Read KapsikiDC Ka Rome 9 Bible Online

Ka Rome 9 - KapsikiDC bible

Ka Rome 9

¹Kaganda yageze 'ya kwa nza 'ya mbe Kriste, kasla tseŋwə 'ya we, kanegha fete mehele ta ɗa laka Sefəa Shala kaganda yageze 'ya.

²Kewəba bezenyɛ ba'a zhɛ ɗa wənəa ɗa, kashɛ ŋkɛ gweɗakwe we.

³Jara bezlakɛ ɗa Shala ba'a nehemte geva 'ya le Kriste kezha ka kesaka meyɛ ɗa nyi yake geva 'ya hwa hɛ.

⁴Ghenci ya kaka Israyɛl. Nahe Shala kezhɛrete hɛ kaŋwalea ŋkɛ, nahe ŋkɛ kendeke nda zləvə ke hɛ. Nahe ŋkɛ kemenete jikə geva le hɛ, nahe Shala kendeke nda wəsə mahalegə, səkwə ghə ba'a kemenete nda meɗe mɛ ke hɛ.

⁵Ka shihɛ ganji ya va hɛ. Ɓiyitsa ne, hwa hwelefe ta nci yake geva Kriste kala wəndə ŋelɛ, gheŋkɛ nya kənəa wəshi pɛtɛ, Shala nya tsahe mbeli kaghala ghala. Amɛn.

⁶Kegeze 'ya nahe meɗe mɛa Shala kenza kaɗema zləvə te we. Kwa nza ŋkɛ kenza mbeli nyi keyake geva hwa ka Israyɛl kaka Israyɛl ganji we.

⁷Ya kwela nza hɛ kahwelefefia Abraham ne, kenza hɛ pɛtɛ kaŋwale ganjia ŋkɛ we. Kwa nza ŋkɛ ma ke Shala gezete nda ke Abraham: «Laka Izak tekemave hwelefefi nyi meɗeyi ŋa 'ya na.»

⁸Ma ghena nya keɗe kageze geva teke ne, ŋwale nyi keyake geva laka ya geva ta wəndə ŋelɛ ya kaŋwalea Shala we, deke ŋwale nyi keya laka meɗe mɛa Shala yaɓela mbeli kahwelefefi ganji.

⁹Wa nya ghena nya meɗeyi nda Shala ke mbelia ŋkɛ nya: «Ma heshi tsetse ŋkwa ne, katese 'ya zhɛkwa ba'a kateya wəzege teza Sara.»

¹⁰Deke Sara we, nahe Rɛbɛka keyake nda ŋwale bake ke shia ɓəmə Izak.

¹¹Ama Shala nde mene ntsehwelea ŋkɛ yitea tseha mbeli, gheŋkɛ nde tseha hɛ kala nya ɗe ŋkɛ, kaɗema se te ganyɛa slene nya mene hɛ. Kezha ncɛ nda ke mbeli kaɗema ŋkɛ kazhɛre mɛ ŋkɛ ne, ma ke Shala sha Rɛbɛka tewə ŋwalea ŋkɛ kenaka kaya ba'a tewə hɛ kenaka kamenete wəsə kwa ganyɛ ba'a kwa ndiremi: «Tezhɛ nde tefa nda ghena ke Zera.»

¹³Kwa nza ŋkɛ ma ke Ghena ta Shala gezete: «Nahe 'ya keɗehwe Zhakob ba'a keɗema Ɛzawə.»

¹⁴Wa ke gheɓəmə sha geze wa? Wəsə nya keɗema tiɗiɗi yamene Shala na? Tsagha we.

¹⁵Kwa nza ŋkɛ ma ke sha Moyize: «Katemene nda ganyɛ 'ya ke wəndə nya ɗe 'ya kamene nda ganyɛ, katezhɛ heli 'ya yitea wəndə nya ɗe 'ya kazhɛ heli yite.»

¹⁶Ma wəsə nya kala nya ne, kenza se te ɗe ta wəndə keɗema te geva nya ntsə ŋkɛ we, ama deke se va Shala nya kezhɛ heli.

¹⁷Ma ke Shala sha meghea ka Ɛzhipte mbe Ghena ta Shala: «Nahe 'ya keveyi ŋa kameghe kezha ncɛ berete ta ɗa na ba'a kezha zlapete geva sləa ɗa te hɛɗi lema.»

