Read KapsikiDC Slene 17 Bible Online

Slene 17 - KapsikiDC bible

Slene 17

¹Ntəŋə hɛ kelete hweŋkwa laka Amfipolis ba'a Apoloni, hwa'a hɛ mbe Tɛsalonike nya nza cɛ kesəkwə ghə ta ka Zhəwif mbe.

²Kala nya mene Pol ghala veci ne, ntəŋə ŋkɛ kadzembe cɛ kesəkwə ghəa shɛ. Veci kezhɛne mpi mahekene menete ŋkɛ kageze nda ghena ta Ghena ta Shala ke mbeli nyi mbe,

³kancɛ nda ŋkɛ ke hɛ tsema tsema hi Mɛsi kasahwe yaka kala nya kerafete geva, kasame kwa kwele le mpi. Ma ke sha hɛ: «Ma Yɛsə nya geze ŋayɛ ghena ta ŋkɛ 'ya ne, gheŋkɛ Mɛsi.»

⁴Pa kweci mbelia nci yɛte ghena ta nci ba'a zlaɓete geva le yɛ Pol le Silas. Tsagha kweci mbeli kwele kwele hwa ka Grɛk nyi kehawe va Shala ba'a mi nyi jama jama nyi mbe meleme.

⁵Kazhɛ nda zlɛ kwele kwele ke ka Zhəwif, pa hɛ tsenete ka mefətekwəa kɛfi kwa hweŋkwa ba'a tazemte mehele ta mbeli nyi mbe meleme. Ntəŋə hɛ le hɛ kadzeki ghɛa Zhazon kasepa yɛ Pol le Silas kezha kele hɛ kalə sha tsene ta mbeli.

⁶Ma kwa kemavema hɛ hɛ ne, pa hɛ ntseheghe yɛ Zhazon le kweci ka kesaka ma kalə sha mbeli nyi kemeha ghwə, ma ke hɛ sha lewela: «Nahe mbeli nyi kebezemte hɛɗi lema, tsetsenya ne, nahe hɛ kentsehe teke.

⁷Nahe Zhazon kekemaneve hɛ ki ghɛa ŋkɛ. Keghə keghə ghena ta mbelia shɛhɛ le ŋa Sɛzar. Ma zəzə hɛ ne, kwete meghe nya nza sləa ŋkɛ kaYɛsə ya shɛ.»

⁸Pa ghena nya gezete nya hɛ tazemte nda mehele ke mbeli ba'a mbelia jama.

⁹Kwele kwele zamte cɛdɛ yɛ Zhazon le mbeli nyi nza hɛ le hɛ nda se mbeli kapelakɛ hɛ.

¹⁰Ma kwa se viɗi ne, pa ka kesaka ma begheghe Pol le Silas kadzembe Bɛrɛ. Ma kwa ntsehe hɛ mbe ne, ntəŋə hɛ kadzembe cɛ kesəkwə ghə ta ka Zhəwif.

¹¹Ndeɗe ma mehele ta mbelia shɛhɛ ke ŋa ka Zhəwif nyi mbe Tɛsalonike. Pa hɛ kelete Ghena kwatenca nya ganyɛ le zlama, keveci keveci jaŋga Ghena ta Shala hɛ kezha newe kenza ŋkɛ kaganda ghena nyi geze Pol.

¹²Kwele kwele mbelia nci nyi keyɛhwe Yɛsə. Ma hwa Grɛk ne, pa mi nyi nza zləvə te hɛ ba'a zhili kwele kwele yɛte ghena ta nci.

¹³Ama kwa fate ka Zhəwif nyi kwa Tɛsalonike kageze ghena ta Shala Pol mbe Bɛrɛ ne, pɛkwe hɛ yitea beze mehele ta mbeli nda mpa hɛ le Pol ɓiyitsa.

¹⁴Ma kwa nakɛ ghena shɛ ka kesaka ma, te ŋkwa shɛnyɛ begheghe Pol hɛ kadzemɛa ndərə, mba yɛ Silas le Timotɛ tagha kaba.

¹⁵Ma mbeli nyi kebegheghe Pol, hwa'a mbe Atɛne begheghe hɛ. Pa hɛ zhɛneke geva kadzawa Bɛrɛ le ghena ta Pol ke yɛ Silas le Timotɛ kezha se hɛ kabegeme le hɛ kahe kahe.

¹⁶Ma vəa nya neghe yɛ Silas le Timotɛ Pol mbe Atɛne ne, kwele kwele zhɛ nda wənəa ŋkɛ kwa nakɛ melemea shɛ ŋkɛ viɗi mbe kweci wəshi nyi zhɛrete mbeli kashala.

¹⁷Kaghəpə ŋkɛ le ka Zhəwif ba'a kweci hwelefefi nyi kehawe va Shala mbe cɛ kesəkwə, Dzeyi te ŋkwa shikwə ne, kaghəpə ŋkɛ mbeli nyi tagha.

