Read KapsikiDC Zhɛne Ghwelə yitea Wəshi Mahalegə 31 Bible Online

Zhɛne Ghwelə yitea Wəshi Mahalegə 31 - KapsikiDC bible

Zhɛne Ghwelə yitea Wəshi Mahalegə 31

¹Kwa sebe ta ŋkɛ, pa Moyize gezete nda ghena shɛhɛ ke pɛtɛa ka Israyɛl.

²Ma ke sha hɛ: «Va ta ɗa gwəmsə ba'a bakemsə ɓeshi, kazhɛne 'ya kanzate nza te ghəa ŋayɛ we. Bandanyɛ ne, ma ke Mahwətə gezete ɗa: ‹Katejive na te Zhəwrdɛŋe nya we.›

³Shala Mahwətə ta ŋayɛ le ghəa ŋkɛ nde tedzeghwa mbe kema ta ŋayɛ. Gheŋkɛ nde teza sebe te hwelefefia shɛhɛ mbe kema ta ŋayɛ kezha nza yɛ kakelehwe hɛɗia nci. Zhozəwɛ nde tenza te ghəa ŋayɛ kala nya gezete Mahwətə.

⁴Katemene nda Mahwətə ke hwelefefia shɛhɛ kala nya menete nda ŋkɛ ke yɛ Sihon le Og nyi kaka meghea ka Amor ba'a ke hɛɗia nci: nahe ŋkɛ kezamte sebe te hɛ.

⁵Kateve hɛ Mahwətə mbe dzeve ta ŋayɛ, ba'a ne, katemene nda yɛ ke hɛ kala ghena nya gezete ŋayɛ 'ya.

⁶Nza mə le berete ba'a le hwepe ghə, ghazlənəma yɛ ma, bare barema yɛ kwa kema ta nci ma, kwa nza ŋkɛ, Shala Mahwətə ta ŋayɛ nde tedzeghwa mbe kema ta ŋayɛ. Katesərə ŋayɛ ŋkɛ we, katewəfə ŋayɛ ŋkɛ we.»

⁷Ma kwa sebe ta ŋkɛ ne, daŋe Moyize hekakɛ Zhozəwɛ, ma ke shɛ kwa ntsə ta Israyɛl pɛtɛ: «Nza le berete ba'a le hwepe ghə, kwa nza ŋkɛ gha nde tebeghe ka Israyɛl kadzete hɛɗi nya meɗeyi Mahwətə kave nda ke ka shihɛ nci. Gha nde teve nda ŋkɛ ke hɛ kaŋa nci.

⁸Katedzeghwa Mahwətə mbe kema ta ŋa, katenza ŋkɛ le gha, katesərə ŋa ŋkɛ we, katewəfə ŋa ŋkɛ we. Ghazlənəma na ma, tama geva ta ŋa ma.»

⁹Pa Moyize rafete wəsə mahalegəa shɛ ba'a ndeke nda ke ka dzeghe Shala nyi kahwelefefia Lɛvi nyi kekele səndəkwəa jikə geva ta Mahwətə ba'a ke pɛtɛa mbelia jama ta ka Israyɛl.

¹⁰Ma ke Moyize sha hɛ: «Menema ta va mberefaŋe, va nya sərə 'yɛwe dewa mbeli te, hwa gəsəkəa yɛ ghwəli,

¹¹vəa ŋkwa nya kese pɛtɛa ka Israyɛl kadzawa kema ta Shala Mahwətə ta ŋayɛ te ŋkwa nya tentave ŋkɛ ne, katejaŋga wəsə mahalegə nya yɛ kwa kema ta pɛtɛa ka Israyɛl kezha fate hɛ.

¹²Katetsene mbeli yɛ pɛtɛ: zhili, mi, ŋwale ba'a ka se se nyi dzeyi mbe yɛ meleme ta ŋayɛ, yitea fa hɛ ba'a yitea teke, kezha hawe hɛ va Shala Mahwətə ta ŋayɛ ba'a kezha mene slene hɛ le pɛtɛa ghena nyi mbe wəsə mahalegə nya.

¹³Ma tsagha ne, katefa ŋwalea nci nyi keɗepema ba'a kateteke hɛ kahawe va Shala Mahwətə ta ŋayɛ kala nza ta hɛa ŋayɛ teghweme te hɛɗi nya tejive yɛ kakele kaŋa ŋayɛ pelɛ kema ta Zhəwrdɛŋe.»

¹⁴Ma ke Mahwətə sha Moyize: «Hende yahende geva və nya temte na te kase. Hekakɛ Zhozəwɛ shɛ yɛ se kaghereŋe ŋayɛ mbe cɛ lekwesa kebegeme. Mbagha ne, kategeze nda ghena ta ɗa 'ya.» Pa yɛ Moyize le Zhozəwɛ lə kaghereŋenji mbe cɛ lekwesa kebegeme geva.

¹⁵Pa Mahwətə ncɛte nda ghəa ŋkɛ ke hɛ mbe geɗeɗe ta meləkwə ləkwə nya kemenete geva mɛa ŋkwa kedzembe cɛ lekwesa.

