Read KapsikiDC Zhɛne Ghwelə yitea Wəshi Mahalegə 3 Bible Online

Zhɛne Ghwelə yitea Wəshi Mahalegə 3 - KapsikiDC bible

Zhɛne Ghwelə yitea Wəshi Mahalegə 3

¹Kwetere wəmbəa ŋkɛ, pa gheɓəmə kelete hweŋkwa kedzeme laka Bashan. Ama təkwəsəmə yɛ Og, meghea ka Bashan le mbelia ŋkɛ pɛtɛ shave kezha mpa le gheɓəmə mbe Ɛdrɛyi.

²Tagha gɛ, ma ke Mahwətə sha 'ya: «Ghazlənəma na ve ma! 'Ya kateve ŋkɛ mbe dzeve ta ŋa, gheŋkɛ le ka sewajɛa ŋkɛ pɛtɛ ba'a hɛɗia ŋkɛ. Katemene nda na kala nya menete nda na ke Sihon, meghea ka Amor nya kese mbe Hɛshebon.»

³Nahe Shala Mahwətə ta ɓəmə kezhɛne kavame ɓəmə yɛ Og, meghea ka Bashan ba'a ka sewajɛa ŋkɛ mbe dzeve ta ɓəmə. Pa gheɓəmə ɗate hɛ, wəndə shɛ ketenakɛ gheɓəmə teghweme we.

⁴Tewə ketemə kwa sebe ta ŋkɛ, pa gheɓəmə kekelehwe yɛ meleme ta nci pɛtɛ. Kwete shɛ kezhɛnete ɓəmə ghə we. Meleme ŋkwaŋemsə te hɛɗia Argob nya mbe Bashan nya sleke Og hɛ.

⁵Zli ya dzedzasle yitea melemea shɛhɛ, kebebiya bebiyanji zlia shɛhɛ kadzeme yitea ghweme ba'a gelembe nyi nza kale nyi kalɛ te ya mɛa hɛ. Kadzevare hɛ ɓiyitsa ne, kwele kwele meleme nyi ɗema zli yite.

⁶Pɛtɛ gheɓəmə zamte sebe te hɛ kala nya menete nda gheɓəmə ke Sihon, meghe nya mbe Hɛshebon. Pɛtɛ gheɓəmə zamte sebe te yɛ meleme ba'a pɛtɛ gheɓəmə mpəmte zhili, mi ba'a ŋwale.

⁷Ama nahe gheɓəmə kefəhwe wəshi keseɗa ba'a wəshi nyi mbe meleme kawəshi nyi hwa mpa.

⁸Tsagha gɛ, pa gheɓəmə kekelehwe hɛɗia nci va ka meghea kɛfia ka Amor nyi bake nyi kese laka ŋkwa kesame ta veci yitea Zhəwrdɛŋe, kwelɛ yɛ hələa Arnon le ghweme ta Hɛrmon vəa ŋkwa shɛ.

⁹KaSiriyon heka ghwemea shɛ ka Sidon, ama kaSenir heka ka Amor.

¹⁰Pa gheɓəmə kekelehwe meleme nyi pelɛ wəmbə, pɛtɛa hɛɗia Gala'ad ba'a pɛtɛa ŋa Bashan hwa'a mbe yɛ Salka le Ɛdrɛyi, meleme ta hɛɗia Bashan nyi sleke Og.

¹¹Ma Og, meghea ka Bashan ne, gheŋkɛ kwetɛŋenyɛ nde tene teghweme hwa ka Refay. Ma gezlea ŋkɛ nya kakwa lɛ lɛ ne, mba ŋkɛ mbe Raba ta ka Amon. Kamɛtre wəfaɗe ba'a kwete gasle biya ta ŋkɛ ba'a mɛtre bake bezlea ŋkɛ.

¹²Ma vəa ŋkwa shɛ ne, pa gheɓəmə kelehwe hɛɗia shɛ. Ma bela ta ghweme ta Gala'ad ba'a meleme nyi mbe, se mbe Arowɛr hwa'a mɛa hələa Arnon ne, pa 'ya ndeke nda ke ŋwalea yɛ Rəbɛn le Gad.

¹³Ma bela ta Gala'ad nya ketene ba'a pɛtɛa hɛɗia Bashan nya kahɛɗi meghea Og ne, pa 'ya ndeke nda ke kwete bela ta hwelefe ta Manasɛ. Ma pɛtɛa hɛɗia Argob ba'a ŋa Bashan ne, hɛɗia ka Refay heka mbeli perə.

¹⁴Ma hwelefefia Yayir, wəzege ta Manasɛ ne, hɛɗia Argob nya mbe Bashan hwa'a kwa ghala ta hɛɗia yɛ Gɛshəwr le Ma'akat yakelehwe hɛ. Pa hɛ hehekate nda slə ke yɛ meleme ta Bashan shɛ “kameleme ta Yayir”, slə nyi heka hɛ mbeli le pa ɓeshi.

