Read KapsikiDC Zhaŋe 19 Bible Online

Zhaŋe 19 - KapsikiDC bible

Zhaŋe 19

¹Tagha gɛ, pa Pilate kelete Yɛsə ba'a ɗate ŋkɛ le kwərəpə.

²Pa ka sewajɛ nderete tigə kala derə meghe, pa hɛ veyi nda mbe ghə ke Yɛsə. Pa hɛ seɗaghe nda gare kwa gheme kala meghe.

³Pa hɛ hendave nda geva ke Yɛsə, ma ke hɛ sha njiŋwe: «Same meghea ka Zhəwif.» Kapesle hɛ le dzeve kwa sleme.

⁴Pa Pilate zhɛne kashave sha ka Zhəwif. Ma ke sha hɛ: «Newe mə, nahe 'ya kekelakave ŋayɛ wəndəa shɛ yitea ɗepe yɛ kenakɛ fete nya pesle mbeli 'ya yite we.»

⁵Cape Yɛsə shave te ŋwela le tigə yitea ghə kala derə meghe, le gare kwa gheme kənə kala meghe. Ma ke Pilate sha hɛ: «Wa nya wəndəa shɛ nya.»

⁶Ma kwa nakɛ mbeli nyi te ghəa ka dzeghe Shala le ka ya ghɛa Shala ta nci ne, ma ke hɛ: «Baŋate te sheghwə kwa zleŋkwa, baŋate te sheghwə kwa zleŋkwa.» Ma ke Pilate sha hɛ: «Kele mə wəsəa ŋayɛ, baŋate mə te sheghwə kwa zleŋkwa le ghəa ŋayɛ. 'Ya ne, kenakɛ fete 'ya ve le ŋa ɗa ghə we.»

⁷Ma ke ka Zhəwif shɛ: «Wəsə mahalegə ya va ghen'yɛ. Ma kala nza ta ghena nya kegezete geva te, wərə mte wəndə nya va nya geze ŋkɛ kawəzege ta Shala ŋkɛ.»

⁸Ma kwa fate ghena shɛ Pilate, pa ghazlənə kazhɛ nda za ma.

⁹Ntəŋə ŋkɛ kadzembe cɛ zhɛkwa. Ma ke sha Yɛsə: «Tema se na wa?» Kese Yɛsə kazhɛne nda we.

¹⁰Ma ke Pilate shɛ: «Va wa ɗema na zhɛne ɗa ghena wa? Keɗepe na, wərə 'ya kapelakɛ ŋa keɗema kabaŋete ŋa te sheghwə kwa zleŋkwa wəka?»

¹¹Ma ke Yɛsə shɛ: «Berete kesleke ɗa va gha we, keɗema nya ndeke ŋa Shala sawa pelɛ ghweme we. Vatse nza nde za ma jaɗafa ta wəndə nya kepahwe ɗa va gha ke gha.»

¹²Se mɛa vəa shɛ ne, hweŋkwa kepele Yɛsə yazele Pilate. Ntake ka Zhəwif katsa lewela, ma ke hɛ: «Ma kepelakɛ wəndə nya na ne, mcɛnyɛa Sɛzar na we. Nahe yayata wəndə nya keve ghəa ŋkɛ kameghe kenza kande ghema ta Sɛzar.»

¹³Ma kwa fate ghena nya Pilate, pa kelakave Yɛsə kashave kwa degha. Pa ŋkɛ ntishɛnyɛ te ŋkwa kemeha ghwə, te ŋkwa nya heka mbeli kaGabata sha ka Zhəwif, geze ta ŋkɛ, pelɛ ghəa tsehala.

¹⁴Tene hɛ kwetɛŋe nda temene gəsəkəa Pake mbeli. Kwa ghə veci ne, ma ke Pilate sha ka Zhəwif: «Wa nya mə meghea ŋayɛ nya.»

¹⁵Ma ke hɛ tsate lewela: «Peslekɛ, peslekɛ, baŋate te sheghwə kwa zleŋkwa.» Ma ke Pilate: «Baŋate meghea ŋayɛ 'ya te sheghwə pe yɛ na?» Ma ke mbeli nyi te ghəa ka dzeghe Shala: «Kwete meghe shɛ va ghen'yɛ za ma ke Sɛzar we.»