¹⁶Ma ke Mahwətə sha Moyize: «Takwa takwa na katemte. Ma kwa sebe ta mte ta ŋa ne, katelə ka Israyɛl kahawe va yɛ shala ta kweci hwelefefi nyi hawe mbeli va hɛ te hɛɗi nya tedzete hɛ. Katewəfə ɗa hɛ ba'a katenehemte jikə geva ta ɗa hɛ, jikə geva nya menete 'ya le hɛ.

¹⁷Ma te vecia shɛ ne, katehwepe wənəa ɗa kwele kwele va hɛ. Katewəfə hɛ 'ya, katezhɛre nda wəmbə 'ya ke hɛ. Ma tsagha gɛ, katempə hɛ kweci hwelefefi ba'a kateme ndiremi nyi jama jama ba'a yaka nyi dzawe dzawe te hɛ. Ma ke hɛ sha tegeze te vecia shɛ: ‹Ma nda dzete gheɓəmə ndiremi nyi ne, ashɛ va nya ɗema Shala ta ɓəmə hwa gheɓəmə wəka?›

¹⁸Ama 'ya ne, katezhɛre nda wəmbə 'ya ke hɛ te vecia shɛ, tewəmbəreke wəshi nyi ndiremi ndiremi pɛtɛ nyi menete hɛ laka hawe va kweci shala.

¹⁹Ma tsetsenya ne, rafete mə cimə nya. Ma gha gɛ Moyize, tekave nda ciməa shɛ ke ka Israyɛl, veyi nda kwa mɛ ke hɛ, yitea nza ciməa shɛ kawəsə kenegha fete ta ɗa kezha ka Israyɛl.

²⁰Kwa nza ŋkɛ ne, katefə mbelia shɛhɛ 'ya kadzete hɛɗi nya hwɛ ŋ'wa ba'a yɛməa mze, hɛɗi nya zemete 'ya kafela kave nda ke ka shihɛ nci. Katezeme wəshi kezeme hɛ behe behe ba'a katetsa geva ta nci. Ma kwa sebe ta ŋkɛ ne, katezhɛre nda geva hɛ ke kweci shala ba'a katemene nda slene hɛ ke hɛ. Kateɓelama ɗa hɛ ba'a katenehe jikə geva ta ɗa hɛ.

²¹Ma vəa ŋkwa nya tedzete hɛ ndiremi nyi jama jama ba'a yaka nyi dzawe dzawe ne, katenza cimə nya kawəsə kenegha fete te hɛ, kwa nza ŋkɛ, katezaghə gha ciməa shɛ hwelefefia nci tɛape we. Kwa nza ŋkɛ ne, nahe 'ya keɗepe zəzə nya mbe ghəa nci ɓeshi, nda tefəghe hɛ 'ya kadzete hɛɗi nya meɗeyi 'ya kafela.»

²²Ma te vecia shɛ ne, pa Moyize rafete ciməa shɛ ba'a tekete nda ŋkɛ ke ka Israyɛl.

²³Kwa sebe ta ŋkɛ, pa Mahwətə gezete nda ghena ta ŋkɛ ke Zhozəwɛ, wəzege ta Nəwn, ma ke shɛ: «Nza le berete ba'a le hwepe ghə, kwa nza ŋkɛ gha nde tebeghe ka Israyɛl kadzete hɛɗi nya meɗeyi nda 'ya kafela ke hɛ. 'Ya ne, katenza 'ya le gha.»

²⁴Ma kwa nahemte rafe ghena nyi mbe wəsə mahalegə nya Moyize pɛtɛ kadzete palepa ne,

²⁵ma ke gezave nda ghena nya ke ka Lɛvi nyi kekele səndəkwəa jikə geva ta Mahwətə:

²⁶«Kelete mə palepa ta wəsə mahalegə nya shɛ yɛ veyi vare səndəkwəa jikə geva ta Shala Mahwətə ta ŋayɛ. Tagha tenza ŋkɛ kawəsə kenegha fete te ka Israyɛl.

²⁷Kwa nza ŋkɛ ne, nahe 'ya keɗepe kaka fama ghena ba'a kaka ntɛaŋentɛa ghə hɛ. Ma kaɗema hɛ kafa nda ghena ke Mahwətə ɓeshi mba 'ya teghweme te tepe ta nci ne, tsema temene geva ŋkɛ kwa sebe ta mte ɗa wa?

²⁸Tsetsenya ne, tsenete mə mbelia jama ba'a mbeli nyi te ghəa hwelefefia ŋayɛ yitea 'ya. Kwa kema ta yɛ ghweme le hɛɗi nyi ketenza kaka negha fete ne, 'ya katezlape nda ghena nyi mbe cimə nya ke hɛ.

²⁹Kwa nza ŋkɛ nahe 'ya keɗepe, ma kwa sebe ta mte ta ɗa ne, katedzembe jaɗafa ka Israyɛl ba'a katesame hɛ kwa hweŋkwa nya ncɛte nda 'ya ke hɛ. Tagha gɛ, katedzeghəa hɛ ndiremi va pɛtɛa wəshi nyi temenete hɛ kaɗema zeɗehwe nda ke Mahwətə ba'a kezha beze nda wənə.»

³⁰Kwa sebe ta ŋkɛ ne, pa Moyize zlapete nda ghena nyi mbe ciməa shɛ ke ka Israyɛl nyi ketsenete geva, ma ke: