Read KapsikiDC Zhaŋe 9 Bible Online

Zhaŋe 9 - KapsikiDC bible

Zhaŋe 9

¹Ma kwa hweŋkwa ne, pa Yɛsə nakɛ kwete wəndə nya yake mbeli kaghwələ.

²Ma ke mbeli nyi ketəkwə təkwə sha Yɛsə: «Rabi, wa nde bezemte ghena nda yake wəndə nya mbeli kaghwələ tse wa? Mbeli nyi keyake na, na, wəndəa shɛ le ghəa ŋkɛ na?»

³Ma ke Yɛsə: «Va ghena nya bezemte mbeli nyi keyake ba'a va ŋa ŋkɛ we, ama yitea ncɛte geva slene nya ɗe Shala kamene mbe, nda yake geva ŋkɛ tsagha.

⁴Ma heveci ŋkwa ne, nda gheɓəmə kamene slene ganjia wəndə nya keghweneke ɗa. Viɗi nde tese, ashɛ mbeli menete slene heviɗi we.

⁵Ma mba ɗa 'ya te hɛɗi lema ne, 'ya ya kawaŋea hɛɗi lema.»

⁶Ma kwa gezemte ghena nya Yɛsə ne, pa ntifəyi ndɛghwɛɗɛ te hɛɗi, pa hwaɗete hɛɗia shɛ, ntsape ŋkɛ shɛ te ntsə va ghwələa shɛ.

⁷Ma ke shɛ: «Kwiɗi pɛkɛ ntsə ta ŋa kwa ghwa ta Silowɛ, geze ta ŋkɛ: Wəndə nya ghwenakɛ mbeli.» Ntəŋə wəndə nyagha kalə kapɛ kema, ma kwa se ŋkɛ, wɛŋe newe ŋkwa ŋkɛ.

⁸Ntake mbeli nyi te ghedəkwəa ŋkɛ le nyi kenakɛ kasəkwə wəshi ghala veci va mbeli ka'yɛwe, ma ke hɛ: «Take ne, ashɛ wəndə nya ya mɛa hweŋkwa kasəkwə wəshi ghala veci wəka?»

⁹Ma ke kweci: «Gheŋkɛ ŋkɛ.» Ma ke kweci: «Gheŋkɛ we.» Ma ke kweci: «Pa yayipə hɛ le.» Ma ke wəndə nyagha sha hɛ: «'Ya ŋkɛ kaganda.»

¹⁰Ma ke hɛ 'yɛwete ve: «Tsema se ŋkɛ nda pelemte geva ntsə ta ŋa gɛ wa?»

¹¹Ma ke wəndəa shɛ: «Wəndə nya heka nya mbeli kaYɛsə nde hwaɗete hɛɗi, pa hwehwekɛ ntsə ta ɗa le. Kwiɗi pɛkɛ ntsə ta ŋa kwa hələa Silowɛ, ke sha 'ya. Ntəŋə 'ya. Pɛkɛma ta ɗa kepɛ ne, ntake 'ya kanewe ŋkwa wɛŋe.»

¹²Ma ke hɛ shɛ: «Tema wəndəa shɛ tse wa, a ke hɛ shɛ. Keɗepe 'ya we.»

¹³Pa hɛ keleghe wəndə nya kese nya kaghwələ sha ka Fariziyɛn.

¹⁴Kwa nza ŋkɛ ne, te veci kezhɛne mpi hwaɗete hɛɗi Yɛsə ba'a kepelemte ntsə ta Ghwələ ŋkɛ.

¹⁵Ma ke ka Fariziyɛn le ŋa nci 'yɛwete va wəndəa shɛ: «Tsema menete geva ŋkɛ nda se na kanewe ŋkwa tsetsenya wa?» Ma ke zhɛnete nda ke hɛ: «Pa ŋkɛ menate ɗa rekɛ te ntsə, pa 'ya pɛkɛ pɛ, ŋkwa yanewe 'ya tsetsenya.»

¹⁶Ma ke kweci ka Fariziyɛn: «Ma wəndə nya ne, wəndəa Shala ŋkɛ we. Kwa nza ŋkɛ ne, kahawe ŋkɛ va veci kezhɛne mpi we.» Ma ke kweci kwa ŋa nci: «Tsema nza nde jaɗafa kamenete wəsə meŋele kala nya wa?» Pa hɛ neheve geva mbe.

¹⁷Ma ke ka Fariziyɛn sha wəndə nya kese kaghwələ: «Ma gha le ŋa ŋa ne, wa ghena nya geze na te wəndə nya keghwenemte ntsə ta ŋa wa?» Ma ke zhɛnete: «Nde mɛ ŋkwa ta Shala ŋkɛ.»

¹⁸Ama kaɗe ka Zhəwif kayɛ kaghwələ se wəndəa shɛ, nda newe ŋkwa ŋkɛ tsetsenya we. Vatse hekake mbeli nyi keyake ŋkɛ hɛ.

¹⁹Ma ke hɛ 'yɛwete va hɛ: «Kaganda nza wəndə nya kawəzege ta ŋayɛ nya geze yɛ keyake geva kaghwələ na? Wa nde menete geva nda se ŋkɛ kanewe ŋkwa tiɗiɗi tsetsenya wa?»

