Read KapsikiDC Ləwke 8 Bible Online

Ləwke 8 - KapsikiDC bible

Ləwke 8

¹Cape Yɛsə kalə kadzembe meleme nyi jama jama ba'a nyi ɓɛhwɛ ɓɛhwɛ. Kazlape nda Ghena kwatenca nya ganyɛ ta Meghea Shala ŋkɛ ke mbeli. Kabeghe ŋkɛ mbeli nyi ketəkwə təkwə meŋe bakeghəmbe,

²zlaɓe le kweci mi nyi mbelete ŋkɛ va 'yi'yɛghwə ba'a zereghwe: Mari nya heka mbeli kaMari ta ka Magdala nyi ŋkamte 'yi'yɛghwə ŋkɛ mberefaŋe shave mbe,

³Zhane male ta Shəza nya kasləwəfəa Hɛrode, Səzane ba'a kweci mi kwele kwele nyi kekemane yɛ Yɛsə le mbeli nyi ketəkwə təkwə le wəshia nci.

⁴Kwele kwele mbeli nyi kese sha Yɛsə se mbe yayata meleme. Ma ke sha hɛ le ghena keyipə pa:

⁵«Ntəŋə kwete nde tsawe ha shave ki ghɛ kalə katsawe ha. Ma vəa ŋkwa nya ŋkisə ha ŋkɛ te wəvea ŋkɛ ne, pa kweci betenji kwa hweŋkwa, pa mbeli ŋkeɗemte hɛ ba'a pa 'yɛ se katsehahwe hɛ.

⁶Pa kweci betenji kwelɛ pelɛ. Ma kwa pese hɛ ne, pa hɛ ghwelenji va nya ɗema nese te ŋkwa shɛ.

⁷Ma kweci ha shɛhɛ ɓiyitsa ne, hwa tigə menji hɛ. Pa tigə ŋkweŋkwahemte hɛ.

⁸Pa kweci ha shɛhɛ menji te hɛɗi ganyɛ. Pa hɛ pese ba'a yate ya kwele kwele, gwəmsə ya kwa yayata ghəa ha.» Ma ke Yɛsə mbakete: «Fa ghena wəndə nya nza sleme ve!»

⁹Ma ke mbeli nyi ketəkwə təkwə 'yɛwakɛ ve: «Wa ghena nya mbe ghena keyipə pa nya wa?»

¹⁰Ma ke sha hɛ: «Nahe Shala kendeke ŋayɛ hweŋkwa kaɗepe wəshi nyi tewəfərə te ghena ta Meghea Shala. Ama ke kweci mbeli ne, le ghena keyipə pa geze nda mbeli ke hɛ, baŋe hɛ kanewe ŋkwa, ama kaveregheve hɛ we, baŋe hɛ kafa ghena, ama kafave ghena nya mbe hɛ we.»

¹¹Wa nya wəsə nya ɗe ghena keyipə pa shɛ kageze nya: ma ha nya tsawe mbeli, gheŋkɛ ghena ta Shala.

¹²Yipə yipə kweci mbeli le mɛa hweŋkwa nya bete kweci ha te. Nahe hɛ kefave ghena kaghate, pɛkwe gətəli, pa nteɗehwe ghena shɛ shave mbe wənəa nci, kezha ɗema hɛ kayɛ ghena shɛ ba'a kambele.

¹³Ma kweci mbeli ɓiyitsa ne, yipə yipə hɛ le ŋkwa nya hwa pelɛ. Ma kwa fate ghena hɛ ne, pa hɛ yɛte le zlama, ama kepelave nda hweŋkwa hɛ kaha slərə we. Pa hɛ yɛte kahɛ ɓɛhwɛ, ma kese mbeli kaghwete hɛ, pa hɛ zlenekɛ ghena zhɛkwa.

¹⁴Ma ha nya kebete hwa tigə ne, kala mbeli nyi kefa ghena hɛ. Ama wəshi nyi zəzə hɛ, mcɛləa nci, sla ntsə yitea wəshi nyi keghwete ŋkwa ka fɛa ghena shɛ. Kamenete wəsə ganyɛ ghena shɛ mbe wənəa nci we.

