Read KapsikiDC Zhɛne Ghwelə yitea Wəshi Mahalegə 28 Bible Online

Zhɛne Ghwelə yitea Wəshi Mahalegə 28 - KapsikiDC bible

Zhɛne Ghwelə yitea Wəshi Mahalegə 28

¹Ma kenza yɛ kahawe kaganda va Shala Mahwətə ta ŋayɛ, kenza yɛ kamene slene le pɛtɛa ghena nyi geze ŋayɛ nyi 'ya ɓeshi ne, katezhɛre ŋayɛ Shala Mahwətə ta ŋayɛ za ma ke hwelefefi nyi te hɛɗi lema.

²Wa nyi wəpi nyi ketese kadzeghəa gheyɛ ba'a nyi ketenza mbe gheyɛ, va nya tefate nda ghena yɛ ke Shala Mahwətə ta ŋayɛ nyi:

³Kewəpi wəpi tenza yɛ dzeyi mbe yɛ meleme ta ŋayɛ ba'a dzeyi mbe yɛ wəvea ŋayɛ.

⁴Kewəpi wəpi tenza ŋwale nyi ketesawa mbe gheyɛ, wəshi nyi tewəza yɛ ba'a yɛ sla, timɛti ba'a kwia ŋayɛ.

⁵Kewəpi wəpi tenza yɛ kwaneɗafa ba'a yɛ dəghwəa ŋayɛ.

⁶Kewəpi wəpi tenza yɛ vəa ŋkwa nya shave yɛ ki ghɛa ŋayɛ ba'a nya zhɛne geva yɛ kadzeki.

⁷Ma vəa ŋkwa nya tehave ŋayɛ mpa ka jaga ta ŋayɛ ne, kateve ŋayɛ hərə hɛ Mahwətə. Ma kehake ŋayɛ mpa hɛ laka hweŋkwa kwetɛŋe ne, hweŋkwa mberefaŋe yatehwɛ hɛ kwa mbe kema ta ŋayɛ.

⁸Katemene Mahwətə kezha nza wəpi ta ŋkɛ dzeyi kwa yɛ tame ta ŋayɛ ba'a mbe pɛtɛa wəshi nyi mene yɛ. Katewəpi ŋayɛ Shala Mahwətə ta ŋayɛ te hɛɗi nya teve ŋayɛ ŋkɛ.

⁹Kateve ŋayɛ Mahwətə kambeli nyi keveyi geva tekeleke, kala nya meɗeyi ŋayɛ ŋkɛ, va nya teyate ghena nyi gezete Shala Mahwətə ta ŋayɛ yɛ ba'a nya tezelete yɛ hweŋkwa ta ŋkɛ yɛ.

¹⁰Katenewe pɛtɛa mbeli nyi te hɛɗi kambeli nyi keveyi geva tekeleke kezha slene ta Mahwətə yɛ ba'a kateghazlənə hɛ va gheyɛ.

¹¹Kwele kwele teve ŋayɛ ŋwale, wəshi keseɗa ba'a wəshi nyi te wəve Mahwətə te hɛɗi nya meɗeyi nda ŋkɛ ke ka shihɛ ŋayɛ kave ŋayɛ.

¹²Kateghwene ghweme nya tseneyi yɛmə Mahwətə pelɛ kala wəsə nya nza zləvə te ŋkɛ, yitea me geva va kadzeghəa yɛ wəvea ŋayɛ te vəa ŋkɛ ba'a yitea wəpi geva pɛtɛa wəshi nyi menete yɛ. Katenzəɓə dewa yɛ va mbeli we, ama gheyɛ ka tenzəɓə nda dewa ke hwelefefi kwele kwele.

¹³Kambeli nyi te kema va mbeli teve ŋayɛ Mahwətə, kaɗema kambeli nyi te sebe. Katenza yɛ keveci keveci te ghəa kweci mbeli, kaɗema kambeli nyi yitea mbeli, va nya tefate ghena nyi gezete Shala Mahwətə ta ŋayɛ nyi geze ŋayɛ nyi 'ya ɓeshi kezha ya ba'a kezha mene slene le hɛ yɛ.

¹⁴Hweŋkwa va gheyɛ kezha same kwa hweŋkwa nya ncɛ ŋayɛ 'ya we, hweŋkwa va gheyɛ kazele kweci shala kezha mene nda slene ke hɛ we.

