Read KapsikiDC Slene 6 Bible Online

Slene 6 - KapsikiDC bible

Slene 6

¹Ma vəa ŋkwa shɛ ne, kambake geva ka təkwə təkwə Yɛsə. Nahe ghena kedzawa kwelɛ ka Zhəwif nyi kegeze ghena ta ka Grɛk le ka Zhəwif nyi te hɛɗi. Kaŋgaɗe ghə mbeli nyi kegeze ghena ta ka Grɛk, ma ke hɛ: «Dewə kemane ka wedidia n'yɛ mbeli.»

²Pa ka təkwə təkwə Yɛsə nyi meŋe bakeghəmbe tsenete pɛtɛa mbeli nyi kezele ghena ta Yɛsə. Ma ke hɛ: «Kehite geva ŋkɛ sha ghen'yɛ kasərə geze nda ghena ta Shala ke mbeli kezha slene ta wəshi kezeme we.

³Ka kesaka ma, jara ma tsehave mbeli nyi hawe mbeli va hɛ, nyi viɗikɛ hɛ Sefəa Shala, nyi nza ntsehwele va hɛ mberefaŋe hwa gheyɛ. Kateve nda n'yɛ kaka nehe wəshi kezeme.

⁴Ma ghen'yɛ le ŋa n'yɛ ne, səkwə ghə ŋa n'yɛ slene ba'a zlape nda ghena ta Shala ke mbeli.»

⁵Pa tsene ta mbeli yɛte ghena shɛ. Pa hɛ ntave Ɛtiyɛne, wəndə nya keyɛhwe Shala kwele kwele ba'a nza Sefəa Shala viɗi mbe, Filipe, Prokore, Nikanor, Timon, Parmɛnas, Nikolas, nde Antiyoshe nya kezhɛrenyɛ kala ka Zhəwif vəashi.

⁶Pa hɛ ghereŋeyi hɛ kwa kema ta ka ghwene ta Yɛsə Kriste. Pa hɛ səkwəte ghə ba'a dapaghe dzeve kənəa hɛ.

⁷Nahe ghena ta Shala kemtsehete geva kalə mbe kema mbe kema. Kwele kwele ka təkwə təkwə Yɛsə mbakete geva mbe Zhɛrəzalɛm. Kwele kwele ka dzeghe Shala nyi keyɛhwe.

⁸Nahe Shala kendeke nda berete ta ŋkɛ ba'a ɗe ta ŋkɛ ke Ɛtiyɛne. Tagha gɛ, ntake ŋkɛ kamene wəshi meŋele nyi kwele kwele ba'a wəshi kencɛ wəshi hwa mbeli.

⁹Pa kweci mbeli ɗema ghena ta Ɛtiyɛne, mbeli nyi kambeli nyi ketsene geva mbe cɛ kesəkwə ghə nya heka mbeli kacɛ kesəkwə ghə ta mbeli nyi waɗe, nyi kaka Zhəwif nyi mbe Sirɛne ba'a Alɛgezandri, ma kweci, kaka Zhəwif nyi mbe Silisi ba'a Azi. Ntake hɛ kaghəpə le Ɛtiyɛne.

¹⁰Ama kaghereŋe hɛ kwa kema ta ŋkɛ we, kwa nza ŋkɛ le ntsehwele nya ndeke nda Sefəa Shala geze ghena ŋkɛ.

¹¹Tagha gɛ, pa hɛ ndeke nda cɛdɛ ke kweci mbeli kezha geze hɛ: «Nahe n'yɛ kefa nda ŋelekɛ Moyize ŋkɛ ba'a Shala», a ke hɛ.

¹²Tsagha heɗete mbeli, mbelia jama ba'a ka rafe wəsə mahalegə hɛ. Dacɛ hɛ keseve Ɛtiyɛne, ntəŋə hɛ le kalə sha mbeli nyi te ghəa hɛɗia ka Zhəwif.

¹³Te ŋkwa shɛnyɛ, pa hɛ hekakɛ kweci mbeli nyi keve nda fete gəmə, ma ke hɛ: «Ma wəndə nya ne, keveci keveci ghena nya ndiremi ŋkɛ te ghɛa Shala nya keveyi geva kaŋa Shala ba'a wəsə mahalegəa Shala ŋkɛ.

¹⁴Nahe n'yɛ kefave nya geze ŋkɛ kateŋzla ghɛa Shala ta ɓəmə Yɛsə nde Nazarɛt ba'a katezhɛre wəshi keshi nyi kese va Moyize ŋkɛ.»

¹⁵Kavereghe Ɛtiyɛne pɛtɛa mbeli nyi mbe cɛa shɛ. Pa hɛ nakɛ kema ta ŋkɛ kala ŋa nde ghwene ta Shala.