¹⁸Kala nya ne, kazhɛ heli Shala yitea wəndə nya ɗe ŋkɛ, kazhɛre wənəa wəndə ŋkɛ ntɛaŋe ntɛaŋe keɗe ŋkɛ.

¹⁹Nda kwete ma pa sha tegeze ɗa: «Ma nda tsetse ŋkɛ ne, wa raberə ŋele ɓəmə Shala wa? Kwa nza ŋkɛ ne, wa nde nza kazhɛnete nda ghə ke ɗe ta ŋkɛ wa?»

²⁰Ama gha ne, wa ŋkɛ na nda ghəpə le Shala wa? Kageze nda ghene ke wəndə nya keŋate: Yitea wa ŋate ɗa na kala nya wa?, a ke na?

²¹Ashɛ berete va male nya keŋa ghene kezha ŋa wəsə nya ɗe nde le rekɛ ghene wəka? Le rekɛa shɛ ne, ashɛ wərə nde kaŋate wəsə nya nza zləvə ba'a nya ɗema zləvə te wəka?

²²Nahe Shala keɗe kancɛ hwepe ta wənəa ŋkɛ ba'a berete ta ŋkɛ. Vatse zereghehwe ghena ta mbeli nyi hi hwepe wənəa ŋkɛ kanza kənəa hɛ ba'a nyi kehi hi kezha zamte geva ŋkɛ.

²³Tsagha menete ŋkɛ kezha ncɛ nda mcɛləa zləvəa ŋkɛ ke mbeli, mbeli nyi zhɛakɛ heli ŋkɛ yitea hɛ, nyi hite ŋkɛ ghalanza kezha kemave zləvəa ŋkɛ.

²⁴Gheɓəmə yahekakɛ ŋkɛ, kaɗema deke hwa ka Zhəwif, ama pa hwa kweci hwelefefi perə.

²⁵Ma ke gezete geva mbe palepa ta Ozɛ: «Ma hwelefe nya kesema kahwelefe ta ɗa ne, kateheka ŋkɛ 'ya kahwelefe ta ɗa, hwelefe nya kesema kakwajiwənia ɗa ne, kateheka ŋkɛ 'ya kakwajiwəni.

²⁶Ma te ŋkwa nya se 'ya kageze hwelefe ta ɗa yɛ we 'ya ne, katezhɛne 'ya kaheka hɛ kaŋwalea Shala teghweme.»

²⁷Ma ke Ɛzayi gezete te ka Israyɛl: «Ya ka Israyɛl nza kwele kwele kala ndaleghe nya kwa hələ ne, ndale nyi ketembele hwa hɛ we.

²⁸Kwa nza ŋkɛ katemene ghena ta ŋkɛ Mahwətə kala nya gezete ŋkɛ, kahe kahe temene ŋkɛ kwake te hɛɗi.»

²⁹Kwa nza ŋkɛ ma ke Ɛzayi gezete vəashi: Ma ya keɗema Mahwətə nde berete kendeke ɓəmə ŋwale ne, yipə yipə le Sodome ba'a Gomore nza gheɓəmə.

³⁰Tsema ke gheɓəmə sha geze wa? Nahe kweci hwelefefi nyi kesema kasepa ntsehwele yitea nza kambeli nyi tiɗiɗi kwa kema ta Shala keveyi geva kambeli nyi tiɗiɗi kwa kema ta ŋkɛ laka yɛ ta nci.

³¹Ma ka Israyɛl nyi kesepate ghena ta wəsə mahalegə kezha nza tiɗiɗi kwa kema ta Shala ne, shaŋe hɛ va zelete wəsə mahalegəa shɛ kala nya kegezete geva.

³²Va wa wa? Va nya ɗema hɛ kazele nza tiɗiɗi kwa kema ta Shala laka yɛ, deke laka slene ta nci veyi zəzə kakemave. Nahe tehene ketsakɛ hɛ te pelɛ nya heka mbeli kapelɛ ketsa ŋkwa.

³³Kwa nza ŋkɛ ma ke Ghena ta Shala gezete: «Newema wə nahe 'ya keveyi kwete pelɛ nya ketsa ŋkwa katehene mbe Siyon, gela nya kewele ŋkwa. Ama katezhɛ nda hawe ke wəndə nya keyɛ ŋkɛ we.»