Read KapsikiDC Slene 12 Bible Online

Slene 12 - KapsikiDC bible

Slene 12

¹Ma vəa ŋkwa shɛ, ntake meghe Hɛrode kaghweze mɛ hwa kweci mbeli nyi mbe Jikə ta ka Kriste.

²Pa ŋkɛ peslekɛ Zhake wəza meghekɛa Zhaŋe le kafayɛ.

³Ma kwa nakɛ ŋkɛ zeɗehwe nda ŋkɛ ke ka Zhəwif ne, pa keseve Piyɛre ɓiyitsa, vəa ŋkwa gəsəkəa pɛaŋe nya ɗema tenjɛne hwe.

⁴Ma kwa keseve Piyɛre Hɛrode kezha veyi kwa daŋgayɛ ne, wəfaɗe ŋkɛ nteyi wəvəsəa ka sewajɛ wəfaɗe wəfaɗe kezha ya ŋkɛ. Nahe ŋkɛ kezəzəte kameha ghwə te kwa kema ta ka Zhəwif kwetere wəmbəa gəsəkəa Pake.

⁵Kwa daŋgayɛ Piyɛre ne, kawənə mbeli nyi mbe Jikə ta ka Kriste va səkwə Shala kaŋa ŋkɛ we.

⁶Mbe ɗe Hɛrode kameha ghwə te Piyɛre kwa kema ta mbeli. Te viɗia shɛ, yitea hɛ Piyɛre kwelɛ tepe ta ka sewajɛ bake. Te hwepe ŋkɛ le zewe lɛ bake. Mɛa cɛ daŋgayɛ kweci ka sewajɛ kaya.

⁷Vəkə nde ghwene ta Shala ncake nca, pa waŋe menete geva mbe cɛa shɛ. Pa nde ghwene ta Shala shɛ kwaɗakɛ Piyɛre te slerepe, feɗeghete ŋkɛ, ma ke shɛ: «Sate ŋa kahe kahe.» Gwelaŋe zewe lɛ teɗenyɛ same kwa dzeve ta ŋkɛ.

⁸Ma ke nde ghwene ta Shala shɛ: «Hwepete hətə nya hwa hwəa ŋa ba'a seɗete tsahwa ta ŋa.» Tsagha shɛ Piyɛre menete. Ma ke nde ghwene ta Shala shɛ zhɛkwa: «Hwepete gwada ta ŋa ba'a zele ɗa.»

⁹Pa Piyɛre same kwa daŋgayɛ kwa sebe ta nde ghwene ta Shala. Kezəzəte ŋkɛ kaganda wəsə nya menete nde ghwene ta Shala we, kwete wəsə yanakɛ ŋkɛ laka kelɛŋə ke ghəa ŋkɛ.

¹⁰Pa hɛ zlakemte kwa ghate ta ŋkwa ka sewajɛ, tsagha kwa bake, hwa'a hɛ mɛa ghɛa ka daŋgayɛ nya gezlate wəsə keŋzle ta ŋkɛ mbeli le lɛ, dzeyi laka meleme mɛa ŋkɛ. Mɛa cɛa shɛ nde pelenyɛ le ghəa ŋkɛ kwa kema ta nci. Pa hɛ shave pelɛ te ŋwela, cape hɛ kwa hweŋkwa. Te ŋkwa shɛnyɛ ne, pa nde ghwene ta Shala slənyɛ yitea Piyɛre.

¹¹Ma kwa se mehele ta Piyɛre ne, ma ke: «Nda kaganda wəsə nya. Tsetsenya gɛ ne, nahe 'ya kefave Shala nde ghwenakɛ nde ghwene ta ŋkɛ, nahe ŋkɛ kembelete ɗa shave mbe dzeve ta Hɛrode ba'a va ghena nyi ndiremi ndiremi nyi ɗe ka Zhəwif kamene ɗa.»