¹⁵Ama keɗema yɛ kafa nda ghena ke Shala Mahwətə ta ŋayɛ laka mene slene le ghena nyi gezete ŋkɛ ba'a wəshi mahalegəa ŋkɛ nyi ve ŋayɛ nyi 'ya ɓeshi ne, wa nyi bezla nyi ketedzeghəa gheyɛ ba'a nyi ketedzete gheyɛ nyi:

¹⁶Kebezla bezla tenza yɛ dzeyi mbe yɛ meleme ta ŋayɛ ba'a dzeyi mbe yɛ wəvea ŋayɛ.

¹⁷Kebezla bezla tenza yɛ kwaneɗafa ta ŋayɛ ba'a yɛ dəghwəa ŋayɛ.

¹⁸Kebezla bezla tenza ŋwale nyi ketesawa mbe gheyɛ, wəshi nyi te wəve, yɛ sla, timɛti ba'a kwia ŋayɛ.

¹⁹Kebezla bezla tenza yɛ vəa ŋkwa nya shave yɛ ki ghɛa ŋayɛ ba'a nya zhɛne geva yɛ kadzeki.

²⁰Kateghwene bezla, ghazlənə ba'a ɗa Mahwətə kadzeghəa gheyɛ mbe wəshi nyi temene yɛ pɛtɛ, pa te za ta sebe te gheyɛ ba'a te mpə ta ŋayɛ kahe kahe, tewəmbəreke wəsə kwa ndiremi nya menete yɛ, va nya wəfəyite ŋkɛ yɛ.

²¹Kateghwene ŋayɛ ba Mahwətə kezha za sebe te gheyɛ te hɛɗi nya tedzete nya yɛ kezha kele kaŋa ŋayɛ.

²²Kateghwene ŋayɛ zereghwe nya kepahe geva, ɗawa, zereghwe nya kezhɛ ŋkwa mbe 'yɛ'yɛ, nya kendə ŋkwa mbe geva kala ghwə, ɓɛaŋwela, wəbəghə ba'a mze nya kebeze ha Mahwətə. Katezele ŋayɛ hɛ pa te za ta sebe te gheyɛ.

²³Katenza ghweme ntɛaŋe ntɛaŋe kənəa ghəa ŋayɛ kala mze kwa ghwə ghwə ba'a katenza hɛɗi ntɛaŋe ntɛaŋe mbe hwə seɗa ta ŋayɛ kala lɛ.

²⁴Te ŋkwa va nya keme te hɛɗia ŋayɛ ne, keləwə ba'a ndaleghe yateghwene ŋayɛ Mahwətə. Katesawa hɛ pelɛ ghweme kadzeghəa gheyɛ pa te za ta sebe te gheyɛ.

²⁵Katemene Mahwətə kezha hərə ŋayɛ ka jaga ta ŋayɛ. Ma kehave nda mpa yɛ ke hɛ laka hweŋkwa kwetɛŋe ne, katehwɛ yɛ kwa hweŋkwa mberefaŋe mbe kema ta nci. Benake tenza pɛtɛa hɛɗia ka meghe nyi te hɛɗi lema kwa nakɛ wəsə nya kemenete ŋayɛ geva hɛ.

²⁶Kawəsə kezeme ta yɛ zleŋa ba'a yɛ kelɛ gamba tenza slia geva ta ŋayɛ, wəndə shɛ katese kaŋka hɛ kənə we.

²⁷Kateghwene ŋayɛ zhi nyi kwa Ɛzhipte, zhi nyi keshave mbe geva, mezeke, damara lɛketa ba'a tereme zeweve nyi keɗema kakiɗi te gheyɛ Mahwətə.

²⁸Katezhɛre ŋayɛ Mahwətə kaka gezhia kɛfi, kaka ghwələa kɛfi ba'a kaka hware hwarea mehele.

²⁹Ma kwa ghə veci ne, katetsepe tsepe yɛ kala ka ghwələa kɛfi, ama katentsate hweŋkwa yɛ we. Kambeli nyi mene ghə mbeli le hɛ ba'a nyi fə wəshi mbeli yitea hɛ tenza yɛ kaghala ghala. Wəndə shɛ katese kakemane ŋayɛ we.

