Read KapsikiDC Zhɛne Ghwelə yitea Wəshi Mahalegə 16 Bible Online

Zhɛne Ghwelə yitea Wəshi Mahalegə 16 - KapsikiDC bible

Zhɛne Ghwelə yitea Wəshi Mahalegə 16

¹Ma mbe terea Abib ne, katemene nda gəsəkəa Pake ke Shala Mahwətə ta ŋayɛ. Kwa nza ŋkɛ ne, mbe terea Abib fəakave ŋayɛ Shala Mahwətə ta ŋayɛ mbe Ɛzhipte, heviɗi.

²Katedzeghe nda melɛa Pake yɛ ke Shala Mahwətə ta ŋayɛ le yɛ sla, timɛti keɗema kwi, te ŋkwa nya tentave Mahwətə kezha ncɛ ghəa ŋkɛ.

³Ma hwa ɗafa gəsəkəa shɛ ne, katezeme ɗafa kwalekwala yɛ we. Ɗafa nyi ɗema tenjɛne hwe yatezeme yɛ kahɛ mberefaŋe, ɗafa ta yaka, kwa nza ŋkɛ katezəzə hɛ nya fəakave geva yɛ le dera le dera shave mbe Ɛzhipte yɛ kaghala ghala.

⁴Ma mbe hɛ nyi mberefaŋe nyi ne, katebegeme ntsə mbeli le tenjɛne ki ghɛa ŋayɛ, te hɛɗia ŋayɛ we. Ma kaŋa slia wəsə nya dzeghekɛ melɛ mbeli le hetɛhwɛɗi te kwa ghate ta hɛ ne, katesərə mbeli pa va masheke we.

⁵Katenza hweŋkwa va gheyɛ kahene wəsə yitea gəsəkəa Pake mbe kwete hwa meleme nyi teve ŋayɛ Shala Mahwətə ta ŋayɛ we.

⁶Deke te ŋkwa nya tentave Shala Mahwətə ta ŋayɛ kezha ncɛ ghəa ŋkɛ tedzeghe melɛa Pake yɛ, hetɛhwɛɗi, yipə le pəkwə ta veci, və nya shave yɛ mbe Ɛzhipte te.

⁷Kateta slia wəsə keseɗa shɛ yɛ ba'a katezeme yɛ te ŋkwa nya tentave Shala Mahwətə ta ŋayɛ. Ma te hendɛ ta ŋkwa ne, katezhɛne geva yɛ kalə sha ghɛa ŋayɛ.

⁸Katezeme ɗafa nyi ɗema tenjɛne hwe yɛ kahɛ ŋkwaŋe. Ma te kwa mberefaŋe ta hɛ ne, katemene tsene nya wəba yɛ kezha Shala Mahwətə ta ŋayɛ. Slene shɛ katemene yɛ te vecia shɛ we.

⁹Ma te və nya gha yɛ katsa ha ne, kateɓela shikwə mberefaŋe yɛ.

¹⁰Kwa sebe ta ŋkɛ, katemene nda gəsəkəa Pantekote yɛ ke Shala Mahwətə ta ŋayɛ. Katefə wəshi gəmə yɛ kase le ɗe ta ŋkɛ, kala wəshi ganji nyi ndeke ŋayɛ Shala Mahwətə ta ŋayɛ.

¹¹Ma te ŋkwa nya tentave Shala Mahwətə ta ŋayɛ kezha ncɛ ghəa ŋkɛ ne, katezlama yɛ, gheyɛ, ŋwale tezhilia ŋayɛ, ŋwalea kwɛa ŋayɛ, ka mene slene ta ŋayɛ, ka kwaterashia ŋayɛ, ka Lɛvi nyi mbe yɛ meleme ta ŋayɛ, ka se se, ka mezhɛtiti ba'a ka wedidi nyi hwa gheyɛ.

¹²Katezəzə yɛ kaka mavashi se yɛ mbe Ɛzhipte. Katehawe yɛ va wəshi mahalegə nyi ba'a katemene slene yɛ le hɛ.

¹³Ma vəa ŋkwa nya tenahe leke ta ha ba'a hetəsə ta rɛzɛŋe va gheyɛ ne, katemene gəsəkəa yɛ Ghwəli kahɛ mberefaŋe.

¹⁴Ma hwa gəsəkəa shɛ ne, katezlama yɛ, gheyɛ, ŋwale tezhilia ŋayɛ, ŋwalea kwɛa ŋayɛ, ka mene slene ta ŋayɛ, ka kwaterashia ŋayɛ, ka Lɛvi, ka se se, ka mezhɛtiti ba'a ka wedidi nyi mbe yɛ meleme ta ŋayɛ.

¹⁵Katemene nda gəsəkə ke Shala Mahwətə ta ŋayɛ kahɛ mberefaŋe, te ŋkwa nya tentave Mahwətə, kwa nza ŋkɛ katewəpi ŋayɛ Shala Mahwətə ta ŋayɛ laka pɛtɛa wəshi nyi kese mbe wəvea ŋayɛ ba'a pɛtɛa slene nyi mene yɛ. Ma tsagha ne, katezlama yɛ kwele kwele.

¹⁶Keva keva ne, katelə zhili nyi hwa gheyɛ pɛtɛ kadzawa kema ta Shala Mahwətə ta ŋayɛ mahekene zhigə, te ŋkwa ŋkɛ nya tentave ŋkɛ: hwa gəsəkəa ɗafa nyi ɗema tenjɛne hwe, hwa gəsəkəa Pantekote ba'a hwa gəsəkəa yɛ Ghwəli. Katelə hɛ kadzawa kema ta Mahwətə le dzeve pala pala we.

¹⁷Ama yayata wəndə katekele wəsə gəmə kase kala wəshi ganji nyi tendeke nda Shala Mahwətə ta ŋayɛ.

¹⁸Ma mbe pɛtɛa meleme nyi teve ŋayɛ Shala Mahwətə ta ŋayɛ ne, katenta ka meha ghwə ba'a ka rafe wəshi yɛ hwa hwelefefia ŋayɛ. Katemeha nda ghwə hɛ ke mbeli.

¹⁹Katemeha ghwə mbəɗəkwə yɛ, katenta ghala yɛ kwelɛ mbeli ba'a kateyɛ wəshi gəmə yɛ we. Kwa nza ŋkɛ ne, ntsə yaghwələpə wəshi gəmə te ka ntsehwele ntsehwele ba'a fete yave nda hɛ ke mbeli nyi tiɗiɗi.

²⁰Katentsə geva yɛ kazele nza tiɗiɗi. Ma tsagha ne, katenza yɛ teghweme ba'a katekele hɛɗi nya ve ŋayɛ Shala Mahwətə ta ŋayɛ yɛ.

²¹Katemɓe selə nya keveyi geva tekeleke keɗema wəfe nya keveyi geva tekeleke yɛ dzeme vare reghwetɛ nya tepa nda yɛ ke Shala Mahwətə ta ŋayɛ we.

²²Katemɓe gɛaŋa yɛ we, kwa nza ŋkɛ kaɗe wəsə nya kala nyagha Shala Mahwətə ta ŋayɛ we.