Read KapsikiDC Zhaŋe 1 Bible Online

Zhaŋe 1 - KapsikiDC bible

Zhaŋe 1

¹Ma te gha ta pɛtɛa wəshi ne, nahe Ghena ta Shala kenza shɛ. Nahe Ghena kese le Shala ba'a nahe Ghena kese kaShala.

²Se ta gha ta wəshi ne, nahe Ghena kese le Shala.

³Nahe Shala kemenete pɛtɛa wəshi le Ghena. Wəsə shɛ kemenete geva keɗema le Ghena we.

⁴Mbe Ghena shɛ nza mpi. Mpia shɛ nde se kawaŋe kaŋa mbeli.

⁵Kaɓele waŋe hwa ŋkwesle, ama kehərəte ŋkɛ ŋkwesle we.

⁶Nahe Shala keghweneke kwete wəndə nya nza sləa ŋkɛ kaZhaŋe.

⁷Nahe ŋkɛ kese kala negha fete, kezha nza kande negha fete yitea waŋe, yitea yɛ waŋea shɛ mbeli laka gheŋkɛ.

⁸Kenza Zhaŋe kawaŋea shɛ ŋkɛ le ghəa ŋkɛ we, ama nahe ŋkɛ kenza kande negha fete yitea waŋe.

⁹Nahe Ghena kese kawaŋe nya kaganda, nya kesawa te hɛɗi ba'a nya kewaŋe mbeli pɛtɛ.

¹⁰Nahe Ghena kese te hɛɗi lema, le Ghena pate hɛɗi Shala. Ama keɗepete ŋkɛ mbeli nyi te hɛɗi we.

¹¹Nahe Ghena kese kadzehwa hwelefe ta ŋkɛ, ama kekemaneve ŋkɛ hwelefe ta ŋkɛ we.

¹²Ama nahe kweci mbeli kekemaneve Ghena bake bake dzeve ba'a keyɛte ŋkɛ. Nahe nde kendeke nda hweŋkwa ke hɛ kanza kaŋwalea Shala.

¹³Kezhɛrenji hɛ kaŋwalea Shala laka mimi, laka ɗe ta geva keɗema laka ɗe ta wəndə ŋelɛ we, ama laka Shala.

¹⁴Pa Ghena zhɛrenyɛ kawəndə ba'a nzanyɛ hwa gheɓəmə. Nahe gheɓəmə kenakɛ zləvəa ŋkɛ, zləvə nya kemave Wəzege kwetɛ va Yita.

¹⁵Nahe Zhaŋe keneghate fete yite, ma ke zlapete: «Gheŋkɛ wəndə nya gezete ŋayɛ ghena 'ya te ghəa ŋkɛ, ma 'ya sha gheyɛ: Nahe wəndə nya ketese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya.»

¹⁶Nahe gheɓəmə pɛtɛ kekemave ŋa ɓəmə bela ta mcɛləa zlaɓa ta ŋkɛ, nahe gheɓəmə kemave ŋkɛ kadzeghə kadzeghə.

¹⁷Nahe Shala keghweneke ɓəmə wəshi mahalegə laka Moyize. Ama nahe gheɓəmə kekemave zlaɓa ba'a kaganda laka Yɛsə Kriste.

¹⁸Wəndə shɛ kegha kanakɛ Shala we. Ama nahe Wəzege kwetɛ nya kaShala ba'a nya kenza le Yita kencɛte ɓəmə Shala.

¹⁹Pa ka Zhəwif nyi mbe Zhɛrəzalɛm ghweneghe nda ka dzeghe Shala ba'a ka Lɛvi ke Zhaŋe, ma ke hɛ 'yɛwete ve: «Wa ŋkɛ na wa?»

²⁰Kese Zhaŋe kawəfərə va hɛ we. Ama ma ke neghate kwa kema ta pɛtɛa mbeli: «Kenza 'ya kaMɛsi we.»

