Read KapsikiDC Zhaŋe 4 Bible Online

Zhaŋe 4 - KapsikiDC bible

Zhaŋe 4

¹Pa ka Fariziyɛn fate kageze mbeli tsema tsema nza ka təkwə təkwə kwele kwele ma va Yɛsə ke Zhaŋe ba'a tsema tsema mene Batɛme ŋkɛ za ma ke Zhaŋe.

²Ndagwara Yɛsə le ghəa ŋkɛ nde mene nda batɛme ke mbeli we, ama ka təkwə təkwə ŋkɛ.

³Ma kwa fate ghena nya geze mbeli Yɛsə ne, cape ŋkɛ slə mbe Zhəwdɛ kezha zhɛne geva kadzawa Galilɛ.

⁴Ama nda ŋkɛ kajive mbe Samari.

⁵Hwa'a Yɛsə kwa Samari, mbe meleme nya heka mbeli kaSishar, takwa takwa melemea shɛ yitea wəve nya ndeke nda Zhakob ke wəzege ta ŋkɛ Zhozɛf.

⁶Tagha belageji nya late Zhakob. Ma kwa leɓe Yɛsə va dzeghwa ne, pa ntishɛ kazhɛne mpi mɛa belagejia shɛ. Nahe veci kenza talala kwa ghə.

⁷Hwa'a kwete male ta ka Samari kagə yɛmə. Ma ke Yɛsə shɛ: «Same ɗa yɛmə.»

⁸Nahe mbeli nyi ketəkwə təkwə Yɛsə kedzembe meleme kezha pa wəshi kezeme.

⁹Ma ke male ta ka Samaria shɛ sha Yɛsə: «Ashɛ nde Zhəwif na wəka? Tsema 'yɛwe yɛmə va 'ya, 'ya nya kawəzha ta ka Samari wa?» Kwa nza ŋkɛ ne, kantsəɓə ka Zhəwif le ka Samari we.

¹⁰Ma ke Yɛsə shɛ: «Ma ya sha nahe keɗepe wəsə nya ve nda Shala ke mbeli ba'a wəndə nya ke'yɛwe yɛmə va gha ne, nza gha le ghəa ŋa nde te'yɛwe yɛmə ve, kateve ŋa yɛməa mpi ŋkɛ.»

¹¹Ma ke malea shɛ shɛ: «Nde sleke ŋkwa, wəsə kegə yɛmə same kwa belageji va gha we. Lɛame belagejia shɛ ɓiyitsa, tema tese na le yɛməa mpi wa?

¹²Kwele ma na ke shia n'yɛ Zhakob nya kelate n'yɛ belageji nya na? Gheŋkɛ le ghəa ŋkɛ, ŋwalea ŋkɛ ba'a wəshi keseɗa ta ŋkɛ ne, same kwa belageji nya se hɛ kasa yɛmə.»

¹³Ma ke Yɛsə shɛ: «Ma yayata wəndə nya kesakɛ yɛmə same kwa belageji nya ne, katezhɛne ndere kazhɛ nda.

¹⁴Ma wəndə nya ketesa yɛmə nya teve nda 'ya ne, mba ndere katezhɛ nda kaghala ghala we. Katenza yɛmə nya teve nda 'ya mbe wənəa ŋkɛ kala ɗasle nya same mpi nya kaghala ghala kwa.»

¹⁵Ma ke malea shɛ shɛ: «Nde sleke ŋkwa, same ɗa yɛməa ŋa shɛ yitea ɗema ndere kazhɛ ɗa ba'a yitea ɗema 'ya kaleɓe ghəa ɗa kase kagə yɛmə teke.»

¹⁶Ma ke Yɛsə: «Kwiɗi hekakɛ za ŋa kase teke.»

¹⁷Ma ke zhɛnete: «Za va 'ya we.» Ma ke Yɛsə: «Kaganda geze na va nya gezete na kaɗema za gha.

¹⁸Va nya nza ŋkɛ mcɛfe wəmeve zhili na. Wəndə nya nza na yite tsetsenya, za ŋa ŋkɛ we. Kaganda ghena ta ŋa deŋwa.»

¹⁹Tagha gɛ, ma ke malea shɛ shɛ: «Nde sleke ŋkwa, ma zəzə 'ya ne, nde mɛ ŋkwa ta Shala na.