²⁰Ma ke mbelia shɛhɛ sha hɛ: «Ma wəsə nya ɗepe n'yɛ ne, wəzege ta n'yɛ ŋkɛ ba'a kaghwələ yake geva ŋkɛ.

²¹Ama keɗepe wəsə nya kemenete geva n'yɛ nda newe ŋkwa ŋkɛ tsetsenya ba'a wəndə nya kepelemte nda ntsə ta ŋkɛ ghen'yɛ we. 'Yɛwe mə ve gi! Nahe ŋkɛ kenza wəbake gare zhɛne ghena le ghəa ŋkɛ.»

²²Va ghazlənə va ka Zhəwif gezete mbeli nyi keyake ŋkɛ tsagha. Kwa nza ŋkɛ ne, nahe ka Zhəwif ketsahwe kwelɛ ghəa nci kezha ŋka yayata wəndə nya kegeze nahe Yɛsə kenza kaMɛsi shave mbe cɛ kesəkwə ghə.

²³Vatse gɛ, ma ke mbeli nyi keyake ŋkɛ: «Nahe ŋkɛ kenza wəbake kezha zhɛne ghena, 'yɛwe mə ve gi!»

²⁴Pa ka Fariziyɛn hekakɛ wəndə nya kese kaghwələ kakwa bake zhigə, ma ke hɛ shɛ: «Geze kaganda kwa kema ta Shala. Nahe n'yɛ keɗepe nde jaɗafa wəndəa shɛ.»

²⁵Ma ke zhɛnete: «Keɗepe 'ya kenza ŋkɛ kande jaɗafa we. Ama wəsə nya ɗepe 'ya ne, nahe 'ya kese kaghwələ, ama ŋkwa yanewe 'ya wɛŋe tsetsenya.»

²⁶Ma ke hɛ shɛ: «Wa wəsə nya menete ŋa ŋkɛ wa? Tsema ghwenemte ŋa ntsə ta ŋa ŋkɛ wa?»

²⁷Ma ke wəndəa shɛ zhɛnete: «Nahe 'ya kegezete ŋayɛ mshena, ama kese yɛ kafa ghena ta ɗa we. Kezha wa zhɛne yɛ ka'yɛwe va 'ya wa? Na, gheyɛ ɗe kazhɛre ka təkwə təkwə wəndəa shɛ na?»

²⁸Ma ke hɛ ŋelete ŋkɛ: «Gha ya kande təkwə təkwə wəndəa shɛ. Ma ghen'yɛ le ŋa n'yɛ ne, ka təkwə təkwə Moyize ghen'yɛ.

²⁹Nahe n'yɛ keɗepe nahe Shala kegezete nda ghena ke Moyize, ama gheŋkɛ ne, keɗepe ŋkwa nya se ŋkɛ te ghen'yɛ we.»

³⁰Ma ke wəndəa shɛ sha hɛ: «Wa nya wəsə nya nza 'ya heɓake ve nya: keɗepe ŋkwa nya se ŋkɛ te gheyɛ we, ama nahe ŋkɛ kepelemte ntsə ta ɗa.

³¹Nahe gheɓəmə keɗepe kaɗema Shala kafa ghena ta ka jaɗafa. Ama ghena ta wəndə nya dɛŋe dɛŋe te ba'a nya kemene ɗe ta ŋkɛ yafa ghena ta ŋkɛ ŋkɛ.

³²Ama kegha mbeli kafa nahe kwete wəndə kepelemte ntsə ta wəndə nya keyake geva kaghwələ we.

³³Ma ya kaɗema wəndəa shɛ kawəndəa Shala ne, nza wəsə shɛ katemene ŋkɛ we.»

³⁴Ma ke hɛ zhɛnete nda: «Ghala ya na ne, bətə na mbe jaɗafa, ama gha ɗe kateke n'yɛ wəsə na?» Tagha gɛ, pa hɛ ŋkakave ŋkɛ.

³⁵Ma kwa fate Yɛsə, na mbeli keŋkamte wəndəa shɛ, pa begeme le, ma ke shɛ: «Kayɛ Wəzege ta za na na?»

³⁶Ma ke wəndəa shɛ zhɛnete nda: «Nde sleke ɗa, wa wəndəa shɛ kezha yɛte 'ya wa?»

³⁷Ma ke Yɛsə shɛ: «Nahe na kenakɛ ŋkɛ, gheŋkɛ nde geze ŋa ghena tsetsenya.»

³⁸Ma ke wəndəa shɛ: «Kayɛ 'ya, Nde sleke ŋkwa.» Tagha gɛ, gwəɗəŋə ŋkɛ kwa kema ta ŋkɛ.

³⁹Ma ke Yɛsə: «Se ta ɗa hwa mbeli se kameha ghwə, yitea newe ŋkwa nyi kaghwələ, yitea ghwələpənji nyi kenewe ŋkwa.»

⁴⁰Kwa fave ghena nya kweci ka Fariziyɛn nyi tagha ne, ma ke hɛ shɛ: «Ka ghwələa kɛfi n'yɛ tse gɛ na?»

⁴¹Ma ke Yɛsə sha hɛ: «Ma nda kaka ghwələa kɛfi yɛ ne, nza jaɗafa va gheyɛ we. Kanewe ŋkwa n'yɛ pe yɛ, vatse nza yɛ kaka jaɗafa.»