Read KapsikiDC Slene 13 Bible Online

Slene 13 - KapsikiDC bible

Slene 13

¹Mbe Jikə ta ka Kriste nya mbe Antiyoshe ne, ka mɛ ŋkwa ta Shala ba'a ka teke nda wəshi ke mbeli ya shɛ: Barnabas, Simon nya heka mbeli kande Ŋkereyi, Ləsiyəs nya kande Sirɛne, Manayɛn nya mandala Hɛrode nya kesleke Galilɛ ba'a Sol.

²Te kwete hɛ kwa tsenete geva hɛ kezha səkwə Nde sleke ŋkwa ba'a kezha mene səwəmayɛ ne, ma ke Sefəa Shala sha hɛ: «Veyi ɗa mə yɛ Barnabas le Sol tekeleke kezha slene nya hekakɛ hɛ 'ya yite.»

³Pa hɛ səkwəte ghə ba'a menete səwəmayɛ, pa hɛ dapaghe dzeve kənəa yɛ Barnabas le Sol ba'a sərəakɛ hɛ kaslə.

⁴Ma kwa ghwenakɛ hɛ Sefəa Shala ne, cape yɛ Barnabas le Sol kadzawa Sɛləsi. Ma kwagha ne, pa hɛ dzawa kwambelə kalə kadzembe meleme ta ka Shipre.

⁵Ma kwa ntsehe hɛ mbe Salamine, ntake hɛ kazlape nda ghena ta Shala ke mbeli mbe cɛ kesəkwə ghə ta ka Zhəwif. Zhaŋe Mark ya yitea hɛ kezha kemane hɛ.

⁶Pa hɛ jivenji mbe hɛɗia Shipre hwa'a mbe Pafos. Te hɛɗi shɛ ne, pa hɛ begeme le kwete nde mene ghwɛ nya nza sləa ŋkɛ kaBar-Yɛsə. Nde Zhəwif nya keveyi ghəa ŋkɛ kande mɛ ŋkwa ŋkɛ.

⁷Wəndə nya ki ghɛa ŋgwamna Sɛrzhiyəs Pawələs, wəndə nya kentsehwele ntsehwele ŋkɛ. Pa ŋkɛ hekakɛ yɛ Barnabas le Sol kezha fa ghena ta Shala.

⁸Ama Ɛlimas nde mene ghwɛ sləa Bar Yɛsə le ghena ta ka Grɛk. Pa ŋkɛ nde fɛake hɛ ba'a ɗe kaghwete ŋgwamna yitea ɗema ŋkɛ kayɛ ghena ta Yɛsə.

⁹Ma kwa viɗikɛ Sol nya heka mbeli kaPol Sefəa Shala ne, pa ŋkɛ vate ntsə te Ɛlimas.

¹⁰Ma ke shɛ: «Gha nya kentsehwele ntsehwele ba'a nya 'yaghwa mehele, wəzege ta gətəli ba'a nde ghema ta wəsə ganyɛ, katefɛa na yitea beze hweŋkwa nyi tiɗiɗia tiɗiɗia ta Nde sleke ŋkwa tse yi?

¹¹Ma tsetsenya gɛ, fate: kateve ɗa Nde sleke ŋkwa te gha, katenza na kaghwələ ba'a katezhɛne kanewe waŋea veci kavə ɓɛhwɛ we.» Te ŋkwa shɛnyɛ ne, təpəkə Ɛlimas kaghwələ, nahe ŋkɛ kenza mbe ŋkwesle. Ntake ŋkɛ kazhɛre geva kezha zele wəndə kekese ŋkɛ te dzeve.

¹²Ma kwa nakɛ wəsə nya kemenete geva ŋgwamna ne, pa ŋkɛ yɛhwe Yɛsə. Nahe ŋkɛ kenza heɓake va wəsə nya teke nda ka ghwene ta Yɛsə Kriste ke mbeli te Nde sleke ŋkwa.

¹³Pa yɛ Pol le mbeli nyi yite dzawa kwambelə kwa Pafos kadzawa Pɛrzhɛ te hɛɗia Pamfili. Te ŋkwa shɛ nehemte geva Zhaŋe Mark le hɛ, Pa ŋkɛ zhɛneghe geva kadzeme Zhɛrəzalɛm.

¹⁴Ghenci le ŋa nci ne, cape hɛ same kwa Pɛrzhɛ kadzawa Antiyoshe ta ka Pisidi. Ma te veci kezhɛne mpi ne, pa hɛ dzembe cɛ kesəkwə ghə, ntishɛ hɛ mbe.

¹⁵Ma kwa jaŋgate palepa ta wəshi mahalegə ba'a ŋa ka mɛ ŋkwa mbeli ne, ma ke mbeli nyi te ghəa cɛ kesəkwə ghə sha yɛ Pol le Barnabas: «Ka kesaka ma, ma kenza ghena va gheyɛ kezha mtsehe nda berete ke mbeli, geze mə tsetsenya.»