²⁰Pelɛ ghweme nya se ka shihɛ n'yɛ nyi kaka Samari kahawe va Shala, ma pe yɛ gheyɛ ka Zhəwif sha geze: Nda mbe Zhɛrəzalɛm hi mbeli kahawe va Shala.»

²¹Ma ke Yɛsə: «Yɛte ghena nya geze ŋa 'ya. Katese və nya ɗema yɛ tehawe va Yita ya pelɛ ghweme nya keɗema mbe Zhɛrəzalɛm.

²²Ma gheyɛ ka Samari ne, keɗepe wəsə nya hawe yɛ ve yɛ we. Ma ghen'yɛ ka Zhəwif ne, nahe n'yɛ keɗepe wəsə nya hawe n'yɛ ve. Kwa nza ŋkɛ shave mbe ka Zhəwif shave mbele.

²³Ama katese və, nahe vəa shɛ kese tsetsenya, nya tehawe mbeli ka hawe fate fate va Yita laka sefəa ŋkɛ ba'a kaganda. Nyi ya kaka hawe va Shala nyi sepa Yita.

²⁴Nahe Shala kenza kaSefə, vatse hi mbeli nyi kehawe ve kahawe ve laka Sefəa Shala ba'a kaganda.»

²⁵Ma ke malea shɛ: «Nahe 'ya keɗepe katese Mɛsi nya heka mbeli kaKriste. Ma vəa ŋkwa nya tese ŋkɛ ne, katencɛ ɓəmə pɛtɛa wəshi ŋkɛ.»

²⁶Ma ke Yɛsə shɛ: «'Ya nya kegeze ŋa ghena nya ya kaMɛsi.»

²⁷Ma vəa ŋkwa shɛ ne, pa mbeli nyi ketəkwə təkwə Yɛsə zhɛneke geva. Heheɓake hɛ va nya nakɛ ŋkɛ hɛ kageze ghena le male. Ama wəndə shɛ hwa hɛ nya kegeze: «Wa yasepa na ve wa?», keɗema: «Yitea wa mɛ na le ghenta wa?», ke hwa hɛ we.

²⁸Pa malea shɛ zlenekɛ ghwelepe ta nta tagha, ntəŋə nde kalə kadzembe meleme ta nci. Ma ke sha mbeli:

²⁹«Nde mə nakɛ mə kwete wəndə nya kegezete ɗa wəshi nyi se 'ya mene pɛtɛ. Mɛsi tenza ŋkɛ.»

³⁰Təkwəsəmə mbeli shave mbe meleme kalə kanewe Yɛsə.

³¹Kwa slənyɛ malea shɛ kadzembe meleme, ma ke mbeli nyi ketəkwə təkwə sha Yɛsə: «Rabi, zeme ɗafa gi!»

³²Ma ke Yɛsə sha hɛ: «Wəsə kezeme nya ɗepema yɛ ya va 'ya.»

³³Ma ke hɛ 'yɛwete kwelɛ ghəa nci: «Kwete wəndə keleke nda wəsə kezeme na?»

³⁴Ma ke Yɛsə sha hɛ: «Wəsə kezemea ɗa ne, mene kala nya ɗe wəndə nya keghweneke ɗa ba'a keɗaŋe slene nya gezete ɗa ŋkɛ.

³⁵Ashɛ tene tere wəfaɗe nda tsa ha mbeli pe yɛ sha geze wəka? Ma 'ya ne, ma 'ya sha gheyɛ: Newakɛ mə ŋkwa, kenakɛ ha yɛ keghwele ghwele va nya ɗe tsa ŋkɛ wəka?

³⁶Nahe wəndə nya ketsa ha kekemave zhɛme ta ŋkɛ, katsene ha ŋkɛ kezha mpi nya kaghala ghala. Tsagha gɛ, kazlama nde tsawete ha ba'a nde tsa ha kanya kwetɛŋe.

³⁷Kwa nza ŋkɛ ne, kaganda ghena ŋela nya, ma ke: Katsawe ha kwete wəndə, kamene kwete seyi te wəfe.

³⁸Nahe 'ya keghwenakɛ ŋayɛ katsa ha nya wəzakɛma yɛ, kweci mbeli ka sahwe yaka yitea wəza ta ŋkɛ, ama gheyɛ ka fa deme te slene ta nci.»

