Read KapsikiDC Ləwke 22 Bible Online

Ləwke 22 - KapsikiDC bible

Ləwke 22

¹Takwa takwa gəsəkəa pɛaŋe nya ɗema tenjɛne hwe, nya heka mbeli kaPake.

²Ntake mbeli nyi te ghəa ka dzeghe Shala ba'a ka rafe wəsə mahalegə kaghweze ntsehwele kepesle Yɛsə, ama pa hɛ ghazlənənji va mbeli.

³Tagha gɛ, shilimə Satan dzembe mbe Zhəwdas Iskariyote, kwete wəndəa mbeli nyi meŋe bakeghəmbe.

⁴Cape Zhəwdas kalə sha mbeli nyi te ghəa ka dzeghe Shala ba'a mbeli nyi te ghəa ka ya ghɛa Shala kezha sepa ntsehwele kekese nda Yɛsə ke hɛ.

⁵Fare fare wənəa nci, pa hɛ meɗeyi nda ve nda cɛdɛ.

⁶Pa Zhəwdas yɛte, ntake ŋkɛ kazele və nya nza ŋkɛ kakeseve Yɛsə kwa kaɗema mbeli keɗepe.

⁷Pa vecia pɛaŋe nya ɗema tenjɛne hwe se. Vəa ŋkwa shɛ tehene zhɛgwəa lɛmə timɛti mbeli kezha wəsə kezeme ta gəsəkə.

⁸Ma ke Yɛsə ghwenakɛ yɛ Piyɛre le Zhaŋe: «Kwiɗi mə kalə kamene ɓəmə wəsə kezeme yitea gəsəkəa Pake.»

⁹Ma ke hɛ shɛ: «Tema ɗe na kalə ghen'yɛ kamene ŋkɛ wa?»

¹⁰Ma ke sha hɛ: «Fa mə: ma vəa ŋkwa nya tedzeme meleme yɛ ne, katebegeme yɛ le kwete wəndə nya nza ghwelepe ta yɛmə kwa ghə ve. Təkwə təkwəte mə ŋkɛ kalə kadzeki ghɛ nya tedzeki ŋkɛ.

¹¹Ma pe yɛ sha wəndə ke ghɛa shɛ: Ma ke Nde sleke n'yɛ sha gha: Tema cɛ nya tezeme gəsəkəa Pake 'ya mbe le mbeli nyi ketəkwə təkwə ɗa wa?

¹²Ma pelɛ ghəa cɛ nya mencikə ne, katencɛ ŋayɛ cɛ nya wəba le pɛtɛa wəshi nyi kehi ŋkɛ. Tagha temene ɓəmə wəsə kezeme yɛ.»

¹³Cape hɛ kalə, tsagha shɛ sləyi hɛ kala nya gezete nda Yɛsə ke hɛ, pa hɛ menete wəsə kezeme kezha gəsəkəa Pake.

¹⁴Ma kwa dzeghete geva və ne, ntishɛ yɛ Yɛsə le ka ghwene ta ŋkɛ kazeme wəsə kezeme.

¹⁵Ma ke sha hɛ: «Kwele kwele ɗehwe 'ya kezha zeme wəsə kezeme ta Pake nya le gheyɛ nda tesa yaka 'ya.

¹⁶Kwa nza ŋkɛ ma 'ya sha gheyɛ: Katezhɛne 'ya kazeme ŋkɛ hwa'a te veci nya tencɛte geva ghena nya mbe mbe mbe Meghea Shala we.»

¹⁷Ma kwa ndeke nda zlerekwea wəsə kesa mbeli ne, pa ŋkɛ tsate nda ŋ'wese ke Shala, ma ke sha hɛ: «Kele mə zlerekwe nya ba'a sa mə wəsə nya kwa kwelɛ gheyɛ.

¹⁸Kwa nza ŋkɛ ma 'ya sha gheyɛ: se mɛa ɓeshi ne, katezhɛne 'ya kasa tɛ tɛape hwa'a te və nya se Meghea Shala we.»

¹⁹Laŋe ŋkɛ sha ɗafa, pa ŋkɛ tsate nda ŋ'wese ke Shala ba'a neheve mbe, pa ŋkɛ ndeke nda ke hɛ. Ma ke sha hɛ: «Nya ya kageva ta ɗa nya kendeke ŋayɛ geva. Mene mə kala nya kezha zəzə ɗa.»

