Read KapsikiDC Ka Rome 14 Bible Online

Ka Rome 14 - KapsikiDC bible

Ka Rome 14

¹Kemaneve mə nde dewə berete mbe yɛ, kaɗema kayiɗə wəshi nyi mene ŋkɛ.

²Ya kwete nahe yɛ ta ŋkɛ kendeke nda hweŋkwa kezeme yayata wəsə ke kwete wəndə, ama kwete ne, deke nɗeli sleke yazeme ŋkɛ, va nya nza yɛ dewə ve.

³Mba wəndə nya kezeme yayata wəsə keŋele wəndə nya keɗema zeme kweci wəshi. Mba wəndə nya keɗema kazeme kweci wəshi keyiɗə wəndə nya kezeme pɛtɛa wəshi, kwa nza ŋkɛ nahe Shala kekemaneve wəndəa shɛ perə.

⁴Wa ŋkɛ na nda meha ghwə te mava ta kwete wəndə wa? Ya gheŋkɛ nza meslete keɗema teɗe ne, ŋa ŋa kwete hwe we. Ama katenza ŋkɛ bereteke, kwa nza ŋkɛ berete ya va Nde sleke ŋkwa kezha kemane wəndəa shɛ.

⁵Ma ke kwete wəndə ne, nahe kweci veci kenza za ma ke kweci. Ma sha kwete ne, yipə yipə hɛ pɛtɛa nci. Nza yayata wəndə dɛŋe dɛŋe te ghena nya zəzə ŋkɛ.

⁶Ma wəndə nya keve zləvə te kweci veci za ma ke kweci ne, kezha tsahe Nde sleke ŋkwa mene ŋkɛ. Ma wəndə nya kezeme yayata wəsə ne, Nde sleke ŋkwa yatsahe ŋkɛ, kwa nza ŋkɛ katsa nda ŋ'wese ŋkɛ ke Shala yitea wəshi nyi zeme ŋkɛ. Ma wəndə nya keɗema kazeme pɛtɛa wəshi ne, yitea tsahe Nde sleke ŋkwa nda mene ŋkɛ tsagha, ŋ'wese yatsa nda ŋkɛ ke Shala perə.

⁷Kwa nza ŋkɛ ne, wəndə shɛ hwa gheɓəmə kanza teghweme keɗema kamte kezha ghəa ŋkɛ we.

⁸Ma kenza gheɓəmə teghweme ne, kezha Nde sleke ŋkwa nza gheɓəmə. Ma kemte gheɓəmə, kezha Nde sleke ŋkwa mte gheɓəmə. Ya teghweme keɗema kemte mte gheɓəmə ne, ŋa Nde sleke ŋkwa gheɓəmə.

⁹Nahe Yɛsə kemte ba'a kesame kwa kwele kezha nza ŋkɛ kaNde sleke mbelia kwahɛɗi ba'a mbeli nyi teghweme.

¹⁰Ama gha gɛ ne, va wa ve nda fete na ke wəza meyɛ ŋa wa? Gha ɓiyitsa, va wa yiɗə wəza meyɛ ŋa na wa? Kwa nza ŋkɛ pɛtɛa ɓəmə katedzawa kema ta Shala kezha meha ghwə ŋkɛ te gheɓəmə.

¹¹Kwa nza ŋkɛ ma ke rafete geva: «Ma 'ya, 'ya Mahwətə nya teghweme: kategwəɗəŋə pɛtɛa mbeli kwa kema ta ɗa, katetsahe ɗa pɛtɛa mbeli.»

¹²Tsagha gɛ ne, kateɓela wəshi nyi menete ŋkɛ yayata wəndəa ɓəmə le ghəa ŋkɛ ke Shala.

¹³Ma tsetse ŋkɛ ne, mba mə kemeha ghwə te ghəa ɓəmə. Ama wa nya wəsə nya hi yɛ kazəzə nya: mba yɛ kemene wəsə nya kenza kala pelɛ nya ketsa wəza meghekɛ katehene kezha teɗe ŋkɛ kadzembe fete.

¹⁴Nahe 'ya keɗepe tiɗiɗi kala nya ncɛte ɗa Nde sleke ŋkwa Yɛsə, kaɗema wəsə nya wale wale shɛ. Ma kenza wəndə kazəzə nahe wəsə kenza wale wale wəsə ne, kawəsə nya wale wale nza wəsəa shɛ shɛ.

¹⁵Ma kebezemte nda wənəa wəza meyɛ ŋa na le wəsə nya zeme na ne, kazele ghena ta ɗe na tsagha we. Mba na kezamte wəndə tewəmbəreke wəsə kezeme nya zeme na, kwa nza ŋkɛ nahe Kriste kemte kezha wəndəa shɛ.

¹⁶Mba yɛ kezhɛre wəsə ganyɛ nya mene yɛ kawəsə kwa ndiremi sha mbeli.

¹⁷Kwa nza ŋkɛ ma Meghea Shala ne, ghena ta wəshi kezeme ba'a wəshi kesa ŋkɛ we. Ama kaghena ta nza tiɗiɗi, kwelɛŋe ba'a zlama nya kese va Sefəa Shala.

¹⁸Ma wəndə nya kemene nda slene ke Kriste le mehele nya kala nya, ganyɛke ŋkɛ sha Shala, wəndə ganyɛ ŋkɛ sha mbeli perə.

¹⁹Nda tsetse ŋkɛ ne, zele ɓəmə wəsə nya keve nda kwelɛŋe ke mbeli ba'a nya kekele ɓəmə jive te kema mbe yɛ.

²⁰Mba na kebezemte slene ta Shala deke kezha ghena ta wəsə kezeme. Kaganda shɛ, ganyɛke zeme wəshi pɛtɛ. Ama ndiremike ŋkɛ kenza nde kaghwete wəza meyɛ ŋa yitea mene jaɗafa.

²¹Ma wəsə nya ganyɛ ne, mba na kezeme sli, mba na kesa tɛ le kwete wəsə nya keteghwete wəza meyɛ ŋa yitea mene jaɗafa.

²²Ma ghena nyi zəzə na te ghena nya ne, nza ŋkɛ kwa wənəa ŋa kwa kema ta Shala. Zlama ya va wəndə nya keɗema kave nda fete ke ghəa ŋkɛ mbe wəsə nya mene ŋkɛ.

²³Ma wəndə nya nza ghəa ŋkɛ bake bake yitea zeme wəsə nya wale wale, nda zehwe ŋkɛ ne, nahe ŋkɛ kekelete fete kwa kema ta Shala, kwa nza ŋkɛ keghereŋe ŋkɛ te yɛ we. Ma wəsə nya ɗema wəndə kemenete laka yɛ ne, jaɗafa yamene ŋkɛ.