¹⁶Pa Pilate ndeke nda Yɛsə ke hɛ yitea baŋe te sheghwə kwa zleŋkwa. Pa hɛ kelete Yɛsə.

¹⁷Le sheghwə kwa zleŋkwa ta ŋkɛ ne, pa Yɛsə shave mbe meleme ba'a ntsehe te ŋkwa nya heka mbeli kaŊkwa 'yɛ'yɛa ghə, nya heka mbeli le ghena ta ka Ɛbrə kaGolgota.

¹⁸Te ŋkwa shɛ baŋete Yɛsə hɛ te sheghwə kwa zleŋkwa. Te vecia shɛnyɛ baŋate kweci hɛ mbeli bake le, təhə kwa zeme, təhə te kwa gwela, te tepe Yɛsə.

¹⁹Ma ke Pilate rafete te sheghwə nya baŋete Yɛsə mbeli te: «Yɛsə nde Nazarɛt, meghea ka Zhəwif.»

²⁰Kwele kwele ka Zhəwif nyi kejaŋgate rafea shɛ, va nya nza ŋkwa nya baŋate Yɛsə mbeli te sheghwə te takwa takwa yitea Zhɛrəzalɛm. Le ghena ta ka Zhəwif, le ŋa ka Rome, le ŋa ka Grɛk rafete geva ghena shɛ.

²¹Ma ke mbeli nyi te ghəa ka dzeghe Shala ta ka Zhəwif sha Pilate: «Rafema na: Meghea ka Zhəwif, pa ma, ama ma pa na sha rafe: Ma ke wəndəa shɛ gezete: 'Ya ya kameghea ka Zhəwif.»

²²Ma ke Pilate sha hɛ: «Ma wəsə nya rafete 'ya ne, nza ŋkɛ tsagha shɛ.»

²³Ma kwa baŋate Yɛsə ka sewajɛ te sheghwə kwa zleŋkwa ne, pa hɛ neheve lekwesa ta ŋkɛ wəfaɗe mbe, kwete kwete va yayata sewajɛ. Tene tɛagwarea ŋkɛ nya ɗema ntsəzlə te, tsa tsa tsate mbeli se pelɛghə kare te wəmbəa seɗa.

²⁴Ma ke hɛ kwelɛ ghəa nci: «Ŋkwahema mə ma. Slate ɓəmə kwasheghediɗi. Wəndə nya kentave, pa kelehwe. Nahe wəshi nyi kemenete geva yitea yipə ghena nyi kerafete geva mbe Ghena ta Shala, ma ke: Nahe hɛ kenehehwe lekwesa ta ɗa, pa hɛ gehwe tɛagwarea ɗa le kwasheghediɗi.» Tsetse menete ka sewajɛ vəa ŋkwa shɛ.

²⁵Meslete meghekɛa Yɛsə dzeme vare sheghwə kwa zleŋkwa shɛ, hɛ le wəzha ta meghekɛa meghekɛ, le Mari male ta Keleyopas, le Mari wəzha ta ka Magdala.

²⁶Pa Yɛsə nakɛ meghekɛ, hɛ le kwete mcɛnyɛ nya ɗe ŋkɛ za ma hwa mbeli nyi ketəkwə təkwə. Ma ke sha meghekɛ: «Male, wa nya wəzege ta ŋa nya.»

²⁷Ma ke sha wəndə nya ketəkwə təkwəa shɛ: «Wa nya meyɛ ŋa nya.» Ghala se te vecia shɛ ne, pa wəndəa shɛ keleghe kalə sha ghɛa ŋkɛ.

²⁸Kwetere wəmbəa ŋkɛ ne, nahe Yɛsə keɗepe pɛtɛ ŋkɛ kekiɗimte slene ta ŋkɛ tsetsenya. Kezha menete geva wəshi nyi kerafete geva mbe Ghena ta Shala kaganda ne, ma ke: «Shewə 'ya va ndere.»