³⁰Ma wəzha nya nteyi kwete wəndəa ŋayɛ kwa ghwa ne, kateɓelahe kwete wəndə le. Ma keŋate ghɛ wəndə ne, katenza ŋkɛ ki we. Ma rɛzɛŋe nya mɓete kwete wəndə ɓiyitsa ne, katenda ka ghate ta ya ta ŋkɛ ŋkɛ we.

³¹Katehene yɛ sla ta ŋayɛ mbeli kwa ntsə ta ŋayɛ, ama katezeme slia nci yɛ we. Katefə kwara lɛməa ŋayɛ mbeli kaghərə, ama katezhɛneke hɛ yɛ we. Katefə timɛtia ŋayɛ ka jaga ta ŋayɛ, ama wəndə shɛ katekemane ŋayɛ we.

³²Katefə nda ŋwale tezhili ba'a ŋwalea kwɛa ŋayɛ mbeli ke kwete hwelefe. Leɓakwe tenza ntsə ta ŋayɛ kavəghwə va newe zhɛne geva ta nci kase, ama wəsə shɛ kamenete yɛ we.

³³Ma wəshi nyi wəzate yɛ ba'a nyi menete yɛ ne, katezeme hɛ mbeli nyi ɗepema yɛ. Kaghala ghala tenza yɛ kambeli nyi mene ghə mbeli le hɛ ba'a kambeli nyi kesa yaka.

³⁴Kaka gezhia kɛfi tezhɛre yɛ va newe wəshi nyi kemene geva kwa ntsə ta ŋayɛ.

³⁵Katemene Mahwətə kezha shave zhi nyi keɗema kampi dzeyi te yɛ ghəa shene ta ŋayɛ ba'a dzeyi te ghwela ta ŋayɛ. Kwa sebe ta ŋkɛ ne, rayɛ tenza ŋkwa nya te geva ta ŋayɛ va hɛ, se te ŋwalea seɗa hwa'a pelɛagha kwa ghə.

³⁶Katefə ŋayɛ Mahwətə, gheyɛ ba'a meghe nya tentave yɛ kadzete hɛɗi ɗepema yɛ, ya gheyɛ ya ka shihɛ ŋayɛ. Te hɛɗia shɛ ne, katehawe yɛ va kweci shala nyi menete mbeli le sheghwə keɗema le pelɛ.

³⁷Heheɓake tenza mbeli nyi tefə geva yɛ kadzete hɛɗia nci va wəsə nya ketemene ŋayɛ geva. Kateyiɗə ŋayɛ hɛ ba'a kateŋ'wəshi ŋayɛ hɛ.

³⁸Katetsawe felehwe ta wəshi yɛ kwele kwele kadzembe yɛ wəvea ŋayɛ, ama ɓɛhwɛ teŋ'we yɛ se te wəve, kwa nza ŋkɛ nahe yɛ hegi kezememte wəshi pɛtɛ.

³⁹Katemɓe yɛ rɛzɛŋe yɛ ba'a katehi hɛ yɛ, ama katesa tɛa nci yɛ we. Katenda hɛ yɛ se te wəve, kwa nza ŋkɛ nahe menciɗi kezehwe hɛ we.

⁴⁰Katenza yɛ bekele va gheyɛ dzeyi te pɛtɛa hɛɗia ŋayɛ, ama katenza n'yi va gheyɛ kezha fi geva ta ŋayɛ we, kwa nza ŋkɛ katebetenji ya ta nci tewə hɛ kenehe.

⁴¹Kateya ŋwale tezhili ba'a ŋwalea kwɛ yɛ, ama katenza hɛ va gheyɛ we, kwa nza ŋkɛ, katefəghe geva hɛ kadzete kwete hɛɗi.

⁴²Katezeme pɛtɛa yɛ wəfe ta ŋayɛ ba'a wəshi nyi wəzate yɛ yɛ dzale.

⁴³Katembake geva berete ta ka se se nyi hwa gheyɛ za ma ke gheyɛ, ama katekiɗi geva berete ta ŋayɛ ɓɛhwɛ ɓɛhwɛ.

⁴⁴Ghenci ka tenzəɓə ŋayɛ cɛdɛ, ama gheyɛ ne, wəsə shɛ katenzəɓə nda yɛ ke hɛ we. Katenza hɛ kaka sleke ŋayɛ ba'a katenza yɛ kaka mene nda slene ke hɛ.

