Read KapsikiDC Zhaŋe 3 Bible Online

Zhaŋe 3 - KapsikiDC bible

Zhaŋe 3

¹Ma hwa ka Fariziyɛn ne, kwete wəndə nya nza sləa ŋkɛ kaNikodɛme ya shɛ. Nahe ŋkɛ kenza kawəndə nya te ghəa ka Zhəwif.

²Hwa'a ŋkɛ sha Yɛsə heviɗi, ma ke shɛ: «Rabi, nahe n'yɛ keɗepe Shala nde ghweneke ŋa kezha teke n'yɛ wəshi, kwa nza ŋkɛ wəndə shɛ kamenete wəshi meŋele kala nyi mene nyi na keɗema Shala le wəndəa shɛ we.»

³Ma ke Yɛsə shɛ: «Kaganda ne, ma 'ya sha gha: wəndə shɛ kanakɛ Meghea Shala keɗema ŋkɛ kezhɛne kayake geva we.»

⁴Ma ke Nikodɛme shɛ: «Tsema nza wəndə kazhɛne kayake geva kehale hale ŋkɛ wa? Wərə ŋkɛ kazhɛneyi geva kwa hwəa meghekɛ ba'a kazhɛne kakwa bake zhigə na?»

⁵Ma ke Yɛsə zhɛnete nda: «Kaganda ne, ma 'ya sha gha: Wəndə shɛ kadzembe Meghea Shala keyakema ŋkɛ le yɛmə ba'a Sefəa Shala we.

⁶Nahe wəndə nya keyake geva laka wəndə ŋelɛ kenza kawəndə ŋelɛ. Nahe wəndə nya keyake geva laka Sefəa Shala kenza kaŋa Sefəa Shala.

⁷Nzama na heɓake va nya gezete 'ya: Nda yɛ kazhɛne kayake geva, 'ya sha gha ma.

⁸Kavɛ sefə dzeyi te yayata ŋkwa nya ɗe ŋkɛ. Kafa kwaɗe ta ŋkɛ na, ama keɗepe ŋkwa nya se ŋkɛ te keɗema nya lə ŋkɛ te na we. Tsetse nza ta yayata wəndə nya keyake geva laka Sefəa Shala.»

⁹Ma ke Nikodɛme shɛ: «Tsema nza wəsə nya kamenete geva wa?»

¹⁰Ma ke Yɛsə shɛ: «Gha ya kande teke nda wəshi ke mbeli mbe Israyɛl, ama kaɗema na keɗepe wəsə shɛ na?

¹¹Kaganda ne, ma 'ya sha gha: wəshi nyi ɗepe n'yɛ yageze n'yɛ, wəshi nyi nakɛ n'yɛ le ntsə ta n'yɛ yanza n'yɛ kaka negha fete yitea hɛ. Ama gheyɛ ne, kese yɛ kayɛ negha fete ta n'yɛ we.

¹²Ma kwa gezete ŋayɛ ghena 'ya te wəshi nyi te hɛɗi ne, kayɛ yɛ we. Tsema nza yɛ kayɛte ghena nya geze ŋayɛ 'ya te wəshi nyi pelɛ ghweme wa?

¹³Wəndə shɛ kegha kadzeme ghweme we, nda Wəzege ta za nya kesawa pelɛ ghweme.

¹⁴Kala nya veyi shishi nya vɛsəte mbeli le mze kwa ghwə ghwə Moyize te sheghwə te ɓerama ne, tsagha teve geva Wəzege ta za mbeli te sheghwə,

¹⁵yitea kemave mpi nya kaghala ghala yayata wəndə nya keyɛte ŋkɛ laka gheŋkɛ.

¹⁶Kwa nza ŋkɛ kwele kwele ɗehwe hɛɗi lema Shala, nda ghweneke Wəzege kwetɛa ŋkɛ ŋkɛ, yitea ɗema yayata wəndə nya keyɛte ŋkɛ kaza, ama kezha kemave mpi nya kaghala ghala ŋkɛ.

¹⁷Keghweneke Wəzege ta ŋkɛ Shala kezha ve nda fete ke mbeli we, ama kezha mbele mbeli laka gheŋkɛ.

¹⁸Ma yayata wəndə nya keyɛte Wəzege ta Shala ne, kateve nda fete mbeli we. Ama wəndə nya keɗema keyɛte ŋkɛ ne, nahe fete kendeke geva, va nya ɗema ŋkɛ keyɛte Wəzege kwetɛa Shala.