²⁹Tagha kwete jɛŋa viɗi tɛa rɛzɛŋe kwa ŋkɛara kwa. Pa hɛ selamahwe bəzə hwa tɛa shɛ, hwepakwe hɛ shɛ te geta ta wəfe nya heka mbeli kaizope, pa hɛ heyite nda yitea mɛa Yɛsə.

³⁰Kwa mɓisəakɛ tɛa shɛ Yɛsə, ma ke: «Nahe slene ta ɗa kekiɗi gɛ.» Pa ŋate ghə, mtiwə ŋkɛ.

³¹Ma kwa nza nde hendɛ veci kezhɛne mpi ta ka Zhəwif, kaɗe hɛ kanza mbeli kebaŋe baŋe te sheghwə te vecia shɛ we, va nya nza ŋkɛ kaveci kezhɛne mpi nya wəba hwa kweci veci kezhɛne mpi. Ntəŋə hɛ kalə ka'yɛwe va Pilate yitea ɓele seɗa ta mbeli nyi baŋete mbeli te sheghwə yitea kelakawa hɛ mbeli sawa te sheghwə nda tese veci kezhɛne mpi.

³²Pa ka sewajɛ se kaɓelemte seɗa yitea nde ghate, tsagha ŋa kwete, nyi baŋete mbeli yipə yipə le.

³³Kwa se hɛ yitea Yɛsə, newe ke hɛ ne, nahe ŋkɛ kemte. Vatse ɗema hɛ ɓele seɗa ta ŋkɛ.

³⁴Ama pa kwete sewajɛ mpahwemte slerepe ta Yɛsə le megha. Te ŋkwa shɛnyɛ, ŋkeɗe mimi le yɛmə same kwa.

³⁵Ma wəndə nya kegeze wəshia shɛhɛ ne, nahe ŋkɛ kenakɛ le ntsə ta ŋkɛ, negha fete nya kaganda yageze ŋkɛ. Nahe ŋkɛ keɗepe kaganda ghena ta ŋkɛ yitea yɛhwe yɛ ɓiyitsa, gheyɛ le ghəa ŋayɛ.

³⁶Pɛtɛ wəshi nyi kemenete geva yitea yipəyi geva wəshi nyi kerafate geva mbe Ghena ta Shala, ma ke: «Kese mbeli ɓele 'yɛ'yɛa ŋkɛ ya kwetɛŋe we.»

³⁷Ma ke kwete ghena mbe Ghena ta Shala ɓiyitsa: «Katenewe wəndə nya mpahwemte hɛ hɛ.»

³⁸Kwetere wəmbəa ŋkɛ, pa Zhozɛf nde Arimatɛ 'yɛwakɛ geva ta Yɛsə va Pilate. Zhozɛf ɓiyitsa ne, nde təkwə təkwə Yɛsə ŋkɛ, ama tewəfərə ŋkɛ va ghazlənə va ka Zhəwif. Pa Pilate pelave nda. Pa Zhozɛf kelete geva ta Yɛsə.

³⁹Nikodɛme, wəndə nya kese sha Yɛsə heviɗi vəashi, pa ŋkɛ se le 'wərdə ganyɛ ba'a kwete 'wərdə. Kakiləwə mahekenemsə nza 'wərdəa shɛ.

⁴⁰Pa hɛ kelete geva ta Yɛsə, pa hɛ fikɛ le 'wərdə, pa hɛ peɗame mbe zlave kala nya mene ka Zhəwif nda tela wəndə hɛ.

⁴¹Le kwete ntsa shɛ te ŋkwa nya baŋete Yɛsə mbeli te sheghwə kwa zleŋkwa. Kwa ntsa shɛ ne, le kwete kwele shɛ kamɛnɛfɛ. Kegha mbeli lamte wəndə kwa we.

⁴²Kwa nza ŋkɛ te hendɛ ta ŋkwa veci kezhɛne mpi ba'a va nya nza kwelea shɛ dekwede ne, pa hɛ veyi geva ta Yɛsə kwa.