Read KapsikiDC Ka Rome 2 Bible Online

Ka Rome 2 - KapsikiDC bible

Ka Rome 2

¹Ma gha nya keve nda fete ke kweci mbeli ne, katenza na kaɗema ghena va gha. Kwa nza ŋkɛ ma kwa ndeke nda fete na ke kweci mbeli ba'a kwa mene na kala hɛ ne, nahe fete kekeseve ŋa perə.

²Nahe gheɓəmə keɗepe kameha ghwə Shala le kaganda te yayata wəndə nya kemene wəshi nyi kala nyi.

³Ma zəzə na ne, pələsə tenza na va ghwə ta Shala, gha nya keve nda fete ke mbeli nyi kemene jaɗafa ba'a nya kemene kala hɛ na?

⁴Na, gha ɓelama ganyɛ nya wəba ta Shala, zereghe ghena ta ŋkɛ ba'a ndeɗe mehele ta ŋkɛ na? Keɗepe na nda ganyɛa Shala kakeleke ŋa kezha zhɛre nza ta ŋa wəka?

⁵Ama ntɛaŋe ntɛaŋe ghəa ŋa, kaɗe na kazhɛre nza ta ŋa we. Vatse mtsehe nda yaka nya wəba na ke ghəa ŋa te veci nya tenca geva hwepe wənəa Shala. Ma te vecia shɛ ne, katemeha ghwə Shala tiɗiɗi te mbeli

⁶ba'a kateŋki nda zhɛme ŋkɛ ke mbeli kala slene nyi menete hɛ.

⁷Kateve nda mpi nya kaghala ghala ŋkɛ ke mbeli nyi kehwepete ghə kamene ganyɛ ba'a kazele zləvə, kwele ba'a mpi nya keɗema kamte.

⁸Ama katehwepe wənə Shala kwele kwele va mbeli nyi kezhɛne nda ghə, nyi keɗema kaganda ba'a nyi kepelave nda ghəa nci ke wəsə kwa ndiremi.

⁹Katenza yaka ba'a yirə te mbeli nyi kemene wəsə kwa ndiremi, kezha ka Zhəwif kaba ba'a kezha kweci hwelefefi.

¹⁰Ama kateve nda zləvə, kwele ba'a kwelɛŋe Shala ke yayata wəndə nya kemene ganyɛ, ke ka Zhəwif kaba, zhɛne, ke kweci hwelefefi.

¹¹Kwa nza ŋkɛ kanta ghala Shala kwelɛ mbeli we.

¹²Ma pɛtɛa mbeli nyi kemenete jaɗafa kaɗema hɛ keɗepe wəsə mahalegəa Moyize ne, katempə hɛ kaɗema keɗepe wəsə mahalegə. Ama pɛtɛa mbeli nyi keɗepe wəsə mahalegəa Shala nda menete jaɗafa hɛ ne, wəsə mahalegə nde temeha ghwə te hɛ.

¹³Kwa nza ŋkɛ deke mbeli nyi kefate nda ŋa wəsə mahalegə ya kawəndə nya tiɗiɗi kwa kema ta Shala we, ama mbeli nyi kemene slene le wəsə mahalegəa shɛ.

¹⁴Ma kweci hwelefefi nyi keɗepema wəsə mahalegəa Shala nda menete slene hɛ le ghəa nci le ne, kala wəsə nya nza wəsə mahalegəa shɛ mbe hɛ, ya kwela ɗepema ŋkɛ hɛ.

¹⁵Ncɛ yancɛ hɛ tsagha tsema tsema rafete geva wəsə nya ɗe wəsə mahalegə mɛa wənəa nci. Gheŋkɛ yancɛ mehele ta nci, tsagha zəzə ta nci nyi keve nda fete ke hɛ te kwete hɛ ba'a kaya hɛ te kwete hɛ.

¹⁶Nya ya kawəsə nya ketenca geva vəa ŋkwa nya temeha ghwə Shala laka Yɛsə Kriste te wəshi nyi wəfərəakɛ mbeli, kala nya gezete Ghena kwatenca nya ganyɛ.

¹⁷Ama gha nya keveyi ghəa ŋa kande Zhəwif ne, na na kedɛŋate geva te wəsə mahalegəa Shala ba'a kenza fare fare te Shala ta ŋa.

¹⁸Nahe na keɗepe ɗe ta Shala, nahe wəsə mahalegəa Shala ketekete ŋa kanta wəsə ganyɛ.

¹⁹Nahe na keveyi ghəa ŋa kande ncɛ nda hweŋkwa ke ka ghwələa kɛfi, kawaŋe kezha mbeli nyi mbe ŋkwesle,

²⁰kande teke nda wəshi ke ka dewə ntsehwele ba'a kande sleke ŋwale, va nya veyi ghə na te kemave ɗepe wəsə ganyɛ ba'a kaganda mbe wəsə mahalegə.

²¹Yawa, ma gha nya kande teke nda wəshi ke mbeli ne, va wa ɗema na tekave nda ke ghəa ŋa wa? Kazlape na kezha ɗema mbeli kaghərə, ama kaghərə na.

²²Kafɛa ŋkwa na kevale tahe, ama kavale na tahe. Kaɗema kweci shala na, ama kazhɛre dzeve na le wəshi nyi mbe yɛ ghɛa yɛ shala shɛhɛ.

²³Kanza na fare fare te wəsə mahalegə, ama kakele zləvə na te Shala laka hawema va wəsə mahalegə.

²⁴Kwa nza ŋkɛ, ma ke Ghena ta Shala gezete: «Tewəmbəreke gheyɛ ne, kaŋele Shala kweci hwelefefi.»

²⁵Ma kenza nde kafa wəsə mahalegəa Shala na ne, kateke ŋa slamte mɓɛta ta ŋa, ama keɗema na kahawe va wəsə mahalegə ne, kala wəsə nya slamtema mɓɛta na.

²⁶Ma wəndə nya keslamtema mɓɛta nya kehawe va wəsə mahalegə ne, kaɗema kateve ŋkɛ kala wəndə nya keslamte mɓɛta na?

²⁷Ma wəndə nya keslamtema mɓɛta, nda hawete nda hawe ŋkɛ ke wəsə mahalegə ne, katemeha ghwə ŋkɛ te gha, gha nya kehawema va wəsə mahalegə, ya kwela nza palepa ta wəsə mahalegə va gha ba'a ya kwela slamte mɓɛta na.

²⁸Kaganda ne, kenza nde Zhəwif nya kaganda kawəndə nya newe mbeli te ŋwela ba'a kawəndə nya keslamte mɓɛta nahe we.

²⁹Ama nahe nde Zhəwif nya kaganda kenza kande Zhəwif nya mbe mbe, nya keslamte mɓɛta kwa wənə. Nahe sla ta mɓɛta shɛ kese va Sefəa Shala ba'a laka wəsə mahalegə nya kerafetema geva. Deke mbeli ka tsahe wəndəa shɛ we, ama Shala.