Read KapsikiDC Ləwke 15 Bible Online

Ləwke 15 - KapsikiDC bible

Ləwke 15

¹Pɛtɛ ka tsehe jaɓeregwale ba'a ka jaɗafa tsenete geva yitea fa ghena va Yɛsə.

²Kandəghwə ndəghwə ka Fariziyɛn ba'a ka rafe wəsə mahalegə. Ma ke hɛ: «Wa raberə nda beke wəndə nya le ka jaɗafa ba'a zeme ɗafa ŋkɛ le hɛ wa?»

³Pa Yɛsə gezete nda kwete ghena keyipə pa ke hɛ. Ma ke:

⁴«Pa timɛti gwəmsə va kwete wəndəa ŋayɛ. Pa kwete zanyɛ kwetɛŋe. Ashɛ wəndəa shɛ kasərə nyi meslimsə meslighəmbe nyi ketene te ɓerama kezha lə kazele nya kezanyɛ wəka?

⁵Ma kesepate ŋkɛ ne, kazlama ŋkɛ, kave ŋkɛ yitea welɛa ŋkɛ.

⁶Ma kwa sheke ŋkɛ ne, pa hekake ka mcɛhɛnyɛ ba'a ka ghedəkwə, ma ke sha hɛ: Zlama mə le 'ya ɓeshi. Nahe 'ya kesepate təməa ɗa nya kezanyɛ!

⁷Ma 'ya sha gheyɛ: Tsagha tezlama mbeli nyi pelɛ ghweme yitea nde jaɗafa kwetɛŋe nya kezhɛrete nza ta ŋkɛ. Za ma tezlama hɛ yitea wəndəa shɛ ke kweci mbeli nyi tiɗiɗi meslimsə meslighəmbe nyi tsakɛma hɛ mpi nda dzeve ke Shala.

⁸Keɗema ne, dala slibə meŋe ya va kwete male, nda zanyɛ slibə kwetɛŋe, kateɗema nde kandə ghwə kwa paterela ta nta, katsale ŋkwa nya kwa cɛa nta ba'a kazele ŋkɛ le mehele hwa'a te və nya tesləyi ŋkɛ nde na?

⁹Ma vəa ŋkwa nya tesləyi ŋkɛ nde ne, katsene ka mcɛhɛ nta ba'a ka ghedəkwəa nta nde, ma ke sha tegeze nda ke hɛ: Zlama mə le 'ya, kwa nza ŋkɛ nahe 'ya kesləyi dala ta ɗa nya kezanyɛ.

¹⁰Ma 'ya sha gheyɛ: tsagha tezlama ka ghwene ta Shala yitea nde jaɗafa kwetɛŋe nya kezhɛrete nza ta ŋkɛ.»

¹¹Ma ke Yɛsə sha hɛ zhɛkwa: «Ŋwale tezhili ya bake va kwete wəndə.

¹²Ma ke wəzege nya ɓɛhwɛ sha yitenyɛ: Yita, ɗave ɗa zhike ŋa ɗa wəshi kezeme ghə. Pa yitenyɛ neheve nda pɛtɛa wəshia ŋkɛ ke hɛ.

¹³Kwa sebe ta hɛ ɓɛhwɛ ne, pɛtɛ wəzege nya ɓɛhwɛa shɛ pamte wəshia ŋkɛ, ntəŋə ŋkɛ slənyɛ le cɛdɛa ŋkɛ kalə kadzembe kwete meleme cakeɗake. Pa ŋkɛ menete mefətekwə te ŋkwa shɛ, pa bezemte cɛdɛa ŋkɛ pɛtɛ.

¹⁴Ma vəa ŋkwa nya kiɗi wəshi yitea dzeve ta ŋkɛ ne, pɛkwe ma nya ndiremi te hɛɗia shɛ, tagha gɛ, nahe titikwə kekeseve ŋkɛ.

¹⁵Ntəŋə ŋkɛ kalə kamene nda slene ke kwete wəndə nya mbe melemea shɛ, pa wəndəa shɛ ghwenakɛ ŋkɛ kalə kaya gərədə.

¹⁶Kaɗe ŋkɛ kabehe ghəa ŋkɛ le rəghwə nyi zeme gərədə, ama wəndə shɛ keɗave nda we.

