Read KapsikiDC Ləwke 2 Bible Online

Ləwke 2 - KapsikiDC bible

Ləwke 2

¹Ma vəa ŋkwa shɛ ne, pa Sɛzar Ogəste gezete nda ke mbeli karafe pɛtɛa mbeli nyi te hɛɗia Rome.

²Ma rafe ŋkwa shɛ ne, gheŋkɛ ya kakwa ghate ta rafe ŋkwa, te və nya nza Kiriniyəs kaŋgwamna te sla ta hɛɗia Siri.

³Pa mbeli pɛtɛ slə kaslə karafe slə, yayata wəndə mbe meleme nya ŋkɛ.

⁴Cape Zhozɛf le ŋa ŋkɛ slə mbe meleme ta ka Nazarɛt nya kwa Galilɛ kadzembe Bɛtelɛhɛm, meleme ta ka Zhəwdɛ, te ŋkwa nya yake geva Meghe David, kwa nza ŋkɛ kwa yita ta David ŋkɛ.

⁵Pa ŋkɛ lə kezha rafe slə le Mari, makwa ta ŋkɛ nya patɛake tɛake le hwə.

⁶Ma kwa nza hɛ kwa Bɛtelɛhɛm, pa və keya ta Mari se.

⁷Pa nde yake wəzege teza, tezhɛa nta. Pa nde peɗeyi ŋkɛ mbe lekwesa ba'a veyi kwa dzebene kezeme gwəzə ta gədəwə, va nya ɗema ŋkwa shɛ mbe cɛa ka mentiɓəa sli.

⁸Ma te hɛɗia shɛnyɛ ne, kweci ka ya wəshi nyi kehɛ kwamte kaya wəshia nci heviɗi ya shɛ.

⁹Pa nde ghwene ta Mahwətə ncake nda geva ke hɛ. Kaɓele zləvəa Mahwətə dzeyi yitea hɛ. Kwele kwele zhɛte nda ghazlənə ke hɛ.

¹⁰Ma ke nde ghwene ta Mahwətə sha hɛ: «Ghazlənəma yɛ ma, kwa nza ŋkɛ nahe 'ya kese kezha geze ŋayɛ ghena kwatenca nya ganyɛ nya ketenza kazlama nya wəba kaŋa mbeli pɛtɛ.

¹¹Ma ɓəshi mbe meleme ta David ne, nahe nde mbele ŋkwa keya, gheŋkɛ Kriste Nde sleke ŋkwa.

¹²Wa nya wəsə nya ketencɛ ŋayɛ ŋkɛ nya: katesləyi velɛnjɛ yɛ tepeɗe mbe lekwesa, meɓelahe kwa dzebene.»

¹³Tewə ketemə, pa ka ghwene ta Shala sawa pelɛ ghweme sha nde ghwene ta Shala. Ma ke hɛ sha tsahe Shala:

¹⁴«Zləvə ya te Shala tehwə ghweme, kwelɛŋe ya va mbeli nyi ɗe Shala te hɛɗi.»

¹⁵Ma kwa slənji ka ghwene ta Shala kadzeme ghweme ne, ma ke ka ya wəshi kwelɛ ghəa nci: «Mbi ɓəmə kadzembe Bɛtelɛhɛm, kezha newe ghena nya kemenete geva nya ncɛte ɓəmə nya Mahwətə.»

¹⁶Ntəŋə hɛ kahe kahe, pa hɛ nakɛ yɛ Mari le Zhozɛf ba'a wəzege nya meɓelahe kwa dzebene.

¹⁷Ma kwa nakɛ ŋkɛ hɛ ne, pa hɛ gezete nda ke mbeli wəshi nyi gezete nda ka ghwene ta Shala ke hɛ te wəzegea shɛ.

¹⁸Hehake pɛtɛa mbeli nyi kefave ghena shɛ.

¹⁹Ma Mari le ŋa nta ne, pa nde veyi ghena shɛ mbe ghə, zəzə yazəzə nde te kwa wənəa nta.

