Read KapsikiDC Slene 14 Bible Online

Slene 14 - KapsikiDC bible

Slene 14

¹Ma mbe Ikoniyəm ne, tsagha menete geva ŋkɛ, pa yɛ Pol le Barnabas dzembe cɛ kesəkwə ghə ta ka Zhəwif. Ma kwa gezemte nda ghena hɛ ke mbeli, kwele kwele ka Zhəwif ba'a ka Grɛk nyi keyɛhwe ghena ta Yɛsə.

²Ama nahe ka Zhəwif nyi keɗema kayɛ ghena ta Yɛsə keghwetete kweci hwelefefi yitea zlɛ hɛ va ka kesaka ma.

³Ya tsagha shɛ ŋkɛ ne, kwele kwele temə yɛ Pol le Barnabas mbe Ikoniyəm. Kageze ghena ta Shala hɛ le berete nya ndeke nda Nde sleke ŋkwa ke hɛ, nda ncɛ yancɛ nda Shala ke mbeli kaganda ghena nya geze hɛ te zlaɓa ta ŋkɛ, kwa ndeke nda berete ŋkɛ ke hɛ yitea mene wəshi kencɛ wəshi ba'a wəshi meŋele.

⁴Pa mbeli nyi mbe meleme neheve geva bake mbe, ghena ta ka Zhəwif yaɗe kweci, ŋa ka ghwene ta Yɛsə Kriste yaɗe kweci.

⁵Pa ka Zhəwif ba'a kweci hwelefefi tsahwe ghena le mbeli nyi te ghəa nci kezha sa nda yaka ke yɛ Pol le Barnabas, yitea jɛwə hɛ le pelɛ.

⁶Ma kwa ɗepete ghena shɛ yɛ Pol le Barnabas ne, pa hɛ hwɛnji kadzembe Listre ba'a Dɛrbe, meleme ta ka Likawon le kweci meleme dzeyi yite.

⁷Ntake hɛ kageze Ghena kwatenca nya ganyɛ te ŋkwa shɛ.

⁸Ma mbe Listre ne, kwete wəndə nya mentishɛ kashɛma slete ya shɛ, nahe ŋkɛ kenza kagweleba sawa kwa hwə, kegha ŋkɛ kadzeghwa we.

⁹Fa yafa ghena nya geze Pol ŋkɛ. Mteghere Pol vate ntsə te, newe ke ne, yɛ ya va wəndəa shɛ kezha mbe ŋkɛ.

¹⁰Tagha gɛ, ma ke shɛ le berete: «Sate ŋa, slete ŋa tiɗiɗi te seɗa ta ŋa.» Mpereke wəndəa shɛ ŋslete bale le seɗa ta ŋkɛ, cape ŋkɛ kadzeghwa.

¹¹Ma kwa nakɛ wəsə nya menete Pol hɛ ne, kɛake ka Likawon sha lewela le ghena ta nci, ma ke hɛ: «Wa nyi shala nyi kekelete pa ta wəndə ŋelɛ nyi. Nahe hɛ kesawa sha gheɓəmə.»

¹²Pa hɛ hekate nda slə ke Barnabas kaZəs[6] ba'a ke Pol kaHɛrmɛs[7], kwa nza ŋkɛ Pol ya kande geze ghena.

¹³Pa nde dzeghe nda melɛ ke Zəs nya nza ghɛa ŋkɛ mɛa meleme keleke mcɛmcɛli nyi nza yɛ ghwə ta wəfe dzeyi kwa welɛa nci kase kadzemɛa yɛ ŋkwa kedzembe ghɛa shala shɛ. Gheŋkɛ le mbeli ne, kaɗe ŋkɛ kadzeghe nda melɛ ke yɛ Barnabas le Pol.

