Read KapsikiDC Zhɛne Ghwelə yitea Wəshi Mahalegə 33 Bible Online

Zhɛne Ghwelə yitea Wəshi Mahalegə 33 - KapsikiDC bible

Zhɛne Ghwelə yitea Wəshi Mahalegə 33

¹Ma nda temte Moyize, wəndəa Shala ne, wa nyi wəpi nyi wəpikɛ ka Israyɛl ŋkɛ le nyi:

²«Nahe Mahwətə kesawa pelɛ ghweme ta Sinay. Kala veci samenyɛ ŋkɛ te hɛɗia Sɛyir. Sawa pelɛ ghweme ta Paran ne, nahe ŋkɛ kewaŋete nda ŋkwa ke mbelia ŋkɛ. Nahe ŋkɛ kese sha mbelia ŋkɛ, zlaɓe le ka ghwene ta ŋkɛ kwele kwele. Wəsə mahalegə nya ketse kala ghwə ya mbe dzeve ta ŋkɛ.

³Kaɗe hwelefefia Israyɛl ŋkɛ. Kaya pɛtɛa mbeli nyi keveyi geva kaŋa ŋkɛ ba'a nyi ketsene geva yitea seɗa ta ŋkɛ kezha fa ghena nyi geze ŋkɛ.

⁴Nahe Moyize kendeke n'yɛ wəsə mahalegə. Wəsə nya nza zləvə te ŋkɛ kaŋa hwelefefia Zhakob.

⁵Nahe Israyɛl kekemave meghe, vəa ŋkwa nya tsenete geva mbeli nyi te ghəa mbeli kanya kwetɛŋe le hwelefefia Israyɛl.»

⁶Ma ke Moyize mbakete: «Pa hwelefe ta Rəbɛn nza teghweme! Zama sebe te tɛape, ya gheŋkɛ ɗema kwele kwele ma.»

⁷Ma ke Moyize te ghəa hwelefefia Zhəwda: «Mahwətə, fate ŋwələa hwelefe ta Zhəwda, zhɛneke ka Zhəwda kadzehwa ka menəhɛ nci. Mpa yampa hɛ yitea ghəa nci le hwepe ghə. Kemanakɛ hɛ va ka jaga ta nci.»

⁸Ma ke Moyize te ghəa hwelefefia Lɛvi: «Nahe na kedapate nda wəshi nyi keveyi geva tekeleke[2] te dzeve ke hwelefefia Lɛvi nyi kemene ŋa slene tiɗiɗi. Nahe na kese kadzeghe hɛ mbe Masa ba'a kese kaghəpə le hɛ te ghena ta yɛ yɛməa Mɛriba.

⁹Nahe hɛ kencɛte za ma ɗehwe ŋa hɛ ke mbeli nyi keyake hɛ, ke ka kesaka megheyɛa nci ba'a ke ŋwalea nci. Nahe hɛ keyate ghena ta ŋa ba'a kehawete nda hawe ke jikə geva ta ŋa.

¹⁰Kateke nda wəshi keshia ŋa hɛ ke mbelia Zhakob ba'a kateke wəsə mahalegəa ŋa hɛ ke ka Israyɛl. Katere ŋa 'wərdə hɛ ba'a kadzeghe ŋa melɛ kwa tere tere hɛ te reghwetɛa ŋa.

¹¹Mahwətə, mbakete nda berete ke hɛ, wəpikɛ pɛtɛa wəshi nyi mene hɛ. Ŋslemte berete ta ka jaga ta nci kezha ɗema hɛ kazhɛne kasate te ŋkwa.»

¹²Ma ke Moyize te ghəa hwelefefia Bɛnjamɛn: «Kwele kwele ɗehwe hwelefe ta Bɛnjamɛn Mahwətə, Gwezlayɛ nza ŋkɛ vare Shala ta ŋkɛ. Kaya ŋkɛ keveci keveci, te tepe ta hwelefe ta ŋkɛ nza ŋkɛ.»

¹³Ma ke Moyize te ghəa hwelefefia Zhozɛf: «Nahe Mahwətə kewəpikɛ hɛɗia nci. Kabete mɛnɛ sawa pelɛ ghweme kadzeghə ba'a kasame yɛmə kwa zeweve ta hɛɗi kadzete.

¹⁴Kakele wəshi nyi te wəve veci, ketere ketere nehe wəshi nyi te wəve.

¹⁵Ma hɛɗi nya dzeyi hwa yɛ ghweme ba'a nya dzeyi te yɛ wəmbəa shɛ ne, wəshi ganji yamene ŋkɛ keveci keveci.

