Read KapsikiDC Ləwke 23 Bible Online

Ləwke 23 - KapsikiDC bible

Ləwke 23

¹Pa pɛtɛa mbeli nyi ketsenete geva sate te ŋkwa ba'a keleghe nda Yɛsə ke Pilate.

²Ntake hɛ kave nda fete, ma ke hɛ: «Nahe ghen'yɛ kesləyi wəndə nya kabeze nda mehele ke mbelia n'yɛ. Kafɛa mbeli ŋkɛ ketsehe nda jaɓeregwale mbeli ke Sɛzar. Ɓiyitsa ne, kageze ŋkɛ nahe ŋkɛ kenza kaMɛsi, kameghe.»

³Ma ke Pilate 'yɛwete va Yɛsə: «Gha ya kameghea ka Zhəwif na?» Ma ke Yɛsə zhɛnete nda: «Gha nde gezete.»

⁴Ma ke Pilate sha mbeli nyi te ghəa ka dzeghe Shala ba'a mbeli nyi tagha: «Kenakɛ ghena nya ndeke nda fete yɛ ke wəndə nya te 'ya we.»

⁵Ama ma ke hɛ le berete ɓiyitsa: «Hweŋkwa ta beze meleme yancɛ nda ŋkɛ ke mbeli. Mbe Galilɛ ghate ghena shɛ ŋkɛ, zhɛne, mbe pɛtɛa Zhəwdɛ hwa'a teke.»

⁶Ma kwa fate ghena shɛhɛ Pilate ne, ma ke 'yɛwete va hɛ: «Nde Galilɛ wəndə nya na?»

⁷Pa mbeli gezete nda kande Galilɛ ŋkɛ, mbe hɛɗi nya sleke Hɛrode. Pa ŋkɛ ghweneghe Yɛsə kalə sha Hɛrode. Nahe ŋkɛ kenza mbe Zhɛrəzalɛm te vecia shɛ.

⁸Fare fare wənəa Hɛrode kwa nakɛ Yɛsə ŋkɛ, kwa nza ŋkɛ nahe ŋkɛ kegha kafa ghena ta ŋkɛ, mbe zəzə lə ŋkɛ kanewe Yɛsə bandanyɛ, kezha kamenete nda wəsə meŋele ŋkɛ.

⁹Kwele kwele 'yɛwete ghena ŋkɛ va Yɛsə, ama kese Yɛsə kazhɛne nda we.

¹⁰Ma mbelia jama ta ka dzeghe Shala ba'a ka rafe wəsə mahalegə ne, nahe hɛ kese le fete nyi dzawe dzawe kezha ve nda ke Yɛsə.

¹¹Ntake yɛ Hɛrode le ka sewajɛa ŋkɛ kaŋele Yɛsə ba'a kayiɗə ŋkɛ. Pa hɛ seɗaghe nda lekwesa meghe ba'a ghweneghe ŋkɛ kalə sha Pilate.

¹²Te vecia shɛnyɛ, nahe yɛ Hɛrode le Pilate kekesete mcɛ, kaka ghema hɛ ghalanza.

¹³Pa Pilate tsenete mbeli nyi te ghəa ka dzeghe Shala, ka ya mbeli ba'a mbeli pɛtɛ.

¹⁴Ma ke sha hɛ: «Nahe yɛ kekeleke ɗa wəndə nya laka geze ɗa mbeli yabeze ŋkɛ. Tagha yɛ pɛtɛ nda se 'ya ka'yɛwe ghena ve, kenakɛ fete 'ya ve te kwete hwa wəshi nyi ve nda fete yɛ te hɛ we.

¹⁵Ya Hɛrode ŋkɛ perə ne, kekemave fete ve we, kwa nza ŋkɛ nahe ŋkɛ kezhɛneke n'yɛ. Kemenete fete wəndə nya gare mte we.

¹⁶'Ya kategeze nda ke mbeli kaɗa ŋkɛ le kwərəpə, kwa sebe ta ŋkɛ, katepele ŋkɛ 'ya.»

¹⁷Ma mbe yayata gəsəkəa Pake ne, kapele nda wəndə Pilate ke hɛ same kwa daŋgayɛ.

¹⁸Ntake hɛ katsa lewela pɛtɛ kanya kwetɛŋe, ma ke hɛ: «Peslekɛ wəndəa shɛ, pelakɛ n'yɛ Barabas.»

¹⁹Nahe Barabas kepeslekɛ wəndə vəa ŋkwa nya fate nda ma ghena mbeli ke ka Rome mbe meleme. Vatse nza ŋkɛ kwa daŋgayɛ.