¹⁶Pa Pol sate te ŋkwa ba'a gweɗakwete hɛ le dzeve, ma ke: «Gheyɛ ka Israyɛl ba'a gheyɛ nyi kehawe va Shala, fa mə ghena ta ɗa!

¹⁷Nahe Shala ta hwelefe ta Israyɛl kentave ka shihɛ ɓəmə, nahe ŋkɛ keyate hɛ kwele kwele vəa ŋkwa nya nza hɛ kaka se se te hɛɗia Ɛzhipte, nahe ŋkɛ kefəakame hɛ same kwa Ɛzhipte le berete ta dzeve ta ŋkɛ.

¹⁸Nahe ŋkɛ kesəwəhwe ghena yitea hɛ kava gare wəfaɗemsə te ɓerama.

¹⁹Nahe ŋkɛ kezamte sebe te kweci hwelefefi mberefaŋe te hɛɗia Kanan ba'a kendeke nda hɛɗia nci ke mbelia ŋkɛ kaŋa nci.

²⁰Pɛtɛ ghena nyi kemenete geva kava gare gwəmsə wəfaɗe ba'a mcɛfemsə. Ma kwetere wəmbəa ŋkɛ, pa ŋkɛ ndeke nda mbeli ke hɛ, ka meha ghwə sləa nci, hwa'a te vəa Saməyɛl nde mɛ ŋkwa ta Shala.

²¹Ma kwa 'yɛwe meghe hɛ va Shala ne, pa ŋkɛ ndeke nda Sawəl, wəzege ta Kish, hwelefe ta Bɛnjamɛn ke hɛ, va wəfaɗemsə menete ŋkɛ mbe meghea shɛ.

²²Ma kwa kelemte Sawəl Shala, pa ŋkɛ veyi nda David kameghe ke hɛ. Ma ke gezete nda ghena te ghəa ŋkɛ: Nahe 'ya kesləyi David, wəzege ta Zhɛsɛ, wəndə nya nza wənəa ŋkɛ kala ŋa ɗa, nya ketemene wəshi nyi ɗe 'ya.

²³Hwa hwelefefia David se Yɛsə nya veyi Shala kande mbele ka Israyɛl, kala nya kemeɗeyi ŋkɛ.

²⁴Ma nda tese Yɛsə ne, nahe Zhaŋe kezlapete nda ghena ta batɛme kezhɛre wənə ke ka Israyɛl.

²⁵Ma te keɗaŋe ta slene ta Zhaŋe ne, ma ke gezete: Wa ŋkɛ 'ya pe sha zəzə wa? Kenza 'ya kawəndə nya neghe yɛ we. Ama fate mə: Katese ŋkɛ kwetere wəmbəa ɗa, kehi 'ya kanza kawəndə nya kepele zewe nyi mbe tsahwa ta ŋkɛ we.

²⁶Ka kesaka ma, gheyɛ hwelefe ta Abraham ba'a gheyɛ nyi kehawe va Shala ne, kezha gheɓəmə ghweneke geva ghena kembele ŋkwa nya.

²⁷Kefate ghena ta nza ta Yɛsə ka Zhɛrəzalɛm ba'a mbeli nyi te ghəa nci we. Kwa ndeke nda fete hɛ ne, nahe hɛ keyipəte ghena ta ka mɛ ŋkwa ta Shala nyi jaŋga mbeli keveci keveci te veci kezhɛne mpi.

²⁸Ya kwela shaŋe hɛ va fete kave nda ke Yɛsə ne, pa hɛ 'yɛwete va Pilate yitea pesle ŋkɛ.

²⁹Ma kwa sebe nya kiɗimte geva ghena nya kerafete mbe Ghena ta Shala te ghəa ŋkɛ ne, pa hɛ kelakawa te sheghwə ba'a lamte ŋkɛ kwa kwele.

³⁰Ama pa Shala kelakame ŋkɛ same kwa kwele le mpi.

³¹Kwele kwele zhigə ncɛte nda geva Yɛsə ke mbeli nyi kebegheke ŋkɛ same kwa Galilɛ kadzeme Zhɛrəzalɛm, ghenci ya kaka negha fete ta ŋkɛ tsetsenya kwa kema ta ka Israyɛl.

³²Ghen'yɛ le ghəa n'yɛ ne, Ghena kwatenca nya ganyɛa shɛ yakeleke ŋayɛ ghen'yɛ, ghena nya meɗeyi nda Shala ke ka shihɛ ɓəmə.

³³Nahe ŋkɛ kemenete tsetsenya kezha gheɓəmə, hwelefefia nci, kwa kelakame Yɛsə ŋkɛ same kwa kwele. Ma ke rafete geva mbe Cimə kwa bake: Gha ya kawəzege ta ɗa. Se te ɓəshi nya ne, 'ya ya kayiteyɛa ŋa.

