Read KapsikiDC Zhɛne Ghwelə yitea Wəshi Mahalegə 19 Bible Online

Zhɛne Ghwelə yitea Wəshi Mahalegə 19 - KapsikiDC bible

Zhɛne Ghwelə yitea Wəshi Mahalegə 19

¹Ma vəa ŋkwa nya tezamte sebe Shala Mahwətə ta ŋayɛ kwa kema ta ŋayɛ te hwelefefi nyi ve ŋayɛ hɛɗia nci ŋkɛ, nya teŋkamte hɛ yɛ ba'a tenza yɛ dzeyi mbe yɛ meleme ta nci ba'a dzeyi ki ghɛa nci ne,

²katenta meleme yɛ mahekene tekeleke te tepe ta hɛɗi nya ve ŋayɛ Shala Mahwətə ta ŋayɛ kaŋa ŋayɛ.

³Katehele hweŋkwa kedzembe hɛ yɛ ba'a katenehe hɛɗi nya ve ŋayɛ Shala Mahwətə ta ŋayɛ kawəsə kezeme ghɛ yɛ mahekene mbe. Ma tsagha ne, katenza ŋkɛ kaŋkwa kewəfərə kaŋa yayata wəndə nya kepeslekɛ ŋkwa.

⁴Deke wəndə nya kepeslekɛ ŋkwa le ɗema ta ŋkɛ ba'a nya keɗema kegha kaɗema ntsə ta wəndə nya peslekɛ ŋkɛ nde tenza kawəfərənyɛ mbe kwete hwa melemea shɛhɛ yitea nza mpia ŋkɛ pələsə.

⁵Ya kwete pa kedzehwa gamba kwete wəndə le kwete kezha mpə wəfe. Ma kwa kafe tseyɛ ŋkɛ kezha tsasle wəfe ne, felaŋe tseyɛ felaŋenyɛ seyi yitea leghe, pa menyɛ te kwete wəndəa ŋkɛ, nda mtenyɛ ŋkɛ ve. Wərə wəndəa shɛ kawəfərənyɛ mbe kwete hwa melemea shɛhɛ yitea nza mpia ŋkɛ pələsə.

⁶Mba wəndə nya keveyi geva kawa wəndə nya kemte kekeka ŋkɛ le wənə le wənə, yagha ŋkɛ kakekave ŋkɛ ba'a kapeslekɛ ŋkɛ kenza ŋkwa cakeɗake. Kwa nza ŋkɛ ne, kahi mbeli kapesle wəndə nya kepeslekɛ ŋkwa shɛ, va nya ɗema ŋkɛ kegha kaɗema ntsə ta ŋkɛ we.

⁷Vatse geze ŋayɛ 'ya kezha nteyi meleme yɛ mahekene tekeleke.

⁸Ma kembakete ŋayɛ hɛɗia ŋayɛ Shala Mahwətə ta ŋayɛ kala nya zemete nda ŋkɛ kafela ke ka shihɛ ŋayɛ ba'a kendeke ŋayɛ pɛtɛa hɛɗi nya meɗeyi ŋkɛ kave nda hɛ ŋkɛ,

⁹va nya teyate ba'a nya temenete slene yɛ le pɛtɛa wəshi mahalegə nyi ve ŋayɛ nyi 'ya ɓeshi, laka ɗe Shala Mahwətə ta ŋayɛ ba'a laka dzeghwa kwa hweŋkwa ta ŋkɛ keveci keveci ne, katembake kweci meleme yɛ mahekene kadzevare nyi mahekene nyi ɓiyitsa.

¹⁰Ma tsagha ne, katesheke geva mimia wəndə nya ɗema fete ve te hɛɗi nya ve ŋayɛ Shala Mahwətə ta ŋayɛ kaŋa ŋayɛ we. Ma keɗema ŋkɛ tsagha ne, kwa ghəa ŋayɛ tenza mte ta ŋkɛ.

¹¹Ama keɗema ntsə ta nde ghedəkwəa ŋkɛ wəndə, nda cɛha ŋkɛ, nda dzeghənyɛ ŋkɛ kənə ba'a nda peslekɛ ŋkɛ, kwa sebe ta ŋkɛ, cape ŋkɛ kalə kawəfərə mbe kwete hwa melemea shɛhɛ ne,

¹²kateghwene ŋkwa mbelia jama nyi mbe meleme ta ŋkɛ kalə kakese ŋkɛ. Kwa sebe ta ŋkɛ, kateve nda ŋkɛ hɛ ke nde wa wəndə nya kemte kezha peslekɛ ŋkɛ.

¹³Katezhɛ ŋayɛ helia ŋayɛ yite we. Tsagha ne, kateza sebe yɛ te wəndə nya kepeslekɛ wəndə nya ɗema fete ve shave hwa ka Israyɛl ba'a katenza ŋkɛ kawəsə ganyɛ kaŋa ŋayɛ.

¹⁴Katehende yɛ pelɛa ghala ta wəvea nde ghala ta ŋayɛ yɛ, nyi mɓete mbeli nyi vəashi, te wəve nya tekemave yɛ te hɛɗi nya ve ŋayɛ Shala Mahwətə ta ŋayɛ kaŋa ŋayɛ we.

¹⁵Kateneghate fete wəndə kwetɛŋe te wəndə nya kemenete fete, jaɗafa keɗema kwete beze ghena we. Te ghena ta ka negha fete bake keɗema mahekene nza mbeli kaslamte ghena.

¹⁶Ma keslate nda tseŋwə wəndə ke kwete wəndə te ghəa kwete fete ne,

¹⁷katelə mbeli nyi bake nyi, nyi nza nyi ghena kwelɛ hɛ kadzawa kema ta Mahwətə, kwa kema ta ka dzeghe Shala ba'a ka meha ghwə nyi kemene slene vəa ŋkwa shɛ.

¹⁸Katenewe ghena shɛ ka meha ghwə tiɗiɗi. Ma vəa ŋkwa nya tentsate hɛ tseŋwə yaslate nde negha fete, gəmə slave nda tseŋwə ŋkɛ ke menənyɛ ne,

¹⁹katemene nda yɛ kala wəsə nya ɗe ŋkɛ kamene nda ke menənyɛ. Ma tsagha ne, kateza sebe yɛ te wəsə kwa ndiremi hwa gheyɛ.

²⁰Katefa ghena shɛ mbeli nyi ketene ba'a katezhɛ nda ghazlənə ke hɛ. Tsagha ne, katezhɛne hɛ kamene wəshi nyi ndiremi ndiremi nya kala nya hwa gheyɛ we.

²¹Katezhɛ ŋayɛ helia ŋayɛ yitea wəndə nya kemenete fete we: mpi te mpi, ntsə te ntsə, slene te slene, dzeve te dzeve, seɗa te seɗa.