²¹Ma ke hɛ 'yɛwete ve: «Wa ŋkɛ na tsagha wa? Ɛli na na?» Ma ke Zhaŋe: «Ewə, gheŋkɛ 'ya we.» Ma ke hɛ shɛ: «Nde mɛ ŋkwa ta Shala na na?» Ma ke zhɛnete: «Ewə, gheŋkɛ 'ya we.»

²²Tagha gɛ, ma ke hɛ shɛ: «Wa ŋkɛ na ke ghen'yɛ sha geze nda ke mbeli nyi keghweneke n'yɛ tsagha wa? Wa ŋkɛ na pa sha ghəa ŋa wa?»

²³Ma ke Zhaŋe zhɛnete nda ke hɛ: «'Ya ya kawəndə nya kezlape ghena te ɓerama: hi nda mə hweŋkwa tiɗiɗi ke Mahwətə, kala nya gezete Ɛzayi, nde mɛ ŋkwa.»

²⁴Ka Fariziyɛn ya hwa mbeli nyi ghweneke mbeli sha Zhaŋe.

²⁵Ma ke hɛ shɛ: «Nda kaɗema na kaMɛsi, kaƐli keɗema kande mɛ ŋkwa ta Shala ne, yitea wa mene nda batɛme na ke mbeli tsagha wa?»

²⁶Ma ke Zhaŋe zhɛnete nda ke hɛ: «Ma 'ya ne, le yɛmə mene ŋayɛ batɛme 'ya. Ama kwete wəndə nya ɗepema yɛ ya hwa gheyɛ.

²⁷Kase ŋkɛ kwetere wəmbəa ɗa. Kehi 'ya kanza ya kawəndə nya kepele zewe nyi mbe tsahwa ta ŋkɛ we.»

²⁸Kwa Bɛtani menete geva wəshi nyi pɛtɛ, pelɛ kema ta hələa Zhəwrdɛŋe, te ŋkwa nya mene nda batɛme Zhaŋe ke mbeli.

²⁹Ma te hendɛ ta ŋkwa ne, pa Zhaŋe nakɛ Yɛsə kase shɛ, ma ke: «Wa nya Zhɛgwəa Shala nya kekele jaɗafa ta hɛɗi lema nya.

³⁰Gheŋkɛ ya kawəndə nya gezete ŋayɛ 'ya, ma 'ya: Nahe wəndə nya kese kwetere wəmbəa ɗa kenza kwele ma ke 'ya, kwa nza ŋkɛ nahe ŋkɛ kenzahwe nza mpelɛa ke 'ya.

³¹Ma 'ya ne, keɗepete ŋkɛ 'ya we. Ama nahe 'ya kese kezha mene batɛme le yɛmə yitea ncɛ nda ŋkɛ ke ka Israyɛl.»

³²Ma ke Zhaŋe neghate fete zhɛkwa: «Nahe 'ya kenakɛ Sefəa Shala kasawa pelɛ ghweme kala gheɗepe kanza kənə.

³³Ma 'ya ne, keɗepete ŋkɛ 'ya we. Ama ma ke Shala nya keghweneke ɗa kamene batɛme le yɛmə sha 'ya: Katenewe Sefəa Shala na kasawa pelɛ ghweme kanza kənəa kwete wəndə. Gheŋkɛ nde temene nda batɛme ke mbeli le Sefəa Shala.

³⁴Ma 'ya ne, nahe 'ya kenakɛ wəsəa shɛ ba'a kenza kande negha fete yite: Wəndəa shɛ ya kawəzege ta Shala.»

³⁵Ma te hendɛ ta ŋkwa ne, nahe Zhaŋe kenza tagha zhɛkwa le ka təkwə təkwə ŋkɛ bake.

³⁶Ma kwa nakɛ Yɛsə ŋkɛ kadzeghwa ne, ma ke Zhaŋe: «Wa nya Zhɛgwəa Shala nya gɛ!»