²⁰Ma kwa ɗe Pilate kapele Yɛsə ne, pa zhɛne kageze nda ghena ke mbeli.

²¹Ama ma ke hɛ tsate lewela: «Baŋate te sheghwə kwa zleŋkwa, baŋate ŋkɛ te sheghwə kwa zleŋkwa.»

²²Pa Pilate kagezete nda ghena ke hɛ kakwa mahekene zhigə, ma ke: «Wa wəsə nya bezemte ŋkɛ wa? Kenakɛ fete 'ya ve gare mte we. 'Ya kategeze nda ke mbeli kezha ɗate ŋkɛ hɛ le ghweɗa, kwa sebe ta ŋkɛ, katepele ŋkɛ 'ya.»

²³Pa hɛ tsate lewela le berete zhɛkwa kezha baŋate Yɛsə mbeli te sheghwə kwa zleŋkwa. Pa lewela ta nci kelehwe ŋkwa.

²⁴Pa Pilate zəzəte mene nda wəsə nya 'yɛwe hɛ ke hɛ.

²⁵Pa Pilate pelakɛ wəndə nya kesawa mbeli kwa daŋgayɛ va fama ghena ba'a va pesle ŋkwa. Pa ŋkɛ ndeke nda Yɛsə ke hɛ kezha mene wəsə nya ɗe hɛ hɛ le.

²⁶Ma vəa ŋkwa nya lə le Yɛsə ne, pa hɛ begeme le kwete nde Sirɛne nya nza sləa ŋkɛ kaSimon kasheke ŋkɛ kwamte. Pa hɛ ŋkeyite yitea sheghwə kwa zleŋkwa ta Yɛsə le berete kezha kele ŋkɛ kwa sebe ta Yɛsə.

²⁷Kwele kwele mbeli ba'a mi kwa sebe ta ŋkɛ katəkwə təkwə ŋkɛ, kanehwene hɛ ba'a kaŋgaɗe ghə hɛ yitea Yɛsə.

²⁸Tewətelɛwe Yɛsə zhɛrete geva kanewe hɛ, ma ke sha hɛ: «Mia ka Zhɛrəzalɛm, nehwenema yɛ yitea 'ya ma. Nehwene mə ghəa ŋayɛ ba'a ŋwalea ŋayɛ.

²⁹Kwa nza ŋkɛ ma ke mbeli sha tegeze te kwete veci: Zlama ya va mi nyi kajɛŋa, nyi keghama kayake ŋwale ba'a nyi keghama kasa nda ŋ'wa ke ŋwale.

³⁰Tagha gɛ, ma ke mbeli sha tegeze nda ke yɛ ghweme: Ŋzlaghe mə geva kənəa ghen'yɛ, ba'a ke yɛ wəmbə: Wəfərəakɛ n'yɛ mə gi!

³¹Ma kwa nza ŋkɛ nahe mbeli kemenete nda ke sheghwə kwa menjaɓa kala nya ne, tsema temene nda geva ŋkɛ ke sheghwə kwa ghwele ghwele wa?»

³²Pa mbeli fəke kweci mbeli bake, ka mefətekwə kezha mpə hɛ le Yɛsə.

³³Ma kwa kekave ŋkwa nya heka mbeli ka'Yɛ'yɛa ghə hɛ ne, pa hɛ baŋete Yɛsə te sheghwə kwa zleŋkwa te ŋkwa shɛ, tsagha kweci ka mefətekwə, laka bela kwa zeme ta ŋkɛ kwete, laka bela kwa gwela kwete.

³⁴Tagha gɛ, ma ke Yɛsə: «Yita, kelemte hɛ te wənə, kwa nza ŋkɛ keɗepe wəsə nya menete hɛ hɛ we.» Pa hɛ nehehwe lekwesa ta ŋkɛ le sla kwasheghediɗi.

³⁵Meghereŋe mbeli tagha kanewe ŋkwa. Ntake mbeli nyi te ghəa Zhəwif kaŋ'wəshi Yɛsə, ma ke hɛ: «Nahe ŋkɛ kembelete kweci mbeli, kashɛ ŋkɛ mbele ŋa ŋkɛ ghə, kenza nde Mɛsi nya ntave Shala ŋkɛ gɛ wəka!»

³⁶Ntake ka sewajɛ kaŋ'wəshi ŋkɛ perə, pa hɛ hendave nda geva, pa hɛ sa mbe nda tɛ kwa ŋkɛara.