¹⁹Wa nya tsetse teve nda geva fete ke mbeli: nahe waŋe kese kadzete hɛɗi, ama nahe mbeli nyi te hɛɗi keɗehwe ŋkwesle za ma ke waŋe, va nya mene wəshi nyi ndiremi ndiremi hɛ.

²⁰Yayata wəndə nya kemene wəshi nyi ndiremi ndiremi ne, waŋe yawəfəyite ŋkɛ. Kaɗe ŋkɛ kase kadzete waŋe, yagha slene ta ŋkɛ kancɛte geva we.

²¹Ma yayata wəndə nya kemene slene ganyɛ ne, kadzete waŋe ŋkɛ. Tsagha ne, kanewe wəshi nyi mene ŋkɛ mbeli dazhɛ dazhɛ, kanewe hawe ta ŋkɛ va Shala mbeli.»

²²Kwetere wəmbəa ŋkɛ, ntəŋə yɛ Yɛsə le mbeli nyi ketəkwə təkwə kadzawa hɛɗia Zhəwdɛ. Pa ŋkɛ hɛakɛ hɛ kwagha le hɛ, cape ŋkɛ kamene nda batɛme ke mbeli.

²³Batɛme yamene nda Zhaŋe ke mbeli, mbe Ɛnon, vare meleme ta ka Salim perə, va nya nza ŋkɛ kwele kwele yɛmə te ŋkwa shɛ. Kase mbeli shɛ yitea mene batɛme.

²⁴Kenaka Zhaŋe kadzawa daŋgayɛ te vecia shɛ we.

²⁵Ntake kweci ka təkwə təkwə Zhaŋe kaghəpə le kwete nde Zhəwif te ghəa nza wɛŋe kala nya gezete wəsə keshi.

²⁶Pa hɛ se sha Zhaŋe, ma ke hɛ sha Zhaŋe: «Rabi, mba wəndə nya neghate fete na te pelɛke te kema ta hələa Zhəwrdɛŋe yitea ghəa ŋa tse na? Yawa, wa nya ŋkɛ kamene batɛme, pɛtɛ mbeli kalə shɛ.»

²⁷Ma ke Zhaŋe sha hɛ: «Wəndə shɛ kakemave wəsə keɗema Shala kendeke nda we.

²⁸Ma gheyɛ le ghəa ŋayɛ ne, nahe yɛ kenza kaka negha fete, ma 'ya gezete: Ma 'ya ne, Kriste 'ya we. Ama nahe 'ya keghweneke geva mbe kema ta ŋkɛ.

²⁹Ma wəndə nya nza makwa kaŋa ŋkɛ ne, gheŋkɛ za makwa, ama mcɛnyɛa za makwa, terasle nza ŋkɛ yitea za makwa kafa wəshi nyi geze ŋkɛ. Zlama yazlama ŋkɛ kwa fa ghena ta za makwa ŋkɛ. Tsagha 'ya perə, viɗi zlama ta ɗa tsetsenya.

³⁰Nahe ŋkɛ kehi kakele, ama 'ya ne, shifə yashifə 'ya.

³¹Wəndə nya kesawa pelɛ ghweme ya te ghəa mbeli pɛtɛ. Nahe wəndə nya te hɛɗi kenza kaŋa hɛɗi, kala nza ta wəshi nyi te hɛɗi geze ghena ŋkɛ. Wəndə nya kesawa pelɛ ghweme ya te ghəa mbeli pɛtɛ.

³²Wəshi nyi nakɛ ŋkɛ ba'a nyi fave ŋkɛ yageze ŋkɛ, ama wəndə shɛ kayɛ negha fete ta ŋkɛ we.

³³Nahe yayata wəndə nya keyɛte negha fete ta ŋkɛ keɗepe kaganda yageze Shala.

³⁴Ghena ta Shala yageze wəndə nya ghweneke Shala, va nya viɗikɛ wənəa ŋkɛ Shala le Sefəa ŋkɛ.

³⁵Kaɗe Wəzege Yita, nahe ŋkɛ keveyi pɛtɛa wəshi mbe dzeve ta ŋkɛ.

³⁶Yayata wəndə nya keyɛte Wəzege ne, mpi nya kaghala ghala ya ve. Ama wəndə nya keyɛ nda ma fete ke Wəzege ne, kanakɛ mpi nya kaghala ghala ŋkɛ we, ama katenza hwepe wənəa Shala kənə.»