²⁰Tsagha shɛ ndeke nda zlerekwe ŋkɛ ke hɛ kwetere wəmbəa ɗafa. Ma ke sha hɛ: «Nahe zlerekwe nya kenza kajikə geva mɛnɛfɛ le Shala, va nya shekeyi geva mimia ɗa kezha gheyɛ.

²¹Ama newema mə: ma wəndə nya ketepamte ɗa ne, teke ŋkɛ kənəa ɗafa le 'ya.

²²Ghəpə yite we, wa nya Wəzege ta za katemte kala nya zəzəte Shala. Ama wa nya yaka te wəndə nya ketepamte ŋkɛ gɛ!»

²³Ntake mbeli nyi ketəkwə təkwə ka'yɛwe wəndə nya ketemene wəsə nya kala nya kwelɛ ghəa nci.

²⁴Ntake mbeli nyi ketəkwə təkwə Yɛsə kazhɛne ghəpə le berete kezha ɗepe wəndə nya ketenza kwele hwa hɛ.

²⁵Ma ke sha hɛ: «Ka meghea kɛfia kweci hwelefefi ne, ghenci ka sleke mbelia nci. Kaɗe hɛ kaheka hɛ mbeli kaka mene ganyɛ.

²⁶Ama gheyɛ ne, menema yɛ kala hɛ ma. Ma wəndə nya kwele ma hwa gheyɛ ne, nza ŋkɛ kanya ɓɛhwɛ ma. Ma wəndə nya kesleke ŋkwa ne, nza ŋkɛ kala wəndə nya kemene nda slene ke mbeli.

²⁷Kwa nza ŋkɛ ne, wa ŋkɛ ya kwele ma wa? Wəndə nya mentishɛ nda keleke nda ɗafa mbeli na, na, wəndə nya kekeleke nda na? Ashɛ wəndə nya mentishɛ wəka? Yawa, 'ya le ŋa ɗa ne, hwa gheyɛ 'ya kala wəndə nya kemene slene.

²⁸Ma gheyɛ ne, mbeli nyi kese kanza le 'ya vəa ŋkwa nya sahwe yaka 'ya.

²⁹'Ya ne, nahe 'ya kehite ŋayɛ ŋkwa mbe Meghea Shala, kala nya hite ɗa ŋkɛ Yiteyɛ ɗa.

³⁰Te ŋkwa shɛ tezeme wəsə kezeme ba'a tesa wəsə kesa yɛ le 'ya. Katentishɛ yɛ pelɛ pasla kameha ghwə te ka yitehɛ ta ka Israyɛl meŋe bakeghəmbe.»

³¹Ma Yɛsə sha Simon Piyɛre: «Simon, Simon, fama ghena ta ɗa. Wa nya Satan nya kazele hweŋkwa kezha dzaŋele ŋayɛ kala nya dzaŋele ha mbeli.

³²Ama nahe 'ya kesəkwəte ghə kezha gha, yitea ɗema yɛ ta ŋa kazamte geva. Ama gha, vəa ŋkwa nya zhɛneke geva na kase sha 'ya ne, mbakete nda berete ke ka kesaka meyɛ ŋa.»

³³Ma ke Piyɛre shɛ: «Nde sleke ŋkwa, nahe 'ya kenza ɗeke ɗeke kadzawa daŋgayɛ ba'a kamte le gha.»

³⁴Ma ke Yɛsə zhɛnete nda: «Ma 'ya sha gha Piyɛre: ma ɓeshi nda teheka ŋələ ne, kategeze na mahekene zhigə kaɗema na keɗepe ɗa.»

³⁵Ma ke Yɛsə geze nda ke hɛ ɓiyitsa: «Ma kwa ghwenakɛ ŋayɛ 'ya kaɗema slibə cɛdɛ, slibəa wəsə kezeme, tsahwa mbe seɗa va gheyɛ ne, nahe yɛ keshaŋe va kwete wəsə na?» -- «Ewə», ke hɛ shɛ.