¹⁷Ntake ŋkɛ kazəzə ghena mbe ghəa ŋkɛ. Ma ke: Ndagwara kapesle ka mene slene ta yiteyɛ ɗa yitea wəsə kezeme we, newe 'ya kamte va ma teke gi!

¹⁸Jara lə 'ya sha yiteyɛ ɗa. Ma 'ya sha tegeze nda: Yita, nahe 'ya kebezemte nda ghena ke Shala ba'a ke gha.

¹⁹Kehi 'ya kanza kawəzege ta ŋa ɓiyitsa we. Veyi ɗa kala kwete wəndəa ka mene slene ta ŋa.

²⁰Ntəŋə ŋkɛ kalə sha yitenyɛ. Ma mba ŋkɛ cakeɗake ne, nahe yitenyɛ kenakɛ ŋkɛ, ntake heli kazhɛ nda yite. Tereŋe ŋkɛ te hwɛ kalə shɛ, pa həməwəve ŋkɛ ndeɗekə.

²¹Tagha gɛ, ma ke wəzege ta ŋkɛ shɛ: Yita, nahe 'ya kebezemte nda ghena ke Shala ba'a ke gha. Kehi 'ya kaheka ɗa na kawəzege ta ŋa ɓiyitsa we.

²²Ma ke yita sha ka mavashia ŋkɛ: Yana mə le lekwesa nya ganyɛ, seɗete nda mə. Vate nda mə ŋgwedɛba te dzeve, seɗame nda mə tsahwa mbe seɗa.

²³Keleke mə mɛare ba'a henemte mə. Zeme ɓəmə wəsə kezeme ba'a mene ɓəmə gəsəkə.

²⁴Kwa nza ŋkɛ nahe wəzege ta ɗa nya kese kemte mte, nahe ŋkɛ kekemave mpi zhɛkwa. Nahe ŋkɛ kese keza za, nahe ŋkɛ kesləyi geva ɓiyitsa. Pa gəsəkə nya wəba ba'a farefa ta wənə menete geva tsagha.

²⁵Ma nda menete geva wəshi nyi kala nyi ne, kwamte wəzege ta ŋkɛ nya wəba. Ma vəa ŋkwa nya sheke ŋkɛ ba'a nya nza ŋkɛ takwa takwa yitea ghɛ ne, pa fate gaka ta wəshi ketsa ba'a yɛ wetse.

²⁶Daŋe ŋkɛ hekakɛ kwete wəndəa mbeli nyi kemene nda slene ke yitenyɛ, ma ke shɛ: Wa menete geva ɓeshi wa?

²⁷Ma ke wəndəa shɛ shɛ: Nahe wəza meyɛ ŋa kezhɛneke geva. Nahe yiteyɛ ŋa kehenekɛ mɛare, va nya kemave wəzege ta ŋkɛ ŋkɛ lɛŋe lɛŋe.

²⁸Mɓɛke wəzege nya wəba hwepete wənə. Hɛreɗɛ ŋkɛ ɗema dzeki ghɛ. Pa yitenyɛ shave, ma ke shɛ: Təhwə təhwə dzeki ghɛ gi!

²⁹Ma ke sha yitenyɛ: Va kwele kwele 'ya kamene ŋa slene, kegha 'ya kaɗema fa ghena nyi gezete na we. Kegha na kandeke ɗa ya zhɛgwəa kwe ŋkɛ kezha mene gəsəkə 'ya le ka mcɛhɛ ɗa we.

³⁰Ama kwa zhɛneke geva wəzege ta ŋa nya kelə kazamte wəshia ŋa le mi mefətekwə hwa ŋkwa ne, gheŋkɛ yahene nda mɛare nya hɛnɛhɛ na.

³¹Ma ke yitenyɛ shɛ: Wəzege ta ɗa, gheɓə le gha ghalanza, yayata wəsə nya va 'ya ne, ŋa ŋa ŋkɛ wəka?

³²Ama ndeɗekə ŋkɛ sha gheɓə kamene gəsəkə ba'a zlama ɓeshi, kwa nza ŋkɛ nahe wəza meyɛ ŋa nya kese kemte mte, nahe ŋkɛ kekemave mpi zhɛkwa. Nahe ŋkɛ kese keza za, ama nahe ŋkɛ kesləyi geva zhɛkwa.»