Read KapsikiDC Zhɛne Ghwelə yitea Wəshi Mahalegə 30 Bible Online

Zhɛne Ghwelə yitea Wəshi Mahalegə 30 - KapsikiDC bible

Zhɛne Ghwelə yitea Wəshi Mahalegə 30

¹Ma vəa ŋkwa nya teseke ŋayɛ se pɛtɛa wəshi nyi, wəpi ba'a bezla nyi veyi 'ya mbe kema ta ŋayɛ ne, katezəzə ghena yɛ hwa hwelefefi nyi tetazeyi ŋayɛ Shala Mahwətə ta ŋayɛ hwa hɛ,

²katezhɛne geva yɛ kase sha Shala Mahwətə ta ŋayɛ, katefa nda ŋa ŋkɛ yɛ, gheyɛ ba'a ŋwalea ŋayɛ, le wənəa ŋayɛ pɛtɛ ba'a le nza ta ŋayɛ pɛtɛ, kala ghena nyi geze ŋayɛ nyi 'ya ɓeshi.

³Tagha gɛ, katezhɛre nza ta ŋayɛ Shala Mahwətə ta ŋayɛ, katencɛ ŋayɛ ganyɛa ŋkɛ ŋkɛ, katetsene ŋayɛ ŋkɛ se hwa pɛtɛa hwelefefi nyi tetazeyi ŋayɛ Shala Mahwətə ta ŋayɛ hwa hɛ.

⁴Ya gheyɛ fəghe geva kalə kadzete mendɛkwe ta hɛɗi ne, katelə Shala Mahwətə ta ŋayɛ katsene ŋayɛ se tagha.

⁵Katefə ŋayɛ Shala Mahwətə ta ŋayɛ kase kadzete hɛɗi nya kese kaŋa ka shihɛ ŋayɛ ba'a katekele ŋkɛ yɛ kaŋa ŋayɛ. Kateve ŋayɛ zlama ŋkɛ ba'a kateya ŋayɛ ŋkɛ kwele ma ke ka shihɛ ŋayɛ.

⁶Kateyaɓe wənəa ŋayɛ Shala Mahwətə ta ŋayɛ wɛŋe, gheyɛ ba'a hwelefefia ŋayɛ. Tagha gɛ, kateɗe Shala Mahwətə ta ŋayɛ yɛ le wənəa ŋayɛ pɛtɛ ba'a nza ta ŋayɛ pɛtɛ, yitea nza yɛ teghweme.

⁷Kateve pɛtɛa bezla nyi Shala Mahwətə ta ŋayɛ kənəa ka jaga ta ŋayɛ, kənəa mbeli nyi keɗema ntsə ta ŋayɛ ba'a kənəa mbeli nyi keghweze mɛ hwa gheyɛ.

⁸Ama gheyɛ ne, katezhɛne yɛ kafa nda ghena ke Mahwətə ba'a katemene slene yɛ le pɛtɛa ghena ta ŋkɛ nyi geze ŋayɛ nyi 'ya ɓeshi.

⁹Kateve ŋayɛ jive mbe kema Shala Mahwətə ta ŋayɛ mbe wəshi nyi temene yɛ pɛtɛ. Kwele kwele tenza ŋwale, wəshi keseɗa ba'a wəshi nyi kese te wəve va gheyɛ. Kwa nza ŋkɛ ne, katezhɛne ganyɛa ŋayɛ kanza zeɗehwe nda ke Mahwətə, kala nya se ŋa ka shihɛ ŋayɛ zeɗehwe nda,

¹⁰kenza yɛ kafa nda ŋa Shala Mahwətə ta ŋayɛ laka mene slene le ghena nyi gezete ŋkɛ ba'a wəshi mahalegəa ŋkɛ nyi kerafete geva mbe palepa ta wəsə mahalegə nya ba'a kezhɛneke geva yɛ kase Shala Mahwətə ta ŋayɛ le wənəa ŋayɛ pɛtɛ ba'a nza ta ŋayɛ pɛtɛ.

¹¹Kaganda ne, kenza ghena nyi geze ŋayɛ nyi 'ya ɓeshi dzawe kaŋa ŋayɛ we, kenza hɛ cakeɗake le gheyɛ we.

¹²Kenza hɛ pelɛ ghweme we, ma kenza ŋkɛ tsagha ne, ma ke mbeli sha tegeze: «Wa nde tedzeme ghweme kezha zele ɓəmə hɛ ba'a kezha geze ɓəmə hɛ, yitea mene slene gheɓəmə le hɛ wa?»

¹³Kenza hɛ pelɛ kwete kema ta ndərə we, ma kenza ŋkɛ tsagha ne, ma ke mbeli sha tegeze: «Wa nde tejive te ndərə kezha zele ɓəmə hɛ ba'a kezha geze ɓəmə hɛ, yitea mene slene gheɓəmə le hɛ wa?»

¹⁴Kaganda ne, dekwede ghena shɛhɛ yitea gheyɛ, kwa mɛa ŋayɛ ba'a mbe wənəa ŋayɛ hɛ, yitea mene slene yɛ le hɛ.

¹⁵Ka Israyɛl, newe mə: 'ya kave mpi ba'a zeɗe nza, mte ba'a ndiremi kwa kema ta ŋayɛ ɓeshi.

¹⁶Wa nyi ghena nyi geze ŋayɛ 'ya ɓeshi nyi: ɗe mə Shala Mahwətə ta ŋayɛ, mene mə ɗe ta ŋkɛ, hawe mə va ghena nyi gezete ŋkɛ, wəshi mahalegəa ŋkɛ ba'a wəshi keshia ŋkɛ. Ma tsagha ne, katenza yɛ teghweme, kateya yɛ kwele kwele ba'a katewəpi ŋayɛ Shala Mahwətə ta ŋayɛ te hɛɗi nya tedzete yɛ kakele kaŋa ŋayɛ.

¹⁷Ama kezhɛrave nda wəmbə yɛ, keɗema yɛ kafa nda ghena ba'a kelə ŋayɛ yɛ kahawe ba'a kamene nda slene ke kweci shala ne,

¹⁸'ya kageze ŋayɛ ɓeshi: mɛke teza sebe te gheyɛ. Katetemə yɛ kwele kwele te hɛɗi nya tedzete yɛ kakele kaŋa ŋayɛ pelɛ kema ta Zhəwrdɛŋe we.

¹⁹'Ya kakele ghweme ba'a hɛɗi kaka negha fete yitea ghena shɛ ɓeshi: nahe 'ya keveyi mpi ba'a mte, wəpi ba'a bezla kwa kema ta ŋayɛ. Ntave mə mpi kezha nza yɛ teghweme, gheyɛ ba'a hwelefefia ŋayɛ.

²⁰Ɗe mə Shala Mahwətə ta ŋayɛ, fa nda mə ghena, nza mə dɛŋe dɛŋe te. Ma tsagha ne, katenza yɛ ba'a katetemə yɛ kwele kwele te hɛɗi nya meɗeyi Mahwətə kave nda ke ka shihɛ ŋayɛ Abraham, Izak ba'a Zhakob.