¹⁵Ma ha nya keme te hɛɗi ganyɛ ne, gheŋkɛ mbeli nyi kefate ghena le mehele nya ganyɛ ba'a nya gweɗakwe, nyi kenzanji dɛŋe dɛŋe te ba'a nyi keyate ya.

¹⁶Wəndə shɛ kandə ghwə kwa paterela kezha dzəɓə wəsə kənə keɗema kezha ve mbeyitere ŋgezle we. Ama pelɛ ghəa ŋkwa ve mbeli yitea newe ŋkwa mbeli nyi kedzembe cɛ yite.

¹⁷Kwa nza ŋkɛ pɛtɛ tencɛ geva wəshi nyi tewəfərə, pɛtɛ tencɛ geva zeweve ta ghena nya ɗema mbeli kancɛ.

¹⁸Ntsehwele mə yitea fa ghena ta ŋayɛ. Kwa nza ŋkɛ ma wəndə nya nza wəshi ve ne, katemtsehe nda wəshi mbeli. Ama wəndə nya ɗema wəsə ve ne, ya wəsə nya ɓɛhwɛ nya zəzə ŋkɛ ve ne, katekele mbeli ve.

¹⁹Pɛkwe yɛ meghekɛa Yɛsə le ka menəhɛnyɛ sha Yɛsə. Ama shaŋe hɛ kantsehe te ŋkwa nya nza ŋkɛ va wəba ta mbeli.

²⁰Ma ke mbeli sha Yɛsə: «Pelɛ kwa degha yɛ meyɛ ŋa le ka menəhɛ ŋa. Kaɗe hɛ kakwaɗe sha gha.»

²¹Ma ke Yɛsə sha mbeli: «Ma meyɛ ɗa ba'a ka menəhɛ ɗa ne, mbeli nyi keve sleme yitea ghena ta Shala ba'a nyi kemene slene le.»

²²Te kwete veci ne, pa Yɛsə dzawa kwambelə le mbeli nyi ketəkwə təkwə. Ma ke sha hɛ: «Mbi ɓəmə kajive kwete kema ta hələ.» Cape hɛ kajive.

²³Ma kajive hɛ ne, pa Yɛsə dzeyitenyɛ yitea hɛ. Tewə ketemə ne, pa sefə nya wəba vɛte vɛ te ndərə. Ntake yɛ gaŋkeɓe ta ndərə kasheke geva kadzawa kwambelə, nahe hɛ kenza kwa hweŋkwa ta za.

²⁴Pa hɛ hendave nda geva ke Yɛsə ba'a feɗeghete ŋkɛ. Ma ke hɛ shɛ: «Nde sleke n'yɛ, nde sleke n'yɛ, gheɓəmə kaza!» Pa Yɛsə feɗeghe, pa ŋkɛ ntsehete nda ŋzle ke sefə ba'a yɛ gaŋkeɓe ta ndərə. Tagha gɛ, gweɗakwe sefə, tikə tikə ŋkwa.

²⁵Ma ke Yɛsə sha mbeli nyi ketəkwə təkwə: «Tema yɛ ta ŋayɛ wa?» Ama shewə hɛ va ghazlənə, hehake hɛ va ghena shɛ. Ma ke hɛ kwelɛ ghəa nci: «Wa nya hwelefe ta wəndə nda fa nda ghena yɛ sefə le yɛmə wa?»

²⁶Hwa'a hɛ ntsehe pelɛ kema ta hələ, te hɛɗia ka Zhɛraza nya mbe kema ta Galilɛ.

²⁷Ma kwa sawa Yɛsə kwa kwambelə ne, pa kwete wəndə shave mbe meleme shɛ. Ma wəndəa shɛ ne, 'yi'yɛghwə ya yitea ghə ve, ghalanza ŋkɛ kadzeghwa mederelaŋe, kanza ŋkɛ ki ghɛ we, ama hwa kwele nza ŋkɛ.

