədə ŋkwa nya mbe pelə. Nda kwete nahe mbeli kehekakɛ kwete wəndə nya kwele ma ke gha.

⁹Ma kwa se wəndə nya kehekakɛ ŋayɛ ne, ma ke sha tegeze ŋa: Zana, sərəakɛ nda ŋkwa ke wəndə nya. Ntəŋə na le hawe kalə kantishɛ mbeyitere sheghwə.

¹⁰Ama kehekakɛ ŋa wəndə yitea veghe ne, ntishɛ ŋa mbeyitere sheghwə kaba. Ma kese wəndə nya kehekakɛ ŋa ne, ma ke sha tegeze ŋa: Mcɛ ɗa, ntishɛ ŋa mbe pelə. Tagha gɛ, nahe ŋkɛ kevate zləvə te gha kwa ntsə ta mbeli nyi zeme wəsə yɛ le hɛ.

¹¹Kwa nza ŋkɛ ma wəndə nya kekele ghəa ŋkɛ ne, kateshifə ŋkɛ. Ma wəndə nya keshifə ghəa ŋkɛ, katekele ŋkɛ.»

¹²Ma ke Yɛsə sha wəndə nya kehekakɛ yitea wəsə kezeme: «Ma kenza na kaheka ŋkwa yitea veghe ne, mba na keheka ka mcɛhɛ ŋa, ya ka kesaka meyɛ ŋa, ya ka menəhɛ ŋa keɗema ka ghedəkwəa ŋa nyi kaka mcɛlə. Kwa nza ŋkɛ wərə hɛ kahekakɛ ŋa perə kezha ŋki ŋa wəsə nya ɗave nda na ke hɛ.

¹³Ama ketakɛ veghe na ne, hekakɛ ka titikwəa kɛfi, ka gweleba kɛfi, ka gwadare kɛfi ba'a ka ghwələa kɛfi.

¹⁴Katenza zlama va gha, va nya ɗema wəsə va hɛ kaŋki ŋa. Kateŋki ŋa Shala te veci nya tesame mbeli nyi tiɗiɗi kwa kwele.»

¹⁵Ma kwa fave ghena shɛ kwete wəndə nya hekakɛ mbeli yitea ɗafa ne, ma ke sha Yɛsə: «Zlama ya va wəndə nya ketezeme veghe Shala mbe Meghea ŋkɛ deŋwa!»

¹⁶Ma ke Yɛsə shɛ: «Pa kwete wəndə takɛ gəsəkə, pa hekakɛ mbeli kwele kwele yite.

¹⁷Ma te vəa veghe ne, pa ghwenakɛ nda mava ta ŋkɛ ke mbelia shɛhɛ, ma ke sha hɛ: Nde mə, nahe ŋkɛ kenakanyɛ.

¹⁸Pɛtɛ hɛ menete ntsehwele kanya kwetɛŋe yitea ɗema se. Ma ke nde ghate shɛ: Nantse nya pave wəve 'ya, 'ya kalə kanewe. Təhwə təhwə ŋa 'ya, kashɛ 'ya lə we.

¹⁹Ma ke kwete: Nantse pave sla 'ya meŋe kawəza, 'ya kalə ka'yɛ hɛ. Təhwə təhwə ŋa 'ya, kashɛ 'ya lə we.

²⁰Ma ke kwete wəndə shɛ ɓiyitsa: Kwatewəmeve male 'ya, vatse ɗema 'ya kalə ɗa.

²¹Zhɛne mava kalə sha nde sleke ŋkɛ, pa gezete nda zhɛne ta nci. Pa wəndəa shɛ hwepete wənə. Ma ke sha mava ta ŋkɛ: Kwiɗi kahe kahe kalə te yɛ kələŋə ba'a kwa baŋwa ta hweŋkwa, shɛ na hekakɛ ɗa ka titikwəa kɛfi, ka gweleba, ka ghwələa kɛfi ba'a ka gwadare.

²²Temə vireɗi ne, pɛkwe mava shɛ, ma ke shɛ: Nde sleke ɗa, nahe 'ya kekiɗimte slene nya ncɛte ɗa na, ama mba ŋkwa ketene.

²³Ma ke nde sleke ŋkɛ sha mava shɛ: Kwiɗi kalə dzeyi kwa hweŋkwa nyi mbe meleme, kwamte yitea wəfe. Ŋka mbeli le berete kase kezha viɗi ŋkwa nya ki ghɛa ɗa.

²⁴Ma 'ya sha gheyɛ: ma mbeli nyi ghate nyi 'ya kaheka hɛ nda ɗema hɛ se ne, wəndə shɛ hwa hɛ katendɛame wəshi kezeme ta ɗa we.»

²⁵Ma kwa nza mbeli kwele kwele kwa sebe ta Yɛsə ne, tewətelɛwe zhɛrete geva, ma ke sha hɛ:

²⁶«Ma wəndə nya keɗe katəkwə təkwə ɗa, ma keɗema ŋkɛ keɗehwe ɗa za ma ke yitenyɛ, meghekɛ, male ta ŋkɛ, ŋwalea ŋkɛ, ka kesaka meghekɛ ba'a ŋwalea kwɛa meghekɛ, ya mpia ŋkɛ ne, kehi ŋkɛ kanza kande təkwə təkwə ɗa we.

²⁷Ma keɗema wəndə kekelete sheghwə kwa zleŋkwa ta ŋkɛ kezha təkwə təkwə ɗa ne, kanzate nza ŋkɛ kande təkwə təkwə ɗa we.

²⁸Kwa nza ŋkɛ ma keɗe kwete wəndəa ŋayɛ kaŋa ŋkwa keya ŋkwa ne, megela ma ntishɛ ŋkɛ kazəzə nza ta cɛdɛa ŋkɛ kenza ŋkɛ cɛdɛa ya shɛ ve gare kiɗimte slenea shɛ.

²⁹Yagha ŋkɛ kaghate shihəa cɛ kaɗema kakiɗimte. Ma yayata wəndə nya ketenakɛ cɛa shɛ ne, kateŋ'wəshi ŋkɛ ŋkɛ.

³⁰Ma ke hɛ sha tegeze: Newema mə, pa wəndə nya ghate kaŋa cɛ, ama shaŋe ŋkɛ va kiɗimte.

³¹Tsagha shɛ, ma keɗe kwete meghe kampa le kwete meghe ne, megela ma ntishɛ ŋkɛ kaba kenza nde kapesle ŋkɛ kahave nda mpa le ka sewajɛa ŋkɛ slibə meŋe ke meghe nya nza ka sewajɛ slibə bakemsə ve.

³²Ma keɗema ŋkɛ kapesle yite, megela ma ghweneghe mɛ ŋkɛ kalə sha meghea shɛ, mba ŋkɛ cakeɗake kaba kezha mpi nda dzeve baŋe hɛ kasərəakɛ mpa.»

³³Ma ke Yɛsə mtsehete: «Tsagha shɛ ne, wəndəa ŋayɛ shɛ katəkwə təkwəte ɗa keɗema wəndə kazlenekɛ pɛtɛa wəshia ŋkɛ we.

³⁴Ma ghwene ne, wəsə ganyɛ ŋkɛ. Ma keshavenyɛ mele mbe ghwene ne, tsema nza ghwənəghwə kazhɛname geva mbe wa?

³⁵Mba nde megela ya kezha mene hɛɗi deɗəmə, ya kanza kadədə we. Kanegha ŋkɛ mbeli. Fa ghena nya wəndə nya nza sleme ve!»