²⁰Pa ka ya wəshi zhɛneghe geva. Kageze zləvəa Shala hɛ, katsahe ŋkɛ hɛ yitea wəshi nyi nakɛ hɛ ba'a nyi fave hɛ. Kaganda ne, nahe pɛtɛa wəshia shɛhɛ kemenete geva kala nya gezete nda nde ghwene ta Shala ke hɛ.

²¹Hɛ deghese kwa sebe ta ŋkɛ ne, nahe və kesla nda mɓɛta ŋkwa ke wəzege kese. Pa mbeli hekate nda slə kaYɛsə, slə nya ncɛte nde ghwene ta Shala tewə meghekɛ kedzawa hwə.

²²Nahe və kese kezha yaɓe ghəa nci yɛ Zhozɛf le Mari kala nya gezete wəshi mahalegəa Moyize. Ntəŋə hɛ kadzembe Zhɛrəzalɛm le wəzege kezha ve kwa kema ta Mahwətə.

²³Kwa nza ŋkɛ ma ke wəsə mahalegəa Mahwətə: «Kateve geva yayata tezhɛa wəzege tekeleke kaŋa Shala.»

²⁴Pa hɛ dzeghekɛ melɛ kala nya gezete wəsə mahalegəa Mahwətə le gheɗepe bake keɗema ŋwalea ghəɗəŋkwə bake.

²⁵Kwete wəndə ya shɛ pelɛ Zhɛrəzalɛm nya nza sləa ŋkɛ kaSimɛyon. Ma wəndəa shɛ ne, wəndə ganyɛ ŋkɛ, kahawe ŋkɛ va Shala, mbe neghe se ta wəndə nya ketembele ka Israyɛl ŋkɛ. Nahe Sefəa Shala kenza le.

²⁶Ma ke Sefəa Shala shɛ shɛ: «Katemte na kenakɛma Mɛsi nya ntave Mahwətə na we.»

²⁷Pa Sefəa Shala keleghe Simɛyon kadzembe ghɛa Shala. Vəa ŋkwa shɛ se mbelia ŋkɛ le Yɛsə kezha mene nda wəsə nya gezete wəsə mahalegə.

²⁸Pa Simɛyon kelete yitea dzeve ta ŋkɛ ba'a tsahekɛ Shala. Ma ke:

²⁹«Ma tsetsenya gɛ Mahwətə, nahe na keyipəyi meɗe mɛa ŋa kwa: wərə na kapelakɛ mava ta ŋa kamte le kwelɛŋe.

³⁰Kwa nza ŋkɛ nahe 'ya kenakɛ mbele ŋkwa ta ŋa le ntsə ta ɗa,

³¹nya veyi na kezha mbeli pɛtɛ.

³²Gheŋkɛ ya kawaŋe nya ketencɛ nda ŋa ke hwelefefi. Laka gheŋkɛ ne, zləvə ya te mbelia ŋa, ka Israyɛl.»

³³Hehake yɛ yitenyɛ le meghekɛ va ghena nyi gezete Simɛyon te Yɛsə.

³⁴Pa Simɛyon wəpikɛ hɛ. Ma ke sha Mari meghekɛa Yɛsə: «Nahe Shala kentave wəzege ta ŋa nya kezha bete ta ka Israyɛl kwele kwele hwa hɛɗi keɗema sate ta nci te ŋkwa. Katenza ŋkɛ kawəsə nya kencɛ wəsə nya kese va Shala, ama kateɗema ghena ta ŋkɛ mbeli.

³⁵Gheŋkɛ nde tencɛ ghena nyi wəfərəakɛ mbeli mbe ghəa nci kwele kwele te ŋwela. Ma gha le ŋa ŋa gɛ male, katempahwe wənəa ŋa yaka kala kafayɛ.»

³⁶Kwete male kakwa mɛ ŋkwa nya nza sləa kaAne ya shɛ Wəzha ta Penəwɛl nya kahwelefe ta Asɛr nde. Nahe malea shɛ kenza kehale hale, deke va mberefaŋe yamenete nde le za ghala ŋzlete mbeli.