²⁸Ma kwa nakɛ Yɛsə ŋkɛ ne, kɛake sha lewela le berete, gwəɗəŋə ŋkɛ yitea seɗa ta ŋkɛ. Ma ke zlapete: Wa yaɗe na le 'ya wa, Yɛsə Wəzege ta Shala tehwə ghweme? Təhwə təhwə ŋa 'ya, mba na kesa ɗa yaka.

²⁹Kwa nza ŋkɛ nahe Yɛsə kegezete nda ke 'yi'yɛghwəa shɛ kashave mbe wəndəa shɛ. Kwele kwele zhigə zhɛte nda 'yi'yɛghwəa shɛ. Kahwepe seɗa ba'a dzeve ta wəndəa shɛ mbeli le zewe lɛ kezha ya ŋkɛ, ama kaŋsle yɛ zewe lɛ ŋkɛ, kakele ŋkɛ 'yi'yɛghwə kadzete ɓerama.

³⁰Ma ke Yɛsə 'yɛwete ve: «Wa sləa ŋa wa?» Ma ke zhɛnete: «Wəvəsə sləa ɗa.» Kwa nza ŋkɛ kwele kwele 'yi'yɛghwə nyi kedzembe wəndəa shɛ.

³¹Ma ke 'yi'yɛghwəa shɛhɛ mpiyi nda dzeve ke Yɛsə: «Təhwə təhwə, mba na keŋka n'yɛ kadzawa daŋgayɛa yɛ 'yi'yɛghwə.»

³²Tagha kweci gərədə kwele kwele kazele wəshi kezemea nci dzeme vare ghweme. Ntake 'yi'yɛghwəa shɛhɛ kasəkwə hweŋkwa va Yɛsə yitea pelakɛ hɛ ŋkɛ kadzembe gərədəa shɛhɛ. Pa Yɛsə pelave nda hweŋkwa ke hɛ.

³³Pa hɛ shavenji mbe wəndəa shɛ ba'a dzembenji mbe yɛ gərədə. Kwesayɛ gərədəa shɛhɛ pɛtɛ betakawa geva sawa pelɛ wəmbəa ŋkwa kadzawa ndərə. Pɛtɛ hɛ mpənji.

³⁴Ma kwa nakɛ wəsə nya kemenete geva mbeli nyi keya gərədə ne, kweracɛ hɛ le hwɛ. Pa hɛ gezete nda ghena shɛ ke mbeli dzeyi mbe meleme nyi jama jama ba'a nyi ɓɛhwɛ ɓɛhwɛ.

³⁵Tekwəsəmə mbeli shave mbe meleme kanewe wəsə nya kemenete geva. Ma se hɛ sha Yɛsə ne, tagha hɛ le wəndə nya shavenji 'yi'yɛghwə mbe, mentishɛ ŋkɛ yitea seɗa ta Yɛsə, lekwesa ya kənəa geva ve, tiɗiɗi mehele ta ŋkɛ. Tagha gɛ, benake hɛ va ghazlənə.

³⁶Ma mbeli nyi kenakɛ mbele ta wəndəa shɛ ne, pa hɛ gezete nda ke hɛ tsema tsema mbenyɛ nde 'yi'yɛghwəa shɛ.

³⁷Ntake ka Zhɛraza katsa nda təhwətə ke Yɛsə kezha slənyɛ ŋkɛ te hɛɗia nci. Zhɛne Yɛsə kadzawa kwambelə kadzeghwanyɛ.

³⁸Ma wəndə nya kembelenyɛ va 'yi'yɛghwə ne, pa 'yɛwakɛ va Yɛsə kezha sərə ŋkɛ kanza yite. Ama pa Yɛsə ɗema. Ma ke shɛ:

³⁹«Kwiɗi sha ghɛa ŋa shɛ na geze nda wəshi nyi menete ŋa Shala pɛtɛ ke mbeli.» Ntəŋə wəndəa shɛ yitea zlape nda pɛtɛa wəshi nyi menete nda Yɛsə ke mbeli nyi mbe meleme.

⁴⁰Ma kwa senyɛ Yɛsə shave pelɛ kwete kema ta ndərə ne, pa mbeli kemaneve ŋkɛ le zlama, kwa nza nde pɛtɛ hɛ kaneghe.