⁴⁵Pɛtɛ tedzeghəa gheyɛ bezla nyi, tezele ŋayɛ hɛ ba'a tedzete gheyɛ hɛ pa te za ta sebe te gheyɛ, va nya ɗema yɛ kese kafa nda ŋa Shala Mahwətə ta ŋayɛ, laka hawema va ghena nyi gezete ŋkɛ ba'a wəshi mahalegəa ŋkɛ nyi ndeke ŋayɛ ŋkɛ.

⁴⁶Kala wəsə kencɛ wəsə ba'a kala wəshi meŋele temene ŋayɛ geva hɛ, gheyɛ ba'a hwelefefia ŋayɛ.

⁴⁷Ma va nya ɗema yɛ kamene nda slene ke Shala Mahwətə ta ŋayɛ le zlama ba'a le wənəa ŋayɛ pɛtɛ, vəa ŋkwa nya tenza wəshi kwele kwele va gheyɛ ne,

⁴⁸katezhɛre yɛ kaka mavashia ka jaga nyi teghwene Mahwətə kase sha gheyɛ. Katezhɛ ŋayɛ ma ba'a ndere, katenza yɛ derelɛŋe lɛŋe ba'a pala pala. Kateve lɛ kejikə ŋkwa kala sla kewəza ŋkɛ te welɛ va gheyɛ, pa te və nya tezamte sebe ŋkɛ te gheyɛ.

⁴⁹Kateghwene ŋayɛ kwete hwelefe Mahwətə se cakeɗake, se te mendɛkwe ta hɛɗi, kala nya me zele kənəa zhɛgwə. Kateɗepe ghena ta hwelefea shɛ yɛ we.

⁵⁰Kambeli nyi ndiremi ndiremia mehele tenza hɛ, katehawe hɛ va meha mehɛɗi we, katezhɛ heli hɛ yitea ŋwale we.

⁵¹Katefə wəshi keseɗa ta ŋayɛ ba'a wəshi nyi wəzate yɛ hɛ, ama gheyɛ ne, katempə yɛ va ma. Katesərə ŋayɛ ha, tɛ, n'yi, levea lɛməa sla, zhɛgwəa lɛməa timɛti keɗema ŋa kwi hɛ, pa te və nya tezamte sebe hɛ te gheyɛ we.

⁵²Katedzasle ŋayɛ hɛ dzeyi mbe meleme nyi te hɛɗi nya tendeke ŋayɛ Shala Mahwətə ta ŋayɛ. Katempa hɛ le gheyɛ pa te və nya teŋzlanji zli nyi bebiya bebiya nyi newe ghəa ŋayɛ nyi yɛ tewəfərə kwəmbəa hɛ.

⁵³Ma vəa ŋkwa nya nza yɛ mbe yaka nya wəba, va nya tedzaslete ŋayɛ ka jaga ta ŋayɛ ne, katezeme ŋwalea ŋayɛ yɛ, katezeme slia geva ta ŋwale tezhili ba'a ŋwalea kwɛ nyi ndeke ŋayɛ Shala Mahwətə ta ŋayɛ yɛ.

⁵⁴Ma za nya tiɗiɗi ma ba'a nya ganyɛ ma hwa gheyɛ ne, kateghwərəzlə wəza meghekɛ, male ta ŋkɛ ba'a ŋwale nyi ketetene ve ŋkɛ.

⁵⁵Kwa nza ŋkɛ ne, kateghazlənə ŋkɛ va nehe slia geva ta ŋwalea ŋkɛ nya kawəsə kezeme ta ŋkɛ le kwete wəndəa nci. Ma vəa ŋkwa nya tempa ka ghema ta ŋayɛ le gheyɛ ne, katenza yaka nya wəba te gheyɛ dzeyi mbe yɛ meleme ta ŋayɛ. Wəsə kezeme shɛ katenza va wəndəa shɛ we.

⁵⁶Ma male nya tiɗiɗi ma ba'a nya ganyɛ ma hwa gheyɛ ne, katemene nde tsagha shɛ. Ma vəashi ne, keganyɛ nda se nde, kaɗe nde kaŋkeɗe seɗa ta nta te hɛɗi we. Ama kateghwərəzlə za nta, wəzege teza ta nta ba'a wəzha ta nta,

⁵⁷ya velɛnjɛa nta ba'a məwəhia nta nde. Ma vəa ŋkwa nya tempa ka ghema ta ŋayɛ le gheyɛ ne, katenza yɛ mbe yaka nya wəba dzeyi mbe yɛ meleme ta ŋayɛ. Vatse tezəzə malea shɛ kazeme hɛ tewəfərə, va nya ɗema wəsə kezeme ve.

