Read KapsikiDC Zhɛne Ghwelə yitea Wəshi Mahalegə 34 Bible Online

Zhɛne Ghwelə yitea Wəshi Mahalegə 34 - KapsikiDC bible

Zhɛne Ghwelə yitea Wəshi Mahalegə 34

¹Cape Moyize slə te ŋwela ta Mowab kadzeme ghweme ta Nɛbo, pelɛ ghəa ghweme ta Pisga, mbe kema ta Zhɛriko. Pa Mahwətə ncɛte nda hɛɗia shɛ pɛtɛ: hɛɗia Gala'ad hwa'a mbe Dan,

²hɛɗia Nɛftali, ŋa Ɛfrayim, ŋa Manasɛ, pɛtɛa hɛɗia Zhəwda hwa'a mɛa ndərəa Mɛditɛranɛ,

³hɛɗia Nɛgɛv, ŋwela ta Zhəwrdɛŋe, zlərəa Zhɛriko, meleme ta yɛ peha, hwa'a mbe Sowar.

⁴Ma ke Mahwətə shɛ: «Nya ya kahɛɗi nya meɗeyi nda 'ya kafela ke Abraham, Izak ba'a Zhakob. Ma 'ya sha hɛ: ‹Kateve nda hɛɗi nya 'ya ke hwelefefia ŋayɛ.› 'Ya kancɛ ŋa ŋkɛ, ama kadzete na we.»

⁵Mtiwə Moyize nya kande mene slene ta Mahwətə te ŋkwa shɛ, te hɛɗia Mowab kala nya gezete Mahwətə.

⁶Pa Shala lamte le ghəa ŋkɛ kwelɛ kwete zlərə te hɛɗia Mowab, mbe kema ta Bɛt-Pɛyor. Ama pa ɓeshi ne, wəndə shɛ keɗepe ŋkwa nya nza kwele ta ŋkɛ te we.

⁷Va ta Moyize gwəmsə ba'a bakemsə nda mte ŋkɛ, ama mba ŋkɛ kanewe ŋkwa megela ba'a mba berete mbe geva ta ŋkɛ.

⁸Pa ka Israyɛl nehwenekɛ te ŋwela ta Mowab kahɛ mahekenemsə. Kwa sebe ta ŋkɛ, pa yɛ hɛa nehwene ta Moyize kiɗinji.

⁹Kwele kwele ntsehwele va Zhozəwɛ, wəzege ta Nəwn, kwa nza ŋkɛ nahe Moyize kevaghe dzeve kənə. Ghena ta ŋkɛ yafa ka Israyɛl, pa hɛ menete wəshi nyi gezave nda Mahwətə ke Moyize.

¹⁰Kezhɛne nde mɛ ŋkwa kase hwa ka Israyɛl kala Moyize we, gheŋkɛ yase Mahwətə kageze ghena kwa ntsə kwa ntsə le.

¹¹Nahe Mahwətə keghwenakɛ ŋkɛ kamene wəshi nyi dzawe dzawe ba'a wəshi meŋele mbe Ɛzhipte kwa kema ta Farawon, kwa kema ta ka mene slene ta ŋkɛ ba'a kwa kema ta mbeli nyi te hɛɗia ŋkɛ pɛtɛ.

¹²Nahe Moyize kemenete wəshi nyi dzawe dzawe ba'a wəshi nyi ghazlənə mbeli ve le berete kwa kema ta pɛtɛa ka Israyɛl.