³⁷Ma kwa fate ghena shɛhɛ ka təkwə təkwə Zhaŋe bake ne, ntəŋə hɛ kwetere wəmbəa Yɛsə.

³⁸Pa Yɛsə zhɛrete geva, pa nakɛ hɛ katəkwə təkwə ŋkɛ hɛ, ma ke 'yɛwete va hɛ: «Wa yaghweze yɛ wa?» Ma ke hɛ shɛ: «Tema ŋkwa nya nza na te wa, Rabi?» Ma ghena nya mbe Rabi ne, Nde sleke ɗa.

³⁹Ma ke zhɛnete nda ke hɛ: «Nde mə, katenewe yɛ.» Pa hɛ lə kanakɛ ŋkwa nya nza ŋkɛ te. Pa hɛ keɗaŋemte veci nya ketene yite. Nahe ŋkwa kenza kwa mtsa veci.

⁴⁰Nahe Andrɛ, wəza meghekɛ Simon Piyɛre kenza hwa mbeli nyi bake nyi kefate ghena ta Zhaŋe ba'a ketəkwə təkwəte Yɛsə.

⁴¹Pa Andrɛ begeme le wəza meghekɛ Simon, ma ke shɛ: «Nahe n'yɛ kesləyi Mɛsi.» Ma ghena nya mbe Mɛsi ne, Kriste.

⁴²Pa ŋkɛ begheghe ŋkɛ kalə sha Yɛsə. Dəkwə Yɛsə te Simon, ma ke shɛ: «Gha ya kaSimon, wəzege ta Zhaŋe, Kɛfas tenza sləa ŋa.» Ma ghena nya Kɛfas ne, Keleɓa.

⁴³Ma te hendɛ ta ŋkwa ne, pa Yɛsə tarete kadzawa Galilɛ. Pa ŋkɛ begeme le Filipe, ma ke shɛ: «Təkwə təkwə ɗa.»

⁴⁴Nahe Filipe kenza kande Bɛtesayida, meleme nya se yɛ Andrɛ le Piyɛre mbe.

⁴⁵Kwetere wəmbəa ŋkɛ, pa Filipe begeme le Natanayɛl. Ma ke shɛ: «Nahe ghen'yɛ kesləyi wəndə nya gezete Moyize te mbe palepa ta wəsə mahalegə. Nahe ka mɛ ŋkwa kegezete ghena te perə. Gheŋkɛ Yɛsə, wəzege ta Zhozɛf nya kande Nazarɛt.»

⁴⁶Ma ke Natanayɛl shɛ: «Wəsə ganyɛ shɛ kasame kwa Nazarɛt na?» Ma ke Filipe shɛ: «Nde, katenewe na.»

⁴⁷Ma kwa nakɛ Natanayɛl Yɛsə kase shɛ ne, ma ke te ghəa ŋkɛ: «Wa nya nde Israyɛl nya kaganda, nya ɗema mbəɗəkwə mbe nya gɛ!»

⁴⁸Ma ke Natanayɛl shɛ: «Tema ɗepe ɗa na wa?» Ma ke Yɛsə zhɛnete nda: «Nahe 'ya kenakɛ ŋa vəa ŋkwa nya nza na yitea dasekwa, nda teheka ŋa Filipe.»

⁴⁹Ma ke Natanayɛl shɛ: «Rabi, gha ya kaWəzege ta Shala, gha ya kameghea ka Israyɛl.»

⁵⁰Ma ke Yɛsə shɛ: «Va nya gezete ŋa 'ya nahe 'ya kenakɛ ŋa yitea dasekwa yɛte na na? Katenewe wəshi nyi jama jama ma ke nyi na.»

⁵¹Ma ke ɓiyitsa: «Kaganda ne, ma 'ya sha gheyɛ: katenewe ŋkwa kedzeme ghweme teghwene ba'a ka ghwene ta Shala yɛ kadzeme ba'a kasawa kənəa Wəzege ta za.»