¹⁸Kaghəpə ŋkɛ ɓiyitsa le kweci mbeli nyi keteke nda ghena ta Ɛpikəre[9] ba'a ŋa Stoyike[10] ke mbeli. Ma ke kweci mbelia nci: «Wa ke nde mɛ ke 'yɛ nya wa?» Ma ke kweci: «Kweci shala yageze ŋkɛ.» Ma nda geze hɛ tsagha ne, va nya nza Pol kageze ghena te Yɛsə ba'a ŋa same ta mbeli kwa kwele.

¹⁹Vatse hekakɛ Pol hɛ kalə kadzete Arɛyopazhe[11], ma ke hɛ sha hɛ: «Kapesle ghen'yɛ kaɗepe ghena kwatenca nya tekete nya na na?

²⁰Kwa nza ŋkɛ kweci ghena nyi ghama n'yɛ kafave yageze n'yɛ na. Kaɗe n'yɛ kaɗepe ghena nyi mbe hɛ.»

²¹Kwa nza ŋkɛ kakiɗi vəa nci ka Atɛne ba'a ka mtake nyi hwa hɛ kaɓela ba'a kafa ka keɗaŋe ta wəshi nyi kemenete geva.

²²Pa Pol sate meslete te tepe ta Arɛyopazhe. Ma ke: «Ka Atɛne, nahe 'ya kentsate tsema tsema nza yɛ fate fate kaka zele hweŋkwa ta shala.

²³Ma kwa dzeghwa 'ya mbe meleme ta ŋayɛ ne, nahe 'ya kenakɛ ŋkwa nyi ŋate nda yɛ ke yɛ shala, nahe 'ya kenakɛ kwete reghwetɛ kedzeghe melɛ, ma ke rafete geva te reghwetɛa shɛ: Ke kwete Shala nya ɗepema mbeli. Yawa, Shala nya hawea shɛ yɛ ve kaɗema yɛ keɗepe yase 'ya kezha ncɛ ŋayɛ.

²⁴Ma Shala nya kepate hɛɗi lema ba'a wəshi nyi te pɛtɛ ne, gheŋkɛ Shala nya kesleke hɛɗi ba'a ghweme pɛtɛ. Mbe cɛ nyi ŋate mbeli le dzeve ta nci nza ŋkɛ we.

²⁵Kaketekɛ ŋkɛ slene nyi mene dzeve ta wəndə ŋelɛ we, kwa nza ŋkɛ gheŋkɛ nde ve nda mpi ke yayata wəndə, sefə nya hwə ba'a wəshi nyi ketene.

²⁶Se te wəndə kwetɛŋe ne, nahe ŋkɛ kepate mbeli pɛtɛ ba'a keveyi hɛ te hɛɗi lema. Nahe ŋkɛ nahe ŋkɛ keveyi vəa yɛ vɛa ba'a yɛ ghele kaŋa nci, tsagha ghala ta hɛɗi nyi nza hɛ te hɛ.

²⁷Kezha zele Shala hɛ nda menete ŋkɛ tsagha, nda kwete kantsate hɛ kaɓe kaɓe. Ndagwara kenza Shala cakeɗake le yayata wəndəa ɓəmə we.

²⁸Kwa nza ŋkɛ: Mbe nza mpia ɓəmə, le yɛ dzeghwa ta ɓəmə ba'a yɛ nza ta ɓəmə teghweme. Kwa nza ŋkɛ ma ke kweci mbeli hwa gheyɛ kwa cimə: Hwelefe ta ŋkɛ gheɓəmə kaganda.

²⁹Ma kwa nza ŋkɛ hwelefe ta ŋkɛ gheɓəmə ne, kehi kazəzə gheɓəmə nahe Shala kenza kala wəsə nya menete mbeli le mze kwa tere tere, mze kwa tɛawetɛa keɗema pelɛ, wəshi nyi zəzəte keɗema nyi ncake mbeli we. Mbeli ka menete hɛ va nya ɗepema Shala hɛ.

³⁰Ama mba Shala kaɓela və nya nza mbeli kaka ɗepema wəshi we. Ma tsetsenya ne, mbeli yaheka ŋkɛ se te yayata ŋkwa kazhɛre nza ta nci.

³¹Kwa nya nza ŋkɛ nahe ŋkɛ kezəzəte kwete veci kwetɛŋe nya temeha ghwə ŋkɛ te mbeli laka nza tiɗiɗi, laka wəndə nya ntave ŋkɛ kezha gheŋkɛ. Nahe ŋkɛ kencɛte nda ke mbeli pɛtɛ laka kele nza wəndəa shɛ same kwa kwele le mpi.»

³²Ma kwa fave ghena ta same ta wəndə kwa kwele hɛ ne, pa kweci mbeli ŋ'wəshikɛ Pol, ma ke kweci: «Te kwete hɛ tegeze n'yɛ ghena shɛ na zhɛkwa.»

³³Tagha gɛ, ntəŋə Pol slənyɛ yitea hɛ.

³⁴Ndagwara nahe kweci mbeli kedzeyitenji yitea Pol hwa hɛ ba'a keyɛte Yɛsə. Hwa hɛ ne, Denis, nde Arɛyopazhe, kwete male nya nza sləa nta kaDamaris ba'a kweci mbeli ɓiyitsa.