³⁶Ma ke Yɛsə sha hɛ: «Ma wəndə nya nza slibə cɛdɛ ve ne, kelete ŋkɛ. Tsagha wəndə nya nza slibə dɛafe ve. Ma wəndə nya ɗema kafayɛ ve, kelete lekwesa ta ŋkɛ ŋkɛ kezha pave.

³⁷Kwa nza ŋkɛ ma 'ya sha gheyɛ: nda wəsə nya kerafete geva te 'ya kamene geva, ma ke: Nahe mbeli keɓelahwe ŋkɛ hwa ka mefətekwə. Kwa nza ŋkɛ ma ghena nya kerafete geva te ghəa ɗa ne, katemene geva ŋkɛ.»

³⁸Ma ke mbeli nyi ketəkwə təkwə: «Nde sleke ŋkwa, wa nyi kafayɛ nyi bake.» Ma ke zhɛnete nda ke hɛ: «Wərə tsagha.»

³⁹Ma kwa shave Yɛsə ki ghɛ ne, cape ŋkɛ kadzeme ghweme ta yɛ Bekele kala nya seneve ŋkɛ ghalanza. Ntəŋə mbeli nyi ketəkwə təkwə kwa sebe ta ŋkɛ.

⁴⁰Ma kwa kekave ŋkwa shɛ hɛ ne, ma ke Yɛsə sha hɛ: «Səkwə mə ghə kezha ɗema yɛ kateɗe kadzembe ghwete ŋkwa.»

⁴¹Pa Yɛsə hendemte geva vare hɛ gare bezaghe pelɛ wəndə kadzete, gwəɗəŋə ŋkɛ kasəkwə ghə.

⁴²Ma ke gezete: «Yita, ma kenza nde kaɗe na ne, fɛake ɗa mte nya. Ɗe ta ɗa nde mene geva we, ama ŋa ŋa.»

⁴³Pɛkwe nde ghwene ta Shala sawa pelɛ ghweme kezha mtsehe nda berete.

⁴⁴Ma kwa yirənyɛ Yɛsə ne, ntake ŋkɛ kasəkwə Shala kevə kevə. Ma hwələ nya ketiɗi sawa yite kadzete hɛɗi ne, kala mimi.

⁴⁵Ma kwa kiɗimte səkwə ŋkɛ ne, pa zhɛneke geva kase sha mbeli nyi ketəkwə təkwə. Ma se ŋkɛ ne, yitea hɛ va yirə ta mehele.

⁴⁶Ma ke sha hɛ: «Wa raberə hɛ yɛ wa? Sate mə ba'a səkwə mə ghə kezha ɗema yɛ kateɗe kadzembe ghwete ŋkwa.»

⁴⁷Ma mba Yɛsə kageze ghena ne, ŋkeɗe mbeli senji. Zhəwdas nya hwa mbeli nyi meŋe bakeghəmbe nde begheke hɛ. Pa ŋkɛ hendeke geva kase sha Yɛsə kezha həməwə.

⁴⁸Ma ke Yɛsə shɛ: «Zhəwdas, laka həməwə ŋkɛ nza na kapamte Wəzege ta za ka.»

⁴⁹Ma kwa nakɛ wəsə nya ketemene geva mbeli nyi yitea Yɛsə ne, ma ke hɛ: «Nde sleke ŋkwa, tsasle hɛ ghen'yɛ le kafayɛ na?»

⁵⁰Pa kwete wəndəa nci tsaslekɛ nde mene slene ta wəndə kwelea ka dzeghe Shala, kwɛ'a ŋkɛ tsaslakawa sleme kwa zeme va ghə ve.

⁵¹Ama ma ke Yɛsə: «Sərəakɛ mə, wərə tsagha.» Pa ŋkɛ kwaɗakɛ sleme ta wəndəa shɛ ba'a mbete ŋkɛ.

⁵²Ma ke Yɛsə sha mbeli nyi te ghəa ka dzeghe Shala, mbeli nyi te ghəa ka ya ghɛa Shala ba'a mbelia jama nyi kese kezha kese ŋkɛ: «Le yɛ kafayɛ ba'a yɛ geta hi yɛ kase kakese ɗa kala wəsə nya nza 'ya kande ŋwasle ŋkwa na?