¹⁶Pa mcɛlə nyi te hɛɗi ganyɛa shɛ ba'a ganyɛa Shala nya mbe wəfe pesleyi geva kənəa hwelefe ta Zhozɛf, gheŋkɛ nya kese te ghəa ka kesaka yitenyɛ.

¹⁷Nza zləvə te Zhozɛf! Bereteke ŋkɛ kala mca. Keberete beretenji tereme ta ŋkɛ nyi bake kala yɛ tereme ta sla gamba. Kateŋka hwelefefi nyi te hɛɗi ŋkɛ le hɛ hwa'a te mendɛkwe ta hɛɗi. Hwelefe ta Ɛfrayim nya kwele kwele kwete teremea shɛ. Wəvəsəa hwelefe ta Manasɛ nya kwele kwele kwete.»

¹⁸Ma ke Moyize te ghəa hwelefefia yɛ Zabəlon le Isakar: «Zabəlon, zlama te slene ta zhɛre dzeve ta ŋa, ma gha gɛ Isakar, zlama yitea nza ta ŋa gwezlayɛ dzeyi mbe yɛ cɛ lekwesa ta ŋa!

¹⁹Kateheka kweci hwelefefi yɛ kadzeme ghweme kezha dzeghe melɛ nyi kegezete geva. Kwa nza ŋkɛ ne, kwa ndərə same mcɛləa ŋayɛ ba'a mbe ndaleghe shave wəshi nyi nza zləvə te nyi tewəfərə.»

²⁰Ma ke Moyize te ghəa hwelefefia Gad: «Katsa nda hana 'ya ke Shala nya kendeke nda hɛɗi nya bezle nya ke Gad! Nahe Gad keɓelahenyɛ kala nivɛrə, ɗeke ɗeke kaslekwe wəsə nya keseve ŋkɛ se te seɗa hwa'a te ghə.

²¹Bela ta hɛɗi nya ganyɛ ma yantave Gad. Bela nya kaŋa wəndə nya te ghə yaveyi ŋkɛ kaŋa ŋkɛ. Kwa sebe ta ŋkɛ, pa kekave mbeli nyi te ghəa mbeli, pa yipəyi zəzə ta Mahwətə ba'a ghena nyi gezete ŋkɛ kaŋa ka Israyɛl kwa.»

²²Ma ke Moyize te ghəa hwelefefia Dan: «Kala megela nivɛrə nya keŋsle bale se mbe Bashan Dan.»

²³Ma ke Moyize te ghəa hwelefefia Nɛftali: «Kwele kwele kemave zlaɓa Nɛftali, kwele kwele wəpikɛ Mahwətə. Mbakete hɛɗia ŋkɛ ŋkɛ laka ŋkwa kepəkwə ta veci ba'a laka bela kwa zeme.»

²⁴Ma ke Moyize te ghəa hwelefefia Asɛr: «Nza Asɛr kewəpi wəpi hwa ŋwalea Zhakob! Nza zləvə za ma te hwa ka kesaka yitenyɛ! Ta n'yi mbeli kwele kwele yitea yɛ bekelea ŋkɛ!

²⁵Nza ŋkɛ tewəfərə va ka jaga ta ŋkɛ kwetere wəmbəa gelembe ta ŋkɛ nyi nza wəshi keŋzle ta nci kalɛ keɗema kamze kwa ghwə ghwə. Temə berete ta ŋkɛ kala nza ta hɛa ŋkɛ teghweme.»

²⁶Ma ke Moyize zhɛkwa: «Israyɛl, shala shɛ kala Shala ta ŋa we! Le berete ne, kasawa ŋkɛ kakemane ŋa sawa pelɛ ghweme le gədəwə sawa hwa ləmbə.

²⁷Se vəashi ne, ŋkwa kewəfərə ta ŋa ŋkɛ. Se vəashi ne, kancɛ berete ta ŋkɛ ŋkɛ te hɛɗi. Gheŋkɛ nde ŋkamte ka jaga ta ŋa mbe kema ta ŋa ba'a nde gezave ŋa kaza sebe te hɛ.

²⁸Gwezlayɛ nzanji ka Israyɛl. Tewəfərə hwelefefia Zhakob te hɛɗi nya mene ha ba'a rɛzɛŋe, te zlaɓa ta mɛnɛ nya kesawa pelɛ ghweme.

²⁹Nza mə fare fare ka Israyɛl! Wa hwelefe nya mbelete Mahwətə kala gheyɛ wa? Gheŋkɛ ya kagelə nya keya ŋayɛ ba'a kakafayɛ nya keve ŋayɛ hərə ŋkwa. Katese ka jaga ta ŋayɛ kaghwete ŋayɛ, ama kateŋkeɗe hɛ mbe hwə seɗa ta ŋayɛ.»