⁵⁸Ma keɗema yɛ kamene slene le pɛtɛa ghena nyi mbe wəsə mahalegə nya, ghena nyi kerafete geva mbe palepa nya, ma keɗema yɛ kahawe va sləa “Shala Mahwətə ta ŋayɛ” nya nza zləvə te ba'a ghazlənə nya mbeli ve ne,

⁵⁹kateve mama ta zhi nyi keɗema kampi ba'a zereghwe nyi dzawe dzawe nyi keɗema kakiɗi Mahwətə te gheyɛ, gheyɛ ba'a hwelefefia ŋayɛ.

⁶⁰Kateghwene ŋayɛ pɛtɛa ndiremi nyi jama jama nyi se nyi yɛ kaghazlənə va hɛ kwa Ɛzhipte ŋkɛ, kateme hɛ kənəa gheyɛ.

⁶¹Kateve mama ta zereghwe ba'a mama ta zhi nyi kerafetema geva mbe palepa ta wəsə mahalegə nya Mahwətə te gheyɛ, pa te za ta sebe te gheyɛ.

⁶²Ma kwa sebe ta nya tese yɛ kwele kwele kala saseregwa nyi te ghweme ne, deke mbelia ŋayɛ jɛɓɛakwe ka tetene, va nya ɗema yɛ kese kafa nda ŋa Shala Mahwətə ta ŋayɛ.

⁶³Kala nya se nde zeɗehwe nda ke Mahwətə kezha newe ghweme te gheyɛ kezha ve ŋayɛ zlama ba'a kezha seghe ŋayɛ kwele kwele ne, tsagha shɛ tenza ŋkɛ zeɗehwe nda ke Mahwətə kezha mpə ŋayɛ ba'a kezha za sebe te gheyɛ. Tsagha gɛ, katenteɗemte geva yɛ te hɛɗi nya tedzete nya yɛ kakele kaŋa ŋayɛ.

⁶⁴Katetaze ŋayɛ Mahwətə kwetɛ kwetɛŋe dzeyi hwa kweci hwelefefi, se te kwete seɗa ta ghweme hwa'a te kwete. Tagha gɛ ne, katehawe yɛ va kweci shala nyi ɗepema ya gheyɛ, ya ka shihɛ ŋayɛ, shala nyi menete mbeli yitea sheghwə keɗema yitea pelɛ.

⁶⁵Ma hwa hwelefefia shɛhɛ ne, katenza yɛ gwezlayɛ ba'a katekemave ŋkwa keŋkeɗe seɗa yɛ we. Kateve wənəa ŋayɛ Mahwətə tsekwe tseɗekwe, katenewe ŋkwa yɛ ngərə ngərə ba'a katenza geva ta ŋayɛ keta ta.

⁶⁶Katempeɗe ŋayɛ ghəa ŋayɛ va nza ta ŋayɛ, katebare bare viɗi le veci, bake bake tenza ghəa ŋayɛ te nza ta ŋayɛ teghweme.

⁶⁷Ma masheke ne, ma tegeze yɛ: «Hweŋkwa tese tɛhwɛɗi tse wa?» Ma hetɛhwɛɗi ne, ma tegeze yɛ: «Hweŋkwa tekiɗi ŋkwa tse wa?» Kateslesla helia ŋayɛ kwele kwele va nya nenewe wəshi nyi kemene geva yɛ.

⁶⁸Katezhɛne ŋayɛ Mahwətə kadzawa Ɛzhipte kwa yɛ kwambelə. Ndagwara nahe 'ya kemeɗeyi ŋayɛ kezha ɗema yɛ kazhɛne kanewe hɛɗia shɛ. Ma kwagha ne, katedzeghe yɛ kapamte nda ghəa ŋayɛ ke ka jaga ta ŋayɛ kaka mavashi ba'a kaka kwaterashi. Ama kateɗe hɛ kapa ŋayɛ we.

⁶⁹Nyi ya kaghena ta jikə geva nya gezave nda Mahwətə ke Moyize kamene le ka Israyɛl te hɛɗia ka Mowab, sərə jikə geva nya menete ŋkɛ le hɛ pelɛ ghweme ta Horɛb.