Read KapsikiDC Zhɛne Ghwelə yitea Wəshi Mahalegə 20 Bible Online

Zhɛne Ghwelə yitea Wəshi Mahalegə 20 - KapsikiDC bible

Zhɛne Ghwelə yitea Wəshi Mahalegə 20

¹Ma vəa ŋkwa nya tedzemte yɛ kampa le ka jaga ta ŋayɛ, ma kenakɛ yɛ gədəwə keɗema yɛ wəmata gədəwə ba'a mbeli nyi kwele kwele ma ke gheyɛ yɛ ne, ghazlənəma yɛ ma. Kwa nza ŋkɛ ne, le gheyɛ Shala Mahwətə ta ŋayɛ nya kefəakave ŋayɛ shave mbe Ɛzhipte.

²Ma vəa ŋkwa nya tegha mpa yɛ ne, katedzate nde dzeghe Shala te kema ba'a kategeze nda ghena ŋkɛ ke mbeli.

³Ma ke sha tegeze nda ke hɛ: «Ka sewajɛa ka Israyɛl, fa mə! Ma ɓeshi ne, katempa yɛ le ka jaga ta ŋayɛ. Nzama geva ta ŋayɛ kempə mpə ma, ghazlənəma yɛ ma, nzama mehele ta ŋayɛ kwetɛ kwetɛŋe ba'a bare barema yɛ te kema ta nci ma.

⁴Kwa nza ŋkɛ ne, hwa gheyɛ Shala Mahwətə ta ŋayɛ kezha mpa le ka jaga ta ŋayɛ ba'a kezha ve ŋayɛ hərə ŋkwa.»

⁵Kwa sebe ta ŋkɛ, ma ke mbeli nyi te ghə sha tegeze nda ke sewajɛ: «Wəndə shɛ hwa gheyɛ nya keŋate dɛwa nya nakama ŋkɛ kadzeki na? Zhɛneghe geva ŋkɛ kalə sha ghɛa ŋkɛ. Ma keɗema ŋkɛ tsagha ne, wərə ŋkɛ kamte kwa mpa, kwete wəndə nde tedzeki ghɛa ŋkɛ gɛ shi!

⁶Wəndə shɛ nya kemɓete rɛzɛŋe nya nakama ŋkɛ kandave ka ghate ta rɛzɛŋe nyi te na? Zhɛneghe geva ŋkɛ kalə sha ghɛa ŋkɛ. Ma keɗema ŋkɛ tsagha ne, wərə ŋkɛ kamte kwa mpa, kwete wəndə nde tenda rɛzɛŋea ŋkɛ gɛ shi!

⁷Wəndə shɛ nya kenteyi makwa kwa ghwa, nya nakama ŋkɛ kawəmeve na? Zhɛneghe geva ŋkɛ kalə sha ghɛa ŋkɛ. Ma keɗema ŋkɛ tsagha ne, wərə ŋkɛ kamtenyɛ kwa mpa, kwete wəndə nde tewəme makwa ta ŋkɛ gɛ shi!»

⁸Ma ke mbeli nyi te ghə sha temtsehe geze nda ke ka sewajɛ: «Wəndə shɛ nya zhɛ nda ghazlənə ba'a nya nza geva ta ŋkɛ keta ta hwa gheyɛ na? Zhɛneghe geva ŋkɛ kalə sha ghɛa ŋkɛ kezha ɗema ŋkɛ katamte geva ta kweci ka menəhɛnyɛ kala ŋa ŋkɛ.»

⁹Ma vəa ŋkwa nya tenahemte geze nda ghena mbeli nyi te ghə ke ka sewajɛ ne, katenta mbelia jama hɛ kezha nza te ghəa ka sewajɛ.

¹⁰Ma vəa ŋkwa nya telə yɛ kaha nda mpa ke meleme ne, kategeze nda ghena ta kwelɛŋe yɛ ke mbeli nyi mbe kaba.

¹¹Ma keyɛte hɛ ba'a keghwenemte gelembe nyi mɛa meleme hɛ ne, katemene ŋayɛ slene mbeli nyi mbe pɛtɛ.

¹²Ama keɗema hɛ keyɛte nda ɗehwe mpa hɛ ne, katedzasle melemea shɛ yɛ kezha kelehwe.

¹³Ma vəa ŋkwa nya tevame ŋayɛ melemea shɛ Shala Mahwətə ta ŋayɛ mbe dzeve ne, pɛtɛ tempə zhili nyi mbe yɛ.

¹⁴Deke mi, ŋwale, wəshi keseɗa ba'a pɛtɛa wəshi nyi mbe melemea shɛ yatesərə yɛ kawəshi nyi fə mbeli hwa mpa. Katemene yɛ le wəshia ka jaga ta ŋayɛ kala nya ɗe yɛ, va nya fəave ŋayɛ hɛ Shala Mahwətə ta ŋayɛ.

¹⁵Tsetse temene nda yɛ ke pɛtɛa meleme nyi cakeɗa cakeɗa yitea gheyɛ, nyi keɗema hwa meleme nyi kaŋa hɛɗi nya tedzete nya yɛ.

¹⁶Ama mbe meleme nyi te hɛɗi nya teve ŋayɛ Shala Mahwətə ta ŋayɛ ne, wəndə shɛ katesərə yɛ teghweme we.

¹⁷Mɛke teza sebe yɛ te ka Hɛt, ka Amor, ka Kanan, ka Pɛrɛs, ka Hava ba'a ka Zhɛbəs kala nya gezave ŋayɛ Shala Mahwətə ta ŋayɛ.

¹⁸Ma tsagha, kateteke ŋayɛ wəshi nyi ndiremi ndiremi kashasha nyi mene nda hɛ ke yɛ shala ta nci hɛ we. Kateghwete ŋayɛ hɛ kamene nda jaɗafa ke Shala Mahwətə ta ŋayɛ.

¹⁹Ma vəa ŋkwa nya tedzasle meleme yɛ kavə kwele kwele kezha ha nda mpa ba'a kezha kelehwe ne, katekafe tseyɛ yɛ kezha mpə wəfe nyi mbe we. Ma kwa nza ŋkɛ ya ta wəfea shɛhɛ yatezeme yɛ ne, katempə hɛ yɛ we. Wəfe nyi hwa gamba nza kambeli nyi dzemte mbeli kampa le hɛ na?

²⁰Deke wəfe nyi teɗepe yɛ kaɗema mbeli kazeme ya ta nci yatempə yɛ kezha mene wəshi kempa kezha mpa le meleme nya keha ŋayɛ mpa, pa te və nya teɗe nde.