¹⁴Ma kwa fate wəsəa shɛ ka ghwene ta Yɛsə Kriste nyi bake nyi ne, pa hɛ ŋkweŋkwahemte lekwesa ta nci ba'a neneghahwe geva hwa mbeli le lewela, ma ke hɛ:

¹⁵«Ka mcɛhɛ n'yɛ, yitea wa mene yɛ kala nya wa? Deke wəndə ŋelɛ ghen'yɛ kala gheyɛ. Ghena kwatenca nya ganyɛ yakeleke ŋayɛ ghen'yɛ kezha sərəakɛ kweci shala nyi gəmə yɛ. Zhɛre mə geva kase sha Shala nya teghweme, nya kepate ghweme, hɛɗi, ndərə ba'a wəshi nyi hɛ te pɛtɛ.

¹⁶Ma vəashi ne, nahe ŋkɛ kepelakɛ mbeli kazele wəshi nyi ɗe hɛ.

¹⁷Ndagwara ganyɛa slene ta ŋkɛ yancɛte nda ŋkɛ ke mbeli ghalanza, gheŋkɛ nde ve ŋayɛ va, gheŋkɛ nde mene ŋayɛ wəshi ndeɗekə te wəve, gheŋkɛ nde behe ŋayɛ le wəshi kezeme ba'a nde ve ŋayɛ zlama.»

¹⁸Ya kwela gezete hɛ kala nya ne, dzawe fɛake mbeli hɛ kedzeghe nda melɛ ke hɛ.

¹⁹Pɛkwe kweci ka Zhəwif se mbe Antiyoshe ta Pisidi ba'a Ikoniyəm. Pa hɛ ghwetete mbeli, ntake mbeli kabeza Pol le pelɛ yitea pesle ŋkɛ. Ma kwa ŋzleyi ŋkɛ hɛ ne, pa hɛ ntsehemte ŋkɛ shave mbe meleme ba'a neghakɛ ŋkɛ, laka zəzə kemte mte ŋkɛ.

²⁰Ama kwa tseneke geva ka təkwə təkwə Yɛsə kadzeghə ne, pelɛhetɛme ŋkɛ sate. Cape ŋkɛ kadzembe meleme zhɛkwa. Te hendɛ ta ŋkwa, ntəŋə ŋkɛ le Barnabas kadzembe Dɛrbe.

²¹Pa yɛ Pol le Barnabas gezete Ghena kwatenca nya ganyɛ mbe Dɛrbe, kwele kwele zhɛrete mbeli hɛ kaka təkwə təkwə Yɛsə. Pa hɛ zhɛrete geva kadzembe Listre, Ikoniyəm ba'a Antiyoshe ta Pisidi.

²²Pa hɛ mtsehete nda berete ke ka təkwə təkwə Yɛsə ba'a ntsəte nda berete ke hɛ kanza dɛŋe dɛŋe te Yɛsə. Ma ke hɛ sha hɛ: «Nza gheɓəmə kasahwe yaka kwele kwele keɗe gheɓəmə kadzembe Meghea Shala.»

²³Pa hɛ tsehave nda mbelia jama ke yayata Jikə ta ka Kriste. Ma kwa menete səwəmayɛ ba'a səkwə ghə hɛ ne, pa hɛ veyi hɛ mbe dzeve ta Nde sleke ŋkwa nya yɛte hɛ.

²⁴Ma kwa jivenji hɛ mbe hɛɗia Pisidi ne, pa hɛ ntsehe te hɛɗia Pamfili.

²⁵Pa hɛ gezete ghena ta Shala mbe Pɛrzhɛ, cape hɛ kadzembe Atali.

²⁶Se te ŋkwa shɛ ne, pa hɛ zhɛneke geva le kwambelə kadzembe Antiyoshe, meleme nya veyi hɛ mbeli mbe zlaɓa ta Shala kezha slene menete hɛ.

²⁷Ma kwa se hɛ kadzembe Antiyoshe ne, pa hɛ tsenete Jikə ta ka Kriste, pa hɛ gezete nda wəsə nya menete Shala le hɛ ke mbeli, halama pele nya pelemte nda ŋkwa Shala ke kweci hwelefefi kezha kemave yɛ hɛ kwa ŋa nci perə.

²⁸Pa hɛ temə kwele kwele tagha le mbeli nyi ketəkwə təkwə Yɛsə.