³⁷Ma ke hɛ shɛ: «Ma kenza ŋkɛ meghea ka Zhəwif na ne, mbelete ghəa ŋa le ghəa ŋa gi!»

³⁸Ma ke mbeli rafeyi ghena te ghəa ŋkɛ: «Wəndə nya ya kameghea ka Zhəwif.»

³⁹Ntake kwete wəndə nya baŋete hɛ mbeli le Yɛsə te sheghwə kwa zleŋkwa kaŋele Yɛsə, ma ke shɛ: «Kenza na kaMɛsi wəka? Mbelete ghəa ŋa ba'a mbelete n'yɛ gɛ!»

⁴⁰Ama ntake kwete wəndəa ŋkɛ kaŋele ŋkɛ, ma ke shɛ: «Kaghazlənə na va Shala, gha nya kesa titikwə kala gheŋkɛ wəka?

⁴¹Ma gheɓə ne, wərə va ɓə, kwa nza ŋkɛ te jaɗafa ta ɓə menete ɓə mbeli kala nya. Ama gheŋkɛ ne, wəsə kwa ndiremi shɛ kemenete ŋkɛ we!»

⁴²Ma ke sha Yɛsə: «Yɛsə, zəzəte ɗa, vəa ŋkwa nya tenza na mbe meghea ŋa.»

⁴³Ma ke Yɛsə shɛ: «Kaganda ne, ma 'ya sha gha: ma ɓeshi nya ne, katenza na mbe meghea Shala.»

⁴⁴Kala wəsə talala veci kwa ghə nda menete geva viɗi veci te hɛɗi lema. Ma nda kiɗi ŋkɛ ne, kwa mtsa veci.

⁴⁵Pa mayafe nya keneheve ŋkwa nya mbe ghɛa Shala perawenyɛ sawa te tepe.

⁴⁶Ma ke Yɛsə tsate lewela le berete: «Yita, 'ya kave sefəa ɗa mbe dzeve ta ŋa.» Ma kwa gezemte ghena ŋkɛ kala nyagha, mtiwə ŋkɛ.

⁴⁷Ma kwa fate wəsəa shɛ wəndə nya te ghəa ka sewajɛ ne, ntake ŋkɛ katsahe Shala, ma ke: «Ghəpə yite we, wəndə nya tiɗiɗi se wəndə nya.»

⁴⁸Ma mbeli nyi kese nyighɛ pɛtɛ kanewe wəsəa shɛ ne, nahe hɛ kenakɛ wəshi nyi kemenete geva. Tagha gɛ, ntəŋə hɛ kalə sha ghɛ le ghɛve ghɛve hate ta nci.

⁴⁹Nahe pɛtɛa ka mcɛhɛnyɛa Yɛsə ba'a mi nyi kebegheke ŋkɛ same kwa Galilɛ kenza meghereŋe cakeɗake kezha newe wəsə nya kemene geva.

⁵⁰Kwete wəndə ya shɛ nya nza sləa ŋkɛ kaZhozɛf mbe kwete meleme ta ka Zhəwif nya heka mbeli kaArimatɛ. Megela wəndəa shɛ, tiɗiɗi ŋkɛ.

⁵¹Neghe yaneghe se ta Meghea Shala ŋkɛ, wəndə nya hwa mbelia jama ta ka Zhəwif ŋkɛ. Ama kese ŋkɛ kamene wəshi nyi se mbeli nyi te ghəa meleme kazəzə ba'a kamene nda ke Yɛsə we.

⁵²Pa ŋkɛ lə sha Pilate ka'yɛwe geva ta Yɛsə.

⁵³Pa ŋkɛ kelakawa geva ta Yɛsə te sheghwə kwa zleŋkwa, pa veheyi ŋkɛ mbe ghamca ba'a veyi ŋkɛ kwa kwele nya kelate geva mbe gela, kwele nya ghama mbeli kave wəndə kwa.

⁵⁴Nahe ŋkwa kenza shikwəa ka Wəramayɛ, te hendɛ ta ŋkwa yitea veci kezhɛne mpi.

⁵⁵Pa mi nyi kebegheghe Yɛsə sawa pelɛ Galilɛ lə le Zhozɛf. Pa hɛ newakɛ kwelea shɛ, pa hɛ newakɛ tsema tsema veyi geva ta Yɛsə mbeli kwa.

⁵⁶Cape hɛ kalə sha ghɛa nci. Pa hɛ zeleve n'yi ba'a 'wərdə kezha mene te geva ta Yɛsə. Ma te veci kezhɛne mpi ne, pa hɛ zhɛnakɛ mpi kala ghena nya gezeke Shala.