Read KapsikiDC Ləwke 20 Bible Online

Ləwke 20 - KapsikiDC bible

Ləwke 20

¹Te kwete veci ne, kateke nda wəshi Yɛsə ke mbeli mbe ghɛa Shala. Ghena kwatenca nya ganyɛ yazlape ŋkɛ. Pɛkwe mbeli nyi te ghəa ka dzeghe Shala ba'a ka rafe wəsə mahalegə zlaɓe le mbelia jama.

²Ma ke hɛ shɛ: «Ncɛte n'yɛ: le berete ta wa mene wəshi nyi na wa? Wa nde ndeke ŋa hweŋkwa kamene kala nya wa?»

³Ma ke Yɛsə sha hɛ: «'Ya perə ne, 'ya kate'yɛwe ghena va gheyɛ. Gezete ɗa mə:

⁴wa nde ghweneke Zhaŋe kamene batɛme wa, Shala na, mbeli na?»

⁵Ntake hɛ kazele ghena kezhɛne kwelɛ ghəa nci, ma ke hɛ: «Ma kezhɛnete mə: Shala nde ghweneke, ke gheɓəmə ne, ma ke sha tezhɛne ɓəmə: Va wa ɗema yɛ keyɛte ghena ta Zhaŋe tsagha wa?

⁶Ama kegeze mə: Mbeli nde ghweneke, ke gheɓəmə ne, kateŋkwape ɓəmə mbeli pɛtɛ le pelɛ, kwa nza ŋkɛ nahe mbeli pɛtɛ keɗepe Zhaŋe kande mɛ ŋkwa.»

⁷Tagha gɛ, ma ke hɛ sha Yɛsə: «Keɗepe n'yɛ we.»

⁸Ma ke Yɛsə sha hɛ: «Ma 'ya perə ne, kageze ŋayɛ 'ya le nyama nyama berete mene wəshia shɛhɛ 'ya we.»

⁹Ma ke Yɛsə sha mbeli le ghena keyipə pa: «Pa kwete wəndə mɓete yɛ rɛzɛŋe, pa dapate nda te dzeve ke ka mene slene. Cape ŋkɛ kadzehwa mte kahɛ kwele kwele.

¹⁰Ma kwa nakanji wəshia shɛhɛ, pa ghweneghe nda mava ta ŋkɛ ke ka mene slene mbe wəvea rɛzɛŋe, kezha ve nda zhike ŋa ŋkɛ bela hɛ kase. Pa ka mene slene ɗate wəndəa shɛ, pa hɛ ŋkamte ŋkɛ pala pala.

¹¹Pa wəndə ke ntsa shɛ ghweneghe kwete wəndəa ŋkɛ ɓiyitsa, pa hɛ ɗate ŋkɛ zhɛkwa, pa hɛ ŋelete ŋkɛ kwele kwele ba'a ŋkamte ŋkɛ pala pala zhɛkwa.

¹²Pa wəndəa shɛ ghweneghe nda nde maheke ta wəndə ɓiyitsa ke hɛ, pa hɛ ɗamte ŋkɛ le zhi ba'a negheyi ŋkɛ pelɛke te ŋwela.

¹³Ma ke wəndə ke wəvea shɛ mbe ghəa ŋkɛ: Tsema temene 'ya tse wa? 'Ya kateghwene nda wəzege ta ɗa ke hɛ, wəzege ta ɗa nya ɗe 'ya kwele kwele. Ghəpə yite we, katehawe hɛ ve.

¹⁴Ama kwa nakɛ wəzegea shɛ ka mene slene, ma ke hɛ kwelɛ ghəa nci: Yawa, wa nya nde zeme ghɛ nya te kwete və gɛ! Peslekɛ ɓəmə ŋkɛ, kaŋa ɓəmə tenza wəve.

¹⁵Pa hɛ kelemte ŋkɛ shave mbe wəve ba'a peslekɛ ŋkɛ hwa gamba. Tsema temene nda wəndə ke wəve ke ka mene slene nyi wa?