⁵³Keveci keveci 'ya le gheyɛ mbe ghɛa Shala, ama kese yɛ kazele hweŋkwa kekese ɗa we. Ama nahe və nya kenza kaŋa ŋayɛ ba'a kaŋa berete ta ŋkwesle.»

⁵⁴Pa hɛ keseve Yɛsə, pa hɛ keleghe ŋkɛ kadzeki ghɛ wəndə kwelea ka dzeghe Shala. Mbe təkwə təkwə hɛ Piyɛre cakeɗake.

⁵⁵Nahe mbeli kemehate ghwə ki ghɛ shɛ, pa Piyɛre ntishɛ hwa mbeli nyi yite.

⁵⁶Pa kwete kwatera nakɛ Piyɛre mentishɛ yitea ghwə. Ntake nde kavereghe ŋkɛ, ma ke: «Nahe wəndə nya perə kese yitea Yɛsə.»

⁵⁷Ama pa Piyɛre ɗepetema Yɛsə, ma ke: «Male, keɗepe wəndəa shɛ 'ya we.»

⁵⁸Temə vireɗi, pa kwete wəndə nakɛ ŋkɛ, ma ke shɛ: «Gha perə ne, kwete na wəndəa nci.» Ma ke Piyɛre sha wəndəa shɛ: «Ewə, hwa hɛ 'ya we.»

⁵⁹Ma kwa teməhwe temə mbeli gare lerə kwetɛŋe ne, ma ke kwete wəndə shɛ shɛ dazhɛ dazhɛ: «Ghəpə yite we, nahe wəndə nya kese le Yɛsə, zhɛne ne, nde Galilɛ ŋkɛ.»

⁶⁰Ma ke Piyɛre: «Keɗepe ghena nya ɗe na kageze 'ya, gha le ŋa ŋa we.» Te ŋkwa shɛnyɛ mba ŋkɛ kageze ne, pa ŋələ hekate heka.

⁶¹Pa Nde sleke ŋkwa zhɛrete geva kanewe Piyɛre, mteghere vate ntsə te. Tagha gɛ, pa Piyɛre zəzəte ghena nya se ŋkɛ geze nda, ma ke shɛ: Ma nda teheka ŋələ ɓeshi nya ne, kategeze na kaɗema na keɗepe ɗa mahekene zhigə.

⁶²Pa Piyɛre shavenyɛ le nehwene sərəɓə sərəɓə.

⁶³Ntake mbeli nyi keya Yɛsə kaŋele ŋkɛ ba'a kaɗa ŋkɛ.

⁶⁴Pa hɛ hwepekɛ kema ta ŋkɛ le zlave, ma ke hɛ 'yɛwete ve: «Wa nde mpave ŋa wa? Ɗepete gɛ!»

⁶⁵Ntake hɛ kaŋele ŋkɛ le kweci ghena keghə keghə.

⁶⁶Ma kwa pesle ŋkwa ne, pa mbelia jama ta ka Zhəwif, mbeli nyi te ghəa ka dzeghe Shala ba'a ka rafe wəsə mahalegə tsenete geva. Pa hɛ keleke Yɛsə kase kadzawa kema ta mbeli nyi te ghəa hɛɗia ka Zhəwif.

⁶⁷Ma ke hɛ 'yɛwete ve: «Gha ya kaMɛsi na? Gezete n'yɛ.» Ma ke Yɛsə sha hɛ: «Ma kegezete ŋayɛ 'ya ne, kateyɛ ghena ta ɗa yɛ we.

⁶⁸Ma ke'yɛwe ghena 'ya va gheyɛ ne, katezhɛne ɗa yɛ we.

⁶⁹Ama tsetsenya ne, katentishɛ Wəzege ta za te kwa zeme ta Shala nde berete.»

⁷⁰Ma ke hɛ pɛtɛ nci: «Gha ya kaWəzege ta Shala gɛ na?» Ma ke sha hɛ: «Gheyɛ ka gezete gheŋkɛ 'ya.»

⁷¹Tagha gɛ, ma ke hɛ: «Mba gheɓəmə kazele kwete fete ta ŋkɛ we, nahe gheɓəmə le ghəa ɓəmə kefate ghena nya gezete ŋkɛ le mɛa ŋkɛ.»