¹⁵Ke hwelefefia Makir, wəzege ta Manasɛ ndeke nda hɛɗia Gala'ad 'ya.

¹⁶Ke hwelefefia yɛ Rəbɛn le Gad ne, hɛɗi nya kwelɛ yɛ Gala'ad le Arnon yandeke nda 'ya ke hɛ. Hələa Arnon ya kaghala nya laka bela kwa zeme ba'a hələa Yabok ya kaghala le hɛɗia ka Amon.

¹⁷Ma laka ŋkwa kepəkwə ta veci ne, dzate kwelɛ zlərəa Zhəwrdɛŋe ghala, kwelɛ yɛ ndərəa Zhɛnɛzarɛt le ndərə kwa Ghwənəghwə hwa'a yitea ghweme ta Pisga nya laka ŋkwa kesame ta veci.

¹⁸Tagha gɛ, ma 'ya gezave ŋayɛ: «Shala Mahwətə ta ŋayɛ nde ndeke ŋayɛ hɛɗi nya kaŋa ŋayɛ. Ma gheyɛ pɛtɛa ka katsala kɛfia ka sewajɛ ne, katejive yɛ te Zhəwrdɛŋe te kema ta ka menəhɛ ŋayɛ nyi kaka Israyɛl.

¹⁹Deke yɛ mia ŋayɛ, ŋwalea ŋayɛ ba'a wəshi keseɗa ta ŋayɛ ka tenza teke mbe meleme nyi ndeke ŋayɛ 'ya. Nahe 'ya keɗepe kwele kwele wəshi keseɗa va gheyɛ.

²⁰Katekemane ka menəhɛ ŋayɛ yɛ pa te və nya teve nda zhɛne mpi Mahwətə ke hɛ kala ŋa ŋayɛ. Nda hɛ kakelete hɛɗi nya teve nda Shala Mahwətə ta ŋayɛ ke hɛ pelɛ kema ta Zhəwrdɛŋe le ŋa nci perə. Ma vəa ŋkwa shɛ ne, yayata wəndəa ŋayɛ katezhɛre geva kase kadzete hɛɗia ŋkɛ, hɛɗi nya ndeke ŋayɛ 'ya.»

²¹Tagha gɛ, ma 'ya gezave nda ke Zhozəwɛ: «Nahe na kenakɛ wəsə nya menete nda Shala Mahwətə ta ŋayɛ ke meghe nyi bake nyi le ntsə ta ŋa. Tsagha temene nda Mahwətə ke pɛtɛa hɛɗi nyi tedzete na pelɛ kema ta Zhəwrdɛŋe.

²²Ghazlənəma yɛ va hɛ ma, kwa nza ŋkɛ, Shala Mahwətə ta ŋayɛ nde tempa kezha gheyɛ.»

²³Ma vəa ŋkwa shɛ, ma 'ya sha se kasəkwə Mahwətə:

²⁴«Shala Mahwətə yawe, nahe na keghate kancɛ ɗa kwelea ŋa ba'a berete ta ŋa. Kwete shala shɛ pelɛ ghweme keɗema kwake te hɛɗi nya kenza kamenete wəshi keɗema slene kala nyi mene na we!

²⁵Pelave ɗa hweŋkwa kajive te Zhəwrdɛŋe kezha nakɛ hɛɗi nya ganyɛ nya pelɛagha, ŋkwa nya ganyɛ dzeme hwa ghweme ba'a ghweme ta Liban 'ya!»

²⁶Ama pa Mahwətə hwepete ɗa wənə va gheyɛ, kese ŋkɛ kafa səkwə ta ɗa we. Ma ke Mahwətə sha 'ya: «Wərə tsagha! Zhɛnema na kageze ɗa ghena nya ma!

²⁷Kwiɗi kadzeme ghəa ghweme ta Pisga, newakɛ ŋkwa nya laka ŋkwa kepəkwə ta veci ba'a nya laka bela kwa gwela, nya laka bela kwa zeme ba'a nya laka ŋkwa kesame ta veci le ntsə ta ŋa. Ama ɗepete kaɗema na katejive te Zhəwrdɛŋe nya!

²⁸Gezave nda ghena ta ŋa ke Zhozəwɛ. Mbakete nda berete ba'a hwepe ghə, kwa nza ŋkɛ gheŋkɛ nde tejive te Zhəwrdɛŋe mbe kema ta mbeli, gheŋkɛ nde teve nda hɛɗi nya tenewe nya na kaŋa nci ke ka Israyɛl.»

²⁹Se mɛa vəa shɛ ne, pa gheɓəmə nza ɓəmə teke kwa zlərə nya, mbe kema ta Bɛt-Pɛyor.