¹⁶Katese ŋkɛ kampə mbeli nyighɛ ba'a katedape nda wəvea shɛ te dzeve ke kweci mbeli.» Kwa fave ghena shɛ mbeli nyi yitea Yɛsə, ma ke hɛ: «Katemene geva ŋkɛ tsetse we.»

¹⁷Newe ke Yɛsə sha hɛ, ma ke: «Wa yaɗe ghena nya kerafete geva mbe Ghena ta Shala kageze wa? Ma ke: Ma pelɛ nya neghamte mbeli nyi keŋa ŋkwa ne, gheŋkɛ nde zhɛrenyɛ kapelɛa megwekwe.

¹⁸Ma yayata wəndə nya keteteɗe te pelɛa shɛ ne, katehwəshimte geva ŋkɛ. Ma nda pelɛa shɛ nde teɗe te wəndə ne, katehə ŋkɛ ŋkɛ.»

¹⁹Kaɗe mbeli nyi te ghəa ka dzeghe Shala ba'a ka rafe wəsə mahalegə kakese Yɛsə te ŋkwa shɛnyɛ. Kwa nza ŋkɛ nahe hɛ keɗepe te ghəa nci gezete ghena keyipə pa shɛ ŋkɛ. Ama kazhɛ nda ghazlənə ke hɛ va mbeli.

²⁰Pa hɛ hendemte geva cakeɗake ɓɛhwɛ, mba hɛ kaya Yɛsə. Pa hɛ ghweneghe nda mbeli kezha fa ntsehwelea ŋkɛ, nyi kezhɛrete ghəa nci kala mbeli nyi kehawe ve. Kaɗe hɛ kaŋa nda keleŋa ke Yɛsə laka 'yɛwe ghena. Tsagha ne, katekese nda hɛ ke ŋgwamna nya nza berete ve yitea meha ghwə te.

²¹Ma ke hɛ sha Yɛsə: «Nde sleke n'yɛ, nahe n'yɛ keɗepe ghena nya kaganda yageze na, tiɗiɗi teke nda wəsə na ke mbeli perə. Katsakɛ ŋa ghena ta kwele nya geze mbeli we. Ama kaganda ta wəsə nya ɗe Shala kanza wəndə le, yateke nda na ke mbeli.

²²Gezete n'yɛ, nahe wəsə mahalegəa ɓəmə kendeke ɓəmə hweŋkwa kaŋki nda jaɓeregwale ke Sɛzar na?»

²³Nahe Yɛsə keɗepe keleŋa yaŋa nda hɛ. Ma ke sha hɛ:

²⁴«Ncɛte ɗa mə cɛdɛa shɛ. Ŋa wa pa ta kema ba'a slə nya te wa?» Ma ke hɛ shɛ: «Ŋa Sɛzar.»

²⁵Tagha gɛ, ma ke Yɛsə sha hɛ: «Yawa, zhɛnave nda mə wəsə nya kenza kaŋa ŋkɛ ke Sɛzar, zhɛnave nda mə wəsə nya kenza kaŋa ŋkɛ ke Shala.»

²⁶Kashɛ hɛ ve nda fete ke Yɛsə, va nya gezete ghena shɛ ŋkɛ hwa mbeli we. Hehake hɛ va ghena ta ŋkɛ, tikə tikə hɛ nzanji.

²⁷Pa kweci hwa ka Sadəsɛyɛn se sha Yɛsə. Ghenci kageze kaɗema mbeli kasame kwa kwele le mpi. Ma ke hɛ 'yɛwete ghena ve:

²⁸«Nde sleke n'yɛ, ma ke Moyize rafete n'yɛ: Ma kemtenyɛ wəndə kaɗema ŋkɛ keyake wəzege sawa hwa male ta ŋkɛ ne, hweŋkwa ya va wəza meghekɛ kakele malea shɛ yitea yake hwelefe ŋkɛ sawa hwe.