¹²Ma kwa ɗepe ŋkwa nya nza ŋkɛ te ŋkɛ ne, cape ŋkɛ kalə sha ghɛa Mari, meghekɛa Zhaŋe nya heka mbeli kaMark. Kwele kwele mbeli nyi ketsenete geva kezha səkwə Shala kiagha.

¹³Ntake Piyɛre kaheka ŋkwa pelɛke kwa degha. Pa kwete kwete kwatera nya nza sləa nta kaRode hendeke geva kafa ghena wəndə nya keheka ŋkwa.

¹⁴Ma kwa fa nde kamɛa Piyɛre ŋkɛ ne, pa nde sərəakɛ pele degha, ntəŋə le hwɛ kadzeki ghɛ le zlama kageze nda ke mbeli Piyɛre ya pelɛ kwa degha.

¹⁵Ma ke hɛ shɛ: «Gezhi na yi!» Ma ke: «kaganda.» Tagha gɛ, ma ke hɛ: «Nde ghwene ta Shala ta ŋkɛ.»

¹⁶Mba Piyɛre mbe heka ŋkwa shanda. Ma kwa pelemte degha hɛ ne, pa hɛ nakɛ ŋkɛ. Heheɓake hɛ pɛtɛ.

¹⁷Pa ŋkɛ gezete nda ke hɛ kanza tikə tikə le dzeve ba'a ɓelate nda ke hɛ tsema tsema mbelete ŋkɛ Nde sleke ŋkwa same kwa daŋgayɛ. Ma ke zhɛkwa: «Geze nda mə ke Zhake ba'a kweci ka kesaka ma perə.» Pa ŋkɛ shavenyɛ kalə kadzete kwete ŋkwa.

¹⁸Ma kwa kiɗi ŋkwa, ghena nya wəba ya va ka sewajɛ, pa hɛ 'yɛwete wəsə nya kemenete le Piyɛre kwelɛ ghəa nci.

¹⁹Pa Hɛrode ghweneghe mbeli kazele ŋkɛ te yayata ŋkwa, ama kesləyi ŋkɛ hɛ we. Pa ŋkɛ 'yɛwete ghena va ka sewajɛ nyi kaya ŋkɛ, pa ŋkɛ gezete kezha mpə hɛ mbeli. Kwa sebe ta ŋkɛ, cape Hɛrode slə mbe Zhəwdɛ kadzawa Sɛzarɛ, pa ŋkɛ teməakɛ temə kwagha.

²⁰Kwele kwele wepenyɛ wənəa Hɛrode va ka Tir ba'a ka Sidon. Pa mbelia shɛhɛ tsahwe ghena kwelɛ ghəa nci kezha lə shɛ. Pa hɛ kesehwe mehele ta Blastəs, wəndə nya te ghəa wəshi nyi ki ghɛa meghe. Pa hɛ lə sha Hɛrode kezha tseɓa ghena ta nza kwelɛŋe le, kwa nza ŋkɛ se te hɛɗia Hɛrode se wəshi kezeme nyi te hɛɗia nci.

²¹Te veci nya tsahwe ghena ta nci hɛ, pa Hɛrode seɗete lekwesa meghe, ntishɛ ŋkɛ pelɛ pasla kazlape nda ghena ke mbeli.

²²Ma ke mbeli tsate lewela: «Wəndə nde geze nya ghena we, ama shala.»

²³Ama te ŋkwa shɛnyɛ ne, pa nde ghwene ta Shala mpave Hɛrode va nya ɗema ŋkɛ kevate zləvə te Shala. Pa menciɗi zehwe ŋkɛ, mtiwə ŋkɛ.

²⁴Nda pesle yapesle geva ghena ta Shala mbe kema mbe kema.

²⁵Ma kwa kiɗimte slene ta nci yɛ Barnabas le Sol mbe Zhɛrəzalɛm ne, pa hɛ zhɛnakawa geva ba'a kelakawa Zhaŋe nya heka mbeli kaMark yitea hɛ.