⁴¹Pɛkwe kwete wəndə sləa ŋkɛ Zhayirəs. Gheŋkɛ ya kawəndə nya te ghəa cɛ kesəkwə ghə. Gwəɗəŋə ŋkɛ kwa kema ta Yɛsə kampi nda dzeve,

⁴²kwa nza ŋkɛ kwetɛŋe wəzha shɛ ve, gare meŋe bakeghəmbe va ta nta, takwa takwa nde kamte. Ma vəa ŋkwa nya lə Yɛsə ne, ntake mbeli kwele kwele katsetsəkwə ŋkɛ laka yayata bela.

⁴³Tagha kwete male shewə va mimi nya kehwɛ yite ghala va meŋe bakeghəmbe. Pɛtɛ zamte wəshia nta nde kapa ghwɛ va ka dakwəterə, ama wəndə shɛ kembete ŋkɛ we.

⁴⁴Pa nde hendeke geva kwetere wəmbəa Yɛsə ba'a kwaɗakɛ mɛa lekwesa ta ŋkɛ. Te ŋkwa shɛnyɛ, hase wəshi yite.

⁴⁵Ma ke Yɛsə 'yɛwete: «Wa nde kwaɗakɛ ɗa wa?» Ma kwa nza mbeli pɛtɛ kazhɛne ghə ne, ma ke Piyɛre: «Nde sleke ɗa, mbeli kwele kwele nyi ketsəkwə ŋa ba'a nyi kedzaslete laka yayata bela.»

⁴⁶Ma ke Yɛsə gezete: «Na kwete wəndə kekwaɗakɛ ɗa. Nahe 'ya kefa kwete berete nya keshavenyɛ mbe 'ya.»

⁴⁷Ma kwa nakɛ malea shɛ nahe mbeli keɗepe wəsə nya menete nde ne, pɛkwe nde le bare bare kagwəɗəŋə yitea seɗa ta Yɛsə. Pa nde gezete yitea wa yitea wa kwaɗakɛ Yɛsə nde ba'a mbele nya mbele nda nde te ŋkwa shɛnyɛ kwa kema ta mbeli pɛtɛ.

⁴⁸Ma ke Yɛsə shɛ: «Wəzha ta ɗa, yɛ ta ŋa nde mbete ŋa. Kwiɗi kwelɛŋe.»

⁴⁹Mba Yɛsə mbe geze ghena nyagha ne, pa mbeli ghweneke wəndə se ki ghɛa Zhayirəs wəndə nya te ghəa cɛ kesəkwə ghə, ma ke hɛ shɛ: «Nahe wəzha ta ŋa kemte, wa yaleɓe Nde sleke ŋkwa na yite gəmə wa?»

⁵⁰Ama nahe Yɛsə kefate. Ma ke sha Zhayirəs: «Ghazlənəma na ma. Yɛhwe nahe ke ta ŋa, katembele nde.»

⁵¹Ma kwa ntsehe ŋkɛ ki ghɛa shɛ, kese Yɛsə kaɗe kadzeki kwete wəndə kwa sebe ta ŋkɛ we, deke yɛ Piyɛre, Zhaŋe le Zhake ba'a yɛ yitenyɛa wəzha shɛ le meghekɛ.

⁵²Pɛtɛa mbeli kanehwene ba'a kaŋgaɗe ghə yitea wəzha shɛ. Ma ke Yɛsə: «Nehwenema yɛ ma. Kemte nde we, hɛ yahɛ nde.»

⁵³Ntake hɛ kaŋ'wəshi Yɛsə, kwa nza nde nahe hɛ keɗepe nahe nde kemte.

⁵⁴Pa Yɛsə keseve ŋkɛ te dzeve, ma ke shɛ: «Wəzege ta ɗa, feɗeghe ŋa.»

⁵⁵Pa nde mbe nda, pelɛhetɛme nde sate te ŋkwa. Ma ke Yɛsə sha mbeli: «Ndeke nda mə wəsə kezeme.»

⁵⁶Heheɓake mbeli nyi keyake va nyagha ghena. Pa Yɛsə meɗekɛ hɛ kezha ɗema hɛ kageze nda ghena shɛ ke kwete wəndə.