²⁹Kweci mbeli ya shɛ hwa ghen'yɛ mberefaŋe kaŋwalea male. Wəmakwe Tezhɛa megheyɛa nci sha male, mtiwə ŋkɛ kaɗema keyake wəzege hwe.

³⁰Pa nde bake wəmeve malea shɛ.

³¹Tsagha nde maheke, tsagha hɛ mberefaŋe nci. Pɛtɛ hɛ kempənji kaɗema keyake ŋwale.

³²Mtiwə malea shɛ kwa sebe ta nci perə.

³³Yawa, ma te veci nya tesame mbeli pɛtɛ kwa kwele le mpi ne, ŋa wa tenza malea shɛ hwa mbeli nyi mberefaŋe nyi wa? Kwa nza ŋkɛ nahe nde kese yitea hɛ pɛtɛ gɛ!»

³⁴Ma ke Yɛsə sha hɛ: «Ma zhili ba'a mi nyi te hɛɗi nya ne, kawəme geva hɛ.

³⁵Ama mbeli nyi kehi kasame kwa kwele le mpa ba'a nyi kehi kanza mbe nza nya mbe kema ne, kawəme geva hɛ we.

³⁶Kwa nza ŋkɛ katezhɛne hɛ kampə we, yipə yipə nza hɛ le ka ghwene ta Shala. Nahe hɛ kenza kaŋwalea Shala, kwa nza ŋkɛ nahe hɛ kesame kwa kwele le mpi.

³⁷Nahe Moyize le ghəa ŋkɛ kegezete katesame mbelia kwahɛɗi kwa kwele le mpi. Tsagha gezete ŋkɛ mbe ghena ta tigə nya tse ghwə hwe, vəa ŋkwa nya hekate Mahwətə ŋkɛ kaShala ta Abraham, kaShala ta Izak ba'a kaShala ta Zhakob.

³⁸Kenza Shala kaShala ta ka mpə mpə we, ama nahe ŋkɛ kenza kaShala ta mbeli nyi teghweme, va nya nza ŋkɛ kaŋa ŋkɛ nza mbeli pɛtɛ.»

³⁹Ma ke kweci ka rafe wəsə mahalegə sha Yɛsə: «Megela gezete ghena na, Nde sleke n'yɛ.»

⁴⁰Kwa nza ŋkɛ kaɗe hɛ kazhɛne ka'yɛwe ghena ve we.

⁴¹Ma ke Yɛsə sha hɛ zhɛkwa: «Tsema geze mbeli kahwelefe ta David Mɛsi wa?

⁴²Kwa nza ŋkɛ ma ke David gezete le ghəa ŋkɛ te palepa ta Cimə: Ma ke Nde sleke ŋkwa sha Nde sleke ɗa: Ntishɛ ŋa te kwa zeme ta ɗa,

⁴³nda ŋkeyi ka jaga ta ŋa 'ya mbe hwəa seɗa ta ŋa.

⁴⁴Ma kenza nde Nde sleke ɗa heka Mɛsi David ne, tsema nza ŋkɛ kawəzege ta David tsagha wa?»

⁴⁵Ma kwa nza mbeli kafa ghena ta Yɛsə, ma ke sha mbeli nyi ketəkwə təkwə:

⁴⁶«Ya mə ghəa ŋayɛ va ka rafe wəsə mahalegə. Mbe gare ɗe hɛ kadzeghwa, le hawe ɗe hɛ kanjiŋwe hɛ mbeli te shikwə, wəshi kentishɛ nyi te kema yawədə hɛ mbe cɛ kesəkwə ghə. Tsagha hwa yɛ veghe perə.»

⁴⁷Pɛtɛ hɛ fəhwe wəshia ka wedidi. Ɓiyitsa ne, kwele kwele temə hɛ te səkwə ghə kezha newe hɛ mbeli kambeli ganji. Kwele ma tenza ɗa te hɛ.