³⁹Kwele kwele mbeli nyi keyɛte Yɛsə hwa ka Samari, kwa nza ŋkɛ ma ke malea shɛ sha hɛ: «Nahe wəndə nya kegezete ɗa pɛtɛa wəshi nyi menete 'ya.»

⁴⁰Vatse gɛ, ma kwa se ka Samari sha Yɛsə ne, pa hɛ səkwəve ŋkɛ kanza le hɛ. Tagha gɛ, pa Yɛsə nzanyɛ le hɛ kahɛ bake.

⁴¹Kwele kwele mbeli nyi keyɛte ɓiyitsa kwa fate ghena ta ŋkɛ hɛ.

⁴²Ma ke hɛ sha malea shɛ: «Tsetsenya ne, keyɛte ŋkɛ ghen'yɛ deke te ghena nya gezete n'yɛ na we, ama nahe ghen'yɛ le ghəa n'yɛ kefate ghena ta ŋkɛ. Nahe ghen'yɛ keɗepe tsetsenya gheŋkɛ ya kaNde mbele mbeli nyi te hɛɗi lema.»

⁴³Kwetere wəmbəa hɛ bake ne, ntəŋə Yɛsə tagha kadzembe Galilɛ.

⁴⁴Ma ke Yɛsə le ghəa ŋkɛ gezete: «Kahawe mbeli va nde mɛ ŋkwa te hɛɗia ŋkɛ we.»

⁴⁵Ma kwa se ŋkɛ kadzembe Galilɛ ne, pa ka Galilɛ kemaneve ŋkɛ le zlama, va nya nakɛ wəshi meŋele nyi menete ŋkɛ pelɛ Zhɛrəzalɛm te vecia gəsəkə Pake hɛ. Nahe hɛ kese pelɛagha le ghəa nci yitea gəsəkəa shɛ.

⁴⁶Pa ŋkɛ zhɛneke geva kadzembe Kana, te hɛɗia Galilɛ, te ŋkwa nya zhɛrete yɛmə ŋkɛ katɛ. Te ŋkwa shɛ kwete wəndəa kwelea meghe, nya nza wəzege ta ŋkɛ shewə kwa Kapɛrnawəm.

⁴⁷Ma kwa fate ŋkɛ nahe Yɛsə keshave mbe Zhəwdɛ kadzembe Galilɛ ne, pa ŋkɛ lə kampi nda dzeve kezha dzawa Kapɛrnawəm ŋkɛ kambe wəzege ta ŋkɛ nya takwa takwa kamte.

⁴⁸Ma ke Yɛsə shɛ: «Ma gheyɛ, keɗema yɛ kenakɛ wəshi kencɛ wəshi ba'a wəshi meŋele ne, kateyɛ yɛ tɛape we.»

⁴⁹Ma ke wəndə kwelea shɛ shɛ: «Nde sleke ŋkwa, təhwə təhwə ŋa 'ya, nde nda temte wəzege ta ɗa.»

⁵⁰Ma ke Yɛsə shɛ: «Kwiɗi, nahe wəzege ta ŋa kenza teghweme.» Pa wəndəa shɛ yɛte ghena ta Yɛsə, cape ŋkɛ kwa ŋkwa.

⁵¹Ma mba ŋkɛ kwa ŋkwa kalə sha ghɛa ŋkɛ ne, begeme ŋkɛ le ka mavashia ŋkɛ, ma ke hɛ shɛ: «Nahe wəzege ta ŋa kenza teghweme.»

⁵²Ma ke sha hɛ: «Tsema və nda mbe ŋkɛ wa?» Ma ke hɛ shɛ: «Mbeɗa verazle veci ke ghə nda mbe.»

⁵³Nahe yita keɗepe te vəa shɛ gezete nda Yɛsə, ma ke shɛ: «Nahe wəzege ta ŋa kenza teghweme.» Tagha gɛ, pa le mbeli nyi ki ghɛa ŋkɛ yɛte Yɛsə.

⁵⁴Nya ya kakwa bake ta wəsə meŋele nya menete Yɛsə, kwa slə ŋkɛ mbe Zhəwdɛ kadzembe Galilɛ.