³⁷Pa nde nza nda kawede, deghesemsə wəfaɗeghəmbe va ta nta. Kanehe geva nde le ghɛa Shala we, slene ta Shala yamene nde veci le viɗi, kamene səwəmayɛ nde ba'a kasəkwə ghə nde.

³⁸Pɛkwe nde vəa ŋkwa shɛ, ntake nde katsa nda hana ke Shala. Pa nde gezete nda ghena te ghəa wəzegea shɛ ke mbeli nyi keneghe mbele ta ka Zhɛrəzalɛm.

³⁹Ma kwa kiɗimte slene nyi 'yɛwete wəshi mahalegəa Mahwətə yɛ Mari le Zhozɛf ne, pa hɛ zhɛneghe geva kadzawa Galilɛ, kadzembe meleme ta nci Nazarɛt.

⁴⁰Ma wəzege le ŋa ŋkɛ ne, kakele ŋkɛ, kambake geva berete ta ŋkɛ. Kwele kwele ntsehwele ve, zlaɓa ta Shala ya kənə.

⁴¹Keva keva dzeme Zhɛrəzalɛm mbeli nyi keyake Yɛsə yitea gəsəkəa Pake.

⁴²Ma kwa menete va Yɛsə meŋe bakeghəmbe, ntəŋə ŋkɛ le hɛ kadzeme Zhɛrəzalɛm yitea gəsəkə kala nya mene hɛ ghalanza.

⁴³Kwa sebe ta gəsəkə, cape hɛ kalə sha ghɛ, mba Yɛsə tagha mbe Zhɛrəzalɛm. Ama keɗepe yɛ yitenyɛ le meghekɛ we.

⁴⁴Ma zəzə hɛ ne, hwa mbeli nyi dzeghwa hɛ le hɛ zlaɓe Yɛsə ke hɛ ke ta nci. Ma kwa vəghwə hɛ kwetɛŋe ne, ntake hɛ kaghweze ŋkɛ hwa ka menəhɛ nci ba'a ka mcɛhɛ nci.

⁴⁵Ama kesləyi ŋkɛ hɛ we. Tagha gɛ, pa hɛ zhɛneghe geva kadzeme Zhɛrəzalɛm, mbe zele ŋkɛ hɛ.

⁴⁶Kwetere wəmbəa hɛ mahekene sepate ŋkɛ hɛ mbe ghɛa Shala. Mentishɛ ŋkɛ hwa ka teke nda wəshi ke mbeli, kafa ghena ta nci ŋkɛ, ka'yɛwe ghena ŋkɛ va hɛ.

⁴⁷Heheɓake pɛtɛa mbeli nyi kefave ntsehwelea ŋkɛ ba'a ghena nya zhɛne ŋkɛ.

⁴⁸Ma kwa nakɛ ŋkɛ yɛ yitenyɛ le meghekɛ ne, nahe hɛ kenza hehake, ma ke meghekɛ shɛ: «Wəzege ta ɗa, wa raberə menete n'yɛ wəsə nya kala nya na wa? Yiteyɛ ŋa le 'ya ne, yɛmə te mɛ va ghen'yɛ kezha zele ŋa we.»

⁴⁹Ma ke sha hɛ: «Yitea wa zele ɗa yɛ wa? Keɗepe yɛ nahe ŋkɛ kehi kanza ki ghɛa Yiteyɛ ɗa wəka?»

⁵⁰Ama kefave ghena nya ɗe ŋkɛ kageze hɛ we.

⁵¹Zhɛne ŋkɛ le hɛ kadzawa Nazarɛt, kafa nda ghena ŋkɛ ke hɛ. Pa meghekɛ veyi pɛtɛa wəshi nyi kemenete geva mbe ghəa nta.

⁵²Kakele Yɛsə, kambake geva ntsehwelea ŋkɛ, zeɗehwe nda ŋkɛ ke Shala, tsagha sha mbeli perə.