³⁴Nahe Shala kegezete katekele ŋkɛ ŋkɛ same kwa kwele kezha ɗema geva ta ŋkɛ kadaɗə. Ma ke gezete vəashi: Katewəpi ŋayɛ 'ya kala nya meɗeyi nda 'ya ke David.

³⁵Ma ke gezete te kwete palepa ɓiyitsa: Katesərə wəndə nya dɛŋe dɛŋe te gha na kadaɗə kwa kwele we.

³⁶Ma kwa menete slene ta Shala David te vəa ŋkɛ ne, mtiwə ŋkɛ, pa mbeli lamte ŋkɛ yitea ka shihɛnyɛ, pa ŋkɛ daɗənyɛ.

³⁷Ama wəndə nya kelakame Shala same kwa kwele le mpi, kedaɗə geva ta ŋkɛ we.

³⁸Jara ɗepete kwete wəsə yɛ ka kesaka meyɛ ɗa: Te zlaɓa ta Yɛsə ne, kageze ŋayɛ mbeli ɓeshi nahe jaɗafa ta ŋayɛ kekelemte geva te wənə. Kembelemte ŋayɛ wəsə mahalegəa Moyize va jaɗafa ta ŋayɛ we,

³⁹ama nahe pɛtɛa mbeli nyi keyɛte Yɛsə kenza kembele mbele fate fate.

⁴⁰Ya mə ghəa ŋayɛ, kwa nza ŋkɛ ma ke ka mɛ ŋkwa ta Shala:

⁴¹Newe mə ŋkwa, gheyɛ ka ɓelama ŋkwa. Nza mə heɓake ba'a za ŋayɛ mə. Kwa nza ŋkɛ 'ya katemene slene nya ɗema kateyɛ kegezete ŋayɛ kwete wəndə te vəa ŋayɛ.»

⁴²Ma kwa shave yɛ Pol le Barnabas mbe cɛ kesəkwə ghə, pa mbeli 'yɛwete va hɛ kazhɛne geva kase te kwete veci kezhɛne mpi kezha geze ghena te ghena shɛ.

⁴³Ma kwa sebe ta tsene ne, pa ka Zhəwif kwele kwele ba'a mbeli nyi kezhɛrete ghəa nci kala ka Zhəwif beghakɛ yɛ Pol le Barnabas. Pa hɛ gezete ghena kwelɛ ghəa nci ba'a mtsehete nda berete ke hɛ kanza dɛŋe dɛŋe te zlaɓa ta Shala.

⁴⁴Ma kwa se kwete veci kezhɛne mpi ne, pa wəba ta mbeli nyi mbe melemea shɛ tseneke geva yitea fa ghena ta Nde sleke ŋkwa.

⁴⁵Ma kwa nakɛ ka Zhəwif kala nyagha ne, pa hɛ hwepete wənə kwele kwele. Ntake hɛ kazhɛne nda ghə ke Pol ba'a kaŋele ŋkɛ.

⁴⁶Tagha gɛ, ma ke yɛ Pol le Barnabas sha hɛ le hwepe ghə: «Ke gheyɛ ka Zhəwif hi mbeli kageze ghena ta Shala kaba. Ma va nya ɗema ŋkɛ yɛ ba'a nya veyi ghəa ŋayɛ yɛ kambeli nyi kehima kezha mpi nya kaghala ghala ne, yawa ghen'yɛ katelə tsetsenya sha mbeli nyi keɗema kaka Zhəwif.

⁴⁷Kwa nza ŋkɛ ma ke Nde sleke ŋkwa sha ghen'yɛ: Nahe 'ya keveyi ŋa kawaŋe kezha kweci hwelefefi, yitea kele ghena ta mbele na kalə hwa'a te mendɛkwe ta hɛɗi.»

⁴⁸Ma kwa fate ghena shɛ kweci hwelefefi ne, ntake hɛ kazlama ba'a kave zləvə te ghena ta Nde sleke ŋkwa. Pa pɛtɛa mbeli nyi keveyi geva yitea mpi nya kaghala ghala yɛhwe ghena ta Shala.

⁴⁹Kwele kwele pesleyi geva ghena ta Nde sleke ŋkwa te hɛɗia shɛ.

⁵⁰Pa ka Zhəwif lə kaŋwashɛ ŋwashɛte yɛ Pol le Barnabas va mi nyi jama jama nyi kesəkwə Shala le kweci mbelia jama mbe melemea shɛ. Pa hɛ ghwetete mbeli yitea ghweze mɛ hwa yɛ Pol le Barnabas, pa hɛ ŋkamte hɛ te hɛɗia nci.

⁵¹Pa yɛ Pol le Barnabas bekwemte keləwə nya te seɗa ta nci, ntəŋə hɛ kalə kadzembe Ikoniyəm.

⁵²Ma mbeli nyi ketəkwə təkwə Yɛsə nyi mbe Antiyoshe ne, viɗi wənəa nci va zlama nya ndeke nda Sefəa Shala ke hɛ.